Sipas njoftimit të Qeverisë serbe pas takimit, zyrtarët ruse shprehën gatishmërinë për të vazhduar mbështetjen për Serbinë, duke theksuar rëndësinë e ruajtjes së stabilitetit dhe të paqes në rajon. Ata përsëritën refuzimin kategorik të ndërhyrjeve të huaja në çështjet e brendshme të shteteve sovrane, një qëndrim që është bërë pjesë e politikës së jashtme të Rusisë, veçanërisht në lidhje me ndikimin perëndimor në Ballkan.

Termi “revolucioni me ngjyra” i përdorur nga Vulin dhe Shoigu iu referohet një serie protestash dhe ndryshimeve të regjimeve autoritare që kanë ndodhur kryesisht në hapësirën e ish-Bashkimit Sovjetik, përfshirë Revolucionin Portokalltë në Ukrainë (2004-2005). Pas protestave të shumta në Serbi dhe akuzave nga presidenti Aleksandar Vuçiç, i cili tha se janë investuar miliona euro për të shpërthyer një revolucion të ngjashëm, zyrtarët serbë dhe rusë shprehen të shqetësuar për përpjekjet e mundshme të ndryshimit të qeverisë në Serbi, që i konsiderojnë të nxitura nga faktorë të jashtëm.

Në këtë kontekst, pas takimit të Vulin dhe Shoigu, është bërë e ditur se të dyja palët janë dakorduar për vazhdimin e bisedimeve dhe kontakteve përmes Këshillit të Sigurisë Kombëtare të Federatës Ruse, me qëllim forcimin e lidhjeve tradicionale mes Serbisë dhe Rusisë.

Një ditë më parë, një tjetër takim i rëndësishëm kishte ndodhur mes Ministrit të Jashtëm rus, Sergei Lavrov dhe Ministrit të Jashtëm serb, Marko Gjuriq, ku u theksua gjithashtu mbështetja ruse për qëndrimin e Serbisë kundër presioneve të huaja, veçanërisht nga vendet perëndimore. Lavrov deklaroi se Rusia dënon ndërhyrjen e jashtme në çështjet e brendshme të Serbisë, duke i bërë thirrje perëndimit të respektojë parimin e mosndërhyrjes.

Reagimi i Bashkimit Evropian, pas këtyre zhvillimeve, ishte i menjëhershëm. BE kërkoi nga Serbia që të përmbahet nga veprimet dhe deklaratat që janë në kundërshtim me politikën e jashtme të bllokut evropian. Ky është një tjetër mesazh që vjen në një moment delikat për Serbinë, si vend kandidat për anëtarësim në BE, që duhet të balancojë marrëdhëniet me Rusinë dhe angazhimet ndaj integrimit evropian.

Për momentin, Serbia dhe Turqia janë dy vendet e vetme kandidate për anëtarësim në BE që nuk janë bashkuar sanksioneve të Bashkimit Evropian ndaj Rusisë, duke i dhënë kështu një dimension të veçantë marrëdhënieve të tyre me Kremlinin./UBTNews/