Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Ukshin Hoti

7 qershor 1993

Në fshatrat e Skënderajt shtohet represioni policor

Pardje, rreth orës 6.30, një ekspeditë policore serbe e përbërë prej afro 80 vetash, së bashku me dhjetë vetura dhe dy autoblinda, me pretekst të kërkimit të armëve rrethuan lagjen e Smakiqëve në fshatin Abri e Poshtme të Skënderajit.

Policia serbe menjëherë filloi me bastisje, ku më së keqi pësuan familjet e Nezir, Musë dhe Sadik Smakiqit. Policët në fillim hynë në familjen e Musait, të cilin e rrahën rëndë së bashku djalin e tij, Kadriun dhe bashkëshorten e tij. Më pas vazhduan bastisjet në familjen e Sadikut, të cilin po ashtu e rrahën rëndë atë dhe bashkëshorten e tij, ndërsa policët Sadikun e morën me vete në polici. Policët serbë para se të largoheshin nga fshati, bastisën edhe shtëpinë e Nezir Smakiqit, me ç’rast atë e rrahën brutalisht si dhe djalin e tij shtatëmbëdhjetë vjeçar, Fatmirin.

Merret vesh se gjatë kësaj bastisjeje, policia serbe rrahu rëndë nëntë veta si dhe demoloi dhe thyejti gjithçka që kishte përpara. Të njëjtën ditë rreth orës 12, të njëjtit policë, bastisën shtëpitë e Ahmet e Mujë Sadikut si dhe shtëpinë e Sylejman Ramës në fshatin Vojnik të Skënderajit. Policët gjatë bastisjes demoluan dhe thyen të gjitha orenditë e këtyre familjeve.

Pas bastisjes policët i rrahën rëndë, Ahmetin, Sylejmanin, Mujën si dhe të bijtë e tyre.

Po këtë ditë edhe në lagjen e Ozdrimit në këtë fshat, policët serbë bastisën edhe shtëpinë e Xhemail Ymerit. Gjatë bastisjes, policët gjetën një pushkë gjuetie, ndërsa menjëherë pas kësaj e rrahën rëndë Xhemailin dhe nusen e djalit të tij, emrin e së cilës nuk arritëm t’ia mësojmë.

7 qershor 1994

U ngrit aktakuza kundër mr. Ukshin Hotit

Serbët e instaluar në Prokurorinë e Qarkut në Prizren ia vazhduan paraburgimin edhe për dy muaj mr. Ukshin Hotit (1947), profesor i Universitetit të Prishtinës dhe kryetar i Partisë së UNIKOMB-it.

Në aktakuzën e shpallur në Prizren thuhet se Ukshin Hoti, si “anëtar dhe si kandidat për kryetar të Partisë së Unitetit Kombëtar (UNIKMB-i), në gjysmën e parë të vitit 1994 ka bërë përgatitje për ndërmarrjen e veprimeve, të përdormimit të forcës dhe të mjeteve të tjera kundërkushtetuese për të rrezikuar rendin kushtetues të RFJ-së, për të shkëputur pjesën e territorit të RFJ-së dhe të Serbisë -territorin e Kosovës të banuar me pjesëtarë të pakicës kombëtare shqiptare dhe me qëllim të formimit të shtetit të veçantë”.

Në aktakuzë thuhet më tutje se Ukshin Hoti, si kandidat për kryetar, në mbledhjen zgjeruar ilegale të Kryesisë së UNIKOMB-it që është mbajtur në Prishtinë ka pranuar të marrë pjesë dhe të përpunojë programin dhe statutin e kësaj organizate ilegale. Pas pranimit të propozimit për kryetar të UNIKOMB-it përpunon ‘Deklaratën Politike’, në të cilën proklamon krijimin e shtetit kombëtar të të gjithë shqiptarëve – ‘Republikën e Kosovës’. Si mjet për realizimin e këtij qëllimi, figuron edhe opcioni i armatosur, përkatësisht marrja me dhunë e pushtetit në Kosovë dhe të shkëpuptjes së territorit nga Republika e Serbisë…”

Mr. Ukshin Hoti akuzohet edhe për shkak se “si anëtar i organizatës ilegale ‘Lëvizja Popullore për Republikën e Kosovës’ nga ana e centralës prej vitit 1990 e këndej, ishte i ngarkuar me botimin e revistës ‘Deja’, nga e cila ka marrë këshilla me detyra dhe instruksione konkrete për veprimtarti armiqësore”.

Ukshin Hoti akuzohet për vepër penale “rrezikim i tërësisë territoriale të RFJ-së”, nga neni 116, par 1 e LPJ e që dënohet sipas nenit 138 të LPJ”.

Sipas këtij aktvendimi, Ukshin Hotit i vazhdohet paraburgimi edhe për dy muaj dhe do të zgjat deri më 2 korrik 1994.

Ukshin Hoti gjendet në paraburgim prej datës 17 maj të këtij viti.

