Lajmet

Shumë persona me nevoja të veçanta, fare pak kushte për jetën e tyre në Mitrovicë

Personave me aftësi të kufizuara në Mitrovicë u mungojnë kushtet bazike për jetë normale.

Published

4 years ago

on

Merita Voca është një qytetare me nevoja të veçanta dhe jeton në Mitrovicë. Sikur Voca, edhe shumë persona tjerë të kësaj kategorie të shoqërisë, nuk e kanë të lehtë të përmbushin nevojat e përditshme ditore. Mitrovica, ka shumë për të bërë, që të përshtasë kushtet fizike, që Voca dhe qindra qytetarë të kësaj komune të mund të përballen më lehtë me sfidat e përditshme të jetës.

Florinda Kelmendi-studente e vitit të dytë në Media dhe Komunikim

53-vjeçarja Voca, thotë se personave me aftësi të kufizuara në Mitrovicë u mungojnë kushtet bazike për jetë normale.

“Kushtet që na ofrohen nuk janë në nivel të duhur. Nëpër insitucione mungojnë nevojat bazë si p.sh pjerrinat të cilat janë vetëm në katin përdhesë ndërsa zyrat janë lartë. Edhe ato pjerrina që janë prezente janë të papërshtatshme. Ashensorët nuk punojnë. Në bankë bankomati është shumë lartë, ndërsa për neve që jemi me karroca nevojitet të jetë në nivel më të ulët. Kështu, në vend që t’i kryejmë vetë shërbimet tona na nevojitet gjithmonë të kërkojmë ndihmë nga dikush tjetër”, thotë Voca.

UBTNews sjell rrëfimin e 53-vjeçares, e cila thekson se edhe ndihmën financiare institucionale nuk e kanë të mjaftueshme.

“Nëse unë dua të udhëtoj jashtë qytetit tim, më duhet të paguajë 100 euro në mënyrë që të më ofrohen kushtet adekuate. Unë e kam të pamundur të udhëtojë me autobusë sepse nuk ma zë karrocën brenda. Po ashtu, autobusët nuk kanë pjerrina në hyrjen të tyre. Kështu që, ose ose duhet ta paguaj vetë udhëtimin, ose të qëndroj në shtëpi”, thotë ajo.

Për shkak të pamundësisë për ta vazhduar shkollimin, Merita Voca ka arritur të përfundojë vetëm shkollimin fillor.

“Mirëpo unë vazhdova me shkollim autodidakt. Nuk më është ofruar ndonjë punë nga institucionet publike apo private. Kam punuar aktiviste në shoqatën ‘Handikos’. Aktualisht nuk jam e punësuar, ndërsa të ardhurat e mia janë nga pensioni”, përmend Voca një nga problemet shtesë me të cilin ajo ballafaqohet.

Ajo mendon se për persona me aftësi të kufizuara, mund të ofrohen punë adekuate të cilat janë të zotët t’i kryejnë me përgjegjësi.

“Natyrisht varet nga kategoritë, mirëpo disa persona mund të punojnë në zyrë, agjent të thirrjeve, fizioterapeut, etj”, thotë Voca.

Në Drejtorinë për Mirëqenie Sociale në Mitrovicë, nuk pranojnë të flasin për shqetësimet që ngritin kjo shtresë e shoqërisë sonë.

Voca, thotë se integrimin në shoqëri nuk e ka fare problem dhe përkundër vështirësive që ka, e do jetën dhe dëshiron të plotësojë epitetin e një qytetareje të dobishme.

“E dua shoqërinë, marr pjesë në panaire të ndryshme, në ndeshje basketbolliste dhe futbollistike. Më respketojnë dhe më ndihmojmë të gjithë”, shton ajo.

Në Mitrovicë, vepron edhe Shoqata “Handikos”, e cila mbulon interesin e personave me aftësi të veçanta, paraplegjikëve dhe paralizës së fëmijëve të Kosovës. Qëllimi i saj shoqate është përmirësimi i të drejtave dhe i standardit të jetesës së personave me aftësi të kufizuara.

