Lajmet

ShBA-ja e njofton Rusinë se nuk do t’i ribashkohet Traktatit të Qiejve të Hapur

Published

5 years ago

May 28, 2021

Betim Gashi

Departamenti i shtetit tha se Traktati i Qiejve të Hapur “është minuar për shkak të shkeljeve nga ana e Rusisë”.

Rusia mohon akuzat dhe pritet që Moska gjithashtu të tërhiqet këtë vit nga traktati. Ministria e Jashtme ruse konfirmoi se ishte informuar për vendimin nga ana e SHBA-së.

Më shumë se 30 vende marrin pjesë në traktatin i cili hyri në fuqi në vitin 2002.

Administrata e Biden kishte qenë duke rishikuar mundësitë për t’iu ribashkuar traktatit, por njoftimi tregon se marrëveshja tani ka përfunduar zyrtarisht.

Uashingtoni u tërhoq nga traktati në kohën e ish-presidentit, Donald Trump. Në përgjigje të njoftimit të administratës Trump vitin e kaluar, Rusia tha se ka në plan të largohet nga marrëveshja dhe muajin maj ligjvënësit votuan për të braktisur traktatin. Dhoma e sipërme e parlamentit të Rusisë pritet të miratojë projekt-ligjin e tërheqjes në qershor.

Midis Rusisë dhe Shteteve të Bashkuara mbetet vetëm një traktat i madh në fuqi, ai për kontrollin e armëve midis dy fuqive. Traktati New Start (Fillimi i Ri) kufizon vendosjen e kokave strategjike bërthamore dhe sistemeve të shpërndarjes.

Njoftimi vjen gjithashtu në kohën kur presidenti amerikan, Joe Biden dhe homologu i tij rus, Vladimir Putin, po përgatiten për mbajtjen e një samiti në Gjenevë të Zvicrës, më 16 qershor.

“Sjellja e Rusisë, përfshirë veprimet e saj të fundit në lidhje me Ukrainën, tregojnë se ajo nuk është më një partner i përkushtuar në ndërtimin e besimit “, tha Departamenti i Shtetit.

Aleatët evropianë të ShBA-së mbështetën ruajtjen e traktatit, i cili lejon vendet të mbledhin informacion mbi forcat ushtarake në mënyrë që të rrisin transparencën dhe të ndërtojnë besimin e ndërsjellë.

Për të qëndruar në marrëveshje, Rusia kishte kërkuar garancë se anëtarët e NATO-s nuk do të dorëzonin në Shtetet e Bashkuara të dhënat e mbledhura gjatë fluturimeve të vëzhgimit mbi Rusinë./Evropa e Lirë

Vendi

Mbi 100 gramë kokainë dhe marihuanë kapen në Vërmicë

Published

12 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

13 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

14 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

16 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/