Lajmet

Sa i brishtë është ende Ballkani Perëndimor

Published

5 years ago

April 22, 2021

Betim Gashi

Ballkani: Non-paper – Kjo temë nuk do të diskutohet më zyrtarisht në Bruksel.

Idetë e “shpërbërjes përfundimtare të Jugosllavisë” dhe spostimi i kufijve në Ballkanin Perëndimor nuk do ta ndryshojnë politikën aktuale të BE. Megjithatë angazhimi europian në rajon ka nevojë për një aktivizim urgjent.

Sa i brishtë është ende Ballkani Perëndimor si rajon, akoma me prirje destabilizimi për shkak të plagëve ende të hapura nga e kaluara, të cilat tani politikisht korrekt quhen “çështje të hapura bilaterale”, e dëshmuan informatat për një tekst, i cili për shkak të karakterit jozyrtar, nuk mund të quhet as dokument, madje as paper. I ashtuquajturi “non- paper”, pa kokë dhe pa firma poshtë, iu atribua nga mediat kryeministrit slloven Janez Jansa.

Teksti propozon “përfundimin e shpërbërjes së Jugosllavisë” apo spostimin “përfundimtar” të kufijve në Ballkanin Perëndimor, me qëllim të krijimit të një Bosnje Hercegovine të fragmentuar por “të qëndrueshme dhe funksionale”, një Shqipërie të bashkuar me Kosovën dhe pjesë të Maqedonisë së Veriut dhe një Serbie të bashkuar me Republikën Srpska.

Institucionet e BE-së nuk e kanë konfirmuar ende mbërritjen e një teksti të tillë në Bruksel, dhe ndoshta kurrë nuk do ta konfirmojnë. Brukseli zyrtar përsëriti vetëm qëndrimin e tij se “asgjë nuk duhet të ndryshojë, kur është fjala për kufijtë e Ballkanit Perëndimor”.

Që “vizatimi i kufijve të rinj është një rrugë e rrezikshme” dhe “pajtimi dhe bashkëpunimi rajonal është çelësi i paqes, demokracisë dhe prosperitetit” në Ballkanin Perëndimor, u theksua edhe nga Sekretari gjerman i Shtetit për Evropën, Michael Roth. Të njëjtat mesazhe erdhën edhe nga Parlamenti Evropian, ku raportuesi për Serbinë, Vladimir Bilçik, porositi se „ndryshimi i kufijve dhe territoreve është një rrugë e rrezikshme drejt së kaluarës shpërthyese” të rajonit.

Kompromise të rrezikshme

Sidoqoftë Alexandra Stiglmayer nga Nisma Evropiane e Stabilitetit dhe Bodo Weber nga Këshilli i Politikës së Demokratizimit në Berlin pohojnë për DW se shfaqja e këtij teksti nuk është e rastësishme, se ai ka parahistorinë e vet dhe se ka njerëz, që e shohin zgjidhjen e të gjitha problemeve në Ballkanin Perëndimor në ndryshimin e kufijve. Në bisedë me DW ata kujtojnë se shkëmbimi i territoreve jo shumë kohë më parë ishte temë në rajon dhe në BE, kur në 2018 flitej për shkëmbimin e territoreve midis Serbisë dhe Kosovës.

„Gjëra të tilla vazhdojnë të dalin. Ato kanë qenë prezente edhe gjatë luftës në ish-Jugosllavi. Por duhet pasur parasysh edhe arsyeja që çoi në këto luftëra. Prandaj është shumë e rrezikshme të besohet se ndryshimi i kufijve, që do të çonte në këmbime etnike, do të sillte zgjidhje në Ballkanin Perëndimor”, thotë Stiglmayer.