Drejtoresha e “Handikos” në Mitrovicë, Myrvete Hasani tha se në këtë komunë përfshirë numërohen 510 persona me aftësi të kufizuara. Ajo tregon si veprojnë në kushte jo të favorshme, dhe nuk kanë mundësi të ndihmojnë mjaftueshëm të gjithë nevojtarët.

“Komuna na ka përkrahur shumë rrallë, pajisje nuk na kanë dhuruar. Ndihma e vetme që na kanë ofruar kanë qenë projekte të vogla si “Dita e fëmijëve.”. Shërbimet adekuate ofrohen nga vetë shoqata Handikos, dhe nga donatorët e huaj”, thotë Hasani.

Ajo tregon se “Handikos” ka bashkëpunim me organizatën “Save the Children”, me “Rrjetin e grave” dhe Departamentin e Punës dhe Mirëqenies Sociale, që funksionin brenda Ministrisë së Financave.

“Bashkëpunimi me ‘Save the Children’ përfshin aktivitetet për fëmijë deri në moshën 16-vjeçare. Janë të punësuara psikologia, edukatorja, logopedia dhe ergoterapeutia”, thotë ajo.

Myrvete Hasani tha se për shkollimin e fëmijëve me nevoja të veçanta, ekzistojnë mundësi solide, porse më pas këta të rinj kanë shumë telashe për gjetjen e një vendit të punës.

“Fëmijëve me aftësi të kufizuara u ofrohen mundësi të shkollimit në shkollë speciale. Gjithashtu një kategori e tyre mund edhe të mësojnë në shkollë normale. Përderisa një person me aftësi të kufizuara e ka intelektin e zhvilluar, nuk e ka problem të aftësohet si të gjithë fëmijët e tjerë në shkollë normale. Ndërsa nëse flasim për punësim, mundësitë janë të pakta”, shtjellon ajo.

Një numër nga këta persona, përfitojnë një ndihmë sociale e cila shpesh quhet si një pension, ndërsa drejtori Rajonal i Zyrës së Pensioneve, Mensur Beqiri tha se janë mjekët ata që e vlerësojnë se cilës kategori nga këta qytetar mund të përfitojnë këtë mbështetje financiare.

“Një person i cili ka të meta, që nga mosha 18-vjeçare deri në moshën 65-vjeçare merr pension. Ndërsa në momentin që kalon në moshën 65-vjeçare kalon në pensionin e pleqërisë që është i barasvlefshëm me pensionin invalidor. Këta persona vijnë aplikojnë, i dorëzojnë dokumentet, marrin formularin që duhet ta plotësojnë, i dorëzojnë raportet mjekësore dhe caktohet seanca nga ministra. Dalin para mjekëve pastaj ata e vlerësojnë se u takon apo jo pensioni këtyre personave. Nëse i takon e merr për një vit, tri vite dhe pesë vite varësisht nga shkalla e invaliditetit”, thotë Beqiri, duke thënë se në rajonin e Mitrovicës, përfshirë Vushtrrinë, Skenderajn, Leposaviqin, Mitrovicën e Veriut, Zubin Potokun, janë mbi 4 mijë persona me aftësi të kufizuara që marrin pension./UBTNews/

Related Topics:
Continue Reading

Lajmet

Ndërroi jetë Ali Sadriu, ministri i parë i financave i Kosovës së pasluftës

Published

10 hours ago

on

January 9, 2026

By

Ka ndërruar jetë Ali Sadriu. Ai ishte ministri i parë i financave i Kosovës së pasluftës. Në periudhën kur Kosova ndërtoi sistemin financiar të vetin.

Njoftimin për vdekjen e tij e ka bërë bashkëpunëtori i tij, Besnik Osmani.

Postimi i plotë i Osmani në Facebook:

Paska ndërruar jetë Ali Sadriu.