7 qershor 1995

Dhuna e përditshme në Kosovë

Prishtinë: – Më 5 qershor, rreth orës 19:00, dy policë, të cilët dukej fare qartë se ishin të dehur, hynë në oborrin e shtëpisë së Mehdi Asllanit, në lagjen e Emshirit në Prishtinë dhe kërcënuan gruan dhe dy fëmijët e tij të vegjël, duke kërkuar prej tyre që të tregojnë se ku ndodhet Mehdiu dhe djali i tij Bekimi. Bëhet me dije se Mehdiu dhe Bekimi ndodhen jashtë vendit dhe nuk dihet preteksti për çka ata i kërkoi policia.

Podujevë: – Më 5 qershor, rreth orës 18:00, policia serbe ndali në rrugë Imer Bahtirin nga fshati Dvorishtë i Podujevës, i cili u legjitimua dhe u pyet për ndihmat që ai i kishte marrë nga SHHB “Nënë Tereza” në Pollatë. Më pas policia shkoi në depon e SHHB “Nënë Tereza” dhe e pyeti Jusuf Latifin rreth mënyrës së shpërndarjes së ndihmave.

Më 5 qershor, policia ishte në shtëpinë e Faik Jasharit, kryetar i Nëndegës së LDK-së në fshatin Batllavë, të cilit iu la thirrja që të paraqitet të nesërmen në orën 13:00 në polici.

Thirrja për t’u paraqitur në polici iu la edhe Rafet Jasharit nga i njëjti fshat.

Skënderaj: – Për të tretën herë, me pretekst të kërkimit të armëve, në polici u mor Haki N. Rushiti (34) nënkryetar i Nëndegës së LDK-së në Prekaz të Epërm. Ai në polici u pyet edhe për vëllaun e tij Ramadanin, i cili momentalisht ndodhet në Gjermani, me pretekstin se gjoja ai paska pasur armë dhe ato duhet t’i dorëzojë Hakiu. Me këtë pretekst në polici është marrë edhe babi i tyre Neziri (60).

Haki Rushiti është urdhëruar që të paraqitet sërish në stacionin e policisë në Skënderaj.

7 qershor 1997

KMDLNj: Gjatë majit në Kosovë u vranë 8 persona

Këshilli për Mbrojtjen e të Drejtave dhe Lirive të Njeriut me seli në Prishtinë, publikoi dje raportin mbi shkeljen e të drejtave e të lirive të njeriut në Kosovë gjatë muajit maj 1997.

Në raport thuhet: Pos dhunës, të cilën policia serbe është duke e ushtruar në kontinuitet kundër popullit të pambrojtur shqiptar të Kosovës, në skenë doli edhe ushtria serbe. Viktimë e këtij terrori të organizuar shtetëror ishte i riu Luan Ilmi Haradinaj (1973), nga fshati Gllogjan i komunës së Deçanit, student i vitit të dytë në Fakultetin e Edukatës Fizike në Universitetin e Tiranës. Më 12 maj, familja Haredinaj njoftoi N/KMDLNJ‑në në Deçan se nga kufitarët e Ushtrisë Jugosllave, në afërsi të fshatit Has në kufi me Shqipërinë, u vra i biri i tyre Luan Haredinaj.

Më 14 maj, në orët e hershme të mëngjesit, në arën e tij u gjet i vrarë Kapllan Isuf Berisha (45), nga fshati Gurbardh i komunës së Malishevës.

Më 5 maj 1997, rreth orës 5. 30 të mëngjesit, persona ende të paidentifikuar serbë, të maskuar dhe të armatosur vranë me armë

zjarri në shtëpinë e tij në lagjen e Sakicollëve në trekëndëshin e fshatrave Parallovë‑Zebincë‑Koretishtë, në komunën e Gjilanit, Nazif Ramush Hajredinin (1948), nga Hajvalia, babai i tetë fëmijëve. Në momentin e vrasjes në shtëpi ndodheshin edhe bashkëshortja e të ndjerit Fahrija (1953) dhe fëmija i tyre Ramushi (1992), të cilët shpëtuan pa lëndime.

Më 26 maj, rreth orës 9. 00 të mëngjesit, në afërsi të shtëpisë së tij në rrethana të pasqaruara bëri vetëvrasje Hanefi Berisha, nga Goranci i Hani i Elezit, baba i 6 fëmijëve. Hanifeut i erdhi thirrja nga organet e Sigurimit Shtetëror serb për t’u paraqitur në polici. Në letërthirrje nuk shpjegohej preteksti. Ndërkohë i ndjeri bëri vetëvrasje kurse policia ia mori letërthirrjen familjes Berisha.

Në mbrëmjen e 5 majit, rreth orës 23. 00, në fshatin Llozicë të komunës së Malishevës, pranë magjistrales Pejë‑Prishtinë, persona të panjohur vranë Hetem Dobrunën (32), nga Llozica, punëtor në administratën e instaluar serbe në Gllogoc.

Më 7 maj, rreth orës 6. 30 të mëngjesit, pas keqtrajtimeve fizike që iu bënë më 5 dhe 6 maj në stacionin e policisë në Mitrovicë, Naser Halim Ferizi (1972), nga Stantërgu, i papunë, e vari veten në shtëpinë e vet.

