Të gjithë të interesuarit që synojnë të bëhen pjesë e UBT-së, institucionit lider të arsimit të lartë në Kosovë dhe platformës më të madhe arsimore e inovative në rajon — janë vetëm një hap larg fillimit të rrugëtimit të tyre akademik.

Në UBT kanë mbetur edhe pak vende te lira në disa nga programet me të kërkuara dhe inovative  të momentit, më mundësi zhvillimi në karrierë.

Më qëllim për t’i mbështetur studentët e rinj, UBT ofron 20 për qind bursë studimi për të tri vitet e akademike në programe specifike si: Shëndet Publik dhe Shkenca Mjekësore, Menaxhimi i Patundshmërive dhe Infrastrukturës (Real Estate), Inxhinieri Ndërtimore dhe Infrastrukture, Inxhinieri e Energjisë, Artet dhe Mediat Digjitale, si dhe në degën e Gjuhës Angleze.

Shëndet Publik dhe Shkenca Mjekësore – një nga sektorët më vitalë e me kërkesë të vazhdueshme globale.

Menaxhimi i Patundshmërive dhe Infrastrukturës (Real Estate) – i vetmi program i këtij lloji që përgatit profesionistë për tregun dinamik të punës.

Inxhinieri Ndërtimore dhe Infrastrukturës si dhe Inxhinieri e Energjisë – dy degë kyçe për zhvillimin e qëndrueshëm dhe teknologjik.

Artet dhe Mediat Digjitale – për të gjithë të apasionuarit pas dizajnit, komunikimit vizual dhe teknologjive kreative.

Gjuhë Angleze – program i cili u hap dyert studentëve për karrierë e mundësi ndërkombëtare.

Përveç  në Prishtinë, kërkesë e lartë për regjistrim është shënuar edhe në kampuset rajonale të UBT-së, ku numri i vendeve të mbetura po shkon drejt përmbylljes së plotë të listave.

Veçanërisht në qytetin e Prizrenit, kanë mbetur vetëm edhe pak vende të lira në tre nga programet më të kërkuara: Shkenca Kompjuterike, Juridik, si dhe Arkitekturë dhe Planifikim Hapësinor.

Gjithashtu, procesi i regjistrimeve është drejt fundit edhe për një varg programesh të tjera me karakter të lartë praktik e aplikativ, si: Sistemet e Informacionit, Inxhinieria e Mekatronikës, Studimet e Sigurisë, si dhe në programin unik Muzikë Moderne, Produksion Digjital dhe Menaxhment.

UBT fton të gjithë maturantët dhe studentët e ardhshëm që të shfrytëzojnë këtë mundësi të fundit, të vizitojnë kampuset e UBT-së apo të aplikojnë online për të siguruar vendin e tyre në një nga universitetet më të meituruara për cilësi, infrastrukturë moderne dhe shkallë të lartë të punësimit të diplomuarve.

Nënkryetari i Listës Serbe, Igor Simiq, ka bërë të ditur se ka pranuar një tjetër ftesë nga Prokuroria Speciale e Kosovës për t’u intervistuar në cilësinë e të dyshuarit, së bashku me disa zyrtarë të tjerë të këtij subjekti politik.

Përmes një postimi në rrjetet sociale, Simiq njoftoi se në ftesën e pranuar përmenden dyshime për disa vepra penale, ndër to edhe ajo për “sulm ndaj rendit kushtetues të Republikës së Kosovës”.

Zyrtari i Listës Serbe ka deklaruar se do t’i përgjigjet ftesës së organeve të drejtësisë, ndërsa i ka mohuar të gjitha akuzat, duke pretenduar se veprimet e tij kanë qenë vetëm në kuadër të angazhimit politik.

Nga ana tjetër, Prokuroria Speciale e Kosovës ende nuk ka dalë me një njoftim zyrtar për të sqaruar detajet apo dyshimet konkrete që rëndojnë mbi Simiqin dhe zyrtarët e tjerë të përfshirë në këtë rast.

Shefi i Grupit Parlamentar të Partisë Demokratike të Kosovës (PDK), Arian Tahiri, i ka bërë thirrje Qeverisë së Kosovës që të sjellë sa më parë në Kuvend plotësim-ndryshimin e Ligjit për Dhomat e Specializuara.

Në një konferencë për media, Tahiri bëri të ditur se amendamentet ligjore tashmë janë draftuar dhe proceduar nga grupi i tij parlamentar, ndërsa kërkoi nga ekzekutivi që të mos e zvarrisë këtë proces.

“Miratimi i deklaratës në mbështetje të UÇK-së ishte vetëm hapi i parë që shprehu vullnetin politik të deputetëve. Por kjo nuk mjafton. Institucionet duhet të kalojnë te veprimet konkrete dhe të sigurojnë mbështetje të plotë për ish-krerët e UÇK-së që po gjykohen në Hagë”, deklaroi Tahiri.