Aliu nuk ishte vetëm ministri i parë i financave, por edhe themeluesi i institucioneve fiskale dhe financiare të Republikës së Kosovës.

Në kohët më të vështira, Aliu ishte lis që nuk rrëzohej kurrë dhe mendje që ecte përpara, me qëllime, ide dhe bindje të qarta.

Periudha e pasluftës ishte jashtëzakonisht e vështirë – jo vetëm për t’u përgjigjur nevojave urgjente të rindërtimit, por edhe për të mbrojtur vlerat liridashëse dhe shtetndërtuese të Lidhjes Demokratike të Kosovës.

Trim i madh, burrë i vendosur, i qartë në ideale dhe në vizion.

Me drejtimin tënd dhe me ndihmën e shumë ekspertëve vendorë e ndërkombëtarë, u themelua buxheti i parë i shtetit. U siguruan rrogat e para për mësuesit dhe mjekët. U ndërtuan institucionet më të rëndësishme financiare: Thesari, Buxheti, Administrata Tatimore dhe Doganore e Kosovës.

Nuk mund të harrohet gëzimi yt – edhe pse i përmbajtur, për shkak të natyrës sate – kur vendose doganën e parë në pikën kufitare të Merdarës.

As momenti kur, mbi një filxhan porcelani kafeje, u shënua shifra e parë e buxhetit të shtetit: 213 milionë euro.

U prehsh në paqe, Ali Sadriu.

Kontributi yt do të mbetet gur themeli i shtetit të Kosovës.

Continue Reading

Lajmet

The Guardian shkruan për përmbytjet në Kosovë

Published

11 hours ago

on

January 9, 2026

By

Kosova është përballur këtë javë me reshje të gjata dhe të dendura shiu, të cilat kanë shkaktuar përmbytje të gjera. Qytete, qyteza dhe fshatra u përmbytën ndërsa lumenjtë dolën nga shtrati i tyre. Komunitetet u izoluan dhe shërbimet emergjente shpëtuan persona të bllokuar në shtëpitë e tyre. Banorët humbën furnizimin me ujë, si dhe energjinë elektrike në komunat e Drenasit, Malishevës dhe Rahovecit, pasi uji i përmbytjeve depërtoi në nënstacionet elektrike, ka shkruar mediumi britanik “The Guardian” për situatën me përmbytjet në Kosovë.

Stacione individuale të motit në të gjithë jugperëndimin e vendit regjistruan më shumë se 50 mm brenda 24 orëve të martën dhe të mërkurën, me disa stacione lokale që regjistruan rreth 80 mm në komunën e Malishevës.

Kjo pasoi reshjet e dendura të mëparshme nga e shtuna deri të hënën, gjatë të cilave stacionet zyrtare të motit në Junik dhe Gllogjan në perëndim të vendit regjistruan përkatësisht 231.5 mm dhe 151.6 mm shi brenda dy ditësh. 130 mm të tjera ranë në rajonin e Junikut të martën, duke përkeqësuar përmbytjet me rrëshqitje të dheut.

The Guardian njoftoi edhe për motin e përkeqësuar në gjithë Europën, duke thënë se Zyra Meteorologjike e Mbretërisë së Bashkuar lëshoi ​​një paralajmërim të kuq për erëra të forta nga ora 16:00 deri në 23:00 të enjten në të gjithë Kornuoll dhe Ishujt Scilly, ndërsa Stuhia Goretti përshkoi Kanalin. Ndërsa jugperëndimi i largët i Anglisë pati erëra ekstreme me shpejtësi afër 100 mph, ishte Meteo-France ajo që i dha emrin stuhisë, pasi Franca veriperëndimore pritej të pësonte goditje të forta. U parashikuan erëra shkatërruese mbi 80 mph, me erëra prej 132 mph të vërejtura në Normandi dhe 94 mph në gjatë natës. Vende deri në brendësi të Parisit patën erëra shumë të forta gjatë natës, me erëra që arritën në 65 mph.