Më 23 maj 1997, në lagjen “Tavnik” të Mitrovicës policia së bashku me dëshmitarin e rastit që e mori në rrugë Sadik Xanin, theu derën e shtëpisë së Hajzer Hajdarit (55), i lindur në Bare, punëtor i pensionuar i Sigurimit Shtetëror, dhe e gjeti të vdekur Hajzerin dhe bashkëshorten e tij, Ajnije Dervishi‑Hajdari (52) nga fshati Kosterc i Skënderajt, punëtore e tregtisë në Skënderaj. Dyshohet se vdekja e tyre në rrethana të panjohura ka ndodhur qysh para 12 ditëve.

KMDLNJ me shqetësim të dukshëm vazhdon të përcjellë gjendjen e të drejtave të njeriut në Kosovë. Si edhe më parë edhe gjatë muajit maj 1997 është vërejtur dukuria e nxitjes së personave të paidentifikuar apo personave civilë serbë për kryerjen e krimeve ndaj shqiptarëve. Kjo dukuri mund të shkaktojë konflikte serioze midis popullatës shqiptare dhe asaj serbe me pasoja të rënda që në të vërtetë është edhe qëllimi i regjimit serb.

Më 30 maj, në Gjykatën e instaluar serbe të Qarkut në Prishtinë përfundoi procesi gjyqësor kundër 20 shqiptarëve të akuzuar se si anëtarë të Lëvizjes Kombëtare për çlirimin e Kosovës, kanë bërë vepër penale të “bashkimit për veprimtari armiqësore” dhe të “cenimit të tërësisë territoriale” të RFJ‑së së vetëshpallur kurse 6‑të prej tyre iu ngarkohet edhe vepra penale e “terrorizmit”. Kryetari i trupit gjykues Dragolub Zdravkoviq u shqiptoi të akuzuarve dënimet me gjithsej 107 vjet burg. Kështu, Avni Klinaku u dënua me 10 vjet burg, Liburn Aliu, Dylber Beka, Fatmir Humolli (në mungesë) e Agim Kuleta (në mungesë) me nga 9 vjet, Nebih Tahiri e Shaban Beka me nga 7 vjet, Mujë Prokupi e Gani Baliu me nga 6 vjet e gjysmë, Naser Tahiri me 3 vjet e gjysmë, Shukrie Rexha me 3 vjet, Dulah Sallahu e Beton Retkoceri me nga 2 vjet e gjysmë dhe Majlinda Sinani, Ragip Berisha, Burhan Hasani dhe Arsim Ratkoceri me nga dy vjet burg. Nëntë të fundit të dënuar nën 5 vjet burg do të mbrohen në liri deri në aktgjykim të plotëfuqishëm kurse të tjerët të lidhur me pranga dhe i kthyen në burg.

Sipas informatave të KMDLNJ‑së gjatë muajit maj 1997 në të gjitha format e dhunës nga policia, ushtria dhe organet e tjera të pushtetit serb në mënyra të ndryshme u keqtrajtuan 398 individë.

Po gjatë kësaj periudhe: u vranë 8 persona, u plagosën dy individë, penalisht e përkundërvajtje u dënuan 25 persona, u shënuan 50 raste të torturës fizike, psikikisht u keqtrajtuan 228 persona, u kërkuan dhe u thirrën në polici 65 persona, arbitrarisht u arrestuan 55 vetë, në mënyrë arbitrare u ndaluan persona, u morën në “biseda informative” 26 persona, nga banesat e tyre u përzunë 4 familje shqiptare, pasaporta iu mor 1 individi, u bastisën 12 familje shqiptare, për armë u keqtrajtuan 72 persona, lëndime trupore morën 6 veta, u keqtrajtuan 7 gra, 2 fëmijë dhe 18 pleq, u keqtrajtuan 15 veprimtarë politik, sindikal dhe 3 veprimtarë të KMDLNJ‑së, u keqtrajtuan 9 veprimtarë të arsimit dhe në 4 raste ndërhyri policia në institucionet arsimore.

Po gjatë kësaj periudhe u shënuan 8 raste të ndalimit të veprimtarive ekonomike, 2 raste të dhunimit tëi mbishkrimit shqip në shkolla, 2 raste të uzurpimit të pronës, 26 raste të plaçkitjes së tregtarëve shqiptarë, 1 rast i konfiskimit të dokumentacionit, 1 rast i ndalimit të kthimit në atdhe, ndërsa 5 individë u keqtrajtuan gjatë riatdhesimit.

Këto janë disa të dhëna që ilustrojnë gjendjen e të drejtave të njeriut gjatë muajit maj 1997.

Raportin po e ilustrojmë me disa nga rastet e shumta që ndodhën gjatë kësaj periudhe.

Më 7 maj, sipas kërkesës së Prokurorisë së instaluar serbe të Gjykatës së Qarkut në Prishtinë, gjykatësja hetuese e Gjykatës së instaluar serbe të Qarkut të Prishtinës Danica Marinkoviq, i filloi hetimet kundër Agim Makollit (35) nga Prishtina, Hasan Zenelit (33) e Jonuz Zeneli (55) nga Ballabani, Muharrem Krasniqit (32) nga Grashtica dhe Latif Brajshorit Nga Sharbani i Podujevës, të gjithë me vendbanim në Prishtinë dhe të akuzuar se kanë qenë anëtarë të “Ushtrisë çlirimtare të Kosovës”.

