Lajmet

​Selmanaj: Kurti po ju del në mbrojtje atyre që kanë abuzuar me paranë publike

Published

on

Deputeti i Lidhjes Demokratike të Kosovës (LDK), Driton Selmanaj deklaroi se kryeministri Albin Kurti po ju del në mbrojtje atyre që kanë abuzuar me paranë publike.

Sipas tij, ai ka harruar të gjitha premtimet që dikur bënte për KEK-un, ndërkohë që siç u shpreh ai, energjia elektrike pas ardhjes në pushtet të LVV-së u rrit për 100 për qind. Ai e konsideroi të domosdoshme që të zgjerohen hetimet, duke përfshirë ministren e Ekonomisë, Artane Rizvanolli, Dejona Mihali e kryeministrin Albin Kurti.

Kështu u shpreh ai në seancë të jashtëzakonshme të ftuar nga opozita, ku po diskutohet për “skandalet dhe keqmenaxhimin në Korporatën Energjetike të Kosovës”.

“Nëse mbani mend zotëri Kurtin dikur thoshte që ‘populli i Kosovës dhe njerëzit e Kosovës po rrinë mbi thëngjill dhe po paguajnë shumë shtrenjtë’ dhe me të ardhur në pushtet krejt çka ndodhi është që energjia elektrike në Kosovë u rrit për 100 për qind pothuajse. U harruan të gjitha ato që u thanë, u harruan të gjitha ato premtime ndërkohë që faktet natyrore nuk u ndryshuan, vetëm ndryshuan sjelljet politike. E dyta, akuzonin për politizim bordesh, akuzonin për politizim të institucioneve si ndërmarrje publike dhe çfarë bën, njeriun e parë që e dërguan për të udhëhequr ose në pozitën e kryeshefit ekzekutiv në KEK, e dërguan personin që udhëhiqte Komitetin për Energji në LVV, Nagip Krasniqin, i cili sot është prapa grilave”, tha Selamanaj.

Përveç tregtimit me energji, siç deklaroi Selmanaj, me një kompani që nuk ka pasur licencë, ai tha se LDK ka ngritur shqetësimet për tregtim edhe me kompani të dyshimta.

“Krejt këtij skandali apo kaosi në fushën e energjetikës në Kosovë i shtohet edhe një person tjetër e që është Martin Berishaj, e që informatat tashmë edhe publike janë që brenda pak ditësh ai ka nxjerrë nga bankat e Kosovës mbi 1 milion e gjysmë euro, ndërkohë që institucionet e Kosovës ende nuk janë vënë në lëvizje sa duhet dhe si duhet për të parë si, kush, ku janë burimi i këtyre të ardhurave, atë që ne i kemi parë burim i këtyre të ardhurave është GEN-i me seli në Beograd. Përsëri asnjë përgjegjësi politike, asnjë përgjegjësi penale në rastin konkret. Përkundrazi kryeministri Kurti del në mbrojtje të tyre sikur të jetë avokat edhe me tërë kapacitetin e tij provon që të mbrojë edhe ata që ne jemi të bindur që kanë abuzuar me paranë publike, qoftë brenda KEK-ut, qoftë në diplomaci”, shtoi Selmanaj.

Ai konsideroi se është e domosdoshme që të zgjerohen hetimet.

“LDK është e bindur që përtej zotëri Nagip Krasniqit, duhen zgjeruar hetimet. Hetimet duhet të shkojnë përtej, duhet parë edhe niveli politik i përgjegjësisë, ministrja Rizvanolli, zonja Dejona Mihali deri tek Albin Kurti. Ne e kemi parë në komunikimet që ky person, Dejona Mihali, del të jetë personi më i fuqishëm në Kosovë pas kryeministrit. Është përfshirë madje edhe se kur Kosova duhet të ketë reduktime e kur jo, është përfshirë në punimet, në komunikatat, në raportimet kur deputetët kanë bërë në rrjedhën e mbledhjeve të bordit të KEK-ut dhe kjo del që është mbi gjithçka. Madje del se duhet të vendos se a duhet të vendos dikush kapele apo jo në takimet me të”, përfundoi.

Lajmet

QKUK përfundon verifikimin e pronësisë, paralajmëron rrënimin e objekteve pa leje në oborr

Published

on

By

Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.

Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.

Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.

Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.

Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.

“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/

Continue Reading

Lajmet

KEDS: Rikthehet energjia elektrike për rreth 80 për qind të konsumatorëve të prekur nga erërat e forta

Published

on

By

Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.

Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.

Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.

Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/

Continue Reading

Lajmet

Nga 18 vjet burgim për Ilir dhe Rrahim Abdullahun për vrasjen e policit Triumf Riza

Published

on

By

Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.

Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.

Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/

Continue Reading

Lajmet

AKB: Nga 7.16 miliardë euro remitanca në pesë vjet e gjysmë

Published

on

By

Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.

Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.

Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.

Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.

Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.

Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/

 

 

 

Continue Reading

Të kërkuara