Ai u bëri thirrje të gjitha subjekteve politike për unitet dhe pjekuri karshi kësaj çështjeje, duke theksuar se lufta çlirimtare dhe trashëgimia e UÇK-së u përket të gjithë qytetarëve. Tahiri gjithashtu vuri në dukje reagimet e diasporës shqiptare në Evropë e Amerikë, të cilët përmes protestave po shprehin pakënaqësinë ndaj zhvillimeve të fundit procesuale në Hagë. /E.A/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

29 shtator 1993

Klaus Kinkel: Gjermania angazhohet për vendosjen e trupave të NATO-s në Kosovë

Ministri gjerman i Punëve të Jashtme, Klaus Kinkel, këto ditë i deklaroi gazetës “Frankfurter Algemaine” se delegacioni gjerman në Sesionin e 48-të të Asamblesë së Përgjithshme të OKB-së, do të angazhohet për zgjerimin e NATO-s me anëtarë të rinj nga Evropa Lindore, si dhe për vendosjen e forcave të NATO-s në Kosovë me qëllim të evitimit të luftës.

Sipas Kinkelit, pas përfundimit të marrëveshjes së Gjenevës për aspektet e ndarjes së Bosnjës, si hap i madh për vendosjen e paqes në rajon, një konferencë e ngjashme duhet të organizohet për Kosovën dhe për Maqedoninë. Për realizimin e këtij plani, siç shkruan “Frankfurter Allgemaine”, Kinkeli ka arritur të përfitojë mbështetjen e evroperëndimorëve, por edhe jo plotësisht atë të amerikanëve.

29 shtator 1994

Prani e madhe kërcënuese e forcave serbe në Podujevë

Në qendër të Podujevës dhe në rrethinë e saj, sidomos në zonën kufitare Kosovë – Serbi, policia dhe ushtria serbe bashkë me një numër civilësh po demonstrojnë sot forcën e tyre.

Në orën 11:00, forcat e policisë filluan ushtrimin e pushtimit të godinës së administratës komunale, e cila gjendet në qendër të Podujevës.

Njoftohet se disa aksione të milicisë serbe po zhvillohen edhe në ndërtesat e banimit, gjoja me qëllim të kapjes së terroristëve.

Ndërsa nga drithniku i Podujevës, ngrehina dominante në qytet, që gjendet nja pesëqind metra larg qendrës në lindje të Podujevës dhe ku janë vendosur që nga dita e pardjeshme rreth 150 ushtarakë serbë, sot po shtihet me murtaja shkollore.

Komisioni për Informim i Degës së LDK-së në Podujevë njoftoi se gjatë ditës së djeshme u bënë stërvitje ushtarake në fshatrat Përpellac, deri në orën 22:00 dhe në Dumnicë, deri në orën 19:00.

Në Dumnicë forcat ushtarake serbe janë vendosur në lokalin e vjetër të shkollës fillore.

Gjatë ditës së djeshme mbi Podujevë dhe rrethinë ka pasur edhe fluturime të aeroplanëve dhe helikopterëve ushtarakë.

Dje pas dite në nga Prishtina në drejtim të Podujevës shkuan shumë tankse.

Disa dëshmitarë thanë se edhe sot në mëngjes nga Prishtina në drejtim të Podujevës shkuan mjete të motorizuara të ushtrisë serbe.

Podujeva me rrethinë ka qenë vitin e fundit në shënjestër të represionit serb. Me pretekst të kërkimit të armëve janë bastisur mbi 1.000 familje, ndërsa numri i shqiptarëve të keqtrajtuar e të rrahur është edhe më i madh. Një numër i madh shqiptarësh janë arrestuar e dënuar, kurse disa prej tyre janë vrarë gjatë aksioneve të policisë serbe.

Javëve të fundit është shtuar represioni kundër udhëheqësve lokalë shqiptarë,  sidomos kundër funksionarëve të LDK-së dhe gazetarëve.

Dega e LDK-së vlerëson se gjendja në komunën e Podujevës është tensionuar edhe më shumë sot nga prania e jashtëzakonisht e madhe e forcave serbe.

Prania e forcave serbe është shtuar edhe në komunën e Prishtinës.

Sot rreth orës 11 filluan të shtënat me armë në afërsi të lagjes “Dragodani”, në pjesën perëndimore të Prishtinës. Banorët e shqetësuar të kësaj lagjeje thonë se po shtihet me armë të llojllojshme. Prania dhe lëvizjet e mëdha të ushtrisë përfshijnë sot territorin prej kazermës ushtarake në rrugën Prishtinë – Mitrovicë e deri te varrezat e qytetit të Prishtinës.