Më 18 maj, drejtoritë e dhunshme të shkollave fillore “Zenel Hajdini” dhe “Asim Vokshi” dhe policia vendosën në këto shkolla mbishkrimin cirilik në vend të mbishkrimeve të mëparshme me emrat e poetit serb Aleksa Shantiq dhe diplomatit Milan Rakiq.

Më 12 maj, organet e instaluara serbe uzurpuan objektin e Entit Pedagogjik dhe të Bashkësisë së Arsimit.

Më 13 maj, Ruzhdi Jashari, kryetar i KMDLNJ‑së në Shtimje, u mor në bisedë informative në Qendrën e Sigurimit në Ferizaj lidhur me aktivitetin e tij politik dhe punën e Nënkëshillit.

Më 7 maj, organet ushtarake serbe u shpërndanë thirrjet për rekrutim rreth 120 të rinjve shqiptarë të gjeneratave 1977, 1978 e 1979.

Sipas së të përditshmes serbe “Dnevni Telegraf” të 16 majit, në bazë të Ligjit mbi qarkullimin dhe shitblerjen e patundëshmërive në rrethana të posaçme, i cili u ndalon shqiptarëve blerjen e pronave serbe këto ditë në Prishtinë Halit Ahmetaj u dënua me 60 ditë burg për shkak se kishte blerë banesën e një serbi. Sipas kësaj gazete të Beogradit pritet të dalin në gjyqe e të dënohen edhe 24 qytetarë shqiptarë të cilët paskan “shkelur” ligjin e përmendur, thuhet në fund të raportit që e përcjell Shërbimi për Informim i KMDLNj-së.

7 qershor 1998

Forcat serbe granatuan edhe sot Llaushën

Në Llaushë të Skënderajt edhe sot vazhdon të jetë gjendje tepër e rëndë.

Aktivisti i LDK-së në këtë fshat Fadil Geci i tha QIK-ut se që nga orët e mëngjesit forcat serbe kanë shtënë disa herë në drejtim të fshatit. Janë granatuar kryesisht lagjet Zejnullahu dhe Babaj, ndërsa snajperistët serbë kanë shtënë disa herë edhe në lagjen e Gecajve.

Nga granatimet janë dëmtuar disa shtëpi.

Në fshat edhe më tutje ka mungesë të theksuar të ilaçeve dhe të ushqimeve, ndërsa lëvizjet e banorëve janë shumë të kufizuara.

Tre trupa të pajetë në morgun e spitalit të Gjakovës

Në morgun e spitalit të Gjakovës ndodhen trupat e pajetë të tre shqiptarëve, të vrarë në frontet e luftës nga forcat serbe.

KI i Degës së LDK-së në Gjakovë njofton se dje në këtë morg janë sjellë trupat e pajetë të dy të rinjve nga Prejlepi i Deçanit, identiteti i të cilëve nuk dihet. Ndërsa sot në këtë morg është sjellë trupi i një plaku rreth 60- vjeç, identiteti i të cilit gjithashtu nuk dihet.

Gjakovë: Një të vrarë të paidentifikuar e varrosi policia

Dje pasdite, me urdhër të policisë së Gjakovës, është varrosur trupi i pajetë i një të riu 25- vjeçar, të cilin vetë policia e kishte sjellë në morg. Identiteti i tij nuk dihet.

Ai është varrosur në varrezat e qytetit.

Edhe sot në komunën e Deçanit u shti nga aeroplanët

Burime nga Deçani bëjnë të ditur se sot rreth orës 9. 25 një aeroplan luftarak serb fluturoi mbi fshatrat e Deçanit dhe në të kthyer ai shtiu ndaj një grupi shqiptarësh në afërsi të fshatit Irzniq.

Njoftohet se nuk pati viktima e as dëme.

Dëshmitarë nga kjo komunë thanë se sot gjendja në Deçan e rrethinë është diç më e qetë, ndërkohë që forcat serbe po i pastrojnë rrugët në pritje të delegacionit të diplomatëve të huaj, dërgimin e të cilit në këtë komunë e kanë paralajmëruar mediat serbe.

Njoftohet gjithashtu se mbrëmë ka pasur lëvizje të forcave serbe nga Deçani në drejtim të Pejës.

KMDLNJ: Në Deçan të vrarit kanë mbetur të pavarrosur

KMDLNJ, duke iu referuar nënkëshillit në Deçan njofton se gjendja në këtë komunë, si pasojë e operacioneve luftarake, është shumë e rëndë. Edhe më tutje mbi 40 të vrarë kanë mbetur në vendet ku janë vrarë, pra pa u varrosur, ndërsa gjendja e të plagosurve, shumica ndër ta gra e fëmijë, është shumë e rëndë, ngase ka mungesë të madhe të medikamenteve mjekësore.