Paralajmërime për përmbytje bregdetare ishin gjithashtu në fuqi në Francën veriperëndimore; brigjet veriore të Brittany ishin nën paralajmërime për valë 6-9 metra, me valë stuhie prej 1.5 metrash gjatë baticës së lartë.

Stuhia Goretti do të vazhdojë të lëvizë drejt lindjes në Europën kontinentale gjatë fundjavës, dhe ndërsa erërat e forta do të lehtësohen disi ndërsa kjo ndodh, kushtet e stuhisë së borës mund të jenë një kërcënim. Reshje të konsiderueshme bore mund të bien në të gjithë Gjermaninë dhe rajonin e Beneluksit.

Continue Reading

Lajmet

Vërshimet në veri: Mbyllet një urë shkaku i dëmtimeve, evakuohen katër familje që iu përmbytën shtëpitë

Published

12 hours ago

on

January 9, 2026

By

Policia e Kosovës ka dalë me përditësim lidhur  me situatën në veri të vendit, pas vërshimeve që u shkaktuan si pasojë e reshjeve të shiut.

Një urë në fshatin Beluçe të Leposaviqit është mbyllur përkohësisht meqë është vlerësuar se përbën rrezik për sigurinë, shkaku i dëmtimeve që ka pësuar nga vërshimet, shkruan Reporteri.net.

Policia ka bërë me dije se janë evkauuar edhe katër familje në Mitrovicë, shkaku që shtëpitë e tyre janë përmbytur.

“Vërshime janë evidentuar në qytetin e Zveçanit dhe në Mitrovicë Veri. Ndërkaq, më datë 08.01.2025, Policia e Kosovës ka pranuar informatë se në fshatin Beluçe te Leposaviqit, si pasojë e vërshimeve, një urë ka pësuar dëmtime, ku njëra këmbë e urës është dëmtuar. Lidhur me këtë rast, Policia ka njoftuar zyrtarët komunal të Leposaviqit si dhe përfaqësuesit nga Ministria e Infrastrukturës, të cilët kanë dalë në terren dhe kanë konstatuar se, për shkak të rrezikut për sigurinë, ura duhet të mbyllet. Si rezultat, ura është mbyllur përkohësisht deri në një vendim të radhës. Po ashtu, gjatë këtyre ditëve, në qytetin e Mitrovicës së Veriut janë evakuuar katër (4) familje, pasi shtëpitë e tyre janë përmbytur si pasojë e vërshimeve”, thuhet në njoftim.

Situata thuhet se aktualisht është e menaxhueshme.

“Policia e Kosovës po vazhdon monitorimin e gjendjes në terren. Qytetarët për çdo vështirësi apo rast emergjent mund të kontaktojnë Policinë e Kosovës në numrin 192. Policia e Kosovës mbetet e përkushtuar në ofrimin e shërbimeve, mbrojtjen e jetës dhe pronës së qytetarëve, veçanërisht në situata emergjente kur vendi përballet me rreziqe natyrore”, thuhet në njoftim.

Continue Reading

Lajmet

​Këta janë 120 deputetët e legjislaturës së 10-të

Published

12 hours ago

on

January 9, 2026

By

Me përfundimin e numërimit të fletëvotimeve, Komisioni Qendror i Zgjedhjeve (KQZ) ka shprehur gatishmërinë që të shpallë rezultatet përfundimtare të zgjedhjeve të parakohshme parlamentare, të mbajtura më 28 dhjetor të vitit të kaluar në Kosovë.

Megjithatë, para shpalljes së rezultateve përfundimtare, duhet të përfundojë periudha e paraparë për ankesa, të cilat partitë politike mund t’i paraqesin në Panelin Zgjedhor për Ankesa dhe Parashtresa (PZAP).