Ajo beson se shfaqja e një ideje të tillë në këtë moment është një lloj baloni prove për të parë reagimin e vendeve anëtare të BE-së dhe për të testuar, nëse mund të ecet në këtë rrugë. “Për mendimin tim kjo nuk është kurrësesi rruga, sepse do të çonte vetëm drejt konfliktit, dhe pastaj në një konflikt të armatosur në të gjitha vendet e prekura të Ballkanit Perëndimor”, thekson analistja nga Brukseli.

Bodo Weber thotë se në katër vitet e mëparshme i gjithë rajoni u kërcënua nga destabilizimi për shkak të idesë së shkëmbimit të territoreve midis Serbisë dhe Kosovës dhe se tani është bërë një “hapje e re”, që e zhvendos kërcënimin në territorin e Bosnjë Hercegovinës.

“Në katër vitet e fundit është vërejtur dinamika e një ‘devijimi të rrezikshëm’ të disa përfaqësuesve të BE dhe SHBA, që negociojnë në rajonin e Ballkanit Perëndimor, të cilët së pari, duke u përqëndruar në negociatat midis Serbisë dhe Kosovës, kërcënuan stabilitetin e të gjithë rajonit me idenë e çmendur të shkëmbimit të territoreve. Kështu jashtë vëmendjes, në Bosnjë Hercegovinë arritën të bien dakord për një “marrëveshje të ndyrë”, për ndarjen etnike në nivel lokal, të ashtuquajturën marrëveshja e Mostarit. E gjitha kjo tregon, se negociatorët tanë perëndimorë në situata krize janë të prirur, të bëjnë çfarëdo marrëveshjeje, që nënkupton edhe kompromis të keq me axhenda të rrezikshme rajonale, që do t’u shkonin për shtat liderëve nacionalë në Ballkanin Perëndimor”, përfundon Weber.

Dokument radikal

Nga Nisma Evropiane e Stabilitetit të Aleksandra Stiglmayer kujtojnë faktin se në procesin e zgjidhjes së “çështjes së Kosovës” disa nga udhëheqësit e BE-së kanë mbështetur opsionin e “çdo zgjidhjeje, për të cilën bien dakord të dyja palët”. Ata shtojnë se “non-paperi” slloven vepron “shumë më radikalisht” pa konsultime paraprake me vendet e prekura.

“Nuk mendoj se Bosnjë Hercegovina, Maqedonia e Veriut apo Kosova do të bien dakord për këtë. Ndoshta Shqipëria, por kjo do të nënkuptojë largimin nga rruga e BE”, thotë Stiglmayer.

Në të njëjtën kohë kryeministri shqiptar, Edi Rama, ishte i vetmi që konfirmoi se e kishte parë dokumentin dhe se kishte biseduar për “idenë” me kryeministrin slloven.

Analistët nga Brukseli dhe Berlini pajtohen, se një “ide” e tillë nuk ka mbështetjen e shumicës.

“Nëse ekziston një dokument i tillë, në formën si është publikuar në media, kjo do të tregonte se zoti Jansa në radikalizmin e tij vepron në fakt në mënyrë kundërproduktive për promovimin e idesë së tij. Unë besoj se kjo është një mënyrë shumë e vrazhdë lobimi për ide të tilla të rrezikshme, nëse dokumenti është i vërtetë dhe autentik”, shprehet Bodo Weber për DW.

Ai shton, se shpreson që situata e re do të inkurajojë vendet e BE-së, që t’i japin “më shumë kontra” mënyrës së rrezikshme të negociatave të përfaqësuesve të BE, konkretisht në Bosnjë Hercegovinë, në këtë moment.

“Këto negociata rrezikojnë ndarjen e mëtejshme etnike të Bosnjë Hercegovinës nën patronatin e BE dhe SHBA, por edhe shpërbërjen e vendit dhe destabilizimin e të gjithë rajonit, që do ta përjetonim po të tillë, po të arrihej marrëveshja për shkëmbimin e territoreve midis Kosovës dhe Serbisë. Kërcënimi është real nga negociatat e jo të pastra dhe jotransparente të përfaqësuesve evropianë dhe më pak nga një përfaqësim i tillë i hapur i ideve etno-nacionaliste si non-paper i famshëm nga Ljubljana”, konkludon Weber.

