New York Times shkruan se presidenti i SHBA, Joe Biden i tha një aleati kryesor se ai e di se mund të mos jetë në gjendje ta “shpëtojë” kandidaturën e tij nëse dështon për ta bindur publikun në ditët në vijim se ai është i përshtatshëm për postin që mban.

Presidenti, tha aleati i tij kryesor, është ende i përkushtuar ndaj betejës së tij për ta fituar një tjetër mandat. Megjithatë, ai e kupton se paraqitjet e ardhshme janë vendimtare dhe duhet të shkojnë mirë. Programi i tij përfshin një intervistë me George Stephanopoulos të ABC News të premten, si dhe ndalesa të fushatës në Pensilvani dhe Wisconsin.

Tashmë, shoqëria amerikane po shpreh shqetësime si për qëndrueshmërinë e tij si kandidat, ashtu edhe nëse ai mund t’i përmbushë kërkesat e postit të presidentit amerikan për katër vjet të tjerë.

Një këshilltar i lartë i Biden, i cili gjithashtu foli në kushte anonimiteti për situatën, tha se presidenti është i vetëdijshëm për sfidën politike me të cilën përballet.

Biden po afrohet ngadalë me zyrtarët e zgjedhur demokratë. Në të njëjtën kohë, ai vazhdon të kontaktojë me njerëz të besuar prej kohësh dhe i ka thënë të paktën një personi se është i hapur ndaj mundësisë që planet e tij për ta kthyer vëmendjen te Donald Trump dhe për ta harruar paraqitjen e tij në debat mund të mos funksionojnë.

Kandidati i Partisë Demokratike të Kosovës për kryeministër, Bedri Hamza gjatë të mërkurës ka qëndruar për vizitë në komunën e Prizrenit.

Nga atje Hamza ka thënë se PDK-ja është çdoherë e gatshme për zgjedhje të reja.

“Në kuadër të vizitave mobilizuese në terren, sot bashkë me Uranin i vizituam Shaqën e Kujtimin në Prizren dhe dolëm pak në Shatërvanin e bukur. PDK-ja, e cila ka dalë e para në zgjedhjet lokale, ka qenë dhe është çdoherë e gatshme për zgjedhje të reja”, ka shkruar Hamza në Facebook.

Ai ka shtuar se vendit do t’ia dhurojnë një qeveri kompetente e të përgjegjshme para qytetarëve dhe aleatëve, me një program konkret, të realizueshëm dhe me indikatorë të matshëm, të cilin do ta prezantojmë gjatë muajve të ardhshëm.

“Së bashku me çdo njeri vullnetmirë, me çdo qytetar që është lodhur nga kjo gjendje e pashpresë dhe dëshiron një jetë më të mirë këtu, në vendin tonë, ne do ta bëjmë ndryshimin”, është shprehur Hamza.

Gati dy mijë qytetarë në katër komunat në veri të Kosovës kanë aplikuar për t’i konvertuar patentë shoferët ilegalë të lëshuar nga strukturat paralele serbe në RKS. Këto shifra i ka bërë të ditura zëvendësdrejtori i Policisë së Kosovës në veri, Veton Elshani.

Ai ka thënë se nga 9 maj e deri më 3 korrik kanë aplikuar 1 mijë e 901 qytetarë për konvertimin e patentë shoferit ilegalë në RKS.

“Në Leposaviq kanë aplikuar 474 qytetarë për konvertimin e patentë shoferit ilegal në RKS, në Mitrovicën Veriore kanë aplikuar 520 qytetarë, në Zubin Potok 270 dhe në Zveçan 312 qytetarë”, ka thënë Elshani.

Ministria e Punëve të Brendshme nga fillimi i muajit maj ka vendosur që t’u lejojë serbëve t’i konvertojnë patentë shoferët ilegalë në RKS me disa lehtësira, duke mos iu nënshtruar provimit për patentë shoferë. Aplikimi do të jetë i hapur deri më 9 gusht të këtij viti.

Ukraina i ka rrëzuar 21 prej 22 dronëve me të cilët Rusia e sulmoi gjatë natës, njoftoi Forca Ajrore të enjten.

Kundërajrorët ukrainas i rrëzuan dronët mbi rajonet e Ukrainës veriore dhe qendrore, thuhet në njoftim.

Guvernatori i rajonit verior Çernihiv tha se njëri prej dronëve e goditi një ndërtesë në rajonin e tij, por nuk dha hollësi të tjera.

Megjithatë, ai njoftoi se mbi 5.000 konsumatorë në këtë rajon kanë mbetur pa furnizim me rrymë, për shkak të sulmeve ruse mbi infrastrukturën energjetike.

Guvernatori i Dnipropetrovskit tha se dy dronë u rrëzuat nga kundërajrorët ukrainas mbi rajonin e tij.

Rusia është duke i vazhduar sulmet me raketa dhe me dronë mbi rajone të ndryshme ukrainase.

Të mërkurën, së paku pesë persona u vranë dhe 34 të tjerë u plagosën nga një sulm i ushtrisë ruse me dronë dhe raketa në qytetin Dnjepër të Ukrainës.

Pas atij sulmi, Volodymyr Zelensky, presidenti i Ukrainës, i cili i bëri thirrje Perëndimit për ndihmë ajrore.

“Vetëm dy gjëra mund ta ndalin këtë terror rus: sistemet moderne të mbrojtjes ajrore dhe armët me rreze të gjata veprimi”, shkroi Zelensky në X.

“Bota mund të mbrojë jetë, për këtë nevojitet vendosmëria e liderëve. Vendosmëria duhet ta bëjë përsëri normë mbrojtjen nga terrori”, shtoi ai.

Rusia e nisi pushtimin e plotë të Ukrainës në shkurt të vitit 2022.

Perëndimi ka ndërmarrë sanksione të ashpra kundër saj, ndërsa Ukrainën është duke e ndihmuar me armatim.

Muajin e kaluar, Bashkimi Evropian ka nisur edhe negociatat për anëtarësimin e Ukrainës në radhët e veta.