Kryeministri në detyrë i Republikës së Kosovës ka përgëzuar Kombëtaren Shqiptare pas triumfit 1-0 ndaj Andorrës, fitore që i siguroi kuqezinjve kalimin në fazën playoff të kualifikimeve për Botërorin 2026.

Në një reagim në rrjetet sociale, ai u shpreh se Shqipëria vazhdon ëndrrën drejt Kupës së Botës, duke vlerësuar maksimalisht paraqitjen e skuadrës dhe përkushtimin e futbollistëve.

“Shqipëria kalon, ëndrra për Botërorin 2026 vazhdon. Përgëzime lojtarëve dhe urime gjithë shqiptarëve!”, ka shkruar Kurti

Fitorja minimaliste ndaj Andorrës, falë golit vendimtar të Asllanit, e mban Shqipërinë në garë për një nga vendet që çojnë në fazën finale të Botërorit, ndërsa mbështetja nga Kosova vjen si konfirmim i marrëdhënieve të ngushta mes dy vendeve në sport dhe më gjerë./S.K/KP/

Trajneri i Kombëtares shqiptare, Silvinjo, u shpreh entuziast pas fitores 0-1 ndaj Andorrës, pasi që i siguroi Shqipërisë kualifikimin historik në “play off”-in e Botërorit 2026.

“Ishte ndeshje e vështirë. Ne po rritemi, por nuk jemi Gjermania që shkon e fiton 6-0. Dikush thotë shko e u bë 6, por futbolli nuk është kështu”, tha Silvinjo

Ai kujtoi se edhe skuadra të mëdha kanë vuajtur kundër Andorrës.

“Anglia e ka mundur 1-0, Letonia barazoi, Serbia ishte 1-1 në pjesën e parë. Duhet t’i respektojmë. Unë akoma nuk e kam kuptuar që për herë të parë po shkojmë në “play-off”. Është një natë e mrekullueshme. Po pyesja si ishin të tjerët, pashë që dikush ishte i mërzitur, nuk e kuptoj pse. Duhet të festojnë të gjithë shqiptarët, brenda dhe jashtë vendit. Nuk ka ndodhur kurrë më parë. Jam krenar për të gjithë. Më vjen keq për Pajazitin e Caken. Edhe ata që nuk luajtën janë pjesë e rrugëtimit”, u shpreh ai.

Trajneri rikujtoi paraqitjet pozitive të skuadrës në kualifikueset e Botërorit.

“Kemi humbur vetëm në Londër ndaj Anglisë. Nuk e di nëse ndonjëri nuk është i kënaqur, por për mua arritja e “play-off”-it me një ndeshje para fundit është diçka e jashtëzakonshme”.

Silvinjo e mbylli prononcimin me një mesazh për tifozët.

“Tifozët meritojnë gjithçka. Kur njerëzit në Tiranë të thonë faleminderit për punën, kjo të jep forcë. Sonte është nata e tyre”, tha ai./S.K/KP/

Ambasadori belg në Kosovë, Gregoire Cuvelier, me rastin e Ditës së Mbretit, tha se Belgjika është mbështetëse e palëkundur e Kosovës në integrimin evropian.

Ai me këtë rast përkujtoi faktin se Belgjika dhe Kosova kanë bashkëpunime në shumë fusha, veçanërisht në luftën kundër krimit të organizuar.

“Në shkurt të vitit 2008, Belgjika e njohu pavarësinë e Kosovës shumë shpejt, më 24 shkurt. Që nga ajo kohë, Belgjika ka qenë një mbështetëse e palëkundur e Kosovës në procesin e saj të integrimit euroatlantik. Sa i përket marrëdhënieve dypalëshe, më lejoni të përmend bashkëpunimin tonë shumë të suksesshëm në luftën kundër krimit të organizuar, një çështje që trajtohet nga një atashe e Policisë Federale, Eva Mielnicki, e cila është sonte këtu me ne. Më lejoni gjithashtu të përmend se një pjesë e këtij bashkëpunimi zhvillohet përmes projektit evropian APEC, oficerët e projektit të të cilit janë gjithashtu sonte këtu me ne. Dhe më lejoni të përgëzoj autoritetet e Ministrisë së Drejtësisë, të Ministrisë së Brendshme, si dhe të Policisë dhe Gjyqësorit të Kosovës, të cilët janë partnerë konstruktivë dhe efektivë të autoriteteve belge në këtë fushë. Muajt e fundit janë karakterizuar nga kontakte të shumta në nivel të lartë ndërmjet dy vendeve tona”, tha ai.

Kryeministri në detyrë Albin Kurti tha se Kosova dhe Belgjika ndajnë vlera të përbashkëta dhe se marrëdhënia mes dy vendeve është e bazuar në një ekuilibër demokratik.

