Komisioni Qendror i Zgjedhjeve ka bërë të ditur se është duke vazhduar periudha për regjistrimin e votuesve jashtë Kosovës për votim me postë në zgjedhjet lokale të 12 tetorit dhe deri më 29 gusht 2025, të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës.

Aplikimi për regjistrim duhet të jetë individualë dhe mund të bëhet përmes platformës elektronike të KQZ-së ose përmes postës duke dërguar aplikimin në kutinë postare të KQZ-së në Kosovë.

Nga data 23 korrik dhe deri të premten, më 22 gusht 2025, përmes platformës elektronike janë pranuar 16.902 aplikime për regjistrim për votim me postë, prej të cilave janë aprovuar 13.360, ndërkaq janë refuzuar 3542.

Në shumicën e rasteve të refuzuara, aplikuesit nuk kanë paraqitur njërin nga dokumentet që dëshmon adresën e tyre jashtë Kosovës, dokument identifikues në të cilin është e shënuar adresa e banimit, vërtetim i adresës nga autoriteti lokal, kontratë të qirasë, faturë shërbimesh, dokument i lëshuar nga banka apo kompania e sigurimit, dokument që dëshmon adresën e personit tek i cili qëndrojnë përkohësisht, dëshmi tjetër banimi për rastet specifike, rezervim hoteli, konvikti, etj.

Sipas procedurës, aplikimet e pakompletuara, të cilat kanë mungesë të dokumenteve mbështetëse, do të refuzohen.

KQZ thotë se shtetasit e Kosovës që do të regjistrohen gjatë kësaj periudhe, do të mund të votojnë përmes postës në periudhën e cila do të fillojë më 17 shtator dhe do të përmbyllet më 11 tetor 2025.

Policia e Kosovës, përmes Drejtorisë Rajonale në Mitrovicë të Veriut, ka njoftuar se rreth orës 01:00 pas mesnate, është raportuar për një incident zjarri në komunën e Zveçanit, ku një veturë është përfshirë nga flakët.

Menjëherë pas marrjes së informacionit, njësitet policore dhe zjarrfikësit kanë dalë në vendin e ngjarjes, duke ndërmarrë veprimet e nevojshme për shuarjen e zjarrit dhe sigurimin e vendit të ngjarjes.

Në vendin e ngjarjes kanë dalë gjithashtu edhe ekspertë të zjarrit për të kryer ekzaminimet përkatëse.

Sipas të dhënave fillestare dhe dëshmive të mbledhura në terren, dyshohet se shkaku i zjarrit mund të ketë qenë një defekt në sistemin elektrik të veturës.

Hetimet rreth këtij rasti janë ende në vazhdim, me qëllim të ndriçimit të plotë të shkaqeve dhe rrethanave që çuan në incident.

Kuvendi i Republikës Srpska (RS) më 22 gusht do të mbajë një seancë të jashtëzakonshme, me temë kryesore vendimin e Gjykatës së Bosnjë e Hercegovinës ndaj Millorad Dodikut.

Dodik është dënuar me një vit burgim, por e ka shlyer dënimin me pagesë prej rreth 18 mijë eurosh. Përveç kësaj, ai është dënuar edhe me gjashtë vjet ndalim për të ushtruar funksione publike vendim që bëri që Komisioni Qendror i Zgjedhjeve (KQZ) i Bosnje e Hercegovinës t’ia merrte mandatin e presidentit të RS-së.

Pasi deputetët hynë në sallën e Kuvendit të RS-së, shërbimet i informuan se ishte pranuar një thirrje anonime për një bombë të vendosur. Të gjithë u evakuuan nga ndërtesa dhe po pritet që policia të kryejë kontrollin.

Seanca do të vazhdojë në orën 11:30, tha para gazetarëve në Kuvend, sekretari Bojan Bosaniçiq.

Sipas propozimit, Kuvendi do të mund të formojë vetë komisione të posaçme për referendum, ndërsa ligji do të hynte në fuqi menjëherë ditën pas miratimit gjë e pazakontë për procedurat ligjore.

Nëse ndryshimet miratohen, deputetët pritet të votojnë për mbajtjen e një referendumi, përmes të cilit qytetarët do të shprehnin qëndrimin e tyre ndaj vendimeve të Gjykatës dhe KQZ-së, me të cilat Dodikut iu mor mandati.

