Kuvendi i Kosovës nuk është konstituuar as në përpjekjen e 45-të, meqë partitë politike vazhdojnë të ngulojnë se kanë të drejtë në qëndrimet e veta.

Në seancën e 11 korrikut kanë marrë pjesë 93 deputetë.

Abelard Tahiri nga Partia Demokratike e Kosovës e ka akuzuar kryesuesin e seancës Avni Dehari – nga Lëvizja Vetëvendosje – për shkelje të Kushtetutës.

“Kjo është e papranueshme”, ka thënë Tahiri nga foltorja e Kuvendit, teksa Dehari ka kërkuar që atij t’i ndalet mikrofoni. Akuza kundër Deharit kanë pasur edhe përfaqësues të partive tjera, të cilëve, gjithashtu u është ndalur mikrofoni.

Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe – partia më e madhe e serbëve në Kosovë – nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit është jokushtetuese.

Lëvizja Vetëvendosje – fituese e më së shumti votave në zgjedhjet e 9 shkurtit – kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme.

Pjesëtarë të shoqërisë civile kanë protestuar sërish para ndërtesës së Kuvendit duke i thirrur deputetët në përgjegjësi.

Ata janë parë duke mbajtur në duart pankarta me mbishkrimet: “Demokracia nuk është veç procedurë”, “Cirku i Republikës së Kosovës”, “120 rroga, 0 përgjegjësi”, e tjera.

Palët vazhdojnë të mos gjejnë një kompromis ndonëse ec afati i përcaktuar nga Gjykata Kushtetuese për konstitutim të Kuvendit.

Ndonëse gjykata e ka përcaktuar 26 korrikn si afat të fundit për konstituim, ajo nuk ka ofruar më shumë hollësi se çfarë ndodh tutje nëse partitë nuk merren vesh deri atëherë.

Presidentja e Kosovës, Vjosa Osmani është takuar me përfaqësuesit e partive politike ditë më parë, me shpresën e gjetjes së një zgjidhjeje, mirëpo situata nuk ka ndryshuar.

Ajo e ka përmendur edhe mundësinë që t’i drejtohet Gjykatës Kushtetuese për sqarime shtesë./REL

Ministri në detyrë i Administratës dhe Pushtetit Lokal, Elbert Krasniqi, ka folur për projektin e ndërtimit të dy urave mbi lumin Ibër në Mitrovicë, duke e cilësuar atë si një hap me rëndësi për qytetin, pavarësisht hetimeve që po zhvillohen lidhur me këtë çështje.

Gjatë një deklarate për media, Krasniqi refuzoi të komentojë për hetimet, por theksoi rëndësinë funksionale dhe simbolike të këtyre urave.

“Nuk mundem me i komentu hetimet, le të hetohet. Urat janë të rëndësishme, i lidhin veriun dhe jugun,” u shpreh ai.

Në një ceremoni të mbajtur të premten, 279 kadetë të gjeneratës së 62-të të Policisë së Kosovës kanë diplomuar, duke u bërë pjesë e re e forcës policore në vend.

Zëvendëskryeministri në detyrë, Besnik Bislimi, tha se betimi i kadetëve është një zotim për të vepruar me integritet dhe në shërbim të interesit të vendit.

“Kjo uniformë dhe ky institucion nuk janë vetëm zbatues të ligjit, por edhe përfaqësues të vlerave të disiplinës, punës, integritetit dhe atdhedashurisë. Këta kadetë – 261 shqiptarë, 11 serbë, 4 boshnjakë, 2 egjiptianë dhe 2 turq – i bashkon një mision dhe qëllime të përbashkëta,” deklaroi Bislimi.

Zëdhënësi i Policisë së Kosovës, Baki Kelani, foli për sfidat që kanë përballuar kadetët gjatë procesit të trajnimit.

“Të gjitha gjeneratat, përfshirë këtë të fundit, kanë kaluar nëpër sfida të ndryshme për të arritur në këtë ditë historike. Por falë përkushtimit dhe disiplinës, ata e kanë finalizuar me sukses trajnimin e tyre. Tani, detyra e tyre është zbatimi i ligjit në praktikë,” tha Kelani.

Ministri në detyrë i Punëve të Brendshme, Xhelal Sveçla, theksoi se Policia e Kosovës jo vetëm që gëzon besimin më të lartë qytetar, por është edhe një shembull i partneritetit dhe i efikasitetit në luftën kundër kriminalitetit.

Drejtori i Policisë së Kosovës, Gazmend Hoxha, bëri të ditur se për këtë gjeneratë kanë aplikuar mbi 7 mijë qytetarë, çka sipas tij tregon besimin e qytetarëve ndaj këtij institucioni.

Deputeti i LDK-së, Armend Zemaj, ka folur para fillimit të seancës së 45-të konstituive të Kuvendit. Ai ka kritikuar menaxhimin financiar të Qeverisë Kurti.

Sipas tij, tashmë do të duhej të ishin ngritur aktakuza, madje edhe të ndodhnin arrestime, për keqpërdorimet që pretendohet të kenë ndodhur gjatë katër viteve të qeverisjes së Albin Kurtit.

Zemaj shtoi se ekzistojnë kontrata të shumta, për të cilat është e dukshme se ka pasur shkelje.

“Sot do të duhej të kishim aktakuza të ngritura, e të mos them edhe arrestime për keqpërdorimin që ka ndodhur në buxhetin e Kosovës në këto katër vjet të Qeverisë Kurti. Ka shumë kontrata që janë evidente që ka pasur shkelje”, tha Zemaj.