Të martën, Shtëpia e Bardhë krijoi një llogari zyrtare në TikTok, “@whitehouse”, për të përcjellë mesazhet e Presidentit Donald Trump te më shumë se 170 milionë përdorues në SHBA.

Videoja e parë e postuar mbrëmjen e 19 gushtit përmbante deklaratën e Trump: “Unë jam zëri juaj”, ndërsa përshkrimi shoqërues ishte: “Amerikë, JEMI KTHYER! Çfarë po ndodh me TikTok?”. Vetëm tre orë pas publikimit, llogaria arriti 25,000 ndjekës dhe aktualisht numëron rreth 70,000.

Presidenti Trump e sheh TikTok si mjet që e ndihmoi të fitonte mbështetjen e votuesve të rinj në zgjedhjet presidenciale 2024, megjithëse shqetësimet për privatësinë mbeten të larta, pasi të dhënat e përdoruesve amerikanë mund të përfundojnë tek qeveria kineze.

Administrata ka tentuar për muaj të tërë që ByteDance të shesë TikTok te investitorë amerikanë, sipas ligjit të miratuar nga Kongresi, që kërkon ndërprerjen e operacioneve të TikTok në SHBA nëse nuk realizohet shitja deri 19 janar 2025. Trump ka zgjatur disa herë këtë afat, duke e shtyrë tani për 17 shtator.

Trump ka mbi 15 milionë ndjekës në llogarinë e tij personale në TikTok, “@realdonaldtrump”, dhe përdor aktivisht rrjetin Truth Social, dhe platformën “X”.

Zëdhënësja e Shtëpisë së Bardhë, Caroline Levitt, deklaroi: “Administrata Trump është e përkushtuar t’ua përcjellë popullit amerikan sukseset historike të Presidentit Trump në çdo platformë të mundshme. Mesazhet e tij dominuan TikTok gjatë fushatës, e tani jemi të entuziazmuar për të ndërtuar mbi këto suksese në një mënyrë që asnjë administratë më parë nuk e ka përdorur.”

Në një nga postimet e fundit, Shtëpia e Bardhë publikoi video me momente ikonike të Presidentit, e cila fillon me deklaratën: “Tani jam unë gjuetari.”

Sipas një raporti të ri, Apple është duke eksploruar mundësinë për të sjellë teknologjinë Touch ID – skanerin e gjurmës së gishtit, në linjën e saj të orëve inteligjente.

Kjo veçori mund të debutojë më herët se sa pritej, me gjasë në modelin Apple Watch Ultra 4, që pritet të lançohet vitin e ardhshëm. Megjithatë, burimet theksojnë se funksionaliteti është ende në fazat e hershme të zhvillimit dhe aktualisht ndodhet në fazën e prototipit.

Për rrjedhojë, modelet që do të prezantohen këtë vit nuk pritet të përfshijnë Touch ID.

Ky zhvillim përputhet me zërat e fundit që sugjerojnë një ridizajnim të rëndësishëm të Apple Watch gjatë vitit 2026. Në atë kohë, ora mund të vijë edhe me një procesor të ri, duke shënuar një hap të rëndësishëm në evolucionin e pajisjes.

Kompania japoneze e teknologjisë SoftBank ka njoftuar një investim prej 2 miliardë dollarësh në Intel, duke siguruar rreth 2% të aksioneve në prodhuesin amerikan të çipeve.

Lajmi u bë i ditur të martën dhe vjen në një moment kur edhe administrata e ish-presidentit Donald Trump raportohet se po shqyrton mundësinë për të marrë deri në 10% pjesëmarrje në Intel.

Pas publikimit të marrëveshjes, aksionet e Intel shënuan një rritje prej mbi 5% jashtë orarit të zakonshëm të tregut, ndërsa ato të SoftBank pësuan një rënie rreth 4%.

Ky investim përkon me përpjekjet e drejtorit të ri të Intel, Lip-Bu Tan, për të rikthyer kompaninë në rrugën e rritjes dhe konkurrencës, pas sfidave të fundit në ruajtjen e avantazhit teknologjik.

Njëkohësisht, lëvizja e SoftBank vlerësohet si një përforcim i pranisë së saj në SHBA dhe si shenjë besimi në sektorin amerikan të teknologjisë dhe prodhimit të çipeve.

Sipas analistëve, kjo mund të jetë një mundësi për Intel që të forcojë pozitat në tregun global të çipeve.

Google ka sjellë një përmirësim të rëndësishëm në aplikacionin e saj të inteligjencës artificiale, Gemini, duke futur aftësinë për të kujtuar automatikisht bisedat e mëparshme, por edhe opsionin për t’i harruar ato nëse përdoruesi dëshiron.

Veçoria e re “Konteksti Personal” i lejon Gemini-t të përdorë bisedat e kaluara për të ofruar përgjigje më të personalizuara dhe të sakta. Ky opsion është aktiv si parazgjedhje, por mund të çaktivizohet lehtësisht në cilësime (Cilësimet → Konteksti Personal → Bisedat tuaja të kaluara me Gemini-n).

Për përdoruesit që preferojnë biseda pa ruajtje, ekziston edhe opsioni “Biseda të Përkohshme”, që nuk ruhen, nuk përdoren për trajnimin e modelit dhe fshihen automatikisht brenda 72 orëve. Këto biseda nuk shfaqen në listën e bisedave të fundit.

Gjithashtu, Google ka ndryshuar emrin e opsionit “Aktiviteti i Aplikacioneve Gemini” në “Mbaj Aktivitetin”, i cili lejon përdoruesit të zgjedhin nëse skedarët, fotot dhe aktivitetet e tyre do të përdoren për përmirësimin e shërbimit. Ky cilësim do të aktivizohet nga 2 shtatori 2025.

Veçoria e Kontekstit Personal është aktualisht e disponueshme për përdoruesit e modelit Gemini 2.5 Pro në disa vende, ndërsa në të ardhmen pritet të jetë pjesë e versionit më të gjerë 2.5 Flash.

Me këtë hap, Google synon të gjejë një balancë midis personalizimit dhe privatësisë, duke i dhënë përdoruesve mundësinë të zgjedhin çfarë informacioni do të mbahet mend dhe çfarë do të harrohet përgjithmonë.