Lajmet

Senatori Murphy: Serbia të mos e pengojë Kosovën në organizata ndërkombëtare

Pas takimit me Osmanin, dy senatorët amerikanë do të takojnë edhe kryeministrin Albin Kurti.

Published

3 years ago

on

Presidentja e Kosovës, Vjosa Osmani, ka pritur në takim senatorët amerikanë, Chris Murphy dhe Gary Peters. Këta të fundit kanë kërkuar që Serbia të mos e pengojë Kosovën në rrugën e anëtarësimit në organizata ndërkombëtare.

Pas takimit, presidentja Osmani ka thënë se Kosova është vendi më pro amerikan në botë, derisa kritikoi Serbinë për moszbatim të marrëveshjes së Ohrit.

“Në kuadër të diskutimeve për dialogun, i njoftova senatorët për listën e gjatë të shkeljeve nga ana e Serbisë. Kjo për mua nuk është një temë e thjeshtë administrative se kush e ka listën më të gjatë të obligimeve të pazbatuara, por ka të bëjë me paqe dhe stabilitet, gjë të cilën Shtetet e Bashkuara kanë kontribuar jashtëzakonisht shumë. Mbi të gjitha ka të bëjë me sigurinë e rajonit tonë dhe mbrojtjen e rajonit tonë nga tendencat destabilizuese. Ne shpresojmë që zëri i senatit do të vazhdojë të jetë i qartë, kundër strukturave ilegale që po i terrorizojnë qytetarët serb në veri të vendit, të cilët janë edhe pjesë e grupeve trans-nacionale të krimit të organizuar, siç është thënë nga thesari amerikan. Sa i përket zbatimit të detyrimeve që dalin nga marrëveshja e Brukselit dhe Ohrit, ashtu siç kam thënë gjithnjë, më lejoni të përsëris se Kosova nuk i ikë detyrimeve të saj, Kosova do të zbatojë secilin detyrim që është pajtuar si pjesë e këtij dialogu, përderisa e dina të gjithë se marrëveshja thotë se të gjitha nenet e saj janë njësojë të rëndësishme. Siç e dini komunat në Kosovë kanë të drejtë të mblidhen në Asociacione për të ndihmuar punën e tyre, por e gjithë kjo në përputhje të plotë me Kushtetutën e Kosovës dhe vendimin e Gjykatës Kushtetuese të vitit 2015, si dhe qëndrimin e shkruar të qeverisë amerikane përmes zotëri Chollet dhe Escobar”, ka thënë ajo.

Në anën tjetër, dy senatorët amerikan kanë ofruar mbështetjen ndaj Kosovës, ndërkohë kërkuan nga Serbia që mos të pengojë Kosovën në anëtarësimin në organizata ndërkombëtare.

Senatori Chris Murphy, ka thënë se aleanca e ShBA-ve me Kosovën është e fuqishme dhe jetike. Ai ka thënë se Serbia duhet të zbatojë marrëveshjen e fundit, por edhe Kosova të konkretizojë zotimin për themelimin e Asociacionit të komunave me shumicë serbe.

“Kjo aleancë, kjo marrëdhënie bilaterale është e fuqishme, qëndrueshme dhe është jetike. Kur ShBA-ja ka nevojë për ndihmë, thirrjet e para janë tek miqtë tanë në Kosovë. Nuk është rastësi që Kosova është ndër vendet e para që ngritët në këmbë dhe deklaron se agresioni i Vladimir Putinit nuk mund të pranohet dhe është bashkë me ShBA-në në njoftimin për sanksione. Po ashtu nuk është rastësi që kur ShBA-ja ka nevojë për t’i larguar aleatët nga Afganistani, Kosova ka treguar vetën duke ndihmuar. Nuk është rastësi që po e fillojmë udhëtimin tonë me partnerët tanë në Prishtinë. Po ashtu e çmojmë shumë vëmendjen që qeveria po ia kushton vëmendjen sundimit të ligjit dhe rritjes ekonomike…Na vjen mirë që po e shohim marrëveshjen e fundit, ndërmjet Kosovës dhe Serbisë që përfshinë njohjen e ndërsjellë të dokumenteve zyrtare, por edhe hapa të vështirë që duhet të ndërmerren nga dy palët. Serbia duhet të ndalojë të pengojë Kosovën për të qenë pjesë e organizatave ndërkombëtare. Kosova ka marrë një përkushtim edhe t’iu lejuar komunave të bëhen bashkë në një Asociacion”, ka shtuar ai.

