Për më shumë se tri orë, ka përfunduar intervistimi i Koordinatores së Komiteteve të Vetëvendosjes, Dejona Mihali nga Prokuroria Speciale.

Mihali nuk ka pranuar të flasë për media, veçse ka thënë se ka ardhur “për t’i ndihmuar Prokurorisë Speciale”.

“Nga prokurori u intervistova për ta zbardhur të vërtetën”, tha ajo derisa nuk pranoi që t’iu përgjigjej pyetjeve të gazetarëve.

Prokuroria Speciale gjatë ditës ka bërë të ditur se Dejona Mihali është intervistuar në cilësinë e dëshmitares për disa çështje penale, të cilat kjo Prokurori i ka në hetim.

“Pas interesimit për të marr informacion nga një numër i madh i gazetarëve, Prokuroria Speciale informon se sot, Dejona Mihali, është paraqitur në Prokurorinë Speciale me ftesë të kësaj prokurorie. E njëjta është duke u intervistuar në cilësinë e dëshmitares për disa çështje penale, të cilat kjo prokurori i ka në hetim”, thuhet në njoftimin e PSRK-së.

Tensionet në Lindjen e Mesme po rriten pas një serie sulmesh që kanë shkaktuar dhjetra viktima dhe mijëra të plagosur, duke sjellë në qendër të vëmendjes marrëdhëniet mes Izraelit dhe Hezbollahut. Sulmet, të cilat besohet të jenë kryer nga Izraeli, përfshinin shpërthime të pajisjeve elektronike të lidhura me anëtarët e Hezbollahut, duke rezultuar në vdekjen e 37 personave dhe plagosjen e rreth 3,000 të tjerëve.

Izraeli bombardoi Libanin jugor në një moment kritik, përpara një takimi të Këshillit të Sigurimit të OKB-së, ndërsa analistët paralajmërojnë për rrezikun e një lufte gjithëpërfshirëse. Një ekspert gjeopolitik izraelit theksoi se “asnjëherë më parë nuk kemi qenë kaq afër një lufte”.

Hezbollah ka përjetuar humbje të mëdha, me shpërthimet e fundit që kanë vrarë të paktën 12 njerëz në Liban dhe Siri. Udhëheqësi i Hezbollahut, Hassan Nasrallah, i quajti sulmet “krime lufte”, por nuk dha detaje mbi përgjigjen e grupit.

Rreth 60,000 njerëz janë evakuuar nga Izraeli verior për shkak të kërcënimeve nga Hezbollah. Diplomacia është në qendër të vëmendjes, me Shtëpinë e Bardhë që paralajmëron të gjitha palët kundër një përshkallëzimi të situatës.

Analistët parashikojnë se ndërhyrja ushtarake e Izraelit është një mundësi reale, por jo e pashmangshme. Roli i Iranit dhe mbështetje ndaj Hezbollahut gjithashtu do të ndikojnë në zhvillimet e ardhshme, duke nxitur diskutime për një zgjidhje diplomatike që mund të ndalojë përshkallëzimin e mëtejshëm të konfliktit./UBTNews/

Portugalia ka shpallur një ditë zie kombëtare si pasojë e zjarreve shkatërruese që kanë përfshirë vendin që prej 14 shtatorit, duke shkaktuar vdekjen e shtatë personave. Këto zjarre, që janë konsideruar ndër më të mëdhenjtë në historinë e Portugalisë, kanë djegur një sipërfaqe prej mbi 120 mijë hektarësh, që është dhjetë herë më shumë se kryeqyteti, Lisboa.

Rajonet veriore të vendit, përfshirë Averio, Vila Real, Braga, Viseu dhe Coimbra, kanë pësuar dëme të rënda, duke rezultuar në shkatërrimin e disa fshatrave dhe lëndimin e rreth 160 personave. Qindra individë janë detyruar të braktisin shtëpitë e tyre, ndërsa mijëra automjete janë shkrumbuar nga flakët.

Dita e zisë është shpallur për sot, dhe flamujt në të gjithë vendin janë ulur në gjysmështizë për të nderuar jetët e humbura. Më herët, më 17 shtator, qeveria shpalli gjendje të fatkeqësisë për shkak të situatës emergjente.

