Rusia ka grumbulluar mijëra ushtarë pranë kufirit me Ukrainën dhe në Gadishullin e aneksuar të Krimesë, por i ka lënë shumë njerëz të hamendësojnë për planet dhe synimet e saj.
Të njëjtën gjë e ka bërë edhe pas video-bisedës që presidenti rus, Vladimir Putin, ka zhvilluar të martën me presidentin amerikan, Joe Biden.
Kremlini ka lëshuar një deklaratë për këto bisedime, gati dy orë pasi Shtëpia e Bardhë ka publikuar deklaratën e saj.
Deklarata e Kremlinit është shumë më e gjatë. I referohet Luftës së Dytë Botërore dhe një “përgjegjësie të veçantë” të përbashkët për sigurinë ndërkombëtare.
Përveçse flasin për të njëjtin takim, dy deklaratat kanë pak gjëra të përbashkëta. Ato i përshkruajnë bisedimet për të njëjtat çështje në mënyra çuditërisht të ndryshme.
Për shembull: Biden “ka shprehur shqetësimet e thella të Shteteve të Bashkuara dhe aleatëve tanë evropianë për rritjen e numrit të forcave ruse përreth Ukrainës”, tha Shtëpia e Bardhë.
Në përgjigje, sipas Kremlinit, Putin ka thënë se Shtetet e Bashkuara nuk duhet ta fajësojnë Rusinë për tensionet. Putin ka fajësuar NATO-n.
Por, duke bërë këtë, Putin ka dhënë deklarata të pabaza se aleanca perëndimore “po bën përpjekje të rrezikshme për të pushtuar territorin ukrainas”. Këtë gjë, në fakt, e ka bërë vetë Rusia kur ka pushtuar Krimenë në vitin 2014.
E vetmja gjë specifike për të cilën duket se kanë rënë dakord dy presidentët është se “midis zyrtarëve amerikanë dhe rusë do të ketë bisedime të tjera”.
Por, bisedime për çka?
Deklaratat e dy palëve dallojnë thelbësisht për sa i përket përmbajtjes dhe kontekstit në këtë pikë, duke reflektuar pozicionet e kundërta për atë që po ndodh në Ukrainë, si dhe për sigurinë në Evropë në përgjithësi.
Ato po ashtu lënë derën gjerësisht të hapur për zhgënjim dhe mosmarrëveshje në të ardhmen.
Deklarata ruse sugjeron se bisedimet e reja do të përqendrohen në ato që Moska i quan “garanci të sigurisë”, të cilat i ka kërkuar me vite.
Putin i ka parashtruar kërkesat e tij në komentet që ka bërë më 1 dhjetor, duke thënë se Rusia do të bëjë presion për të siguruar garanci formale, se NATO-ja nuk do të zgjerohet më tej në lindje, përfshirë me Ukrainën, dhe se “sistemet e armëve që përbëjnë kërcënim” për Rusinë, nuk do të vendosen “në afërsi” të kufijve rusë.
Deklarata e Kremlinit për bisedimet Biden-Putin i përsërit këto fjalë me një ndryshim te pjesa për armët. Sipas deklaratës, Rusia “është seriozisht e interesuar që të marrë garanci të besueshme, ligjërisht të detyrueshme, të cilat e përjashtojnë zgjerimin e NATO-s drejt lindjes” dhe vendosjen e disa llojeve të armëve në vendet, me të cilat ndan kufij.
“Udhëheqësit ranë dakord që t’i angazhojnë përfaqësuesit e tyre në konsultime të hollësishme për këto çështje të ndjeshme”, thuhet në deklaratën e Kremlinit.
Megjithatë, Shtetet e Bashkuara dhe NATO-ja – për të mos përmendur Kievin – thonë se Rusia nuk mund ta ketë të drejtën e vetos ndaj Ukrainës ose ndonjë vendi tjetër që bashkohet me aleancën perëndimore.
Deklarata e Shtëpisë së Bardhë e vendos marrëveshjen për bisedime të reja në kontekstin e shqetësimeve të Perëndimit për kërcënimin rus ndaj Ukrainës.
Biden “ka përsëritur mbështetjen e tij për sovranitetin dhe integritetin territorial të Ukrainës dhe ka bërë thirrje për shtensionim [të situatës] dhe kthim në diplomaci”, thuhet në deklaratën e Shtëpisë së Bardhë.
“Të dy presidentët i ngarkuan ekipet e tyre për ndjekjen e zhvillimeve dhe SHBA-ja do ta bëjë këtë në koordinim të ngushtë me aleatët dhe partnerët”, thekson deklarata.
Pesë kadetë nga Kosova kanë diplomuan në Akademinë e Forcave të Armatosura të Shqipërisë.