Sipas rezultateve preliminare:

Lëvizja Vetëvendosje (LVV) ka marrë 51.11% të votave dhe do të ketë 57 ulëse në Kuvendin e Kosovës;

Partia Demokratike e Kosovës (PDK) ka marrë 20.19% dhe do të ketë 22 ulëse;

Lidhja Demokratike e Kosovës (LDK) ka marrë 13.23% (15 ulëse);

Aleanca për Ardhmërinë e Kosovës (AAK) ka marrë 5.5% (6 ulëse).

Deputetët e Lëvizjes Vetëvendosje (LVV): Albin Kurti; Glauk Konjufca; Albulena Haxhiu; Hekuran Murati; Donika Gërvalla-Schëarz; Xhelal Sveçla; Hajrulla Çeku; Avni Dehari; Mimoza Kusari-Lila; Ejup Maqedonci; Shqipe Mehmeti Selimi; Andin Hoti; Arben Vitia; Saranda Bogujevci; Edona Llalloshi; Alban Bajrami; Mefail Bajqinovci; Nezir Kraki; Armend Muja; Rufki Suma; Adriana Matoshi; Jeta Statovci; Ardian Gola; Haxhi Avdyli; Adelina Grainca; Blerim Gashi; Albena Reshitaj; Fatos Geci; Agim Bahtiri; Taulant Kelmendi; Artane Rizvanolli Berisha; Fitore Pacolli Dalipi; Dimal Basha; Arbër Rexhaj; Labinotë Demi Murtezi; Arbëreshë Kryeziu Hyseni; Artan Abrashi; Arjeta Fejza; Hysen Durmishi; Arbërie Nagavci; Enver Haliti; Liza Gashi; Valon Ramadani; Adnan Rrustemi; Jeton Raka; Fatmire Kollçaku; Arsim Ademi; Drita Pajaziti; Rozeta Hajdari; Salih Zyba; Fitim Haziri; Fjolla Ujkani; Ilir Kërçeli; Sylejman Meholli; Vigan Qorrolli; Valon Hoti; Naim Bardiqi.

Deputetët e PDK-së: Bedri Hamza; Arian Tahiri; Përparim Gruda; Uran Ismaili; Sala Jashari; Vlora Çitaku; Enver Hoxhaj; Arben Mustafa; Nait Hasani; Rrahman Rama; Ganimete Musliu; Eman Rrahmani; Kujtim Gashi; Elmi Reçica; Artan Behrami; Xhavit Haliti; Besa Kabashi-Ramaj; Mergim Lushtaku; Ferat Shala; Blerta Deliu-Kodra; Ariana Musliu-Shoshi; Arbnore Salihu.

Deputetët e LDK-së: Lumir Abdixhiku; Hykmete Bajrami; Ukë Rugova; Avdullah Hoti; Doarsa Kica-Xhelili; Kujtim Shala; Anton Quni; Armend Zemaj; Lutfi Haziri; Jehona Lushaku-Sadriu; Janina Ymeri; Besian Mustafa; Adelina Thaçi-Meta; Fadil Hadergjonaj; Ermal Sadiku.

Deputetët e AAK-së: Ramush Haradinaj; Daut Haradinaj; Besnik Tahiri; Bekë Berisha; Time Kadrijaj; Albana Bytyqi.

Deputetët e Listës Serbe: Slavko Simiq; Igor Simiq; Liljana Stefanoviq; Milan Kostiq; Nemanja Bishevac; Zlatan Elek; Miljana Nikoliq; Srdjan Popoviq; Verica Çeraniq.

Deputeti i partisë “Për Liri, Drejtësi dhe Mbijetesë”: Nenad Rashiq.

Deputetët e komuniteteve tjera joserbe: Fikrim Damka; Fatma Taqi; Rasim Demiri; Emilija Rexhepi; Elbert Krasniqi; Duda Balje; Veton Berisha; Artan Asllani; Adem Hoxha; Erxhan Galushi.

Continue Reading

Të kërkuara