Një test pa ndikim dhe politikë pa „aktivizim”

Teksti, që krijoi tymnajë në Ballkanin Perëndimor dhe në të gjithë BE-në, pretendohet se iu dërgua Presidentit të Këshillit Evropian, Charles Michel, si pjesë e njohjes me prioritetet, të cilat do t’i përfaqësojë Sllovenia, kur të marrë presidencën e Këshillit të BE në mes të vitit.

Aleksandra Stiglmayer mendon se pas reagimeve që mori, kryeministri slloven nuk do të vazhdojë të këmbëngulë në ide të ngjashme dhe se nuk duhet pritur ndonjë kthesë radikale në politikën e BE ndaj Ballkanit Perëndimor. “Nuk besoj se kjo mund të bëhet bazë për ndonjë politikë të re të BE ndaj Ballkanit Perëndimor. Shumica e vendeve anëtare mbështesin shtetet multietnike, bazuar në të drejtat e njeriut dhe ato civile. Për këtë nuk do të diskutohet më zyrtarisht në Bruksel”, thotë Stiglmayer. Por ajo shton:

“Një impuls i ri në politikën e BE ndaj Ballkanit Perëndimor është i domosdoshëm, por unë nuk shoh se ka një apel të vërtetë për zgjim. Për sa kohë të zvarritet situata në Ballkanin Perëndimor, ndoshta jo në mënyrë fort të kënaqshme, por gjithsesi pa konflikte, vendet anëtare të BE-së nuk do ta shohin atë si prioritet.”

Në bisedë me DW Stiglmayer i bën thirrje BE që t’i ofrojë përfundimisht Ballkanit Perëndimor “diçka vërtet të besueshme”, përfshirë një proces më funksional të pranimit, se “për çfarë dhe në çfarë drejtimi” duhet të punojë Ballkani Perëndimor. “Përndryshe, kam frikë se do të shkaktohet konflikt. “Dy situata veçanërisht problematike janë ajo mes Serbisë dhe Kosovës dhe ajo në Bosnjë dhe Hercegovinë”, përfundon Aleksandra Stiglmayer. DW

Lajmet

BE shpreh keqardhje që Serbia nuk i ka ndjekur ende përgjegjësit e sulmit në Banjskë

Published

6 minutes ago

April 27, 2026

UBTNews

Bashkimi Evropian i ka thënë të hënën Radios Evropa e Lirë se shpreh keqardhje që Serbia nuk i ka marrë ende hapat e nevojshëm për t’i përballur me drejtësinë përgjegjësit për sulmin në fshatin Banjskë të Kosovës në vitin 2023.

Një zëdhënës i BE-së i ka bërë këto deklarata, teksa e ka komentuar vendimin e Gjykatës Themelore në Prishtinë, e cila më 24 prill i ka dënuar tre të akuzuarit për sulmin: Bllagoje Spasojeviqin dhe Vladimir Tolliqin me burgim të përjetshëm, ndërsa Dushan Maksimoviqin me 30 vjet burgim.

Sulmi në Banjskë ndodhi më 24 shtator 2023, si pasojë e të cilit u vra rreshteri i Policisë së Kosovës, Afrim Bunjaku.

Në këmbim e sipër të të shtënave u vranë edhe tre sulmues serbë.

Millan Radoiçiq, atëbotë nënkryetar i Listës Serbe – partisë më të madhe të serbëve në Kosovë, e cila gëzon mbështetjen e Beogradit zyrtar – mori përgjegjësinë për sulmin.

Tre të dënuarit kanë qenë pjesë e grupit prej 45 personash ndaj të cilëve kanë ngritur aktakuzë autoritetet e Kosovës, përfshirë Radoiçiqin. Përveç tre të dënuarve, pjesa tjetër e të akuzuarve janë në arrati.