Si në Podujevë, ashtu edhe në Prishtinë zyrtarët e mediumet serbe nuk kanë paralajmëruar dhe nuk kanë dhënë kurrëfarë njoftimi për shkakun e kësaj pranie të shtuar të forcave serbe dhe të daljes së ushtrisë nga kazermat ushtarake.

29 shtator 1995

Ndërhyrje e policisë në lokalet e lidhjes së arsimtarëve shqiptarë “Naim Frashëri” në Prishtinë

Dy inspektorë të sigurimit serb ndërhynë sot në lokalet e lidhjes së arsimtarëve shqiptarë “Naim Frashëri” në Prishtinë.

Ata hynë në zyrë në orën dhjetë dhe qëndruan deri në 12:15.

Ata kërkuan kryetarin e LASH-it Rexhep Osmanin dhe Zijadin Gashin, anëtar i Kryesisë së LASH-it dhe kryetar i Këshillit të Arsimit të komunës së Prishtinës.

Inspektorët bastisën të gjitha zyrat e LASH-it dhe morën materiale të ndryshme. Inspektorët nuk lanë dëshmi për materialin që e morën.

Inspektorët legjitimuan punëtorët në zyrë dhe ata që shkuan në zyrë me punë të ndryshme.

Një grup arsimtarësh nga shkolla fillore “Rilindja” të fshatit Çifllak i komunës së Rahovecit ishin në Prishtinë, respektivisht në LASH “Naim Frashëri” për t’u konsultuar me zotin Rexhep Osmani për disa çështje të punës në shkollë, mirëpo në lokalin e LASH-it ata gjetën punëtorët e sigurimit serb.

Arsimtarët thanë se u morëm në pyetje për shkaqet e ardhjes së tyre në LASH.

Arsimtarëve Halit Sahitajt, Tahir Thaçit, Sokol Bajraktarit dhe Hasan Thaçit iu morën letërnjoftimet.

Arsimtarët u pyetën për një orë e gjysmë se për çfarë shkaku kishin ardhur në Prishtinë, kend e kërkonin, kur mbahet mbledhja, në cilën shkollë punojnë, cili është drejtor i shkollës, nga përse shkolla quhet “Rilindja”, çka u duhet Rexhep Osmani, tjerë.

Arsimtarët nga fhati Çiflak i thanë QIK-ut se ishin parë edhe arsimtarë të tjerë nga shkolla fillore “Rilindja” e Keçekollës, zotërit Hamiti, Idrizi, pas disa minutave erdhën edhe disa tjerë nga Gjakova, Lipjani dhe Dragashi.

Sjelljet e organit të sigurimit serbë nuk ishin të natyrës brutale, përveç të disa provokacioneve të vogla.

29 shtator 1997

Njoftim i DPA për gjendjen në Kosovë

Agjencia DPA njofton se udhëheqësi politik i shqiptarëve të Kosovës, dr. Ibrahim Rugova është shprehur kundër demonstratave të caktuara të studentëve.

Në njoftim thuhet:

“Neve nuk na nevojiten demonstratat nëpër qytete, që të vijë deri te keqësimi i gjendjes në Kosovë”, tha dr. Rugova të premten në kryeqytetin e Kosovës në Prishtinë, siç njofton agjencia e lajmeve e Beogradit “Beta”.

Unioni i Studentëve shqiptarë ishte kërcënuar më parë në organizimin e demonstratave më 1 tetor dhe marrjen me dhunë të objekteve shkollore dhe universitare.

“Ne do të ndërmarrim të gjitha masat, që të mos ndërpritet iniciativa ndërkombëtare për zgjidhjen e problemit të Kosovës”, tha dr. Rugova.

Ai theksoi se bota e jashtme po bën presion mbi Beogradin, në mënyrë që të realizohet Marrëveshja për normalizimin e arsimit në gjuhën shqipe në Kosovë.

Rugova shprehu shpresën, se së shpejti do të vijë deri te një dialog në midis serbëve dhe shqiptarëve lidhur me këtë çështje. Përfaqësues të ambasadave të jashtme në Beograd, vërtetuan faktin në Beograd se po qëndrojnë në lidhje të vazhdueshme me Beogradin dhe Prishtinën, në mënyrë që të pengohen konfliktet e mundshme.

Nxënësit dhe studentët shqiptarë protestojnë në mënyrë paqësore që prej ditësh në Prishtinë, kundër sistemit arsimor serb. Në shëtitjet e çdo mbrëmshme në rrugën kryesore, të enjten kanë marrë pjesë disa mijëra njerëz.

Me këtë protestë, ata duan të arrijnë kthimin në objektet shkollore dhe normalizimin e arsimit. Marrëveshjen e patën nënshkruar në shtatorin e vitit të kaluar, kryetari i atëhershëm serb, Millosheviq dhe Rugova.

