Sport

Shorti i kupës, flasin përfaqësuesit e klubeve

Published

2 years ago

February 19, 2025

UBTNews

Në ambientet e Federatës së Futbollit të Kosovës është bërë tërheqja e shortit për fazën çerekfinale të Kupës së Kosovës në futboll. Në këtë fazë kanë arritur të kualifikohen tetë skuadra, të cilat do të garojnë për katër vende në gjysmëfinale.

Skuadrat që janë kualifikuar për çerekfinale janë: Drita, Prishtina, Vëllaznimi, Drenica, Malisheva, Llapi, Prishtina e Re dhe Ferizaj.

Nga shorti i hedhur kanë rezultuar çiftet e mëposhtme:

Drenica-Ferizaj

Malisheva-Llapi

Prishtina e Re-Drita

Vëllaznimi-Prishtina

Drejtori sportiv i Dritës, Valon Zymberi, pas shortit theksoi se Drita duhet të jetë shumë e kujdesshme përball Prishtinës së Re sepse kjo skuadër mund të shkaktojë befasi.

“Në momentin që jemi në këtë pikë të garës të gjitha ekipet të cilat janë kualifikuar dhe të cilat kanë qenë në short janë potencialisht ekipe të niveleve të njëjta kështu që normalisht që shorti deshi që të jemi përballë Prishtinës së Re, një ekip që ka treguar jashëtzakonisht cilësi edhe në këtë pikë të garës mendoj që duhet të jemi shumë të përgjegjshëm dhe të kujdesshëm sepse çdo kundërshtar mund të shkaktoj befasi”, tha Zymberi.

Nga ana tjetër, përfaqësuesi i Prishtinës Kushtrim Sopa, skuadra e të cilit do të ballafaqohet me Vëllaznimin, deklaroi se përballja me Vëllaznimin nuk është aspak e lehtë, por që Prishtina synon ta eliminojë skuadrën gjakovare

“Prishtina sikur në çdo raund të kupës edhe në këtë raund secilin prej kundërshtarëve e respekton maksimalisht e në veçanti kuptohet Vëllaznimi është njëri prej klubeve më me traditë në futbollin e Kosovës dhe njëra prej klubeve më të trofeshme në futbollin kosovar para dhe pas luftës, kështu që me respektin maksimal ndaj tyre po do të ballafaqohemi sigurisht që Prishtina i ka objektivat e veta dhe pretendojmë të kalojmë tutje”, theksoi Sopa.

Vlerësim të lartë për Prishtinë pati pikërisht rivali i tyre, drejtori sportiv i Vëllaznimit, Edi Luzha. Ai theksoi se në këtë ballafaqim Prishtina është skuadër favorite, por që Vëllaznimi do të jap maksimumin për t’i befasuar ata.

“Pikësëpari është një lajm i mirë që pas një kohe Prishtina dhe Vëllaznimi do të ndeshen mes vete kur dihet historia e dy klubeve dhe besoj që ka do të jetë një shfaqje shumë e mirë mbi të gjitha. Ndërsa, sa i përket se kush është favorit, ajo vetëm dihet sepse Prishtina ka ekip shumë të mirë, shumë kualitative, ne jemi të fokusuar në ligë, por kjo nuk na ndalon që të luftojmë për ngjyrat e klubit gjë të cilën do ta bëjmë edhe me Prishtinën përpjekjen maksimale ndërsa në fund të fitojë më i miri”, theksoi Luzha.

Ndeshjet e kësaj faze do të zhvillohen në mesjavën e 26 shkurtit.

Related Topics:futboll Kosove Kupa e Kosoves

Up Next

Takohen Agim Ademi dhe Armand Duka

Don't Miss

Hidhet shorti për çerekfinalet e Kupës së Kosovës, këto janë çiftet

Sport

Briken Calja i artë në “Taranto 2026”, Shqipëria fiton medaljen e dytë të artë

Published

1 hour ago

September 1, 2026

UBTNews

Briken Calja i ka sjellë Shqipërisë medalje të artë në Lojërat Mesdhetare “Taranto 2026”.

Peshëngritësi shqiptar garoi të martën paradite në kategorinë deri në 75 kilogramë, duke shkëlqyer në stilin e shkëputjes.

Calja fitoi medaljen e artë në shkëputje, pasi ngriti me sukses peshën maksimale prej 154 kilogramësh.

Në stilin e shtytjes, shqiptari u rendit i treti, duke fituar medaljen e bronztë me një peshë maksimale prej 184 kilogramësh.