Në bazë të informacioneve të NKMDLNJ në Deçan numri i viktimave është më i madh se 50 të vrarë e dhjetëra të plagosur, ndërkohë që janë identifikuar 50 të vrarë.

Nga Deçani njoftohet se ushtria dhe policia serbe mbrëmë kanë bërë pastrimin e rrugëve, pasi që është paralajmëruar shkuarja e diplomatëve në këtë zonë.

Edhe sot në Deçan ka vazhduar pastrimi i rrugëve dhe vendosja e xhamave.

Forcat serbe kanë ndezur një zjarr të madh dhe dyshohet se ata mund të djegin edhe të vrarit e të masakruarit, për të fshehur gjurmët e krimit, thuhet në njoftim.

Në morgun e spitalit të Prishtinës ndodhet trupi i pajetë i një të riu nga komuna e Deçanit

KMDLNJ njofton se sot në morgun e spitalit të Prishtinës ndodhet trupi i pajetë i një të riu shqiptar të moshës 22-25 vjeç.

Dyshohet se ai e ka mbiemrin Dabiqaj dhe është nga Prejlepi i Deçanit.

Që nga ora 07:00 e mëngjesit, janë hapur vendvotimet në të gjitha komunat e Kosovës, duke shënuar fillimin e procesit zgjedhor.

Të drejtë vote kanë 2.092.174 qytetarë, të cilët do të mund të ushtrojnë të drejtën e tyre demokratike gjatë ditës së sotme. Sipas njoftimeve zyrtare, të gjitha përgatitjet e nevojshme janë përfunduar me kohë për të siguruar një proces të rregullt dhe të qetë votimi.

Përveç qendrave të rregullta të votimit, në secilën komunë është organizuar edhe nga një qendër për votim me kusht, për t’u mundësuar votimin qytetarëve që plotësojnë kriteret për këtë formë votimi.

Procesi zgjedhor po zhvillohet në 949 qendra votimi me gjithsej 2550 vendvotime në mbarë vendin. Institucionet përgjegjëse u kanë bërë thirrje qytetarëve që të marrin pjesë në votim dhe të kontribuojnë në një proces demokratik dhe të rregullt.

Foto: Kosovapress

Rektori i UBT-së, Prof. Dr. Edmond Hajrizi, në kuadër të vizitës së tij në Mbretërinë e Bashkuar, zhvilloi një vizitë pune edhe në Londër, në ambientet e Global UBT London, një qendër e rëndësishme e ekosistemit ndërkombëtar të UBT-së, e krijuar për të fuqizuar bashkëpunimin global në arsim, teknologji dhe inovacion.

Gjatë qëndrimit në Londër, Prof. Dr. Edmond Hajrizi zhvilloi takime me përfaqësues të kompanive dhe institucioneve nga vende të ndryshme të botës, me fokus zgjerimin e bashkëpunimit në fushën e arsimit ndërkombëtar, krijimin e partneriteteve të reja strategjike, si dhe promovimin dhe shtrirjen globale të shërbimeve dhe produkteve inovative të Global UBT.

Në kuadër të këtyre takimeve, u nënshkrua edhe një marrëveshje e rëndësishme bashkëpunimi me partnerë nga India, e cila synon zhvillimin e projekteve të përbashkëta në fushën e digjitalizimit dhe aplikimit të inteligjencës artificiale për rritjen e produktivitetit shkencor, akademik dhe inovativ.

Marrëveshja parasheh gjithashtu bashkëpunim për promovimin dhe shpërndarjen e platformave digjitale të UBT-së në vendet e Azisë, duke krijuar mundësi të reja për shkëmbimin e njohurive, zhvillimin teknologjik dhe forcimin e bashkëpunimit ndërkombëtar në sektorin e arsimit dhe kërkimit shkencor.

Sipas Prof. Dr. Edmond Hajrizit, zgjerimi i pranisë së UBT-së në qendrat kryesore ndërkombëtare dhe krijimi i partneriteteve me institucione dhe kompani lidere globale përbëjnë elemente kyçe të strategjisë së internacionalizimit të UBT-së dhe të zhvillimit të ekosistemit të saj inovativ.

Kjo vizitë në Global UBT London përfaqëson një hap të rëndësishëm drejt forcimit të rolit të UBT-së në skenën globale të arsimit, teknologjisë, inovacionit dhe transformimit digjital.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Senatori Robert Dol

6 qershor 1994

Në Kanë u protestua kundër apartheidit në Kosovë

“Mjaft me apartheid në Kosovë”, “Fashizmi po lind në zemër të Evropës”, “Zagreb, Sarajevë e Beograd përkrahni demokratët”, dhe “Radovan Karaxhiqi para gjyqit”, ishin parullat kryesore të protestës, të shtunën e kaluar në Kanë, së cilës i prinin 50-të shkencëtarë e veprimtarë francezë.

Siç njoftoi RFI, protesta kishte për qëllim t’u tërhiqte vërejten pjesëmarrësve të manifestimit përkujtues të 50-të vjetorit të zbarkimit të forcave aleate në Normandi për një lindje të dytë të fashizmit në zemër të Evropës dhe për krimet mosntruoze në rajonin e ish-Jugosllavisë.

