Ftesën e Prokurorisë Speciale për intervistim të kryeministrit Albin Kurti, ministrja e Drejtësisë, Albulena Haxhiu po e konsideron përpjekje për ta dëmtuar Lëvizjen Vetëvendosje në prag të zgjedhjeve parlamentare të 9 shkurtit. Duke e përmendur rastin e rezervave shtetërore, ajo thotë se ftesa ka mundur të bëhet më herët.

Ministrja e Drejtësisë, Albulena Haxhiu thotë se Prokuroria Speciale po zhvillon “një luftë speciale” kundër qeverisë Kurti dhe Lëvizjes Vetëvendosje.

“Rasti i rezervave shtetërore ka ndodhur gjegjësisht para më shumë se 1 viti, dhe ishte e çuditshme se si prokuroria në kohën kur kryeministri Kurti, si kryetar i Lëvizjes Vetëvendosje dhe Kryesia e LVV-së diskutonin për listën e kandidatëve për deputetë, njoftohem nga kryeministria që për të paska ardhur një ftesë në cilësinë e dëshmitarit në raport me këtë rast. Sigurisht që nuk ishte diçka e habitshme, por në fakt është një tregues i qartë i luftës speciale që kjo prokurori po e bënë kundrejt kryeministrit Kurti, dhe në përgjithësi qeverisë dhe Lëvizjes Vetëvendosje. Pra, ne e shohim si veprim të qëllimshëm pikërisht në këtë kohë në prag të zgjedhjeve parlamentare. Dhe pikërisht qëllimi është të dëmtohet Lëvizja Vetëvendosje me këto ftesa nga ana e Prokurorisë Speciale, sepse një gjë e tillë, nëse është dashur të ndodh, atëherë ka mundur të ndodh shumë më herët, sepse ju e dini që ky rast ka nisur që më shumë se një vit, vitin e kaluar”, thotë Haxhiu.

Sipas Haxhiut, kjo ftesë është tendencioze.

“Vlerësoj që është jashtëzakonisht tendencioze dhe shpërfaq edhe njëherë qëllimin që e ka Prokuroria Speciale kundrejt qeverisë“, deklaron ministrja e Drejtësisë.

Kryeministri nuk u paraqit sot në prokurori, siç parashihej në ftesë, me arsyetimin se ndodhet në një udhëtim jashtë vendit – të planifikuar më herët.

Më vonë, Zyra e Kurti tha se “kryeministri Kurti ka shprehur gatishmërinë t’i mirëpres prokurorët e rastit në zyrën e tij në një ditë dhe orë të dakorduar nga të dy palët për të përmbushur kërkesën e dalë nga ftesa e prokurorisë”.

Këtë, Haxhiu e konsideron si diçka “normale nëse Prokuroria Speciale dëshiron dëshminë e Kurtit për rastin penal për të cilën është ftuar”.

“Po nëse prokurorët duan që të marrin dëshminë e kryeministrit ai i mirëpret në zyrën e tij. Pra, kjo është kërkesa që kryeministri e ka bërë, prandaj nëse janë të interesuar për të ditur më shumë në raport me këtë çështje besoj që është e rëndësishme që të tregojnë se kur mund të shkojnë tek kryeministri, natyrisht kur kryeministri Kurti është në Kosovë dhe sigurisht që më duket shumë diçka normale dhe nuk e besoj që ka nevojë për diskutime e rëndësishme, është që nëse ata janë të interesuar për ta marr dëshminë e kryeministrit Kurti, mund ta bëjnë këtë“, thotë Haxhiu.

Kryeministri i Kosovës, Albin Kurti ishte ftuar nga Prokuroria Speciale që sot të jap dëshminë e tij në cilësinë e dëshmitarit, por që ai nuk ishte i pranishëm me arsyetimin që ndodhet një vizitë zyrtare të planifikuar më herët.

Zëdhënësja e Prokurorisë Speciale, Liridona Kozmaqi tha se paraditen e së hënës janë njoftuar se kryeministri e ka të pamundur paraqitjen në këtë institucion. Ajo tha se do të përgatitet një tjetër ftesë për Kurtin.

Pas deklarimit të Prokurorisë Speciale, nga Qeveria e Kosovës thanë se Kurti ka shprehur gatishmërinë “t’i mirëpres prokurorët e rastit në zyrën e tij në një ditë dhe orë të dakorduar nga të dy palët për të përmbushur kërkesën e dalë nga ftesa e prokurorisë”.

Më 11 dhjetor Prokuroria Speciale e Republikës së Kosovës, e kishte ftuar kryeministrin, Albin Kurti për të dhënë dëshminë e tij në cilësinë e dëshmitarit për një rast penal.