Mbështetje ndaj Kosovës ka deklaruar edhe senatori tjetër, Gary Peters.

“Marrëdhënia ndërmjet ShBA-së dhe Kosovës është me të vërtet speciale, kam pasur privilegjin të udhëtojë në krejt botën, por nuk ma merr mendja që ka ndonjë vend tjetër në botë që ka një miqësisë më të fortë sesa e kemi këtu. E ndjejmë miqësinë që kemi këtu, e ndjejmë kur jemi këtu në rrugë tek njerëzit dhe do të vazhdojmë të punojmë ngushtë që kjo demokraci të jetë e fortë dhe fuqizohet edhe më tej…Do të vazhdojmë të shohim mundësitë për të forcuar mundësitë për sigurinë kibernetike, gjithashtu edhe për përmirësimin e marrëdhënieve të forcave ushtarake të ShBA-së për ndërveprueshmërinë me tërë Evropën”, ka theksuar ai.

Pas takimit me Osmanin, dy senatorët amerikanë do të takojnë edhe kryeministrin Albin Kurti.

Related Topics:
Continue Reading

Lajmet

FSK merr pjesë në ushtrimin shumëkombësh “Saber Junction 26” në Gjermani

Published

5 hours ago

on

September 10, 2026

By

Kontingjenti i Forcës së Sigurisë së Kosovës (FSK), i përfaqësuar nga një kompani këmbësorie e Regjimentit të Tretë të Forcave Tokësore, ka marrë pjesë në ushtrimin shumëkombësh “Saber Junction 26”, të zhvilluar në Qendrën e Gatishmërisë Shumëkombëshe në Hohenfels të Gjermanisë.

Sipas FSK-së, kompania kosovare është integruar në Brigadën Ajrore 173 të Ushtrisë së Shteteve të Bashkuara, përkatësisht në Batalionin 3-504 “Blue Devils”.

Pas fazës së planifikimit, koordinimit dhe trajnimit, pjesëtarët e FSK-së janë angazhuar në operacione të ndryshme në terren, përfshirë operacione sigurie në mbështetje të zbarkimit ajror, patrulla luftarake dhe operacione mbrojtëse.

Sipas njoftimit, pjesëmarrja në këtë ushtrim ka mundësuar zhvillimin e mëtejshëm të aftësive të komandimit dhe kontrollit, planifikimit dhe ekzekutimit të operacioneve, si dhe rritjen e ndërveprueshmërisë me Ushtrinë Amerikane dhe forcat e vendeve partnere.

Integrimi i kompanisë së FSK-së në një formacion shumëkombësh ka shërbyer edhe për testimin e aftësive të saj në një mjedis kompleks dhe dinamik trajnues, krahas njësive partnere.

Gjatë “Observation Day”, aktivitetet e kontingjentit të FSK-së janë përcjellë nga Komandanti i Komandës së Forcave Tokësore, gjeneral brigade Mehmet Lladrovci, dhe rreshter majori i KFT-së, Naim Smakolli.

Pjesëmarrja në ushtrime të tilla, sipas FSK-së, kontribuon në rritjen e gatishmërisë operacionale, profesionalizmit dhe kapaciteteve për të vepruar krah për krah me ushtritë partnere në operacione shumëkombëshe./A.K/

Continue Reading

Lajmet

Gjashtë motoçikleta sekuestrohen në Pejë për kundërvajtje në trafik

Published

6 hours ago

on

September 10, 2026

By

Policia e Kosovës ka njoftuar se sot, më 10 shtator, në Pejë janë sekuestruar gjashtë motoçikleta për kundërvajtje në komunikacion.

Sekuestrimi është kryer nga Njësia e Trafikut për Qytet e Stacionit Policor në Pejë, në kuadër të planit operativ “Siguria në shkolla”, i cili do të vazhdojë edhe në ditët në vijim.