Policia serbe deri më tash i lejoi protestat. Gazeta qeveritare “Politika” (Beograd), lajmëroi të premten “masa të caktuara” kundër “këtyre protestave”. Kështu, policia serbe, zonën për këmbësorë, e cila ekziston që prej vitesh, nga e enjtja e ka hapur përsëri për trafik, kështu që protestuesit mund t’i shfrytëzojnë vetëm trotuaret.

Më 1989, Beogradi ia ka hequr krahinës së banuar me 90 për qind shqiptarë autonominë dhe që atëherë qeverisë me ligje të veçanta dhe prani të madhe të policisë.

Nxënësit shqiptarë e bojkotojnë që prej gjashtë vitesh arsimin serb dhe kanë ndërtuar një sistem paralel shkollor të panjohur nga Beogradi. Ky mësim zhvillohet në banesa private, përderisa shkollat vijohen vetëm prej fëmijëve serbë, njoftonte DPA.

29 shtator 1998

Granatohen fshatrat e Shtimes dhe Jezerci i Ferizajt

Prishtinë, 29 shtator (QIK) – Forcat serbe kanë vazhduar edhe sot granatimin e fshatrave të Shtimes dhe Jezercit të Ferizajt.

KI i Degës së LDK-së në Shtime njofton se forcat serbe po përdorin artilerinë e rëndë në përpjekje për të depërtuar në Grykën e Devetakut, ndërkohë që po granatohen edhe fshatrat Topillë, Llanishtë, Petrovë e Mollopolc të Shtimes, si dhe fshati Jezerc i Ferizajt, që ndodhet afër këtyre fshatrave. Thuhet se sulmi i sotëm është i intensitetit më të madh deri tash. Në drejtim të këtyre fshatrave granatime ka pasur edhe gjatë natës.

Nga fshatrat e sulmuara sot po del tym e flakë. Tym del sidomos nga Petrova, një nga fshatrat më të ndërtuara të kësaj komune, gjysma e të cilit u dogj në fund të gushtit, ndërsa shtëpitë e mbetura po digjen tash.

Njoftohet se rreth 700 banorë, kryesisht gra, fëmijë e pleq, kanë mbetur nën rrethimin e forcave serbe dhe nën qiellin e hapur.

Për shkak të ripërtëritjes së sulmeve serbe, mësimi u ndërpre në shkollën fillore në Reçak dhe në shkollën e mesme në Shtime, ndërkohë që në shkollën fillore “Emin Duraku” në Shtime mësimi u mbajt edhe sot, ndonëse në afërsi të shkollës janë vendosur forca serbe.

Tre të vrarë gjatë sulmit serb në Plloçicë të Malishevës

Gjatë sulmit të forcave serbe në fshatin Plloçicë të Malishevës janë djegur të gjitha shtëpitë dhe janë vrarë së paku tre shqiptarë.

KI i Degës së LDK-së në Malishevë njofton se janë vrarë Dervish Cen Maloku (60), Sejdi Bali Gashi (60) dhe Deli Bali Gashi. Dyshohet se ka edhe të tjerë të vrarë.

Bëhet me dije se popullata e larguar nga ky fshat është strehuar në malet e Gollubovcit, ndërsa disa banorë që forcat serbe i zunë në fshat, kryesisht pleq, por edhe disa të rinj, u ngarkuan në kaminë të forcave serbe dhe deri tash nuk ka informa cione ku janë dërguar.

Gllogoc: Në Krojkovë u gjetën trupat e 7 shqiptarëve të vrarë e të masakruar

Sot në Krojkovë të Gllogocit, u gjetën trupat e 7 shqiptarëve të vrarë e të masakruar nga forcat paramilitare serbe, ndërsa në të njëjtin fshat janë plagosur edhe 4 shqiptarë të tjerë.

Xhemë Binaku, aktivist i NKMDLNJ-së në Gllogoc njofton se në këtë fshat janë vrarë e masakruar, Fitim Sadri Elshani (22), Vehbi Ejup Hoxha (48), Faik Aziz Braiqi (16), Fahredin Sejdë Braiqi, Sabit Metë Buzllaku (62), Fejzë Brahim Braiqi (45) dhe Afrim Ramadan Braiqi (30).

Në fshatin Krojkovë, dyshohet se nga forcat serbe është vrarë edhe Metë Elshani.

I njëjti burim bën të ditur se në këtë fshat janë plagosur, Naser Imer Shala, Lindita Ramadan Podrimçaku, Besnik Aziz Braiqi dhe Abedin Fejzë Braiqi. Ky i fundit është arrestuar nga forcat serbe dhe ende po mbahet në arrest.

Ndërkaq në fshatin Shtrubullovë, bëhet e ditur se forcat serbe kanë zënë rob 28 civilë shqiptarë, për fatin e të cilëve ende nuk dihet asgjë.