Kryetari i Mitrovicës së Jugut, Bedri Hamza ka njoftuar për votimin e buxhetit të komunës, duke paralajmëruar hapjen e rrugës “Ali Zeneli” dhe “shumë projekte të rëndësishme”.

“I lumtur që u votua Buxheti i Mitrovicës së Jugut për vitin 2025 dhe që me votat e asamblistëve u krijuan mundësitë e hapjes së rrugës “Ali Zeneli”, ku jetojnë qindra familje, të cilën asnjë qeverisje lokale nuk kishte mundur ta hapte në këto dy dekada për shkak të vështirësive që janë të njohura për të gjithë mitrovicasit. Hapja e kësaj rruge do ta shkarkojë jashtëzakonisht shumë komunikacionin dhe do të hapë perspektivë të re ekonomike për banorët e kësaj zone. Dhe, po ashtu, perspektivë të re do të hapin edhe shumë projekte të rëndësishme dhe me ndikim të madh në përmirësimin e jetës së qytetarëve që do të realizohen me buxhetin e miratuar për vitin e ardhshëm”, shtoi ai.

Kandidati i PDK-së për kryeministër i ka falënderuar asambleistët e të gjitha partive politike për “vendimmarrjen e përgjegjshme në të mirë të qytetarëve dhe komunës sonë”.

Qeveria e re franceze, e përbërë nga konservatorë dhe centristë, është mbledhur për herë të parë për të diskutuar buxhetin dhe çështjet e emigracionit. Kryeministri Michel Barnier ka thirrur një takim me ministrat e sapoemëruar përpara seancës së kabinetit në pallatin presidencial Élysée.

Në një intervistë televizive, Barnier ka theksuar se sfida kryesore do të jetë projektligji i buxhetit për vitin 2025, që pritet të diskutohet në parlament muajin e ardhshëm. Ai shprehu nevojën për një “përpjekje kombëtare” për të përmirësuar situatën pas vendosjes së Francës nën procedurën për deficit të tepërt nga Komisioni Evropian.

Barnier ka sugjeruar se do të rriten taksat për të pasurit, duke premtuar se nuk do të rrisë barrën tatimore për të gjithë francezët. Ai gjithashtu shprehu shqetësim për numrin e emigrantëve në Francë, duke e cilësuar situatën si “të padurueshme” dhe duke iu referuar masave të ngjashme nga vendet fqinje, si Gjermania.

Testi i tij i parë politik do të jetë fjalimi i politikës së përgjithshme në Asamblenë Kombëtare më 1 tetor. Barnier, një politikan me përvojë dhe negociator për Brexit, ka theksuar rëndësinë e kompromisit dhe bashkëpunimit në qeverisje, pavarësisht dallimeve politike me presidentin Macron./UBTNews/

Deputeti shqiptar në Kuvendin e Serbisë, Shaip Kamberi, ka folur për protestën e sotme që është zhvilluar në Preshevë. Ai para mediave ka theksuar se shumica e partive politike shqiptare ishin prezente në protestë dhe se ishin dakorduar që të kenë më shumë aktivitete në të mirë të shqiptarëve të Luginës së Preshevës.

“Protestat janë një mekanizëm që kemi filluar t’i praktikojmë me qëllim që të sensibilizojmë çështjen tonë dhe t’i detyrojmë akterët kryesor të fillojnë të veprojnë. Prandaj, Këshilli Organizativ do të vlerësojë kohën për të vazhduar me protesta të tjera dhe mekanizma të tjerë juridik të cilët i kem në disponim. Pra, partitë politike shumica prej tyre sot janë prezente këtu, janë dakorduar që të vazhdojmë me një aktivitet politik më efektiv dhe më dinamik”, ka thënë Kamberi.

Irani ka filluar ndërtimin e një muri mbi 10 kilometra të gjatë në kufirin e tij me Afganistanin, një vendim që reflekton shqetësimet e rritura për fluksin e refugjatëve afganë. Zëvendëskomandanti i forcave tokësore të ushtrisë, gjeneral Nozar Nemati, konfirmoi se plani për të zgjeruar këtë mur përfshin edhe ndërtimin e 50 kilometra të tjerë në të ardhmen.

Gjatë një deklarate për mediat lokale, gjenerali Nemati theksoi se “në kufirin me Afganistanin janë ndërtuar mbi 10 km mure” si pjesë e një strategjie për të menaxhuar fluksin e emigrantëve. Ai shpjegoi se ky hap është i nevojshëm për të rritur sigurinë dhe për të kontrolluar më mirë hyrjen dhe daljen në territorin iranian.

Ministri i Brendshëm, Eskander Momeni, kishte shpallur më herët mbylljen e plotë të kufirit, duke theksuar se Irani nuk kishte më kapacitet për të pranuar një numër kaq të madh refugjatësh afganë, pas rikthimit të talebanëve në pushtet në vitin 2021. Fluksi i refugjatëve afganë në Iran ka qenë në rritje, duke krijuar sfida për autoritetet iraniane.

Me një kufi prej më shumë se 900 kilometrash me Afganistanin, autoritetet iraniane kanë intensifikuar kontrollet dhe kanë rritur presionin mbi emigrantët e parregullt, duke realizuar dëbime të rregullta. Mbyllja e kufirit dhe ndërtimi i murit janë pjesë e një politike më të gjerë për të menaxhuar krizën e refugjatëve dhe për të mbajtur nën kontroll situatën në zonat kufitare./UBTNews/