Lajmet

Selimi: Kërkesat financiare për të akuzuarit nga Specialja shqyrtohen këtë javë

Published

5 years ago

December 14, 2020

Betim Gashi

Ministria e Drejtësisë i ka pranuar disa kërkesa për t’i paguar avokatët e të akuzuarve të Gjykatës Speciale. Këtë e bëri të ditur ministri i Drejtësisë, Selim Selimi, gjatë një konferencë për media, raporton Ekonomia Online.

Selimi tha se këto kërkesa do të shqyrtohen këtë javë. Ai theksoi se javën e kaluar Agjencia e Kosovës për Inteligjencë e ka bërë verifikimin e zyrtarëve të ministrisë që do të merren me këtë çështje.

I pari i Drejtësisë në Kosovë shtoi se së pari do të shqyrtohen dokumentet, pastaj shuma e kërkuar e parave dhe në fund do të bëhet transferimi i mjeteve.

“Janë të klasifikuara. Ky klasifikim është bërë më herët në mënyrë që të ruhet konfidencialiteti mes avokatit dhe klientit. Ne i kemi pranuar disa kërkesa, mund të them. Ato do të fillojnë të shqyrtohen këtë javë, pasi që deri tash e kemi pritur verifikimin e AKI-së të zyrtarëve të cilët do të merren me procesimin e këtyre kërkesave sepse na është dashur që ata ta kenë nivelin e verifikimit sekret. Fatmirësisht javën e kaluar AKI-ja e ka përfunduar verifikimin dhe tash i kemi certifikatat e këtyre zyrtarëve të dhëna nga AKI-ja. Grupi do të mblidhet shpejtë dhe do ta shqyrtojë çdo kërkesë me dokumentet përcjellëse. Do të shqyrtohen së pari dokumentet, a janë të kompletuara, pastaj do të shqyrtohet shuma e kërkuar. Edhe shuma e kërkuar gjithashtu rregullohet me norma të veçanta se cila do të jetë për çdo kërkesë. Dhe pasi që të kalohet kjo pjesë procedurale, atëherë do të kemi mundësi që t’i transferojmë paratë të mbrojtjes”, deklaroi ai.

Tutje ai tha se ligji i obligon për t’i ndihmuar të akuzuarit potencialë, ndërsa theksoi se i kanë 20 milionë euro për t’i ndihmuar.

“Ne e kemi buxhetin e caktuar të Ministrisë së Drejtësisë, buxhet i cili ka të bëjë me Divizionin për Mbrojtjen e të Akuzuarve Potencialë. Është detyrë e jona për të cilën na obligon ligji. Nga ky ligj kanë dalë tri udhëzime administrative që e rregullojnë mënyrën se si ndahen ato fonde. Ne i kemi 7 milionë euro të cilat janë ndarë me amandamentim në Kuvend gjatë rishikimit buxhetor dhe 13 milionë euro tjera të cilat janë në buxhetin rezervë”, shtoi ai.

Selimi u pyet nga gazetarët se nëse nga ndihma do të përfitojnë edhe familjarët ose miqtë e të akuzuarve.

Ministri i Drejtësisë theksoi se shteti i ndihmon familjarët me paratë e vizitës që duan t’ua bëjnë të akuzuarve.

“Ligji nuk e parasheh ndihmën për familjarët, miqtë, mikeshat. Familjarët e kanë ndihmën që ua jep shteti për t’i vizituar të akuzuarit”, deklaroi ai.

Lajmet

Kurti takon kryetaren e Akademisë së Shkencave dhe Arteve të Kosovës

Published

2 hours ago

February 27, 2026

UBTNews

Kryeministri i Kosovës, Albin Kurti, priti në takim kryetaren e Akademisë së Shkencave dhe Arteve të Kosovës, Justina Shiroka Pula, me të cilën diskutoi për punën dhe prioritetet e institucionit.

