Sipas raportit të fundit të Policisë së Kosovës, në Prishtinë është arrestuar një person i dyshuar për posedim të paautorizuar të narkotikëve dhe përgatitje për kultivim të substancave narkotike.

Rasti ka ndodhur më dje, 27.05.2026  në rrugën “Karadaku” në Prishtinë. Gjatë kontrollit të shtëpisë së të dyshuarit, policia ka gjetur dhe sekuestruar një sasi të substancës narkotike të llojit marihuanë, si dhe pajisje që dyshohet se janë përdorur për kultivimin e narkotikëve.

I dyshuari, shtetas kosovar, është arrestuar në vendin e ngjarjes dhe me vendim të prokurorit është dërguar në mbajtje.

Policia e Kosovës po vazhdon hetimet për rastin.

Në Policin e Kosovës janë raportuar tetë raste të ndara të dhunës në familje në disa qytete të vendit, gjatë 24 orëve të fundit, ku disa persona janë arrestuar ndërsa disa raste janë duke u trajtuar në procedurë të rregullt.

Në Pejë janë raportuar disa raste, ku në një rast një i dyshuar është arrestuar pasi dyshohet se ka sulmuar fizikisht viktimën grua, e cila ka pranuar trajtim mjekësor, ndërsa me vendim të prokurorit është dërguar në mbajtje.

Në një rast tjetër, një viktimë grua ka kërkuar ndihmë mjekësore pas dhunës psikike dhe fizike, ndërsa i dyshuari ndodhet në kërkim policor.

Po ashtu, në një rast tjetër në këtë qytet, një i dyshuar është arrestuar për dhunë psikike dhe fizike ndaj viktimës dhe është dërguar në mbajtje.

Në Istog, një rast i dhunës psikike është raportuar, ku pas intervistimit palët janë liruar dhe rasti vazhdon në procedurë të rregullt.

Në Deçan, dy persona janë arrestuar nën dyshimin për dhunë fizike ndaj dy viktimave, ku njëra prej tyre ka pësuar lëndime dhe ka marrë trajtim mjekësor. Pas procedurave, të dyshuarit janë liruar në procedurë të rregullt.

Në Rahovec, një grua ka pranuar trajtim mjekësor pas dyshimeve për dhunë psikike dhe fizike, ndërsa pas intervistimit palët janë liruar dhe rasti po vazhdon në hetim.

Në Gjakovë, një i dyshuar është arrestuar pasi dyshohet se në gjendje të dehur ka ushtruar dhunë fizike ndaj viktimës grua, e cila ka marrë trajtim mjekësor. Me vendim të prokurorit, ai është dërguar në mbajtje.

Në Prishtinë, një i dyshuar është arrestuar nën dyshimin për ushtrim të dhunës psikike ndaj dy viktimave gra, ndërsa pas intervistimit palët janë liruar dhe rasti vazhdon në procedurë të rregullt.

Pas vrasjes së mbrëmshme në lagjen “Bregu i Diellit” në Prishtinë, ku një person mbeti i vdekur nga të shtënat me armë zjarri, i dyshuari vazhdon të jetë në arrati.

Sipas Policisë së Kosovës, rasti ka ndodhur të martën rreth orës 20:30. Viktima, dyshohet se është qëlluar me armë zjarri nga një person tjetër, i cili pas incidentit është larguar në drejtim të panjohur.

Njësitë policore dhe ekipi mjekësor kanë dalë menjëherë në vendin e ngjarjes, ndërsa mjeku kujdestar ka konstatuar vdekjen e viktimës.

Policia ka bërë të ditur se i dyshuari ndodhet në kërkim, derisa hetimet për zbardhjen e plotë të rastit janë duke vazhduar.

Me vendim të prokurorit, trupi i pajetë është dërguar në Institutin e Mjekësisë Ligjore për obduksion.

Një person ka humbur jetën dhe një tjetër ka mbetur i plagosur si pasojë e një therjeje me thikë që ndodhi mbrëmjen e së martës në Mitrovicën e Jugut.

Policia njoftoi se viktima është një 37-vjeçar, i cili nuk arriti t’u mbijetojë plagëve të marra. Ndërkohë, një person tjetër u lëndua nga i njëjti i dyshuar dhe po trajtohet në Qendrën Klinike Universitare të Kosovës (QKUK), ndërsa gjendja e tij raportohet të jetë jashtë rrezikut për jetën, raporton Ekonomia online.

Sipas policisë, rasti është raportuar rreth orës 22:00, pasi një person i plagosur me mjet të mprehtë ishte dërguar në Spitalin Rajonal të Mitrovicës së Jugut. Mjeku kujdestar konfirmoi se 37-vjeçari kishte ndërruar jetë si pasojë e plagëve.

I dyshuari, një 31-vjeçar, është arrestuar nga policia dhe me urdhër të prokurorit është ndaluar për 48 orë, ndërsa hetimet për rastin janë duke vazhduar./Ekonomia online.