Tubimin e organizoi Lëvizja franceze për Paqe.

6 qershor 1995

Senatori Dol: Sanksionet derisa nuk rijetësohen të drejtat njerëzore e qytetare të popullatës shqiptare në Kosovë

Senatori Robert Dol, lider i republikanëve në Senatin Amerikan dhe kandidat presidencial në një intervistë që i dha të përjavshmes “Koha” në Prishtinë u përgjigj në disa pyetje lidhur me politikën aktuale amerikane ndaj problemeve në rajonin e Ballkanit, duke përfshirë edhe çështjen e Kosovës.

Senatori Dol tha se gjëja që mungon sa herë që flitet për ish-Jugosllavinë nuk janë idetë, por udhëheqja e Shteteve të Bashkuara.

Shihet qart pafatësia e Evropës për të kontrolluar situatën e tillë. Shtetet e Bashkuara do të duhej të prinin në hulumtimet për gjetjen e zgjidhjes së drejtë për ish-Jugoslalvinë, jo vetëm në Kroaci apo Bosnjë, por edhe në Kosovë. Është pozicioni i Amerikës, ai i liderit botëror që parashtron këtë, tha Senatori Dol.

Në pyetjen se çfarë do të duhej të ishte politika e SHBA-ve ndaj Kosovës, Senatori Dol u përgjigj:

“Me të vizituar Kosovën dhe me të parë me sytë e mi shtypjen e shqiptarëve atje, besoj se Shtetet e Bashkuara duhet ta idetifikojnë përgjegjës regjimin e Millsoheviqit pë shkeljen flagrante të të drejtave njerëzore dhe qytetare atje. Kjo do të thotë se sanksionet ndaj Serbisë nuk do të duhej hequr përderisa nuk rijetësohen të gjitha të drejtat njerëzore dhe qytetare të popullatës shumicë shqiptare në Kosovë – që përfshinë rijetësimin e autonomisë politike, të cilën e kishte Kosova para aplikimit të gjendjes së jashtëzaknshme më 1989. Për më tepër, Shtetet e Bashkuara duhet të vazhdojnë politikën e Administratës së Bushit dhe Klintonit, atë të tërheqjes së ‘vijës në zall’ në Kosovë”.

Duke u përgjigjur në një pyetje lidhur me inciativat eventuale kongresionale lidhur me ish-Jugosllavinë, Senatori Dol tha:

“Lidhur me instistimin për heqjen e embargos në armatim në Bosnjë-Hercegovinë ekzistojnë kushtëzime dhe amandamente ndaj autorizimeve të State Departmentit dhe ndaj atyre të sektorit të Ndihmës së Huaj, të cilët insistojnë në: (1) zvogëlimin e angazhimit financiar të SHBA-ve në operacionet e OKB-së në Bosnjë, (2) kërkimin e prezencës zyrtare të qeverisë së SHBA-ve në Prishtinë dhe (3) përpilimin e kushtëzimeve rreth heqjes së sanksioneve ndaj Serbisë, duke përfshirë këtu rijetësimin e autonomisë dhe të të drejtave njerëzore të popullit të Kosovës”.

Në fund të intervistës, Senatori Dol shfaqi besimin se Shtetet e Bashkuara kanë për interes stabilitetin e Ballkanit, i cili në masë të madhe ndikon në stabilitetin dhe sgiurinë e Evropës si tërësi.

“Për më tepër, besoj se Shtetet e Bashkuara kanë për interes promovimin dhe përkrahjen e demokracisë dhe të të drejtave të njeriut”, theksoi ai.

6 qershor 1997

“Evropa e lirë”: Proceset e reja kanë homogjenizuar shqiptarët

Në një vështrim të emetuar në Radio “Evropa e lirë” rreth proceseve politike serbe kundër shqiptarëve të Kosovës, theksohej se opinioni i gjerë kosovar, si rallë herë më parë, i ka përkrahur dhe është solidarizuar me të akuzuarit dhe me të dënuarit shqiptarë. Ky solidaritet me të akuzuarit shqiptarë, tek partitë të cilat kërkojnë një përgjigje më të hapët të shqiptarëve ndaj regjimit serb, ka kaluar pothuaj tërësisht në identifikim me platformën politike të shqiptarëve të dënuar. Kështu Partia Parlamentare e Adem Demaçit, ka vlerësuar me rastin e këtij gjykimi, se “qëndrimi i të akuzuarve në seancën kryesore gjyqësore ishte heroik dhe duhet të shërbejë si shembull për të gjithë shqiptarët”.

Duke kërkuar nga faktorët politikë shqiptar që të pushojnë së binduri opinionin se shqiptarët e nxjerrur para gjyqit nuk kanë bërë asgjë dhe gjykimi është i montuar, Unioni i Pavarur i Studentëve të Universitetit të Prishtinës konstaton se shqiptarët e nxjerrë para gjyqit të regjimit serb, siç thuhet, janë marrë me “punë të vërtetë çlirimtare”.