Për autoritetet e Kosovës, Radoiçiq ka qenë “udhëheqësi i grupit terrorist” dhe sulmi është organizuar nga shteti i Serbisë. Beogradi, në anën tjetër, i hedh poshtë këto akuza.

Autoritetet në Kosovë i kanë ndarë procedurat penale kundër Spasojeviqit, Tolliqit dhe Maksimoviqit, të cilët ndodheshin në paraburgim që nga shtatori 2023, ndërsa e kanë hedhur poshtë kërkesën e Prokurorisë Speciale për një gjykim në mungesë për 42 të pandehurit e tjerë.

Institucionet e Bashkimit Evropian u kanë bërë thirrje rregullisht autoriteteve të Beogradit që të përcaktojnë përgjegjësinë për sulmin dhe t’i nxjerrin përgjegjësit para drejtësisë.

Megjithatë, pavarësisht thirrjeve nga blloku evropian, Shtetet e Bashkuara dhe NATO-ja, autoritetet në Serbi nuk kanë ngritur asnjë aktakuzë, madje as ndaj Radoiçiqit i cili besohet se është në Beograd.

Gjykata e Lartë në Beograd ka bërë të ditur se ekziston vendimi që ia ndalon Radoiçiqit largimin nga banesa e tij dhe ka detyrim që të paraqitet në polici, ndërsa Zyra e Prokurorit nuk e ka komentuar ndonjë aktakuzë eventuale. /REL/

Lajmet

DITARI: Çfarë lajmesh kemi lexuar në çdo 27 prill, në vitet nëntëdhjetë

Published

2 hours ago

April 27, 2026

UBTNews

27 prill 1993

Lajm i plotë:

Kryetari dr.Rugova u takua me Papa Gjon Palin e Dytë

Mbrëmë, në Tiranë, kryetari i Republikës së Kosovës, dr.Ibrahim Rugova, i shoqëruar nga kryeministri i Republikës së Kosovës, dr.Bujar Bukoshi dhe prof.Anton Çetta, patën një takim përshëndetës me Papa Gjon Palin e Dytë, me rastin e vizitës së parë të Shenjtërisë së Tij, Papës në Shqipëri.

Me këtë rast, dr.Rugova i dhuroi Papa Gjon Palit” të Dytë në shenjë nderimi, një gur nga muret e qytetit të Ulpianës, në shenjë kujtimi të Laurit e Florit, dy marierëve të qytetërimit nga shekulli II, në këtë qytet të Dardanisë së vjetër.

Lajm i plotë:

Serbia vrau edhe pesë shqiptarë në zonën kufitare Shqipëri-Kosovë

Në zonën kufitare Shqipëri-Kosovë nga forcat ushtarake serbe u vranë parmbrëmë pesë shqiptarë, njofton gazeta e sotme serbe “Borba”, në një shënim të panënshkruar. Kjo gazetë, mëson jo zyrtarisht, se gjoja një grup i armatosur shqiptarësh kanë provuar ta kalojnë kufirin midis Shqipërisë dhe Kosovës. Me këtë rast ata hasën në kufitarët serbë, të cilët shtien me armë. Me armë shtinë, siç mëson “Borba”, edhe gupi i sulmuesve shqiptarë, në mesin e të cilëve pati disa të vdekur. Sipas kësaj gazete në këtë konfrontim vdiqën pesë veta.

Këto të dhëna, gazeta nuk ka mundur t’i verifikojë te autoritetet ushtarako-policore serbe.

Për Qendrën për Informim të Kosovës, këtë lajm, jozyrtarisht, e vërtetuan disa burime shqiptare të informimit në Radiotelevizionin Shqiptar. Por, edhe në Shqipëri burimet zyrtare ende nuk kanë informuar për këtë rast.

