Callum Turner dhe Dua Lipa po përjetojnë në maksimum romancën e tyre.

Aktori britanik 35-vjeçar dha një përgjigje të thjeshtë kur u pyet për planet e së ardhmes me këngëtaren 30-vjeçare të hitit “New Rules”.

Në një bisedë për Etalk, Turner tha se shpreson të jetë me Lipën “përgjithmonë”.

Intervistuesi u përgjigj: “Kjo është gjithçka që na duhet të dimë”, dhe protagonisti i “Masters of the Air” shtoi: “Kjo është e vërtetë”.

Historia nisi në janar 2024. Në dhjetor të atij viti, nisën aludimet për fejesë pasi Dua publikoi disa foto ku shihej me një unazë diamanti.

Megjithatë, konfirmimi zyrtar erdhi vetëm në qershor, përmes një interviste për British Vogue.

“Po, jemi të fejuar. Është emocionuese”, tha këngëtarja me origjinë shqiptare. “Ky vendim për të ecur përpara së bashku, për të ndarë një jetë dhe për të qenë miqtë më të mirë përgjithmonë është diçka jashtëzakonisht e veçantë”.

Në një tjetër intervistë për Harper’s BAZAAR muajin e kaluar, Lipa foli për mënyrën si e përjeton dashurinë. “E adhuroj dashurinë. Është një gjë e bukur, frymëzuese. E gjej veten duke rënë gjithmonë, me intensitet, në formën më të mirë të saj”, tha ajo.

Këngëtarja e “Training Season” shtoi se ndonëse do të ndajë më shumë nga romanca e saj, shpesh vendos ta mbajë të mbrojtur jetën private.

Ndërkohë, një burim i afërt i tregoi revistës People në qershor se dyshja po shijon këtë fazë të fejesës dhe nuk po nxitojnë drejt martesës.

Ministri spanjoll i Kulturës, Ernest Urtasun, tha se vendi do të tërhiqet nga pjesëmarrja në Eurovision 2026 nëse Izraeli nuk përjashtohet.

“Nuk mendoj se mund ta normalizojmë pjesëmarrjen e Izraelit në evente ndërkombëtare sikur s’po ndodh asgjë.”

Gjatë një interviste, Urtasun tha se pjesëmarrja e Izraelit në konkurs nuk mund të tolerohet.

“Ngjarje si Eurovision apo Vuelta a España sjellin një përfaqësim të veçantë të vendit”, tha ai duke iu referuar protestave kundër ekipit të çiklistëve Israel-Premier Tech gjatë këtij edicioni të garës.

“Në rastin e Eurovision nuk është një artist individual që merr pjesë, por dikush që merr pjesë në emër të qytetarëve të atij vendi.”

Urtasun tha se nëse Izraeli merr pjesë e “nuk ia dalim ta përjashtojmë, do duhen të merren masa”, rikujtoi se kryeministri Pedro Sánchez i kishte bërë thirrje më parë European Broadcasting Union, i cili organizon konkursin, për të mos lejuar Izraelin në konkursin ndërkombëtar.

Urtasun theksoi se denoncimi i “gjenocidit” në Gaza nuk është antisemitik dhe e përshkroi Izraelin si “qeveri gjenocidale”.

Ai sqaroi se vendimi i tërheqjes nga Eurovision do të jetë në dorën e RTVE (Korporata Spanjolle e Radios dhe Televizionit), e cila ka shprehur shqetësim për pjesëmarrjen e Izraelit në Eurovision pas vitit të shkuar.

Edhe drejtuesi i transmetuesit kombëtar slloven, RTVSLO, ka njoftuar se me gjasë vitin e ardhshëm do të tërhiqet nga konkursi nëse Izraeli merr pjesë.

Pas 19 muajsh, Princi Harry është takuar sërish me babanë e tij, Mbretin Charles III, në një takim privat këtë të mërkurë në Londër, duke ringjallur shpresat për një pajtim mes tyre.

CNN raporton se kanë pirë çaj privatisht në Clarence House. Harry u pa duke mbërritur me Range Rover rreth 17:20 dhe doli pas një ore.

Ky ishte takimi i tyre i parë që nga shkurt 2024, kur Harry udhëtoi për një vizitë të shkurtër në Britani pas diagnostikimit të babait të tij me kancer. Në prill, ai nuk arriti të takohej me të atin pasi Charles ndodhej në një vizitë shtetërore në Itali.

Harry ka shprehur publikisht dëshirën për të pajtuar marrëdhëniet.

“Disa anëtarë të familjes sime kurrë nuk do të më falin për librin tim… por unë dua të pajtohem me familjen time. Nuk ka më kuptim të vazhdojmë të grindemi,” deklaroi ai për BBC-në në maj.

Marrëdhëniet me vëllanë, princin William, mbeten të tensionuara. William është i përqendruar tek gruaja e tij, Princesha Kate, gjatë trajtimit të saj për kancer. Ndërkohë, Harry ka qenë aktiv në Londër me angazhime bamirësie.

“Po, është shumë mirë, faleminderit,” tha ai për gjendjen shëndetësore të babait të tij.

Ai shpalli donacion 500 mijë dollarësh për fëmijët e plagosur në Gaza dhe Ukrainë, duke theksuar se asnjë organizatë nuk mund ta zgjidhte këtë vetëm. “Duhen partneritete për të siguruar që fëmijët të mbijetojnë e rikuperohen pas plagëve të shkaktuara” shtoi ai.

Vizitën e tij në Britani, Harry do ta përmbyllë të enjten me një aktivitet bamirësie në kuadër të fondacionit “The Diana Award”, para se të kthehet në Shtetet e Bashkuara.

Përgatiti: A.Z. /UBT News/