Në vazhdim citohet qëndrimi i partisë më me ndikim të shqiptarëve -Lidhjes Demokratike të Kosovës, e cila gjykimet më të reja aktuale në Kosovë i vlerëson si farsë me të cilat regjimi serb mundohet t’i fshehë dështime e shumta në Kosovë dhe jashtë saj. Me serialin e gjukimeve më të reja, regjimi aktual serb ka për qëllim që t’i bind zgjedhësit serbë se para zgjedhjeve të tyre ky regjim demonstron një kurs të ashpër kundër shqiptarëve dhe se Kosova mund të mbahet edhe më tej nën kontrollin serb.

Në fund të këtij vështrimi, korrespondenti i këtij radiostacioni nga Kosova konstaton se megjithë qëllimin serb që të ndriçohen sulmet terroriste në Kosovë, qëllimi i serisë së re të proceseve politike në Kosovë është tërheqja e shqiptarëve nga projekti i tyre për pavarësinë e Kosovës. Por, regjimi serb, pa dyshim, me këtë akt ka arritur efekt të kundërt, i cili edhe më shumë i ka ngjeshur radhët dhe i ka homogjenizuar shqiptarët. Me këtë qëndrim Beogradi ka mbetur në gjysmë të rrugës dhe ka përjetuar edhe një humbje, duke menduar se me dënime represive politike mund t’i disiplinojë shqiptarët që të inkuadrohen në Serbi, thuhej në fund të raportit të korrespondentit të radios “Evropa e Lirë” nga Prishtina, Ismet Hajdari.

Po këtë ditë në stacionin e policisë në Gjilan u mor në pyetje Sherif Fejzullahu, kryetar i SP të Energjetikës. Ai u mbajt rreth dy orë në polici dhe nga inspektori serb u pyet për aktivitetin e tij në sindikatën ku vepron, rreth Kuvendit të BSPK-së, rreth pozicionit të kryetarit Rugova dhe kryetarit të PPK-së, Adem Demaçi, lidhur me çështjen e Kosovës etj.

Njoftohet se në pyetje është marrë edhe Qamil Salihu, mësimdhënës në shkollën fillore “Esad Berisha” në Llashticë. Ai në polici u mbajt rreth tri orë dhe u pyet për aktivitetin e tij politik nga viti 1990 e këtej, për partitë politike shqiptare në komunën e Gjilanit, si dhe për disa çështje të tjera.

Njoftohet se z. Qamil Salihu në pyetje është marrë për herë të pestë.

6 qershor 1998

Vazhdojnë sulmet serbe, në Gramaçel u vra fëmija 3-vjeçar, në Baballoq u vra një i ri

Gjatë sulmeve serbe të djeshme kundër fshatit Gramaçel të Deçanit është vrarë fëmija 3-vjeçar, Leutrim Esat Aga. Këtë njoftim e dhanë sot aktivistët e LDK-së të Degës në Gjakovë.

Në fshatin Baballoq është gjetur i vrarë një i ri, identiteti i të cilit nuk dihet.

Këtë lajm e konfirmon edhe KMDLNJ, duke saktësuar se forcat serbe të stacionuara te Suka e Biteshit kanë granatuar

pandërprerë me armë të rënda artilerike fshatrat Shaptej, Gramaçel e Baballoq. Nga këto granatime në shtëpi të tij, në djep, u vra fëmija 3 vjeçar, Leutrim Esat Aga dhe u plagosën edhe tre persona të tjerë.

Nga granatimet e sotme dhjetëra shtëpi gjenden në tym e flakë.

Mbi fshatrat e Deçanit hedhin granata edhe aeroplanët luftarakë

Ushtria dhe policia serbe vazhdojnë të granatojnë edhe sot disa fshatra të komunës së Deçanit.

Fatmir Berisha, arsimtar nga Strellci, i deklaroi QIK-ut se ushtria serbe po sulmon me artileri fshatrat Gramaçel, Glloxhan, Isniq, Prejlep. Supozohet se në këto fshatra janë tubuar më se 30 mijë banorë që kanë ardhur nga fshatrat e tjera të kësaj komune dhe të komunës së Pejës.

Po ky burim njofton se në këtë zonë të sulmeve serbe, ku po përdoren edhe aeroplanët luftarakë, janë përfshirë edhe fshatrat Prapaçan, Dubovik, Lumbardh, Pozhar, Llukë e Poshtme etj.

Fatmir Berisha përcjell apelin e banorëve të këtyre fshatrave që t’u sigurohet një korridor për kalimin në Gjakovë ose në Shqipëri, me qëllim që të shpëtojnë nga masakrat serbe.

Dy trupa të pajetë në morgun e spitalit të Gjakovës

Sot në mesditë në morgun e spitalit të Gjakovës u sollën trupat e pajetë të dy shqiptarëve të vrarë.

Njoftohet se ata janë sjellë nga Prejlepi i Deçanit, por identiteti i tyre tash për tash nuk dihet.

Lista e 45 të vrarëve në Deçan e rrethinë gjatë ditëve të fundit

Osman Cacaj, kryetar i Komisionit për Informim të LDK-së në Deçan i tha sot QIK-ut se dihet identiteti i 45 të vrarëve shqiptarë gjatë sulmeve të fundit të forcave serbe në Deçan e rrethinë. Ai tha se numri i të vrarëve është më i madh se ky që dihet deri më tash.