Me këtë sukses, Calja ka kontribuar në një paraqitje të mirë të Shqipërisë në “Taranto 2026”, ku deri tani ka fituar dy medalje të arta, një të argjendtë dhe dy të bronzta.

Foto: euronews

D.L

Sport

Sigurohet medalja e shtatë për Kosovën, Islam Selmani në finale

Published

2 hours ago

September 1, 2026

UBTNews

Islam Selmani ka siguruar medaljen e shtatë për Kosovën në Lojërat Mesdhetare “Taranto 2026”, duke shkruar njëkohësisht histori për karatenë kosovare.

Karateisti ynë ka triumfuar në gjysmëfinale dhe është kualifikuar në finale, duke i siguruar Kosovës medaljen e parë në karate në këto Lojëra Mesdhetare.

Selmani tani do të luftojë për medaljen e artë, me synimin për ta kurorëzuar paraqitjen e tij me titullin e kampionit.

D.L

Sport

Serbia shmangu përballjen me Kosovën në 3×3, Çoviq e konfirmon

Published

2 hours ago

September 1, 2026

UBTNews

Sportistët e Kosovës janë përballur në disa raste me përfaqësuesit e Serbisë në Lojërat Mesdhetare “Taranto 2026”. Një tjetër përballje mes dy vendeve ishte paraparë të zhvillohej edhe në basketbollin 3×3 në konkurrencën e meshkujve, por ajo nuk u realizua.

Ekipi i Serbisë në basketbollin 3×3 nuk u paraqit në Lojërat Mesdhetare, ndërsa tashmë është bërë e qartë se një nga arsyet ishte shmangia e përballjes me Kosovën. Këtë e ka konfirmuar edhe presidenti i Federatës së Basketbollit të Serbisë, Nebojsha Çoviq.

Çoviq, i cili është i njohur edhe për angazhimin e tij politik dhe qëndrimet kundër Kosovës, ka deklaruar se Serbia nuk kishte pranuar të luante ndaj Kosovës.

Kosova dhe Serbia ishin shortuar në të njëjtin grup në basketbollin 3×3, së bashku me Turqinë dhe Portugalinë. Megjithatë, Serbia nuk garoi fare, ndërsa nga grupi në fazën tjetër avancuan Turqia dhe Portugalia. Kosova, ndërkohë, i humbi të dyja ndeshjet e zhvilluara.

Sipas Çoviqit, Kosova dhe Serbia nuk është dashur të vendosen në të njëjtin grup. Ai pretendon se Federata e Basketbollit të Serbisë, Ministria e Sportit dhe Komiteti Olimpik i Serbisë kishin paralajmëruar më herët se përballjet mes dy vendeve nuk duhej të ndodhnin.

“Që më 2 qershor, si Federatë e Basketbollit të Serbisë, si Ministri e Sportit dhe Komiteti Olimpik, kemi paralajmëruar se situata në Lojërat Mesdhetare nuk është në përputhje me qëndrimet e FIBA-s. FIBA ka një vendim që, kur ekziston mundësia që të takohen Serbia dhe Kosova, të bëhet short i dirigjuar. Kjo nuk është bërë”, ka thënë Çoviq në një program të “Radio Beogradit”.

Ai ka shtuar se Serbia nuk e njeh Kosovën dhe se për këtë arsye nuk kishte pranuar të luante ndaj saj.

Në Lojërat Mesdhetare “Taranto 2026”, Kosova është përballur me Serbinë edhe në sporte të tjera, përfshirë taekwondonë, pingpongun dhe xhudonë. Në pingpong, përballja ka ndodhur edhe në konkurrencën ekipore, përkatësisht në çiftet miks.

Në basketbollin ndërkombëtar, jashtë kuadrit të Lojërave Mesdhetare, përballjet Kosovë–Serbi nuk lejohen. E njëjta praktikë aplikohet edhe në futboll dhe hendboll, ku shorti modifikohet kur ekziston mundësia që dy përfaqësueset të përballen. Përballjet mes Kosovës dhe Serbisë, si dhe ato mes klubeve të të dyja vendeve, evitohen për arsye sigurie.

Në aspektin sportiv, Kosova nuk arriti rezultate të mira në basketbollin 3×3 në “Taranto 2026”, duke i humbur të gjitha ndeshjet në të dyja konkurrencat. Megjithatë, vëmendjen më të madhe e mori pikërisht një ndeshje që nuk u zhvillua, ajo që ishte paraparë mes Kosovës dhe Serbisë.

D.L