Në zonën kufitare mes Kosovës dhe Shqipërisë janë vrarë shumë shqiptarë, të Kosovës ose të Shqipërisë, nga forcat ushtarako-policore serbe. Në mesin e dhjetëra të vrarëve, nuk ka pasur asnjë viktimë nga forcat ushtarako-policore serbe.

Lajme të tjera:

Në Skënderaj policia serbe arrestoi Murat Dautin

Në Suharekë policia bën presion mbi aktivistët e Këshillit për Financim

Në fshatrat e Pejës bastisje të policisë serbe dhe kërkesa për armë

Dhuna e zhveshur mbi arsimin shqip

Pronarëve të firmave u urdhërohet përdorimi i alfabetit çirilik

Klinton: Ballkani është problemi më i vështirë për ne dhe aleatët tanë

“Le Figaro”: Papa predikon ringjalljen e Shqipërisë

“The Economist”: Lufta që nuk do të largohet

27 prill 1994

Lajm i plotë:

Nënkryetari amerikan, All Gor: Jam admirues i flakët i presidentit Rugova

Një shkëndijë në Kosovë do të mund të shkaktonte reagime zinxhirore drejt një konflikti më të gjerë në Ballkan, si dhe një krizë të madhe refugjatësh, por kjo ende nuk ka ndodhur, tha nënkryetari amerikan All Gor, duke folur para anëtarëve të pres-klubit të Nju-Jorkut – njofton në numrin e fundit gazeta shqiptaro-amerikane “Illyria”.

Kryetari Klinton dhe unë, kemi shprehur brengosjen tonë për Kosovën në takimin me kryeministrin grek, Papandreu. Ne nuk patëm ndonjë bisedë të detajizuar për këtë çështje, por kemi përmendur problemin e Kosovës. Papandreu është gjithashtu i brengosur rreth këtij problemi – tha ai.

Unë e kam takuar presidentin Rugova dhe jam admirues i flakët i tij si dhe i hapave të rëndësishëm që populli i Kosovës i ka bërë për zvogëlimin e mundësive të përhapjes së një dhune me përmasa të gjera. Ne po e vëzhgojmë situatën për së afërmi atje. Për të penguar konfliktin në rajon ne kemi dërguar trupat tona në Maqedoni – përfundoi nënkryetari All Gor.

Kohë më parë edhe presidenti Klinton u tha gazetarëve në Shtëpi të Bardhë se SHBA janë të brengosura rreth shqiptarëve të Kosovës dhe atë zonë e quajti si një fuçi baroti, njofton gazeta “Illyria”.

Lajme të tjera:

Mbledhja e Komitetit ushtarak të NATO-s

Forcat serbe arrestuan katër shqiptarë në Vërmicë të Prizrenit

Represioni në Kosovë

Gjatë këtij muaji policia financiare në Malishevë plaçkiti 350.000 DEM.

Ecuria e sëmundjeve ngjitëse në Kosovë në vitin 1993

Keqtrajtime të vazhdueshme ndaj Latif Gashit

Njoftime kontradiktore për vendosjen e kolonistëve të rinj serbë në Kosovë

Konsullati amerikan në Beograd përkohësisht nuk punon

Si merren vizat gjermane në Beograd

U shpall konkursi për festivalin “Zambaku i Prizrenit ’94”

Doli “Jeta e re” nr.1-2/94

Bullgaria refuzoi të nënshkruajë marrëveshjet në gjuhën maqedonase

Fitore të skuadrave favorite në kampionatin e futbollit të Kosovës

27 prill 1995

Lajmet kryesore:

Kryetari Rugova bisedoi me parlamentarët suedezë

Delegacioni i Kongresit amerikan bisedoi në KMDLNJ dhe në Komitetin Kosovar të Heslinkit

