Ministri gjerman i Mbrojtjes, Boris Pistorius tha se Evropa duhet të përfshihet në bisedimet e paqes Rusi-Ukrainë.

Përpara takimit të ministrave të Mbrojtjes të NATO-s në Bruksel, Pistorius tha se presidenti amerikan Donald Trump dhe presidenti rus Vladimir Putin zhvilluan një bisedë telefonike dhe ranë dakord të fillojnë negociatat për t’i dhënë fund luftës Rusi-Ukrainë.

“Nëse Putini është vërtet serioz për të hyrë në këto negociata, që duke u bazuar në përvojën e tre viteve të fundit mund të ketë të paktën disa dyshime për këtë, atëherë ai duhet të marrë masa të menjëhershme në fushën e betejës dhe të ndalojë shkatërrimin e Ukrainës“, tha ministri gjerman.

Pistorius tha se Evropa duhet të jetë pjesë e këtyre negociatave. “Për mua është e qartë se Evropa duhet të përfshihet në negociata dhe nuk ka asnjë dyshim për këtë çështje“, theksoi ai.

Sipas tij, ende nuk është e qartë se si do të vazhdojnë negociatat e paqes në Ukrainë dhe më e rëndësishmja, cilat do të jenë rezultatet e negociatave. “Gjëja e trishtueshme është se administrata e Trumpit tashmë i ka bërë lëshime të qarta Putinit përpara fillimit të negociatave. Nga këndvështrimi im, do të kishte qenë më mirë anëtarësimi i mundshëm i Ukrainës në NATO ose humbja e mundshme e territorit të vendit të diskutohej vetëm në tryezën e negociatave“, tha Pistorius.

Ai potencoi se është e rëndësishme t’i jepet fund vrasjes së njerëzve mbi bazën e një paqeje të qëndrueshme, të përhershme, të drejtë dhe të barabartë.

Shefi i Zyrës së Bashkimit Evropian në Kosovë, Aivo Orav vizitoi të enjten Qendrën Komunale të Numërimit në Prishtinë – sallën 1 Tetori, ku po numërohen votat e kandidatëve për deputetë.

“Vizitova sot Qendrën Komunale të Numërimit në Prishtinë, ku është duke vazhduar procesi i numërimit”, shkroi Orav në X.

Nga 258 kuti të rregullta të votimit, shtatë me kusht dhe 11 nga ekipe mobile sa gjenden në këtë qendër, janë numëruar 13 kuti me vota të kandidatëve për deputetë. Ndërkaq, tetë prej tyre janë në proces, ka bërë të ditur më herët të enjten kryesuesja e Komisionit Komunal Zgjedhor në Prishtinë, Fatmire Bajrami.

Sot është dita e tretë prej kur ka nisur numërimi i votave të kandidatëve për deputetë në Qendrën Komunale të Numërimit në Prishtinë, në Obiliq, në Lipjan dhe Partesh.

Këto ditë janë karakterizuar me telashe teknike, derisa sistemi ka rënë disa herë në Qendrën Komunale të Numërimit në Prishtinë. Kjo ka bërë që të ripërsëritet numërimi.

Përveç kësaj, edhe të martën kur ka filluar procesi, por edhe dje, është raportuar për përleshje në mes të vëzhguesve nga Lëvizja Vetëvendosje dhe Lidhja Demokratike e Kosovës.

Procesi i numërimit gjatë këtyre ditëve ka filluar me vonesë për shkak të telasheve teknike.

Përveç komisionerëve dhe vëzhguesve të subjekteve politike, të pranishëm në këtë qendër janë edhe vëzhguesit e Bashkimit Evropian.

Përveç në Prishtinë, numërimi i votave të kandidatëve për deputetë, njëkohësisht verifikimi i votave për subjekte politike, të martën ka filluar edhe në Obiliq, Lipjan dhe Partesh.

Ndërkaq, Komisioni Qendror i Zgjedhjeve të mërkurën ka njoftuar se ka filluar procesi i numërimit të votave të kandidatëve për deputetë dhe verifikimit të votave të subjekteve politike në 14 komuna të tjera.

Të mërkurën, procesi i numërimit ka filluar në Qendrat Komunale në Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut dhe Veriut, Skenderaj, Shtërpc, Viti, Vranidoll, Kllokot dhe Han të Elezit.

Ndërkaq, ende nuk është bërë e ditur se kur do të fillojë numërimi i votave në komunat e tjera.

Mali i Zi po bën një hap të rëndësishëm në forcimin e marrëdhënieve diplomatike me Kosovën, duke dërguar pas katër vitesh një ambasador të ri. Në seancën e 12 shkurtit, Komisioni për Marrëdhënie Ndërkombëtare i Parlamentit të Malit të Zi mbështeti propozimin e Qeverisë për emërimin e Bernard Çobajt si ambasador të ri në Kosovë. Ky emërim vjen pas një periudhe të gjatë pa ambasador në Prishtinë, që nga vitin 2020, kur Ferhat Dinosha, ambasadori i mëparshëm, arriti moshën e pensionimit.