Ata do të vazhdojnë shërbimin e tyre si oficerë në radhët e Forcës së Sigurisë së Kosovës.
Kjo u bë e ditur nga ministri në detyrë i Mbrojtjes, Ejup Maqedonci i cili mori pjesë në ceremoninë e diplomimit me ftesë të homologut të tij nga Shqipëria, Pirro Vengu.
“Me mbështetjen e ministrit Pirro Vengu dhe të Shefit të Shtabit të Përgjithshëm, gjeneral Arben Kingji, është bërë e mundur që për vitin e ardhshëm të katërfishohet numri i kadetëve nga Kosova që do të ndjekin studimet në këtë akademi prestigjioze”, shkruan Maqedonci në Facebook
Inspektorati Policor i Kosovës thotë se ka të meta në pasqyrimin e të dhënave në gjoba në raport me shkeljet dhe që këto “sjellin dyshime se mund të abuzohet gjatë kryerjes së detyrës zyrtare”. Kjo është theksuar me një inspektim që IPK-ja e ka bërë rreth përdorimit të teknologjisë për matjen e shpejtësisë së lëvizjes së mjeteve në trafik.
Përmes një njoftimi për media, IPK-ja tha se inspektimi është realizuar me kërkesë të kryeshefit ekzekutiv, ndër të tjera, bazuar në informacionet që IPK kishte pranuar se zyrtarët policorë për arsye të ndryshme nuk i gjobisin kundërvajtësit për shkeljet që i kanë kryer.
“Inspektimi ka vënë në pah se ka dobësi/të meta në pasqyrimin e të dhënave në gjoba në raport me shkeljet dhe që këto sjellin dyshime se mund të abuzohet gjatë kryerjes së detyrës zyrtare”.
Sipas IPK-së. gjatë krahasimit të të dhënave në gjoba dhe atyre të regjistruara në radar gjatë inspektimit janë hasur katër natyra të mospërputhjeve: Shpejtësia e lëvizjes së mjetit e përshkruar në gjobë është më e ulët se ajo e regjistruar në radar (në 55 nga 84 mostra/gjoba); Shpejtësia e kufizuar në radar ndryshon nga ajo e regjistruar në gjobë (në 23 nga 84 mostra); Lloji i shkeljes në gjobë ndryshon nga ajo e matur me radar (në 3 nga 84 mostra); Shqiptohet gjobë për tejkalim të shpejtësisë në bazë të një neni (paragrafi) jo adekuat të ligjit (në 3 nga 84 mostra).
IPK-ja në kuadër të Raportit ka dhënë shtatë rekomandime, që kanë të bëjnë me nevojën e nxjerrjes së një udhëzuesi lidhur me përdorimin e pajisjeve për matjen e shpejtësisë së lëvizjes, mbajtjen e një trajnimi shtesë për të pajisur personelin me njohuri të mjaftueshme, ushtrimit të kontrolleve në drejtim të eliminimit të dobësive sa i përket vendosjes së të dhënave në pajisjet e matjes, ushtrimit të kontrolleve në drejtim të eliminimit të praktikave të dëmshme gjatë shqiptimit të gjobave për kundërvajtje, përdorimit efektiv të automjeteve me pajisje inteligjente, monitorimit të procesit të shkarkimit dhe ruajtjes së materialeve të regjistruara nga pajisjet, aplikimit të praktikës së printimit të kundërvajtjeve.
Policia e Kosovës ka shqiptuar 2289 gjoba për kundërvajtësit e trafikut brenda 24 orëve të fundit.
Në 24 orët e fundit janë raportuar 70 aksidente trafiku me dëme materiale, 35 aksidente trafiku me të lënduar kurse një aksident përfundoi me fatalitet.
Policia e Kosovës ka arrestuar 20 persona, 10 janë dërguar në mbajtje kurse një person është në vuajtje të dënimit.
Një person është arrestuar pasi të njëjtit i janë gjetur nëntë armë në formë stilolapsi dhe katër fishek.
Policia në Pejë njoftoi se pas informacionit për një përleshje fizike në fshatin Carrabreg-Deçan njësitet policore kanë dalë në vendin e ngjarjes ku edhe i janë gjetur dhe i janë konfiskuar armë të dyshuarit.
“Nё koordinim me prokurorin e Shtetit, ёshtё kryer kontroll/bastisje ne shtёpinё e personit tё dyshuar mirёpo nuk ёshtё gjetur diçka e kundёrligjshme.I dyshuari ёshtё arrestuar dhe pas intervistimit nga hetuesit, me urdhёr tё prokurorit tё Shtetit, ёshtё dёrguar nё mbajtje pёr 48- orё“, thuhet në njoftim.