Anemia është sëmundja që lidhet me uljen e numrit të rruazave të kuqe të gjakut dhe pakësimin e përqindjes së hemoglobinës.

Së fundmi është kthyer në një nga problemet shëndetësore kryesore të shqiptarëve bazuar në të dhënat e mbledhura nga AgroWeb.org dhe kontaktet me mjekët e specializuar në qendrat e kujdesit shëndetësor të vendit.

Të prekurit nga anemia kanë lëkurë dhe mukoza të zbehura, lodhen shpejt, ndjejnë këputje dhe apati, nuk kanë oreks dhe shfaqin ulje të presionit arterial.

Ata që vuajnë nga anemia kanë edhe rrahje të shpejta të zemrës, vështirësi në frymemarrje, dhimbje koke, marrje mendsh dhe shikim të turbullt.

Anemia sjell uljen e përqendrimit të oksigjenit në gjak dhe në inde, duke lehtësuar zhvillimin e infeksioneve të ndryshme.

Specialistët e Shëndetit Publik tregojnë për AgroWeb.org se shtimi i rasteve të anemisë së fundmi ka lidhje me problemet në ushqim.

Një faktor kryesor është mosmarrja prej organizmit e lëndeve të nevojshme ushqimore, të vitaminave dhe mineraleve, sidomos të hekurit.

Gjendja anemike përcaktohet saktë vetëm nga analiza laboratorike e gjakut, që tregon numrin e rruazave të kuqe.

Në forma të lehta dhe mesatare nuk ka nevojë për regjim shtrati, por duhet patur duhet kufizuar aktiviteti fizik. Për format më të rënda duhet patjetër regjim shtrati ose trajtim mjekësor.

Të ushqyerit kundër anemisë

Ushqimet duhet të jenë të pasura me vitamina, minerale dhe sidomos me proteina. Anemikët duhet të konsumojnë vezë, peshk, qumësht, gjalp të freskët, lakra të freskëta, spinaq, karota, brokoli, panxhar dhe shumë fruta.

Trajtimet me produkte të natyrës

Mjekësia tradicionale përdor disa bimë që përmirësojnë aneminë dhe rruazat e kuqe të gjakut.

1. Merrni 1-2 lugë kafeje prej bimës së bluar të pelinit. Hidheni në një gotë ujë dhe zijeni për 15min. Përdoreni 3 herë në ditë nga 1 lugë gjelle, gjysëm ore para buke. Kura vazhdon 1-2 muaj rrjesht, deri në përmirësimin e plotë.

2. Merrni 1 lugë gjelle nga fletet e grimcuara të thata të hithrës. I zieni në një gotë me ujë për 15min. Pasi ta filtroni, ëmbëlsojeni me pak mjaltë. Pijeni 3 herë në ditë nga 1 gotë për 1 muaj rrjesht.

3. Rrënjët e Sanzës (Gentiana Lutea) shërbëjnë për aneminë. Merrni 10 gr me bimë të bluar. Zijeni në 1 litër uje për 15min. Kullohet dhe pijeni 2-3 filxhana në ditë para buke./AgroWeb.org

Regjimi ushqimor Nordik është një mënyrë e të ushqyerit që fokusohet në prokuktet lokale të vendeve nordike si Norvegjia, Danimarka, Suedie, Finlanda dhe Islanda.

Ai u krijua në 2004 nga një grup nutricionistësh, shkencëtarësh dhe kuzhinierësh, për të trajtuar obezitetin dhe rregulluar tregun ushqimor në vendet nordike.

Mund të jetë një zgjedhje e mirë nga perspektiva mjedisore, pasi përqëndrohet në konsumin e ushqime që rriten në këto vende dhe kultivohen në mënyrë të qëndrueshme.

Frutat, perimet, produktet e detit, drithërat e plota, arrorët, buka e thekrës, qumështi me pak yndyrë dhe vaji kanola janë baza e këtij regjimi.

Në mënyrë të moderuar konsumohet mishi i shpendëve, vezët, djathi dhe kosi.

Rrallë konsumohet mishi i kuq dhe yndyrnat shtazore.

Ndërsa konsumi i pijeve dhe ushqimeve me sheqer të shtuar, salami, ushqimet e shpejta, përjashtohen.

Regjimi ushqimor nordik është shumë i ngjashëm me atë mesdhetar.

Dallimi më i madh është se në vend të vajit të ullirit ekstra të virgjër, nordikët përdorin vajin e kanolës.

Edhe pse shumë fruta importohen në këto vende pasi klima nuk lejon rritjen e tyre, përsëri theksi është ushqyerja e shëndetshme.