Në lidhje me hetimet për zjarret, deri tani janë ndaluar pesë persona, ndërsa Agjencia Kombëtare e Emergjencave dhe Mbrojtjes Civile ka njoftuar se zjarret janë nën kontroll, megjithatë ende vazhdojnë në rreth 30 pika të ndryshme.

Kjo situatë ka shkaktuar një ndjesi të thellë pikëllimi në mesin e popullsisë, e cila tani po përballet me pasojat e mëdha që këto zjarre kanë lënë pas./UBTNews/

Në prag të përfundimit të fazës së parë të punimeve të kanalit kullues të tokave bujqësore në Shtime, ministri i Bujqësisë, Pylltarisë dhe Zhvillimit Rural, Faton Peci bashkë me kryetarin e kësaj komune, Qemajl Aliu u zotuan se në vitin e ardhshëm do të vazhdojë faza tjetër e punimeve për të shkuar drejt finalizimit.

Ky projekt në vlerë mbi 330 mijë euro i financuar nga MBPZHR parashihet të parandalojë përmbytjen e mbi 200 hektarëve tokë bujqësore si dhe të ketë benefite të tjera për banorët e fshatit Godanc i Epërm dhe fshatrave të tjera të kësaj pjese.

Ministri i Bujqësisë, Faton Peci vizitoi nga afër punimet në këtë kanal kullues me gjatësi rreth dy kilometra.

Peci premtoi se pas përfundimit të fazë së parë do të ndajë mjete për vazhdimin e fazave të tjera deri në përfundimin e këtij projekti.

“Jemi për të parë përfundimin e fazës së parë të punimeve të një kanali kullues, i cili do të parandalojë mundësinë e përmbytjes të përafërsisht 215 hektarëve përafërsisht tokë bujqësore, që është investim i Ministrisë së Bujqësisë për Komunën e Shtimes, sikurse ka investime edhe në komunat e tjera. Në funksion të kësaj, vlen të theksohet se kjo është fazë e parë dhe në dy vitet pasuese ne do të vazhdojmë dhe do të zotojmë mjete si ministri e Bujqësisë për të vazhduar projektet e tilla në disa komuna me kanale kulluese. Unë e përgëzoj kryetarin për të gjitha angazhimet dhe punët e mira që i ka bërë në këtë projekt e që priten edhe fazat tjera në vitet e tjera pasuese për Komunën e Shtimes”, tha Peci.

Kryetari i Shtimes, Qemajl Aliu tha se ky projekt është mirëpritur nga të gjithë banorët e kësaj komune, për shkak të ndikimit të tij.

Aliu tha se përveç bujqve, ndërtimit të këtij kanali kullues me investim prej 336 mijë eurove, iu janë gëzuar edhe banorët e fshatit Godanc të Epërm, pasi sipas tij këta të fundit kishin hallin me kundërmimin.

“Një nga projektet më të mirëpritura nga të gjithë banorët e Komunës së Shtimes. Është faza e parë e një projekti, është financuar direkt nga ministria që ju e udhëhiqni. Është një kanal kullues diku rreth dy kilometra që shuma totale e kësaj faze është diku 336 mijë euro dhe përmes këtij kanali shpëtohen pa u përmbytur diku mbi 215 hektarë tokë bujqësore. Kjo është mirëprit jo vetëm nga bujqit për shkak të përmbytjes të tokave bujqësore por edhe e kanë mirëpritur banorët e fshatit Godanc i Epërm ku jemi këtu sepse ky kanal përveç që ka përmbytur, gjatë stinës së verës ka kundërmuar nga ajo toka moçalike që është krijuar për shkak të përmbytjeve. Po shpresojmë që fazat tjera do ta përshkojnë komplet këtë pjesë të Komunës së Shtimes”, tha Aliu.

Kanali i kullimit të tokave bujqësore fillon nga lagjja e “Zymberve” në Godanc të Epërm dhe përfshin tokat që shtrihen nga të dyja anët e lumit duke mbuluar kështu një sipërfaqe prej 215 hektarë, e cila kalon nëpër fshatin Gjergjaj deri tek Lumi Sitnicë.