Koalicioni qeverisës ka propozuar që referendumi të mbahet më 18 ose 25 tetor, por deri në fillim të seancës nuk ishte sqaruar se si do të formulohet pyetja e referendumit.

Kushtetuta e Bosnjës nuk parashikon që një nivel më i ulët i pushtetit, siç është entiteti, të mund të shpallë referendume për vendime të institucioneve shtetërore, çka e vë në pikëpyetje ligjshmërinë e gjithë procesit.

Dodik është dënuar për mosrespektim të vendimeve të Përfaqësuesit të Lartë ndërkombëtar në Bosnje e Hercegovinë, i ngarkuar me zbatimin e Marrëveshjes së Paqes së Dejtonit.

Si president i RS-së, ai kishte nënshkruar ligje që parashihnin moszbatimin e vendimeve të Gjykatës Kushtetuese të Bosnjës dhe të Zyrës së Përfaqësuesit të Lartë në territorin e entitetit. Këto ligje ishin anuluar paraprakisht nga Përfaqësuesi i Lartë, Christian Schmidt.

Mbrojtja e Dodikut ka paraqitur apel në Gjykatën Kushtetuese të Bosnjës, ndërsa KQZ është e obliguar që, sipas ligjit, të shpallë zgjedhje të parakohshme për presidentin e RS-së brenda 90 ditësh.

Deputetja nga radhët e Lëvizjes Vetëvendosje, Donika Gërvalla tha se bllokimi nuk ndërlidhet me emrin e përveçëm, por nuk ka gaditshmëri të opozitës për formim të institucioneve.

“Është shumë e qartë që bllokimi nuk lidhet me emra të përveçëm, bllokimi lidhet thjesht me mos gaditshmërinë e opozitës për të shkuar në një fazë të re. Pra, në konstituimin e Kuvendit, të qeverisë dhe të punëve të shumta që kemi përpara. Frika e opozitës nga qeveria Kurti 3 është shpërfaqur hapur gjatë shumë ditëve javëve e muajve të fundit”, tha ajo.

Ministrja në detyrë e Punëve të Jashtme, pas dështimit të radhës për t’u konstituar Kuvendi, tha se AAK kishte mësuar nga gabimi i herës së kaluar kur votoi kundër saj dhe abstenoi kur u hodh në votim emri i Hekuran Muratit.

Ajo e konsideron gabim të madh nëse ndodh që Lista Serbe të certifikohet në zgjedhjet lokale të 12 tetorit, ndonëse dje Komisioni Qendror i Zgjedhjeve nuk e certifikoi këtë parti.

“PDK, LDK, AAK dhe Lista Serbe sot AAK kishte mësuar nga gabimi i herës së kaluar dhe të paktën abstenoi nga frika që mos përsëri po identikohet nga qytetarët me Listën Serbe. Mirëpo, këto tre subjekte shqiptare dhe Lista Serbe e cila nuk është parti serbe por është një parti e cila synimin e saj thelbësor e ka zhbërjen e Kosovës, një parti e tillë nuk e ka vendin në Kuvend, një parti nuk e ka vendin në udhëheqje komunale prandaj jemi këmbëngul që certifikimi i saj në këto zgjedhje komunale të 12 tetorit nuk duhet të ndodh dhe nuk do të guxoj të ndodh…Do ta konsideroja gabim të madh nëse Lista Serbe certifikohet në këto palë zgjedhje në zgjedhjet komunale”, tha ajo.

E pyetur lidhur me mospjesëmarrjen e Shqipe Selimit në votim kur u propozua emri i saj për kryetare të Kuvendit, Gërvalla tha se është vendim i Selimit dhe nuk ka arsye ta komentoi atë vendim.

“Ne kemi pas një diskutim në grup parlamentar si çdo herë para çdo vendimi që marr nuk ka pas debat rreth kandidimit tim, zonja Selimi i merr vendimet e saja ajo nuk ka marr pjesë në votim në dallim nga disa të tjerë tek të cilët është pritur se nuk mund të votojnë dhe të bashkohen me Listën Serbe dhe me PDK për të votuar kundër personit tim megjithatë ai është vendim personal i zonjës Selimi. Nuk kam asnjë arsye dhe të drejtë ta komentoj”, tha ai.

Gërvalla tha se djali i Xhemajl Mustafës, nipi i Tahir Zemajt e dy komandantët e Koshares u bënë bashkë me PDK-në dhe Listën Serbe dhe votuan kundër saj.