Delegacioni i Kongresit Amerikan përfundoi dje vizitën në Kosovë

Amnesty International (AI) kërkon gjykim të drejtë për ish-policët shqiptarë

Në Pejë po vazhdon procesi i montuar kundër ish-policëve të Kosovës

Në Gjilan filloi procesi kundër policit dhunues

Sesion shkencor kushtuar atdhetarit Faik Konica

Miting i madh protestues në Tetovë

Dr. Fadil Sulejmani hodhi poshtë akuzat

Shtypi serb për procesin gjyqësor të Tetovës

“Bujku” nuk doli as sot

Në termocentralet e Obiliqit, nga 800 megavatët e mundshëm prodhohen vetëm 120

Dhuna e përditshme në Kosovë

Policia ishte disa herë në fshatin Shajne të Dragashit

E ashtuquajtura “lëvizje e rezistencës serbe” kërkon ndarjen e Kosovës

Në Hagë filloi procesi gjyqësor kundër kriminelit serb Dushan Tadiq

“Tajms”: NATO-ja e gatshme për operacione luftarake

Policia sërish ndërpreu ndeshjen Prishtina – Flamurtari

Në Prishtinë filloi finalja e turneut të shahut në kuadër të aksionit “Vullneti ’95”

Promovohet romani “Shote Galica” i M. Kajtazit

27 prill 1998

Edicioni i parë (Ora 9:00)

Lajm i plotë:

Urgjent!

Ushtria sulmon gjatë natës fshatarët në Stërgun dhe në Hulaj të Deçanit

Sot rreth orës 01 ushtria jugosllave ka sulmuar shqiptarët në Stërgun të Vokshit dhe në fshatin Hulaj. Ushtria jugosllave ka shtier me artileri të rëndë dhe raketa ndriçuese prej kazermës ushtarake. Sulmi ka zgjatur deri në orën 05 dhe druhet se ka të vrarë e të plagosur.

Disa dëshmutarë i thanë QIK-ut se në orën 03 drejt vendit të sulmuar kanë shkuar aeroplanë, ndërsa në orën gjashtë të mëngjesit kanë shkuar dhe kanë ateruar disa helikopterë ushtarakë. Të njëjtit shkuan pastaj në drejtim të Gjakovës.

Vendi ku janë sulmuar shqiptarët gjendet rreth 10 km. larg kufirit me Shqipërinë.

Popullsinë e kësaj pjese të Deçanit e ka përfshirë sot frika e paniku. Nga fshati Voksh po largohen fëmijët, gratë e pleqt, njoftoi Komisioni për Informim i Degës së LDK-së në Deçan.

Më parë një pjesë e madhe e popullsisë është larguar nga vetë qyteza e Deçanit dhe nga fshatrat që kanë qenë cak i sulmeve serbe prej datës 24 mars.

Edicioni i dytë (Ora 11:30)

Lajm i plotë:

Dyshohet për një masakër të vërtetë nga ana e forcave serbe në Stërngun të Vokshit

Në Deçan dhe rrethinë gjendja është sot shumë e rëndë dhe e rrezikshme. Dega e LDK-së në Deçan nuk ka ende njoftime të hollësishme rreth pretekstit as përmasave të aksionit të ushtrisë serbe që filloi sot pasmenatës dhe që zgjati deri në mëngjes në kodrën Stërgun të Vokshit dhe në fshatin Hulaj.

Dyshohet se nga të shtënat e ushtrisë me artileri mund të ketë shumë të vrarë e të plagosur.

Vendi ku dyshohet të jenë masakruar shumë shqiptarë gjatë natës është 10 km. larg kufirit me Shqipërinë.

Gjatë aksionit forcat serbe kanë shkrepur edhe shumë raketa ndriçuese.

Nga fshatrat Voksh e Pobërgjë ka ikur pjesa më e madhe e popullsisë, ndërsa nga fshati Hulaj njerëzit janë larguar më herët për shkak të rrezikut nga ushtria serbe.

Njoftimet nga Deçani flasin për një gjendje shumë dramatike në fshatrat e sulmuara nga ushtria dhe njësitë speciale serbe.