Cilat janë përfitimet e mundshme në organizëm?

Ushqimi i shëndetshëm shkon përtej humbjes së peshës.

Ai mund të çojë në përmirësime të konsiderueshme në shëndetin tuaj dhe të ulë rrezikun e shumë sëmundjeve kronike.

Disa studime kanë ekzaminuar efektet e regjimit ushqimor nordik në shëndet dhe rezultatet janë si më poshtë.

Ul presionin e lartë të gjakut

Në një studim 6-mujor tek njerëzit obezë, u vu re se ky regjim uli presionin e lartë të gjakut.

Një tjetër studim 12-javor përforcoi edhe më tepër gjetjet e studimi të parë.

Mund të ulë nivelet e kolesterolit dhe triglicerideve

Regjimi ushqimor nordik është i pasur me shumë ushqime të shëndetshme për zemrën, por efektet e tyre mbi kolesterolin dhe trigliceridet janë të paqëndrueshme.

Megjithatë, disa studime flasin për një reduktim të lehtë të kolesterolit të keq, faktor i fortë rreziku për sëmundjet e zemrës.

Kontrolli i sheqerit në gjak

Edhe në këtë rast disa studime të kryera për efektet e këtij regjimi në nivelin e sheqernave në gjak, treguan se ai mund të ketë një ndikim të lehtë.

Inflamacioni

Inflamacioni kronik është një nxitës kryesor i shumë sëmundjeve serioze.

Studimet mbi regjimin ushqimor nordik dhe inflamacionin japin rezultate të përziera.

A ndihmon në humbjen e peshës?

Disa studime kanë vlerësuar efektet e humbjes së peshës të dietës nordike. Sipas tyre duket se njerëzit humbin peshë në fillim, por pastaj gradualisht e fitojnë atë.

Prandaj është e rëndësishme që mënyra e të ushqyerit të jetë një mënyrë jetese dhe jo vetëm një dietë disa javore. /AgroWeb.org

Ndryshimi i stinës dhe temperaturave ndikon ndjeshëm në organizëm, duke shteruar energjitë, përkeqësuar humorin dhe prekur edhe muskujt.

Këto të fundit përkeqësohen edhe me kalimin e moshës dhe një nga mënyrat për t’i mbajtur nën kontroll është përkujdesja ndaj marrjes së dozave të caktuara të magnezit.

Mjekët paralajmërojnë se njerëzit që ndihen të plogësht, të lodhur e pa fuqi, duhet të tregojnë kujdes me sasinë e magnezit ose mungesat e tij.

Çfarë është magnezi ?

Magnezi është një mineral që luan një rol thelbësor për sistemin imunitar, nervat, muskujt, zemrën dhe kockat. Ai është i përfshirë në më shumë se 300 reagimet biokimike të trupit.

Mungesa e magnezit ndikon fort në vyshkjen e çdo organizmi të gjallë dhe vlen për bimët dhe sidomos për njerëzit.

Ku gjendet magnezi?

Magnezi gjendet në shumë prej ushqimeve që konsumojmë çdo ditë.

Atë e gjeni me shumicë tek fasulet e zeza, spinaqi dhe kikirikët.

Njerëzit që ushqehen shëndetshëm mund të arrijnë të plotësojnë nevojat e organizmit për këtë mineral.

Ata që ushqehen me produkte të shpejta, e të përpunuara nuk arrijnë dot të plotësojnë nevojat e tyre për magnez.

Sasitë e domosdoshme të magnezit

Sasia e rekomanduar ditore e magnezit, e marrë nga ushqimet apo suplementet është si më poshtë:

Fëmijët nga 1 në 3 vjeç kanë nevojë për 80 mg/ditë

Fëmijët nga 4 në 8 vjeç kanë nevojë për 130 mg/ditë

Fëmijët nga 9 në 13 vjeç kanë nevojë për 240 mg/ditë

Gratë dhe vajzat nga 14 në 18 vjeç kanë nevojë për 360 mg/ditë

Gratë dhe vajzat nga 19-30 vjeç kanë nevojë për 310 mg/ditë

Gratë mbi 31 vjeç kanë nevojë për 320 mg magnez në ditë.

Gratë shtatzënë nga 19-30 vjeç kanë nevojë për 350 mg magnez në ditë

Ato mbi 31 vjeç kanë nevojë për 360 mg magnez në ditë.

Djemtë nga 14 në 18 vjeç kanë nevojë për 410 mg magnez në ditë

Burrat nga 19 në 30 vjeç kanë nevojë për 400 mg magnez në ditë

Burrat mbi 31 vjeç kanë nevojë për 420 mg magnez në ditë.

