Norvegjia ka siguruar një kualifikim historik në çerekfinalet e Kupës së Botës, duke eliminuar Brazilin e madh me rezultatin 2:1 në stadiumin “MetLife” të New Jerseyt. Heroi i mbrëmjes ishte kush tjetër përveç Erling Haaland, i cili përmbysi ndeshjen me dy gola elektrikë në fundin e lojës.

Ndonëse qëndroi në hije për pjesën më të madhe të sfidës, Haaland shpërtheu pikërisht atëherë kur kombëtarja e tij kishte më shumë nevojë. Në minutën e 80-të, ai shfrytëzoi në maksimum një asist perfekt nga zëvendësuesi Andreas Schjelderup për të zhbllokuar shifrat me kokë. Pak minuta më vonë, i njëjti dyshe bashkëpunoi sërish: Schjelderup shërbeu dhe Haaland shënoi golin e dytë personal, duke vulosur fatin e takimit dhe duke u ngjitur në kuotën e 7 golave në këtë Botëror — aq sa Lionel Messi dhe Kylian Mbappe.

Krejt në fund të shtesës, Neymar shënoi nga penalltia për Brazilin, por ky gol shërbeu vetëm për statistika.

Ndeshja nisi me ritëm të çmendur. Norvegjisë iu anulua fillimisht një gol i Patrick Berg për pozicion jashtë loje. Më pas, Brazili shpërdoroi një shans të artë kur Bruno Guimaraes gaboi nga pika e bardhë, pas një penalltie të fituar nga Matheus Cunha — gjuajtje që u ndal nga portieri norvegjez, Orjan Nyland, i cili bëri një paraqitje heroike me disa pritje vendimtare.

Ky eliminim shënon dështimin më të hershëm të Brazilit në një Kupë Bote që nga viti 1990 në Itali. Për më tepër, “Seleçao” konfirmon mallkimin e madh përballë skuadrave evropiane në fazat me eliminim direkt, të cilat nuk i mposht dot që nga viti 2002, kur u shpall për herë të fundit kampion bote./E.A/

Kampionati Botëror 2026 vazhdon sot me tri ndeshje të fazës së 1/16 së finales, ku në fushë zbresin disa prej kombëtareve favorite. Tifozët në Kosovë do të kenë mundësi të ndjekin duele interesante, dy prej të cilave zhvillohen pas mesnate sipas orës lokale.

Programi i ndeshjeve sipas orës së Kosovës:

20:00 – Australi – Egjipt

00:00 – Argjentinë – Kepi i Gjelbër

03:30 – Kolumbi – Ganë

Të tre përballjet janë të vlefshme për fazën eliminatore të Botërorit, ku skuadrat synojnë një vend në çerekfinale. Vëmendja më e madhe pritet të jetë te ndeshja mes Argjentinës dhe Kepit të Gjelbër, ndërsa Kolumbia dhe Gana pritet të zhvillojnë një duel mjaft të fortë në orët e para të mëngjesit.

D.L

Talenti me prejardhje nga Kosova, Yll Gashi, ka zgjatur zyrtarisht kontratën me Bayern Munich, duke u lidhur me klubin bavarez deri në verën e vitit 2028. Lajmi u bë i ditur nga Bayern Campus, i cili konfirmoi se sulmuesi 18-vjeçar do të vazhdojë zhvillimin e tij në radhët e kampionëve të Gjermanisë.

Gashi, i cili iu bashkua akademisë së Bayernit në vitin 2022, ka spikatur me paraqitjet e tij te grupmoshat e klubit. Sezonin e kaluar ai realizoi 11 gola dhe 5 asistime në garat e të rinjve, ndërsa debutoi edhe me ekipin e dytë të Bayernit.

Me këtë rinovim, Bayern konfirmon besimin e madh që ka te një prej talenteve më premtues me rrënjë kosovare, duke i ofruar mundësinë të vazhdojë rrugëtimin drejt ekipit të parë.

D.L

Kombëtarja e Spanjës ka shënuar një fitore bindëse 3-0 ndaj Austrisë, duke siguruar me meritë kalimin për në 1/8 e finales të Kupës së Botës. Me këtë triumf, “La Roja” konfirmon formën e saj të lartë dhe përgatitet për një super-sfidë në fazën tjetër, ku do të përballet me Portugalinë, e cila më herët eliminoi Kroacinë.

Ndeshja nisi me dominimin e spanjollëve, të cilëve fillimisht iu anulua një gol spektakolar me volej nga Marc Cucurella për shkak të një faulli në sulm. Megjithatë, epërsia u zhbllokua në minutën e 36-të, kur Mikel Oyarzabal shënoi pas një asistimi të saktë nga po i njëjti Cucurella.

Në pjesën e dytë, Spanja e rriti presionin dhe në minutën e 66-të dyfishoi shifrat me anë të Pedro Porros, i shërbyer bukur nga Alex Baena. Austria u përpoq të reagonte, madje David Alaba shpëtoi një gol të sigurt mbi vijën e portës pas një goditjeje të Lamine Yamal. Krejt në fund të takimit, në minutën e 89-të, Oyarzabal shënoi golin e tij të dytë personal dhe të tretin për Spanjën, pas një tjetër asistimi nga Cucurella, duke vulosur rezultatin përfundimtar 3-0.

Ky sukses e dërgon Spanjën drejt një prej dueleve më të pritura të turneut, ku në fazën e 1/8-ave do të masë forcat në një derbi iberik kundër Portugalisë së Cristiano Ronaldos. /E.A/