Spanja dhe Franca po përballen me një valë të re të të nxehtit, ndërsa temperaturat në disa rajone pritet të kalojnë mbi 40 gradë Celsius.

Shërbimi Kombëtar Meteorologjik i Spanjës ka paralajmëruar se kushtet ekstreme të motit do të vazhdojnë të paktën deri të dielën, duke rritur rrezikun për zjarre masive. Paralajmërimi vjen në kohën kur zjarrfikësit po luftojnë me disa nga zjarret më të mëdha të regjistruara në vend.

Edhe Franca është përfshirë nga temperaturat e larta, ku rajonet jugperëndimore Gironde dhe Landes janë vendosur në nivel alarmi për shkak të valës së nxehtit. Temperaturat e larta po vështirësojnë përpjekjet për shuarjen e zjarreve, të cilat autoritetet i kanë cilësuar si shumë të paparashikueshme.

Kryetari i Bashkisë së Bordosë, Thomas Cazenave, ka deklaruar se qyteti po përgatitet për çdo skenar, pasi një nga vatrat e zjarrit ndodhet vetëm 15 kilometra larg tij.

Sipas autoriteteve, rreth 220 mijë persona janë evakuuar në Francë, ndërsa në Spanjë mbi 100 mijë banorë janë detyruar të largohen nga shtëpitë e tyre për shkak të zjarreve.

Presidenti francez Emmanuel Macron e ka përshkruar situatën në zonat e prekura si një zjarr “plotësisht të paprecedentë”, duke e cilësuar si një nga sfidat më të mëdha me zjarret që nga Lufta e Dytë Botërore.

Operacionet për shuarjen e flakëve vazhdojnë, ndërsa autoritetet mbeten në gatishmëri për shkak të temperaturave të larta dhe rrezikut të përhapjes së mëtejshme të zjarreve./BBC//A.K/

Administrata Tatimore e Kosovës (ATK) ka njoftuar se ka intensifikuar kontrollet dhe veprimet operative në sektorët që ofrojnë shërbime estetike, kozmetike, dermatologjike dhe stomatologjike.

Sipas ATK-së, kontrollet do të përfshijnë klinikat për ndërhyrje estetike, kirurgji estetike, klinikat stomatologjike, qendrat për trajtime të fytyrës dhe trupit, qendrat për mbjelljen e flokëve, sallonet e bukurisë, qendrat e mjekësisë estetike, dermatologjisë, spa dhe wellness, si dhe studiot për trajtime estetike dhe me laser.

ATK-ja u ka bërë thirrje qytetarëve dhe klientëve që kanë marrë shërbime në këto biznese të bashkëpunojnë duke raportuar rastet e mundshme të moslëshimit të kuponëve fiskalë apo parregullsive të tjera tatimore.

Raportimet mund të bëhen përmes platformës DENONCO, si dhe përmes Qendrës së Thirrjeve të ATK-së në numrin 038 222 165.

Sipas institucionit, qëllimi i këtyre veprimeve është rritja e përmbushjes së detyrimeve tatimore, formalizimi i aktiviteteve ekonomike dhe krijimi i një konkurrence të barabartë ndërmjet bizneseve./A.K/

Deklaratat e presidentit serb, Aleksandar Vuçiq, se Kosova është pjesë e Serbisë, dhe të ministres së tij, Snezhana Paunoviq, për spastrimin etnik të Kosovës, u dënuan ashpër nga ministri i Jashtëm i Shqipërisë, Ferit Hoxha.

Në një konferencë nga Tirana me homologun e Kroacisë, shefi i diplomacisë shqiptare u ndal te kjo çështje.

“Theksuam rëndësinë e veçantë të dialogut ndërmjet Kosovës dhe Serbisë. Ky proces nuk mund të ndërtohet mbi revizionizmin historik, mohimin e fakteve, lartësimin e kriminelëve të luftës apo përmes retorikave nacionaliste, përçarëse dhe deklaratave të papranueshme që relativizojnë, justifikojnë ose u japin jehonë krimeve të luftës dhe politikave të dënuara si nga drejtësia ndërkombëtare, ashtu edhe nga ndërgjegjja njerëzore”.

Hoxha iu përgjigj drejtpërdrejt deklaratave të Vuçiqit për marrëveshjen ushtarake mes Tiranës, Zagrebit dhe Prishtinës.

“Çdo angazhim i yni, koordinim dypalësh, tripalësh apo më shumë nuk duhet të shqetësojë askënd e as të përdoret nga askush, në rajon apo jashtë tij, për të justifikuar militarizimin e vendit e shoqërisë e aq më pak për t’i fryrë zjarreve të rrezikshme të luftërave dhe për të rikthyer thirrjet arkaike për fitore e përkatësi territoriale. Asnjë përpjekje për të ringjallur ndasitë e së kaluarës, për të ushqyer tensione apo për të penguar proceset e pajtimit dhe bashkëpunimit nuk do të mund ta tërheqë zvarrë rajonin dhe as të cenojë të ardhmen tonë të përbashkët evropiane”.

Marrëveshja trepalëshe e sulmuar shumë nga Serbia u komentua dhe nga ministri i Jashtëm kroat, Gordan Grliq-Radman, i cili foli për thellim të bashkëpunimit rajonal, por edhe mes dy vendeve mike./TCH/A.K/

Është zbardhur dëshmia e Rozalinda Plakës, ish-të fejuarës së Refit Buzit, i cili tre ditë më parë vrau prindërit e saj, ndërsa më pas mori peng për disa orë ish-partneren, përpara se t’i jepte fund jetës.

Anila Hoxha, Rozalinda ka rrëfyer për marrëdhënien e saj me Buzin, arsyet e ndarjes dhe momentet e frikshme të ngjarjes së rëndë.

“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar. Arsyeja ka qenë sepse ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua.”

Rozalinda ka deklaruar se prindërit e saj ishin në dijeni të problemeve në këtë marrëdhënie dhe se nuk kishin qenë dakord për lidhjen që në fillim.

“Këto gjëra i dinin edhe prindërit e mi, të cilët nuk kanë qenë dakord për këtë lidhje që në fillim.”

Në lidhje me momentin e sulmit në banesë, Rozalinda ka rrëfyer se ishte duke fjetur kur dëgjoi një zhurmë të fortë, që e ngjau me një krismë arme.

“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur.”

Sipas dëshmisë së saj, në korridor ajo ka parë Refit Buzin me armë në dorë dhe babain e saj të shtrirë në tokë.

“Kur dola kam parë shtetasin Refit Buzi në korridor, me një armë të gjatë si ato të gjahut në dorë, si dhe kam parë babain tim Kosta Plaka të shtrirë përmbys te hyrja e dhomës, i mbuluar me gjak.”