Çdo votues i cili dëshiron të caktojë qendrën e tij të votimit sa më afër vendbanimit të tij, do të mund ta bëjë këtë me anë të telefonit. Mundësia për ndërrimin e Qendrës së Votimit brenda komunës ofrohet nga Komisioni Qendror i Zgjedhjeve përmes platformës elektronike.

Zgjedhjet parlamentare në Kosovë do të mbahen më 9 shkurt 2025.

Përveç kësaj platforme, KQZ mundëson ndërrimin e Qendrës së Votimit edhe duke paraqitur kërkesën në Komisionin Komunal të Zgjedhjeve në komunën përkatëse të votuesit.

Në një deklarim për KosovaPress, zëdhënësi i KQZ-së, Valmir Elezi tha se afati i fundit për të bërë këto ndryshime është data 26 dhjetor 2024.

Sipas tij, pas kësaj date, kjo platformë do të vazhdojë të funksionojë për të informuar qytetarët se në cilën qendër të votimit do të mund të votojnë.

“Deri më 26 dhjetor 2024, çdo qytetar me të drejtë vote, nëse dëshiron që ta ndërrojë Qendrën e Votimit brenda komunës dhe ta caktojë atë sa më afër vendbanimit të tij, mund ta bëjë përmes platformës elektronike të KQZ-së : http://qv.kqz-ks.org ose duke paraqitur kërkesën në Komisionin Komunal të Zgjedhjeve, në komunën përkatëse të votuesit. Në platformën elektronike është e mjaftueshme që votuesi të shënojë numrin e tij të identifikimit si dhe datëlindjen, dhe menjëherë do të shfaqen të dhënat për qendrën aktuale të votimit. Nëse votuesi dëshiron që ta ndërrojë qendrën e votimit brenda komunës, duke e caktuar atë sa më afër vendbanimit të tij, mund të paraqesë kërkesën e tij në të njëjtën platformë dhe brenda një kohe të shkurtër kërkesa do të shqyrtohet nga shërbimi votuesi KQZ-së dhe do të marr përgjigje”, tha Elezi.

Ai tha se digjitalizimi i këtij operacioni zgjedhor ka ndikuar edhe në numrin e madh të kërkesave të qytetarëve për të ndërruar Qendrën e Votimit brenda komunës së tyre.

Sipas Elezit, nga 29 gusht e deri më tani, më shumë se 4 mijë votues kanë ndërruar qendrën e tyre të votimit vetëm përmes kësaj platforme elektronike, ndërkaq rreth 700 përmes ndonjërit nga Komisionet Komunale të Zgjedhjeve.

Kryetari i Komisionit Qendror të Zgjedhjeve në Shqipëri, Ilirjan Celibashi, njoftoi të hënën se më 11 janar pritet të jetë funksionale platforma elektronike, ku rreth 1 milion mërgimtarë shqiptarë mund të regjistrohen për të votuar në zgjedhjet parlamentare në Shqipëri.

Zgjedhjet parlamentare në Shqipëri do të mbahen më 11 maj dhe diaspora shqiptare do të votojë për herë të parë në to.

Duke raportuar para nënkomisionit të Kuvendit për Diasporën dhe Migracionin, Celibashi theksoi se procesi i përgatitjes së votimit nga jashtë ka shkuar “sipas të gjitha parashikimeve” me Kodin Zgjedhor.

“Komisioni Rregullator pranë KQZ-së ka miratuar thuajse të gjitha aktet kryesore me qëllim realizmin e votimit nga jashtë. Para Krishtlindjeve do të kemi një demonstrim të funksionaliteteve të këtij sistemi me qëllim që, në datën 11 janar, kjo platformë të jetë funksionale“, tha Celibashi.

Kreu i KQZ-së tha se testet do bëhen në prani të organizatave të huaja, shoqërisë civile, palëve politike dhe garantoi “100 për qind siguri” për këtë proces.

I pyetur nga deputetët nëse do të finalizohet ky proces para datës së zgjedhjeve, Celibashi tha se është “plotësisht e realizueshme”.

Kuvendi i Shqipërisë miratoi në fund të korrikut disa ndryshime në Kodin Zgjedhor që mundësojnë votën e emigrantëve.

Vota do të dërgohet me postë dhe tarifa do të mbulohet nga shteti shqiptar.

Celibashi tha se janë mbi 1 milionë votues nga jashtë, por ngriti shqetësimin se një numri të madh imigrantësh u kanë skaduar dokumentet e identifikimit, ose mund t’u skadojnë ditën e zgjedhjeve.

Ai kërkoi që të merren masa nga Qeveria shqiptare për ta shtyrë vlefshmërinë e këtyre dokumenteve sikurse ka ndodhur në zgjedhjet e vitit 2021.

