ChatGPT ka qenë aplikacioni më i shkarkuar në botë për shtatë muaj me radhë, duke ruajtur vendin e parë si në Google Play ashtu edhe në App Store nga marsi deri në shtator 2025, sipas të dhënave të Appfigures.

Sipas analizave, aplikacioni i OpenAI është shkarkuar rreth 410.8 milionë herë në mbarë botën që nga fillimi i vitit, duke lënë pas rivalët kryesorë si Gemini i Google me 131.1 milionë shkarkime.

DeepSeek ka 79.2 milionë, Grok ka 46.6 milionë, Perplexity me 43.1 milionë, dhe Meta AI me vetëm 16.9 milionë shkarkime.

Drejtori ekzekutiv i OpenAI, Sam Altman, ka bërë të ditur se ChatGPT tashmë numëron mbi 800 milionë përdorues aktivë në javë, ndërsa platforma përpunon më shumë se 2.5 miliardë mesazhe çdo ditë — që përkthehet në rreth 29,000 mesazhe për sekondë. /A.Z/UBT News/

Meta po zgjerohet funksionin e përkthimit të Reels-ave, duke e bërë përmbajtjen më të qasshme për përdoruesit globalisht.

Pas përkthimeve dypalëshe në anglisht dhe spanjisht, kompania ka njoftuar shtimin e indishtes dhe portugalishtes në listën e gjuhëve të mbështetura.

Ky funksion synon të ndihmojë krijuesit të arrijnë audienca më të gjera përmes përkthimeve automatike të realizuara nga Meta AI, i cili përdor klonim të zërit për të ruajtur tonin dhe intonacionin origjinal të folësit.

Përkthimet janë falas dhe mund të përdoren nga:

Krijuesit në Facebook me të paktën 1,000 ndjekës

Të gjitha llogaritë publike në Instagram

Përdoruesit në vendet ku është i disponueshëm Meta AI

Përveç zërit të personalizuar, Meta ofron edhe sinkronizim të buzëve, që përshtat audion e përkthyer me lëvizjet e gojës së krijuesit për një përvojë më realiste. Të gjitha videot e përkthyera shënohen me etiketën “Përkthyer me Meta AI” për transparencë ndaj shikuesve.

Meta paralajmëron se do shtojë shumë gjuhë në të ardhmen, duke e bërë përmbajtjen gjithëpërfshirëse në nivel global. /A.Z/UBT News/

Nuk do ta kuptonit nga pamja e tij e ëmbël me “sytë e bretkosës”, por Twingo elektrik, që pritet të dalë në treg vitin e ardhshëm, do të jetë Renault më i shpejtë i prodhuar ndonjëherë – jo për shpejtësinë në rrugë, por për shpejtësinë e zhvillimit.

Po, më i shpejtë se Clio V6, Mégane RS Trophy-R dhe madje edhe Espace i famshëm i viteve ’90 me motor Formula 1 V10.

Ky model i ri, me çmim 20,000 euro, do të jetë automjeti i parë i Renault i zhvilluar për më pak se dy vjet, vetëm 100 javë. Kjo është gjysma e kohës që kompania kishte nevojë vetëm pak vite më parë për të krijuar një makinë të re.

Edhe pse kjo “shpejtësi” nuk ka të bëjë me performancën në pistë, është hap i madh strategjik në përpjekjen e Renault për të konkurruar me prodhuesit kinezë dhe për të mbetur relevant në epokën e automjeteve elektrike.

Një proces i përshpejtuar zhvillimi

Ky ritëm rekord është pjesë e projektit Leap 100, një nismë që synon të shkurtojë ndjeshëm kohën e planifikimit, dizajnimit, zhvillimit dhe prodhimit të automjeteve të reja. Për krahasim, Renault 5 dhe Renault 4, të ndërtuar mbi platformën Ampr Small EV, u zhvilluan secili për rreth tre vjet. Twingo do të shkojë edhe më tej, duke përdorur të njëjtën platformë e komponentë të përbashkët për të kursyer kohë dhe kosto.

Arsyeja pas nxitimit

Sipas Cedric Combemerel, zëvendësdrejtor i teknologjisë në Renault, shpejtësia është çelësi për t’iu përgjigjur trendeve të tregut që ndryshojnë me ritëm të shpejtë.

“Dy vjet më parë, të gjithë përdornin bateri litium NMC dhe ndiheshin të sigurt. Sot, tregu kërkon LFP, dhe kush nuk përshtatet shpejt, mbetet prapa,” – shpjegon ai.

Kjo qasje, lejon që kompania të marrë vendime fleksibile në momentin e fundit e të përshtatet më shpejt me kërkesat reale të tregut.

Teknologjia si motor i zhvillimit

Renault e pranon se një cikël zhvillimi njëditor është ende i paarritshëm, por dy vjet mbeten një objektiv ambicioz. “Nuk mund të ndash shpejtësinë nga teknologjia – ato ecin bashkë,” – thekson Combemerel.

Çfarë synon projekti Leap 100?

Programi Leap 100 synon të reduktojë:

16% të kohës në fazat e planifikimit,

41% në zhvillim (nga dizajni te përsosja e teknologjisë),

dhe 26% në fazën e industrializimit (prodhim dhe shpërndarje).

Renault po kërkon kursime kohe në shtatë fusha kryesore: qeverisje, dizajn, kontroll cilësie, përdorim të AI-së dhe të dhënave, validim, homologim dhe strategji furnizimi.

Në fund, Twingo elektrik nuk do të jetë thjesht një makinë e vogël për qytet, por simboli i një epoke të re për Renault – një epokë ku shpejtësia e zhvillimit bëhet po aq e rëndësishme sa ajo e motorit. /A.Z/UBT News/

Paketa e softuerëve për produktivitet të Microsoft-it, e njohur si Microsoft 365, ka përjetuar ndërprerje masive, duke lënë jashtë funksionit mijëra përdorues, njofton faqja Downdetector, e specializuar në monitorimin e problemeve të shërbimeve online.

Sipas raportimeve, më shumë se 17,000 përdorues kanë raportuar vështirësi në qasjen dhe përdorimin e shërbimeve të Microsoft 365, përfshirë Word, Excel, Outlook, Teams dhe aplikacione tjera të lidhura. Megjithatë, numri real i përdoruesve të prekur mund të jetë më i madh, pasi shumë persona nuk raportojnë menjëherë problemet përmes platformave të monitorimit.

Microsoft 365 ka konfirmuar se po heton raportimet e punon për të identifikuar shkakun e ndërprerjes, në mënyrë që shërbimet të rikthehen sa më shpejt të jetë e mundur. Kompania këshillon përdoruesit të kontrollojnë faqen e statusit të shërbimeve për njoftime të përditësuara dhe të shmangin operacione kritike derisa problemi të zgjidhet.

Ndërprerjet e tilla, edhe pse të përkohshme, ndikojnë në punën e mijëra bizneseve dhe individëve që varen nga aplikacionet e Microsoft 365 për komunikim, bashkëpunim dhe administrim të detyrave të përditshme.

Kjo ngjarje rikujton rëndësinë e planifikimit të zgjidhjeve alternative dhe kopjeve rezervë për organizatat që varen nga shërbimet cloud.

Në këto raste, përdoruesit përjetojnë probleme si: vështirësi në hyrje, ndërprerje të sinkronizimit të dokumenteve, pamundësi për të dërguar email-e ose për të përdorur funksione të caktuara të Teams dhe aplikacioneve tjera. /A.Z/UBT News/