“Marrëdhënia jonë është e bazuar në një ekuilibër demokratik. Ajo mbështetet në demokraci, në fatin tonë të përbashkët evropian dhe në besimin se paqja dhe drejtësia duhet të mbizotërojnë gjithmonë. Belgjika qëndroi përkrah Kosovës në momentet më kritike, që nga koha e rezistencës paqësore kundër shtypjes në vitet 90-ta, deri te lufta për çlirim dhe pavarësi në vitet 1998–1999, që i dha fund viteve të vuajtjeve. Më pas, Belgjika vazhdoi të mbështesë rindërtimin, zhvillimin dhe shtet-formimin e Kosovës. Belgjika ishte ndër të parat që artikuloi bazën ligjore dhe morale të ndërhyrjes perëndimore të bashkuar në Kosovë, dhe ndër të parat që njohu pavarësinë tonë në vitin 2008. Që atëherë, ajo ka mbetur një mbështetëse kryesore dhe e qëndrueshme e sovranitetit dhe integrimit tonë euroatlantik. Ne e vlerësojmë thellësisht këtë mbështetje, jo vetëm me fjalë, por edhe me vepra”, theksoi Kurti.

Në pritjen me rastin e Ditës së Mbretit i pranishëm ishte edhe kryetari i Kuvendit, Dimal Basha, zyrtarë të ndryshëm politike si dhe diplomatë të akredituar në Kosovë. Në ceremoni të pranishmit patën mundësinë edhe të shijojnë birrën belge, e njohur për cilësinë dhe traditën e saj shekullore./S.K/KP/

Në protestën e paralajmëruar nga Organizata e Veteranëve të Luftës së UÇK-së (OVL-UÇK) më 16 nëntor në Strasburg, pritet të marrin pjesë rreth 6 mijë protestues nga gjitha trojet shqiptare. 

Protesta do të mbahet përballë Asamblesë së Përgjithshme të Këshillit të Evropës në shenjë kundërshtimi ndaj padrejtësive që po u bëhen ish-krerëve të UÇK-së në Hagë.

Kryetari i OVL-UÇK-së, Hysni Gucati tha se përgatitjet janë drejt përfundimit dhe se janë bërë koordinime me këshillin organizativ në Evropë dhe me mërgatën shqiptare.

“Ne jemi në fazën përfundimtare të përgatitjeve, është këshilli organizativ në Evropë që e kemi bërë para disa ditësh, kemi pasur takime me shumicën e shteteve të Evropës me mërgatën, kjo mërgatë është për lavdatë që na ka ndihmuar në këtë rast. Ne shprehom që me datë 16 nëntor në ora 13:00 para Asamblesë së Përgjithshme të Këshillit të Evropës, do të jemi prezent aty dhe do të ngrisim zërin pikërisht ku në atë objekt është ngritur një rezolutë për Gjykatën Speciale, një rezolutë e një njeriu të çmendur të Dick Marty, i cili ka mashtruar deputetë e Evropës me një dokumentacion, me një shpifje me ambasadorin serb dhe ambasadorin rus dhe e ka bërë atë rezolutë që gjoja në Shqipëri ka ekzistuar një shtëpi e verdhë. Kjo është një gjykatë e njëanshme, një gjykatë e padrejtë, ku në botë nuk ekziston gjykatë e njëanshme,” tha ai.

Sipas tij, shumë pjesëmarrës nga Kosova, Shqipëria dhe Maqedonia e Veriut kanë siguruar bileta lirë për në Bazel dhe Stuttgart.

“Sipas informacioneve, nga Prishtina nuk besoj që do të ketë autobusë, kanë gjetur bileta lirë nga Tirana dhe Shkupi, kanë gjetur për Bazel edhe Stuttgart kanë marrë bileta shumë lirë, që fati i jonë dhe i qytetarëve që do të udhëtojnë nga Kosova, Maqedonia dhe Shqipëria kanë gjetur bileta për Bazel të Zvicrës kanë gjetur shumë lirë. Është një numër bukur i madh, kryetari i këshillit organizativ atje, ne presim që numri të jetë mbi 5 deri 6 mijë veta, të jenë para Strasburgut atë ditë. Nga Kosova besoj do të kalojë numri mbi 1000 udhëtarë që do të vijnë,” tha Gucati.

Gucati tha se të gjitha hotelet në Strasburg tashmë janë të rezervuara nga shqiptarët që kanë konfirmuar pjesëmarrjen, duke shtuar se shumë prej tyre janë detyruar të rezervojnë në periferi.

“Në Strasburg kemi informacione të sakta, nuk ka vend në hotele, që kanë bërë rezervimin shqiptarët, e kanë bllokuar Strasburgun. Na kanë lajmëruar se më nuk ka vend, tash janë duke u larguar në periferi apo qytete të tjera duke marrë hotele, shqiptarët kanë shkuar deri në Kolmar. Ne nuk kemi besuar që edhe në Holandë do të bëhen mbi 6 mijë protestues, por janë bërë 11 mijë e 500 sipas raportit policor. Ne nuk kemi besuar as për Tiranë, mbi 82 mijë, 47 mijë protestues kanë qenë në Prishtinë atë ditë,” tha Gucati.

Ai theksoi se organizatat e dala nga lufta nuk kanë marrë asnjë ndihmë financiare nga qeveria dhe se të gjitha aktivitetet janë mbështetur nga donatorë.

“Organizatat e dala nga lufta nuk kanë pare, qeveri as një lekë nuk na ka ndihmuar deri më sot. Në Holandë prapë na kanë ndihmuar donatorët,” u shpreh ai./S.K/EO/