Sipas një raporti të Institutit të Statistikave në vitin 2020, numri i asaj që njihet si “diaspora e re”, apo imigrantët e larguar gjatë viteve ‘90 nga Shqipëria, ka arritur në rreth 1.68 milionë./REL/

Presidenti i zgjedhur amerikan, Donal Trump ka emëruar Richard Grenell, si të dërguar presidencial për misione speciale. Opozita në Kosovë kanë komentuar një gjë të tillë, duke thënë se pushteti tashmë ka dëmtuar relacionet me Shtetet e Bashkuara të Amerikës.

Pas mbledhjes së kryesisë, shefja e Grupit Parlamentar të LVV-së, Mimoza Kusari Lila, tha se vendimet e presidentit të zgjedhur duhet të shihen si hap para drejt bashkëpunimit.

“Natyrisht që vendimet e presidentit të zgjedhur të Shteteve të Bashkuara të Amerikës raport me politikën dhe gjeo-strategjinë janë vendime që duhet shikuar hapat përpara në frymën e bashkëpunimit e jo në frymën e kundërshtisë. Mendoj që situata është dramatikisht më ndryshe në terren në Republikën e Kosovës me atë çfarë ka qenë në vitin 2020 dhe me marrëveshje të cilën janë arritur që ne prapë edhe sot e asaj dite vlerësojmë se ka mundur të ketë pasoja në veçanti për shembull ndarja apo menaxhimi i Liqenit të Ujmanit me Serbinë. Që e konsiderojmë dhe e kemi konsideruar edhe në atë kohë që është një cenim i sovranitetit të Republikës së Kosovës për projekt dhe për infrastrukturë vitale, të cilën Kosova dhe qytetarët e saj në sistemin e kaluar kanë paguar dhe e kanë në pronësi”, deklaroi jo.

Shefi i Grupit Parlamentar te PDK-së, Abelard Tahiri ka komentuar zgjedhjen e Richard Grenell, si të dërguar presidencial për misione të posaçme.

“Unë besoj që Republika e Kosovës do të ketë një qeveri të re, një kryeministër të ri, siç është Bedri Hamza, i cili i ka dyert e hapura edhe në Shtetet e Bashkuara të Amerikës edhe në Shtëpinë e Bardhë edhe në State Departament. Dhe unë besoj shumë që Kosovës po i hapet një perspektivë e re edhe në raport me ShBA-të. Këta që tashmë po shkojnë kanë qenë jashtëzakonisht të papjekur, e kanë dëmtuar agjendën shumë në raport me Shtetet e Bashkuara të Amerikës”, u shpreh Tahiri.

Sa i përket deklarimeve të pozitës pas dorëzimit në Kushtetuese të dhjetëra ligjeve, Tahiri deklaroi se pushteti është nën masa dhe nuk i pyet askush.

“Ky pushtet i sanksionuar me i thënë këto është e palogjikshme, këta janë të sanksionuar. Ju imagjinoni prej qershorit të vitit 2023 ky është një pushtet i sanksionuar, janë nën masa, janë nën sanksione. Çfarë kuptimi ka agjenda ndërkombëtare. Janë vetëm figura, këta nuk t’i pyet askush për asgjë dhe janë krejt të pa rëndësishëm. Këtu vetëm një e mirë është që jemi në prag të zgjedhjeve dhe qeveria do ta ketë një kryeministër të ri, siç është Bedri Hamza”, përfundoi ai.

Shefi i Grupit Parlamentar të Lidhjes Demokratike të Kosovës, Arben Gashi tha se emërimi i Grenell është vendim sovran i shtetit tjetër.

“Është vendim sovran i shtetit tjetër nuk kemi çka…normalisht që do të bashkëpunojmë me këdo që Shtetet e Bashkuara të Amerikës e caktojnë si përfaqësues të tyre për ndërmjetësimin e krizave nëse konsiderohet problemi në Ballkanin Perëndimor si problem krizash që hyn në fushëveprimtarinë e tij. Nuk jemi ne ata që përcaktojmë se kush do të jetë përfaqësues i Shteteve të Bashkuara të Amerikës”, tha ai.

Ndërkaq, deputetja e Aleancës për Ardhmërinë e Kosovës, Time Kadriaj akuzoi pushtetin për prishje të raporteve me Shtetet e Bashkuara të Amerikës.

“Zyrtarët amerikan kanë thënë se ne nuk kemi raporte me këtë qeveri, e kanë sanksionuar këtë qeveri dhe kemi raporte të mira me popullin e Kosovës. Besoj që do të vazhdojnë në këtë drejtim sepse për herë të parë në histori ka ndodhur që shqiptarët dhe gjithë ata ushtarët e facebook -ut të LVV-së i kanë atakuar Shtetet e Bashkuara të Amerikës që i kemi aleatët kryesor, aleatë trandicional”, përfundoi deputetja e AAK-së.