Dikur, xhihadistët zbatonin ligjin e tyre të sheriatit në sheshin Al-Naim të Rakës, duke kryer ekzekutime prej më të ndryshmeve ndaj atyre që ata i konsideronin apostatë apo kriminelë.
Vetëm pak vite më parë, ky shesh ishte skena e zymtë për ekzekutimet publike. Ndërsa sot, sheshi në fjalë është shndërruar në një vend takim për të dashuruarit.
“Më parë shmangnim kalimin pranë tij që të mos shihnim gjak dhe tmerr”, thotë Hussein, një banor i Rakës.
Rrethi i trafikut Al-Naim, që në shqip nënkupton lumturi dhe rehati, ishte çdo gjë tjetër veçse kuptimit të tij – kur grupi ISIS drejtonte Rakën, ish-kryeqytetin e tyre de fakto sirian – nga viti 2014 e deri më 2017.
Banorët e quajtën atë “rrethrrotullimi i ferrit”.
Rakë, Siri.
Policia e ISIS e bëri të pamundur takimin e të dashuruarve, qoftë edhe privatisht, pa rrezikuar vdekjen.
“Unë kurrë nuk guxova të takohesha personalisht me të dashurën time; ne flisnim vetëm në telefon, nga frika se mund të na vrisnin me gurë si ndëshkim”, thotë Hussein.
Dy vjet pasi ISIS u shpall i mundur në Siri, sheshi i rinovuar është shumë ndryshe nga ajo që njerëzit ishin mësuar të shihnin aty.
Kolona me harqe janë ndërtuar rreth një shatërvani të ri qendror, duke zëvendësuar gardhin metalik në thumbat e të cilit një xhihadist i të ashtuquajturit Shteti Islamik dikur vuri në shtyllë kokat që sapo i kishte prerë, përpara se të pozonte për një foto.
Stola janë vendosur pranë pishinave anësore eliptike. Natën, dritat shumëngjyrëshe e kthejnë sheshin në një atraksion për banorët.
Tani rrethrrotullimi është i rrethuar nga kafene dhe restorante, duke e bërë atë një vend të njohur për familjet dhe çiftet.
“Sheshi Al-Naim është kthyer nga ferri në parajsë… edhe të dashuruarit vijnë këtu tani”, tha 24-vjeçari Manaf.
Mohammad al-Ali, 37 vjeç dhe gruaja e tij ulen krah për krah, duke parë tre fëmijët e tyre teksa luajnë rreth një prej pishinave bosh, skenë kjo që ishte e paimagjinueshme para katër vitesh.
“Ne kurrë nuk i sollëm fëmijët këtu [në mënyrë] që të mos shihnin kokat e prera të varura”, tha ai për AFP.
“Por sot sheshi është një hapësirë për familjet dhe fëmijët”.
Jeta po shtohet ngadalë në Raka, ku ndërtesat e rrafshuara dhe gjurmët e të ashtuquajturit Shteti Islamik japin kujtime të qarta të epokës së errët të sundimit xhihadist.
Pikërisht në këtë vend, grupi vrau me gurë njerëz për vdekje, hodhi nga çatitë burra gjoja homoseksualë dhe nxirrte në ankand gra nga minoriteti Yazidi si skllevër.
Disa kilometra larg sheshit Al-Naim, një tjetër rrethrrotullim më i vogël dikur famëkeq, i përdorur nga i ashtuquajturi Shteti Islamik për ekzekutime, ka rifituar gjithashtu gjallëri, kjo për shkak të vendndodhjes së tij pranë një tregu popullor.
“Ky rrethrrotullim na kujton tragjedinë që jetuam… na kujton vdekjen dhe vuajtjet”, thotë Ahmad al-Hamad, i cili po kalonte sheshin me karrocën e tij.
“Ne kemi parë prerjen e kokave dhe duarve dhe ekzekutimet e kryera duke përdorur shpata”, thotë ai.
Disa nga të afërmit e tij u ekzekutuan në këtë shesh.
“Ne kishim frikë edhe të kalonim këtu”, thotë ai./UBTNews/
Futbollisti Henrikh Mkhitaryan është detyruar të lërë fushën në minutën e 32-të të ndeshjes kundër Napolit për shkak të një problemi fizik.