Gjatë natës ka pasur të shtëna me armë automatike kundër fshatrave Baballoq e Gramaçel, ndërsa në momentin kur aktivistët e Degës së LDK-së në Deçan njoftonin për zhvillimet, në telefon dëgjohej uturima e helikopterëve që po fluturonin në drejtim të Hulajt dhe pastaj jehona e të shtënave me armë që vinte nga Baballoqi.

Lajme të tjera:

Në Gjakovë shkojnë vazhdimisht forca të reja ushtarako-policore

Forcat serbe shtinë me armë gjatë gjithë natës kundër fshatrave të rrethuara të Drenicës

Rruga Prizren-Gjakovë mbahet e bllokuar – të shtëna gjatë natës në regjionin e Hasit

Postbllok policor në hyrje të fshatit Strellc

Edicioni i katërt (Ora 14:00)

Lajm i plotë:

Ushtria serbe pohon se vrau sot 3 e plagosi 4 shqiptarë

Sot në orët 3. 00 të mëngjesit, në zonën kufitare Kosovë-Shqipëri afër Deçanit, ushtria serbe vrau tre dhe plagosi 4 shqiptarë, njofton Radio Beogradi. Sipas kësaj radioje të plagosurit janë transferuar në spital ku u është dhënë ndihma mjekësore, kurse në vendin e ngjarjes thuhet se është gjetur një sasi armësh.

Lajme të tjera:

Forca policore përgjatë rrugës Mitrovicë-Skënderaj

Forca të mëdha shkojnë vazhdimisht në drejtim të fshatrave të Klinës

Përgjatë rrugës Pejë-Deçan janë vendosur forca policore

Në Krushë të Vogël në një sulm u plagosën dy policë serbë

Shefat e pesëmbëdhjetëshes evropiane shqyrtojnë sot ashpërsimin e situatës në Kosovë

Sipas shtypit serb gjykatësi hetues ushtarak i ka marrë në pyetje dy shqiptarët e zënë më 23 prill

Komandanti i Divizionit të Kukësit: “Ushtria serbe ka ngritur kampe në vijën e kufirit”

Ushtria jugosllave pengoi ceremoninë e varrimit të një fëmije në Kramovik

Policia serbe pengoi qytetarët të shkojnë në meshë

Dje u varros Qelë Desku, i vrarë nga policia serbe të premten

Një qytetar u keqtrajtua në postbllokun e Nadakocit

Edicioni i katërt (Ora 15:30)

Lajm i plotë:

Maloku: E ashtuquajtura Media Center, zëdhënës i administratës ushtarako-policore serbe në Kosovë

Enver Maloku, shef i Qendrës për Informim të Kosovës (QIK), i lutur të komentojë nga disa radiostacione të huaja dhe mediume në Kosovë formimin dhe veprimtarinë e Media Center-it në Prishtinë, dha këtë deklaratë:

E ashtuquajtura Media Center që po funksionon qe disa javë në Prishtinë është një medium i formuar nga qeveria serbe. Qëllimet e tij janë të qarta po të kihet parasysh se ai po citon ekzluzivisht burimet ushtarake dhe policore serbe. Me një fjalë, Media Center, është zëdhënës i administratës pushtuese ushtarako-policore serbe, përgjegjëse për masakra, për vrasje, për tortura dhe për spastrime etnike në Kosovë.

Dihet se në botë dënohen operacionet e përbashkëta të ushtrisë e të policisë kundër popullsisë. Mirëpo në këtë rast, jo vetëm që ushtria dhe policia serbe po bashkëpunojnë ndëmjet vetes kundër shqiptarëve, por po bashkëpunojnë me to edhe gazetarët serbë.