1. Cacaj tha se gjatë ditëve të fundit janë vrarë në shtëpitë, oborret, arat e fshatrat e veta ose duke mbrojtur vendin e vet këta persona:

Në Deçan janë vrarë Haxhi Metë Cacaj, Nexhat S. Iberhysaj, Shaban Osaj (72) – Xajë C. Kuçi, Shyrhere Jeftaj, nënë e tre fëmijëve;

Në Lloçan janë vrarë – Tafil e Shaban Kasumaj;

Në Carrabreg të Epërm janë vrarë: Asllan Bazhdaraj, Shaqir Dobra, Ajmane Balaj, nënë e katër fëmijëve, Besart Dautaj, Hate Balaj, Teuta R. Loshaj, Abdyl Gjonaj (Loshaj), Gala e Ukë Belit (është djegur) dhe Hamdi Jakup Dautaj;

Në Carrabreg të Ulët janë vrarë Adem E. Ukëhaxhaj, Besim Ukëhaxhaj, Lavdërim R. Nitaj e Bajram Ramosaj (70);

Në Strellc të Epërm janë vrarë: Ismet E. Ukaj, Brahim Demaliaj, kryetar i Aktivit të LDK-së në fshat – Arif B. Mahmutdemaj, Rexhep Pavataj (90);

Në Vranoc Beqir (Rrustem) Krasniqi, hoxhë, Imer (Elez) Ukaj (55), Halit Z. Krasniqi dhe Fazë (Zenun) Krasniqi (35), nënë e katër fëmijëve;

Në Lubeniq u vranë Zeqë Hamza (68), Brahim Hamza (64), Dërvish Hamza (51), Ymer Hamza (53), Gani Hamza (25), Rifat Hamza (24), Bashkim Hamza (23), Hysen D. Alimehaj (40) nga Lybeniqi, Haxhi Mehmet Gogaj (Cacaj) (22) nga Deçani, Hajdar Ukshinaj dhe Mehmet Ukshinaj;

Në Pobërgjë janë vrarë: Gruaja e Niman J. Tolajt 1968), Zize H. Tolaj (75), Osman R. Tolaj (79), në shtëpinë e Ilmi M. Tolajt kanë mbetur të vdekur një plak e një plakë nga Batusha, që jetonin aty.

Dyshohet se në bodrumet e dy shtëpive të këtij fshati ka edhe disa të vrarë të tjerë. Mirëpo nuk dihet gjë as për numrin e as për identitetin e tyre. Në këtë fshat forcat serbe kanë bërë masakër të vërtetë;

Në Irzniq është vrarë Blerim Dervishaj;

Mbrëmë në Prejlep është vrarë Haxhi Fetah Mazrekaj (75);

Në morgun e spitalit në Pejë gjendet trupi i pajetë i një personi të paidentifikuar

Në komunën e Pejës edhe më tutje mbretëron gjendje shumë e rëndë. Në qytet dhe në fshatrat që nuka janë përfshirë nga zjarri i luftës arrijnë pa ndërprerje njerëz nga fshatrat e rrezikuara. Në Pejë janë strehuar rreth 20. 000 banorë të këtyre fshatrave. Për këtë arsye vështirësitë rreth furnizimit me bukë, artikuj tjerë ushqimorë dhe barëra, të bëhet edhe më i vështirë.

Dje dhe sot, për herë të parë qyshkur kanë filluar operacionet e forcave ushtarake e policore serbe në komunën e Klinës, Deçanit e Gjakovës, në Pejë kanë arritur shumë gazetarë të huaj. Në nënkëshillin për Mbrojtjen e të Drejtave dhe Lirive të Njeriut (NKMDLNJ), në Degën e Shoqatës Humanitare Bëmirëse “Nëna Tereze” dhe në degët e partive politike në Pejë ata kërkuan informacione për zhvillimet e ditëve të fundit në këtë komunë.

KMDLNJ në Pejë ka njoftime se në morgun e spitalit të qytetit tash dy ditë gjendet trupi pa jetë i njeriu, i cili është gjetur i vdekur në shtratin e lumit Bistricë. Komisioni nuk ka arritur të mësojë emrin e viktimës, por ka marrë vesh se ai është i moshës rreth 60 vjeçare dhe se mbiemri i tij është: Berisha.

Burimet e këtij këshilli kanë njoftuar se më 4 e 5 qershor në stacionin e policisë në Istog dhe në Pejë është rrahur brutalisht Xhafer Tafilaj nga fshati Rakosh, me pretekst se gjoja ka incizuar terrenin rreth Burgut në Dubravë të Istogut, ku ka punuar ai. Ndërkaq, dje në organet e policisë në Pejë është mbajtur rreth katër orë dhe është rrahur Azem Shala nga fshati Novosellë.

Po kështu, njoftohet se policia serbe ia ka konfiskuar Vehbi Morinës një stabiliment ftohës, 25 tonësh.