Gjatë takimit u theksua rëndësia e bashkëpunimit ndërmjet Qeverisë dhe Akademisë, veçanërisht në fushën e arsimit dhe zhvillimit të vendit. Palët u dakorduan për komunikim të rregullt dhe thellim të bashkëpunimit në të ardhmen.

Në takim ishte i pranishëm edhe zëvendësministri i Arsimit dhe Shkencës, Përparim Kryeziu, si dhe nënkryetari i Akademisë, Fejzullah Krasniqi, dhe sekretari shkencor, Bardh Rugova.

Lajmet

Supremja lë në fuqi burgimin e përjetshëm për Dardan Krivaqën

Published

3 hours ago

February 27, 2026

UBTNews

Gjykata Supreme ka vërtetuar dënimin me burgim të përjetshëm ndaj Dardan Krivaqës për vrasjen e Marigona Osmanit, duke lënë në fuqi vendimet e shkallës së parë dhe të dytë.

Sipas Supremes, gjykatat më të ulëta kanë analizuar në detaje të gjitha provat, përfshirë dëshmitë, raportet e ekspertizës, provat materiale dhe video-incizimet nga banesa ku qëndronin i akuzuari dhe viktima. Nga këto prova është konstatuar se viktima kishte pësuar lëndime të rënda si pasojë e dhunës së ushtruar nga i akuzuari.

Raporti i autopsisë dhe ekspertët mjeko-ligjorë kanë vërtetuar se vdekja erdhi si pasojë e lëndimeve të shumëfishta trupore të shkaktuara me mjet të fortë, duke mbështetur kualifikimin e veprës si vrasje e kryer në mënyrë mizore.

Gjykata Supreme rrëzoi edhe pretendimet e mbrojtjes për parregullsi procedurale, ekspertizë psikiatrike dhe ndikim të substancave narkotike, duke theksuar se i akuzuari ka qenë i aftë të kuptojë veprimet e tij në momentin e kryerjes së krimit.

Lajmet

Humb jetën një punëtor i KEK-ut në Termocentralin “Kosova B”

Published

4 hours ago

February 27, 2026

UBTNews

Vdes një punëtor i Korporatës Energjetike të Kosovës (KEK sh.a.) sot, në një incident të rëndë në Termocentralin “Kosova B” në Obiliq. Punëtori 55 vjeç, u përfshi nga një mjet transportues kamion dhe pësimi i lëndimeve të rënda rezultoi fatal.

Në vendngjarje menjëherë kanë dalë zyrtarët e KEK-ut, Policia e Kosovës dhe ekipet mjekësore, të cilat konfirmuan vdekjen e të ndjerit.

KEK sh.a. shpreh ngushëllimet më të sinqerta familjes së viktimës, kolegëve dhe bashkëpunëtorëve të tij. Autoritetet po e trajtojnë rastin në përputhje me procedurat ligjore.

Ky informacion është bërë i ditur nga vetë Korporata Energjetike e Kosovës.

Lajmet

Konjufca bisedon me shefin e misionit të Luksemburgut për thellimin e bashkëpunimit

Published

6 hours ago

February 27, 2026

UBTNews

Ministri i Punëve të Jashtme dhe Diasporës, Glauk Konjufca, takoi dje Shefin e Misionit të Ambasadës së Luksemburgut në Kosovë, Eric Dietz.

Në takim, Dietz e uroi Konjufcën për mandatin e ri dhe riafirmoi gatishmërinë për të vazhduar bashkëpunimin e ngushtë mes dy vendeve.

Diskutimet u fokusuan tek forcimi i marrëdhënieve bilaterale, koordinimi për procesin e integrimit evropian dhe zgjerimi i bashkëpunimit ekonomik, thuhet në njoftimin e MPJD-së.

Konjuca është shprehur se Kosova mbetet e përkushtuar për thellimin e mëtejshëm të partneritetit me Luksemburgun.