Sipas testeve mjekësore të kryera në Institutin “Humanitas” në Rozzano, mesfushori armen ka pësuar tendosje muskulore në muskulin semitendinosus të kofshës së majtë.
Interi njoftoi se gjendja e tij do të rivlerësohet javën e ardhshme, ndërsa koha e rikuperimit ende nuk është përcaktuar.
Skuadra e Cristian Chivu do të përballet të mërkurën (29 tetor) me Fiorentinën në “San Siro”, ndërsa më 2 nëntor udhëton në Verona për sfidën ndaj ekipit vendas./S.K/KP/
Kevin De Bruyne rrezikon ta mbyllë para kohe vitin 2025 pas lëndimit të pësuar në ndeshjen Napoli–Inter.
Mesfushori belg u detyrua të largohej nga fusha menjëherë pas shënimit të golit nga penalltia, pasi ndjeu dhimbje në kofshën e djathtë dhe më pas u pa me paterica në pankinë.
Sipas Gazzetta dello Sport, dyshohet për një këputje të rëndë në bicepsin femoris, e cila mund ta mbajë jashtë fushave për disa muaj. Napoli shpreson që dëmtimi të mos ketë prekur zonën ku lojtari u operua në vitin 2023 gjatë kohës së tij te Manchester City.
Nëse konfirmohet se bëhet fjalë për një dëmtim serioz, De Bruyne mund t’i nënshtrohet një operacioni, gjë që do ta detyronte të mungojë për pjesën e mbetur të sezonit. Edhe në rastin më të mirë, ai pritet të qëndrojë jashtë për dy ose tre muaj, duke i dhënë fund praktikisht vitit 2025.
Napoli ndërkohë mund të detyrohet të bëjë ndryshime në listën e Ligës së Kampionëve, me mundësi që në vend të belgut të përfshihet njëri mes Marianuccit apo Mazzocchit. Rezultatet e ekzaminimeve priten të përcaktojnë kohën e rikuperimit të mesfushorit./S.K/KP/
Humbja ndaj Lazios i ka kushtuar trajnerit Igor Tudorit, ku klubi bardhezi ka vendosur ta shkarkojë trajnerin kroat pas një serie rezultatesh të dobëta në fillim të këtij sezoni.
Sipas La Gazetta dello Sport detyrën e përkohshme të trajnerit do ta marrë Massimo Brambilla, deri në emërimin e pasardhësit të ri.
Nën drejtimin e Tudorit, Juventusi ka zhvilluar tetë ndeshje në Serie A, ku ka grumbulluar vetëm 12 pikë dhe ndodhet aktualisht në vendin e tetë të renditjes.
Në fazën e grupeve të Champions League, bardhezinjtë kanë siguruar vetëm dy pikë në tre takime, çka ka thelluar krizën e skuadrës torineze./S.K/KP/
Zëvendësministri në detyrë i Infrastrukturës Hysen Durmishi, ka njoftuar se kanë vënë nën mbrojtje Malin Mokna dhe Liqenin e Ujmanit.
Ai ka thënë se javën e kaluar ka nënshkruar vendimin për mbrojtje paraprake të “Malit Mokna dhe Liqenit të Ujmanit”, i cili sipas tij është nga vendimet më të rëndësishme për mbrojtjen e natyrës në Kosovë.
“Me këtë vendim, Republika e Kosovës bëhet shteti me përqindjen më të lartë të territorit nën mbrojtje të natyrës në gjithë Ballkanin Perëndimor. Pas një studimi njëvjeçar në terren, është konstatuar se kjo zonë përbën pasuri të rrallë natyrore, me biodiversitet të pasur dhe peizazhe me rëndësi të veçantë ekologjike e shkencore”, ka shkruar Durmishi.
Ai ka shkruar se zona me sipërfaqe prej 192.19 km² tashmë vihet nën mbrojtje paraprake, siç ka thënë duke e ngritur në 12.4% përqindjen e territorit të Kosovës që mbrohet ligjërisht./S.K/EO/