Përveç emërimit të Çobajt, Qeveria e Malit të Zi ka emëruar gjithashtu Nebojsha Gjokoviqin si ambasador në Serbi, duke plotësuar kështu pozitat ambsadore në Prishtinë dhe Beograd pas një periudhe të gjatë. Ndryshe nga Gjokoviq, i cili u votua unanimisht, Çobaj nuk mori mbështetje nga deputetët e partive pro-serbe që nuk e njohin pavarësinë e Kosovës.

Bernard Çobaj ka një eksperiencë të pasur diplomatike, duke punuar për vite me radhë në Ambasadën e Shteteve të Bashkuara në Podgoricë. Deri tani, ai ka mbajtur postin e ngarkuar me punë në ambasadën e Malit të Zi në Prishtinë, ku është njohur për angazhimin e tij në diplomacinë kulturore, duke kontribuar në forcimin e marrëdhënieve mes dy vendeve. Ai ka theksuar se marrëdhëniet ndërmjet Malit të Zi dhe Kosovës janë të bazuara në miqësi dhe bashkëpunim, me orientim drejt një të ardhmeje evropiane për të dyja shtetet.

Çobaj është një figurë që nuk i përket asnjë partie politike, një aspekt që e ndihmon të ruajë një qasje objektive dhe të paanshme në diplomaci. Sipas ligjit malazez, propozimi për ambasadorin bëhet nga Qeveria, me mendimin e Komisionit për Marrëdhënie Ndërkombëtare, dhe më pas Presidenti i Shtetit, Jakov Millatoviq, duhet të nxjerrë dekretin përfundimtar për emërimin e tij. Pas këtij hapi, Çobaj do të marrë detyrën e ambasadorit të Malit të Zi në Kosovë, duke shënuar një fazë të re në marrëdhëniet diplomatike ndërmjet dy shteteve./UBTNews/

Në vitin 2024 janë vrarë më shumë gazetarë se në çdo vit tjetër, tha Komiteti për Mbrojtjen e Gazetarëve (CPJ) në një raport.

CPJ, i cili filloi të mbledhë të dhëna para rreth 30 vjetëve, tha se të paktën 124 gazetarë dhe punonjës të medias u vranë në vitin 2024.

Në raport thuhet se në vrasjen e gazetarëve ka ndikuar rritja e numrit të konflikteve në mbarë botën – qofshin ato politike, kriminale apo ushtarake.

Lufta në Rripin e Gazës ka ndikuar më së shumti në rritjen e numri, pasi një numër i paparë gazetarësh dhe punonjësish të medias u vranë vrarë në këtë luftë, tha CPJ, e cila është organizatë joqeveritare me qendër në SHBA e përkushtuar për mbrojtjen e lirive të gazetarëve dhe të drejtave.

Pothuajse dy të tretat e numrit të përgjithshëm të punonjësve të medias të vrarë në mbarë botën janë palestinezë, sipas raportit. Vitin e kaluar u vranë 85 gazetarë, ndërsa në vitin 2023 u vranë 73.

“Tani është koha më e rrezikshme për të qenë gazetar në historinë e CPJ-së”, tha drejtoresha ekzekutive e CPJ-së, Jodie Ginsberg.

“Lufta në Gaza është e paprecedentë në ndikimin e saj tek gazetarët dhe demonstron një përkeqësim të ndjeshëm të normave globale për mbrojtjen e gazetarëve në zonat e konfliktit, por është larg nga i vetmi vend ku gazetarët janë në rrezik. Shifrat tona tregojnë se gazetarët janë nën sulm në mbarë botën“, shtoi ajo.

CPJ tha se zbuloi se të paktën 24 gazetarë në mbarë botën u vranë qëllimisht për punën e tyre vitin e kaluar.

Ai tha se në Rripin e Gazës dhe Liban ka dokumentuar 10 raste kur gazetarët janë vrarë nga ushtria izraelite, në kundërshtim me ligjet ndërkombëtare që i përcaktojnë gazetarët si civilë gjatë konflikteve. 14 vrasjet e tjera të gazetarëve në vitin 2024 ndodhën në Haiti, Meksikë, Pakistan, Myanmar, Mozambik, Indi, Irak dhe Sudan.

Numri i madh i gazetarëve të vrarë në vitin 2024 tregon për rreziqet e shtuara me të cilat përballen gazetarët dhe punonjësit e medias, si dhe kërcënimin për rrjedhën e informacionit në mbarë botën, tha CPJ.

Totali i 124 gazetarëve të vrarë vitin e kaluar e tejkalon rekordin prej 113 nga viti 2007, kur pothuajse gjysma u vranë gjatë luftës në Irak.

Jashtë Rripit të Gazës dhe Libanit (tre), CPJ dokumentoi vdekjen e 39 gazetarëve dhe punonjësve të medias në 16 vende në vitin 2024, shumica në Sudan (6), Pakistan (6), Meksikë (5), Siri (4), Mianmar (3), Irak (3) dhe Haiti (2)./REL/