Sipas Policisë, motoçikletat janë sekuestruar për kundërvajtje të ndryshme, përfshirë drejtimin pa patentë shoferi, pa regjistrim dhe pa helmetë.

Drejtoria Rajonale e Policisë në Pejë ka bërë të ditur se aktivitetet në terren do të vazhdojnë me qëllim të parandalimit të aksidenteve në komunikacion.

Policia ka paralajmëruar “zero tolerancë” ndaj të gjithë kundërvajtësve në trafik./A.K/

Continue Reading

Lajmet

UBT vazhdon të forcojë bashkëpunimet ndërkombëtare dhe lidhjet institucionale me partnerë evropianë

Published

6 hours ago

on

September 10, 2026

By

UBT vazhdon të forcojë bashkëpunimet ndërkombëtare dhe lidhjet institucionale me partnerë evropianë. Në kuadër të këtyre përpjekjeve, Zëvendësdekani i Departamentit të Turizmit në UBT, Prof. Alban Fejza, zhvilloi një takim në Ambasadën e Italisë në Kosovë, së bashku me Prof. Raffaella Ritucci dhe Lirdion Blakaj.

Gjatë takimit u diskutua për mundësitë e konkretizimit të bashkëpunimeve të ndërsjella me UNITO – University of Turin dhe UNITA – Universitas Montium, aleanca universitare evropiane e koordinuar nga UNITO.

Diskutimi u fokusua në mundësi konkrete për bashkëpunim akademik, mobilitet, ndërkombëtarizim dhe zhvillimin e iniciativave të përbashkëta, me synim që interesat e përbashkëta të shndërrohen në hapa konkretë.

Ky takim përbën një hap të rëndësishëm në drejtim të forcimit të lidhjeve akademike dhe institucionale ndërmjet UBT-së, partnerëve italianë dhe hapësirës evropiane të arsimit të lartë.

Continue Reading

Lajmet

Tenderi afro 400 mijë eurosh për kamionë në Ekoregjion, aktakuzë ndaj tre personave

Published

7 hours ago

on

September 10, 2026

By

Prokuroria Speciale ka ngritur aktakuzë ndaj tre personave, B.Sh., A.G. dhe R.Z., si dhe ndaj subjektit juridik SH.P.K. “D.C & E”, për veprat penale “Keqpërdorim i pozitës apo autoritetit zyrtar”, “Keqpërdorimi dhe mashtrimi në prokurimin publik” dhe “Mbajtja në pronësi, kontroll ose posedim të paautorizuar të armëve”.

Sipas aktakuzës, më 7 qershor 2023 dhe gjatë periudhës 18 shtator 2023 deri më 16 nëntor 2023, në Prizren, B.Sh., në cilësinë e kryeshefit të KRM “Eko Regjioni”, në bashkëkryerje me zyrtarin e kësaj kompanie, A.G., kanë tejkaluar kompetencat e tyre me qëllim të përfitimit të dobisë pasurore për vete dhe për subjektin juridik SH.P.K. “D.C & E”.

A.G. dhe B.Sh. akuzohen se, në kundërshtim me legjislacionin për prokurimin publik, kanë krijuar mundësi që tenderin “Furnizimi me kamiona kompaktor dhe autobusë për nevojat e KRM ‘Ekoregjioni’”, në vlerë prej 385 mijë e 500 eurosh, ta përfitojë SH.P.K. “D.C & E”.

Sipas Prokurorisë, me këto veprime buxhetit të KRM “Ekoregjioni” i është shkaktuar dëm në shumën prej 233 mijë e 685.37 eurosh.

Ndërkaq, R.Z. akuzohet për veprën penale “Keqpërdorimi dhe mashtrimi në prokurimin publik”. Sipas aktakuzës, ai u ka paguar B.Sh. dhe A.G. shpenzimet e një udhëtimi jashtë territorit të Kosovës, me qëllim të koordinimit të veprimeve inkriminuese dhe ndikimit në dhënien e tenderit.

Prokuroria pretendon se R.Z. paraprakisht kishte arritur marrëveshje të kundërligjshme me të pandehurit, përmes së cilës ishin përshtatur specifikat teknike të tenderit./A.K/

Continue Reading

Të kërkuara