Drejtues formalë të Media Centrit janë gazetarët serbë, nën ombrellën formale të Shoqatës së Gazetarëve të Serbisë. Kjo shoqatë njihet për të keq në Kosovë dhe në botë, sepse ajo bashk me Shoqatën e Shkrimtarëve të Serbisë ka qenë në shërbim të luftës speciale serbe kundër Kosovës e shqiptarëve qysh nga ngritja e Millosheviqit në pushtet. Disa gazetarë serbë, anëtarë e drejtues të kësaj shoqate kanë përhapur vazhdimisht gënjeshtra dhe kanë luajtur rol shumë negativ në nxitjen e luftës dhe duke marrë pjesë drejtpërdrejt në të kundër popujve të tjerë në vitet e agresionit serb kundër Kroacisë, Bosnjës e Hercegovinës e tjerë.

Është indikativ fakti se selia e Media Centrit është në Hotelin Grand të Prishtinës, prej nga janë dëbuar jo vetëm drejtuesit e punëtorët shqiptarë në vitin 1990, por edhe shqiptarët si klientë. Në dhomat e këtij hoteli e ka pasur për një gjatë selinë selinë Arkani, i akuzuar për krime lufte.

Lajme të tjera:

Dy të vrarë të paidentifikuar afër fshatit Piranë në rrugën Prizren – Gjakovë

Koncentrimi forcave dhe i terrorit serb në fshatrat e Hasit

Forca të ushtrisë serbe edhe në komunën e Vitisë

Fshtrat Balincë, Llazicë, Mleçan e Kijevë të Malishevës nën shtetrrethim të plotë

Gurrakoc: Policia keqtrajtoi fizikisht dy veprimtarë humanitarë

Në Prishtinë rreth 25 mijë veta u bënë homazh viktimave të 23 prillit nga ushtria serbe

Këshilli Organizativ propozon begatimin e formave të protestës së nesërme.

Shtypi i huaj për ngjarjet dramatike në Kosovë dhe për zgjidhjen e krizës së rrezikshme për rajonin

Foto: Nënkryetari amerikan, All Gor

Lajmet

Këto janë çmimet maksimale të derivateve për sot në Kosovë

Published

2 hours ago

April 27, 2026

UBTNews

Ministria e Industrisë, Ndërmarrësisë, Tregtisë dhe Inovacionit (MINT) ka publikuar çmimet e reja maksimale të lejuara për shitjen e derivateve të naftës, të cilat do të jenë valide për datat 26 dhe 27 prill 2026.

Sipas njoftimit zyrtar, çmimi tavan i naftës për këto dy ditë është caktuar 1.66 euro për litër.

Ndërkohë, qytetarët që përdorin benzinën do të paguajnë deri në 1.44 euro për litër, ndërsa çmimi maksimal i gazit është fiksuar në 0.86 euro për litër.

Ky vendim i ministrisë synon mbrojtjen e konsumatorëve dhe rregullimin e tregut të karburanteve në vend.

Lajmet

Komiteti Ushtarak i NATO-s viziton Kosovën, Policia njofton për kufizime në trafik

Published

2 hours ago

April 27, 2026

UBTNews

Delegacioni i Komitetit Ushtarak të NATO-s do të qëndrojë për një vizitë zyrtare dyditore në Republikën e Kosovës më 27 dhe 28 prill 2026.

Për të garantuar sigurinë dhe mbarëvajtjen e kësaj vizite, Policia e Kosovës ka njoftuar se do të kujdeset për ruajtjen e rendit publik dhe rregullimin e trafikut përgjatë itinerarit të lëvizjes së eskortës.

Gjatë kësaj kohe, do të ketë ndërprerje të përkohshme të qarkullimit në disa segmente rrugore në intervale të shkurtra kohore, si dhe riorientim të automjeteve në rrugë alternative.

Policia kërkon mirëkuptimin e qytetarëve dhe pjesëmarrësve në trafik për këto kufizime, të cilat do të aplikohen sipas agjendës zyrtare të delegacionit të lartë të aleancës.