Kampionja e Kosovës në futboll, Drita, e ka mësuar kundërshtarin me të cilin do të përballet në raundin e parë eliminator të UEFA Champions League.

“Intelektualët” do ta kërkojnë kualifikimin duke u ballafaquar me ekipin nga Luksemburgu, FC Differdange 03.

Skuadra me të cilën ndeshen gjilanasit, nuk e ka kaluar asnjëherë rrethin e parë në Ligën e Kampionëve, andaj për skuadrën nga Kosova ky është një moment i favorshëm që ta bëjnë historinë shtetërore, duke arritur ta kalojnë këtë rreth, i cili pos në aspektin financiar, jep mundësi të artë për “Bardh e Kaltërit” që të bëhen pjesë e ndonjë faze grupore evropiane.

Kualifikimi nga ky rreth, në rastin më të keq pastaj për Dritën siguron fazën “Playoff” në UEFA Europa Conference League.

Paraprakisht do të kenë mundësi pos UCL-së, ta provojnë vetën edhe në Europa League.

Klub i futbollit Drita, që u shpall kampion i Kosovës në futboll për edicionin 2024/25, ka mësuar sot kundërshtarin e parë në kualifikimet për Ligën e Kampionëve, raporton KosovaPress.

Në këtë fazë të garave, Drita do të përballet me skuadrën Differdange nga Luksemburgu.

Kjo do të jetë pjesëmarrja e tretë e Dritës në fazën kualifikuese të Ligës së Kampionëve, pas dy përvojave të mëparshme që kanë sjellë përvojë dhe besim në arenën ndërkombëtare.

Edon Zhegrova do të largohet gjithsesi nga Lille gjatë afatit kalimtar të verës. Ylli e ka mbyllur eksperiencën me klubin francez, ndonëse ka ende kontratë me të.

Ai dëshiron ta provojë një eksperiencë të re dhe klubet italiane janë ato që kanë shprehur më së shumti interesim për të.

Krahas Napolit, lojtarin e pëlqejnë edhe Milani dhe Atalanta, sipas mediave franceze, Lille mund t’i përfitojë deri në 30 milionë euro nga shitja e përfaqësuesit kosovar.

Dhe, klubi nga Ligue 1 e ka gjetur zëvendësuesin e anësorit ofanziv. Bëhet fjalë për mesfushorin ofanziv, Marius Sivertsen Broholm, i cili aktualisht është pjesë e Rosenborgut.

Edoni nuk e ka zhvilluar asnjë ndeshje në vitin 2025 shkaku i një lëndimi që e kishte pësuar në fund të vitit të kaluar.

26-vjeçari i ka zhvilluar 21 ndeshje në të gjitha garat duke i realizuar 8 gola dhe duke i bërë 2 asistime.

Ai ishte në formë jetësore në pjesën e parë të sezonit, por lëndimi i çuditshëm ia humbi pjesën e dytë të sezonit.

Zhegrova, i cili luajti ditë më parë në ndeshjen e yjeve në Kosovë, synon të jetë protagonist në sezonin 2025/26 në cilindo ekip që transferohet.

Kryetari i Federatës së Futbollit të Kosovës, Agim Ademi është rikthyer të flasë për situatën me selektorin e Kombëtares së Kosovës, Franco Foda.

Trajneri gjerman e ka marrë ofertë të majme e joshëse nga Emiratet e Bashkuara Arabe, përkatësisht nga ekipi Al Wahda.

Kreu i FFK-së, në televizionin publik – RTK ka treguar se do të flasë sy me sy me selektorin, për ta parë disponimin e tij dhe për të vendosur bashkërisht për të ardhmen e tij.

Ndonëse ka kontratë me FFK-në deri në fund të kualifikimeve, nuk përjashtohet mundësia që Foda ta lë Kosovën ende pa i nisur kualifikimet e Botërorit 2026.

“Franco Foda ka pasur edhe më parë oferta, por kjo që ka tani thjesht është shumë e mirë ekonomikisht.”

“Kam biseduar me Fodën, ai është në pushime. Të mërkurën kthehet dhe do të ulemi të bisedojmë ose këtu ose në Vjenë. Ai e ka një kontratë deri në fund të kualifikimeve dhe është obligues ndaj kontratës tonë, me mundësi të vazhdimit edhe për dy vjet tjera. Nëse kualifikohemi me automatizëm i vazhdohet. Kjo është klauzola që e kemi pasur.”