Si të merrni suplementin më të mirë të magnezit?

Përpara se të vendosni për një suplement të magnezit është e udhës të përcaktoni nevojat e organizmit sepse marrja e suplementit të gabuar mund të shkaktojë probleme serioze me tretjen e të manifestohet edhe me diare.

Konsultohuni me një mjek dhe ai mund t’ju këshillojë cilin suplement magnezi të përdorni në rast se ju duhet për muskujt, trurin, konstipacionin, apo gjumin./AgroWeb.org

Dhimbjet dhe djegiet e stomakut shpesh janë pasoja të një sëmundje të fshehur të stomakut.

Quhet acidi refluks dhe është shumë i përhapur, pasi mund të shfaqet papritur në çdo fazë të jetës.

Pavarësisht kësaj kjo sëmundje që shkakton dhimbje dhe djegie të vazhdueshme në të gjithë zonën e kraharorit dhe deri diku mund të parashikohet.

Nëse keni një stil jetese jo të rregullt dhe konsumoni vakte të mëdha të cilat provokojnë stomakun me siguri që do të prekeni nga acidi refluks.

Kjo sëmundje kronike megjithëse nuk është vdekjeprurëse është shumë e bezdisshme dhe mund ta dëmtojë shumë stomakun gjatë jetës.

Prandaj masat për ta parandaluar atë duhet të jenë sa më të shpejta e pa efekte anësore.

Në këtë artikull të AgroWeb.org ju tregojmë disa mënyra të thjeshta se si ta kuroni këtë sëmundje pa pasur nevojën e ilaçeve.

Hani me porcione

Kujdesi për ushqimin fillon që nga mënyra e servirjes dhe e ngrënies së tij.

Për këtë sëmundje kaq specifike që lidhet me stomakun kjo është edhe më thelbësore.

Prandaj mundohuni të konsumoni gjithnjë racione të vogla duke i përtypur ngadalë.

Është e rëndësishme që stomaku juaj të mos jetë i mbushur plot, pasi në këtë gjendje do të prodhojë më shumë acid dhe simptomat pasuese.

Harrojini tre vaktet kryesore të ditës dhe shpërndajini ato në vakte të vogla të cilat mund t’i konsumoni orë pas ore.

Ushqimet e dëmshme

Evitimi i disa ushqimeve të caktuara do të ishte një ndihmë e madhe për stomakun tuaj.

Çdo gjë që provokon stomakun është e ndaluar, këtu futen ushqimet me aciditet të lartë apo ato djegëset.

Qëndroni larg, qepëve, domateve, ushqimeve pikante, hudhrës, kafes, çokollatës, çajit apo alkoolit.

Nëse i konsumoni këto ushqime rregullisht dhe vuani nga acidi refulks, mundohuni t’i eliminoni një nga një dhe të shikoni reagimin e trupit tuaj.

Evitoni pijet me gaz

Pijet me gaz krijojnë djegie dhe një sërë reaksionesh të dëmshme për stomakun, ndaj evitojini sa më shumë.

Qëndrimi i duhur

Gjatë konsumimi të ushqimit mundohuni të qëndroni ulur e këtë bëjeni edhe pasi të keni mbarur.

Në këtë mënyrë ushqimi do të kalojë menjëherë në stomak dhe do ta tresni më lehtë.

Kështu që evitoni gjumin pas dreke dhe mos hani darkën në orët e vona.

Mjekët thonë se ushqimi duhet të konsumohet tre orë para se të shtriheni për të fjetur apo pushuar.

Mos lëvizni shumë shpejt

Menjëherë pasi keni ngrënë evitojini lëvizjet e forta fizike, vrapin, ushtrimet apo ecjet e shpejta.

Nëse bëni një shëtitje të thjeshtë pas dreke ose darke nuk ka problem, por sforcimi i menjëhershëm i trupit do të shkaktonte vetëm probleme për organizmin tuaj.

Humbisni në peshë

Pesha e shtuar nuk ju ndihmon në luftën kundër acidit refluks pasi sforcon trupin dhe shtyp stomakun.

Prandaj mundohuni ta mbani atë sa më shumë nën kontroll.

Pirja e duhanit

Nëse jeni duhanpirës duhet të hiqni dorë menjëherë.

Nikotina që është përbërësi kryesor tek cigarja ndikon keq në shëndetin e stomakut dhe acidit refluks.

Merrini parasysh këto këshilla dhe dhimbja apo djegia nga acidi refluks do të pushojë gradualisht.

Gjithashtu kujdesuni që të konsultoheni me një mjek specialist në mënyrë që të merrni të gjithë kujdesin e duhur./AgroWeb.org