Pas një vere me temperatura të larta në Evropë, një studim i agjencisë britanike të udhëtimeve Thomas Cook ka renditur Tiranën si destinacionin më ekonomik evropian për një udhëtim të shkurtër gjatë muajit shtator.

Sipas studimit, 18 nga 51 destinacionet më të njohura evropiane mund të vizitohen me më pak se 100 paund për person në ditë, ndërsa Tirana kryeson listën me një kosto mesatare prej rreth 51 paundësh në ditë për person.

Kjo do të thotë se një qëndrim tre-ditor në kryeqytetin shqiptar mund të kushtojë rreth 153 paund për person.

Në studim veçohen arkitektura e Tiranës, atmosfera e kafeneve dhe mundësitë për të eksploruar qytetin me një buxhet relativisht të ulët. Çmimi mesatar i atraksioneve turistike me pagesë është më pak se 4 paund, ndërsa edhe ushqimi në restorante konsiderohet i përballueshëm.

Një porcion i tavës së kosit, një prej gatimeve tradicionale shqiptare, kushton rreth 7 paund, ndërsa një birrë Korça rreth 1.31 paund.

Edhe akomodimi mbetet ndër alternativat më të lira. Sipas të dhënave të studimit, një natë qëndrimi në fillim të shtatorit kushton mesatarisht rreth 27.50 paund për person.

Për krahasim, një udhëtim i ngjashëm në Amsterdam do të kushtonte rreth 305 paund për person në ditë, ose rreth 915 paund për një qëndrim treditor.

Sipas Thomas Cook, destinacionet e Evropës Lindore dhe qytetet turke po ofrojnë gjithnjë e më shumë alternativa me çmime të përballueshme për turistët që kërkojnë udhëtime të shkurtra.

Pas Tiranës, ndër destinacionet më ekonomike të renditura në studim janë Bukureshti në Rumani, Antalia në Turqi dhe Varshava në Poloni.

Rritja e interesimit turistik për Shqipërinë, e shoqëruar me çmimet relativisht të ulëta, po e vendos Tiranën gjithnjë e më shumë në hartën e destinacioneve evropiane për udhëtarët me buxhet të kufizuar./atsh/A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

28 gusht 1993

Policia në Mitrovicë ndaloi senatorin Pol Kavërdell

Sot, rreth orës 10,50, në hyrje të Mitrovicës, policia serbe ndaloi senatorin amerikan Pol Kavërdell, të cilin, bashkë me shoqëruesit e tij, e dërgoi në qendrën e policisë në Mitrovicë.

Pas një ndalimi të shkurtër aty, me arsyen se duhej t’i bëhej kontrolli teknik i veturës, e cila shoqëronte senatorin Kavërdell, policia detyroi këta që të shkojnë në qendrën për kontrollime teknike të veturës. Këtu u mbajtën deri rreth orës 12.

Mbajtja e gjatë u arsyetua së pari me mungesën e policit që do të bënte kontrollin e pastaj me mungesën e rrymës elektrike.

Senatori amerikan Poll Kavërdell, bashkë me shoqëruesit, pas orës 12, u takua me udhëheqës të LDK-së dhe të subjekteve tjera politike të Mitrovicës dhe të Zubin-Potokut dhe me minatorë të këtij rajoni.

Senatori amerikan nga afër u njoh edhe me ngjarjen në fshatin Çabër, i cili pardje iu nënshtrua një represioni të gjerë të policisë serbe.

 28 gusht 1995

Kolonët serbë punësohen në vend të punëtorëve shqiptarë

Propaganda serbe vazhdon me një intensitet të madh për t’i “bindur” refugjatët serbë të vendosen si kolonë në Kosovë. Në masmediat serbe publicitet të madh u jipet sidomos informacioneve për punësimin e refugjatëve serbë të Kroacisë. E gjithë kjo po bëhet në shërbim të politikës shoveniste të Beogradit për kolonizimin e serbizimin e Kosovës me serbë.

Në një informatë të sotme të agjencisë serbe Tanjug thuhet se aktualisht në Kosovë janë vendosur 6000 mijë refugjatë serbë, kurse vende për strehim janë siguruar për afro 12.000.

Por theksin kryesor propagandistik agjencia serbe e vë në punësimin e refugjatëve serbë si kolonë në Kosovë, duke numëruar organizatat e ndërmarrjet që kanë punësuar serbët e Kroacisë.

Kolonët serbë po punësohen kryesisht në vendet e punës nga të cilat u dëbuan punëtorët shqiptarë në mënyrë sistematike nga uzurpatorët serbë. Kështu “Trepça” thuhet se do të punësojë 500 e madje edhe 1000 kolonë serbë. Pastaj një numër të tyre edhe “Binaçka Morava” e Gjilanit, “Grading” (ish- “Ramiz Sadiku”), etj.

Por qëllimi kryesor i regjimit të Beogradit është që sa më shumë refugjatë serbë si kolonë t’i vendosë në Dukagjin, në trevat shqiptare. Prandaj ofrohen edhe nga disa hektarë tokë pune dhe vreshta. Tanjugu pohon se për kolonët serbë në Kosovë në dispozicion janë jipen 30 mijë hektarë tokë pune, apo siç thuhet nga “toka shtetërore ose e kombinatet e dështuara”.

Dihet mirëfilli se nuk është fjala për kurrfarë toke shtetërore e kombinate të dështuara, por fjala është për pronat e pasuritë e kooperativave e të kombinateve bujqësore, që u krijuan me djersën e punëtorëve kryesisht shqiptarë, të cilët u dëbuan nga uzurpatorët serbë pas vitit 1990. Shumica e këtyre kombinateve do të plaçkiten edhe nga firmat e ndryshme të Serbisë pas integrimit të tyre të dhunshëm me to. Tash kur në këto kooperativa e kombinate nuk ka mbetur asgjë pa u plaçkitur, pos tokës, edhe ajo si “tokë shtetërore” synon t’u jipet kolonëve serbë.

Hollësi rreth vrasjes së Ymer Agushit nga ana e ushtarëve serbë

Siç kemi informuar, të shtunën në mbrëmje, rreth otës 18:45 ushtarët serbë vranë Ymer Dervish Agushin në fshatin e tij Gërqinë të Gjakovës.

Komisioni për Informim i Degës së LDK-së, në një njoftim të shpallur sot, jep hollësi të reja për rrethanat më të cilat u vra ky i ri.

Më 26 gusht, pas motit të ligë dhe rrebeshit të shiut, një grup i të rinjve të fshatit Gërqinë të Gjakovës, ndërmorrën një aksion për hapjen e vijave të ujit për të shpëtuar fshatin nga vërshimet.

Në këtë kohë, tre ushtarë serbë shkuan në shitoren e parë në hyrje të fshatit, i cili gjendet afër kufirit me Shqipërinë, ku ndodhet edhe karaulla ushtarake dhe konsumuan sasi të madhe të alkoolit.

Pak kohë më vonë, ushtarët, në gjendje të dehur dolën nga shitorja dhe iu afruan të rinjve që po punonin në hapjen e kanaleve. Pas provokimeve e sharjeve, ushtarët rrahën Mursel Gutën (16) e pastaj edhe Ibrahim dervish Gutën, ndërsa me armë provokuan Lulëzim Gutën (20), Asllan Gutën (16), Faton Gutën, Islam Gutën, Aziz Gutën, Ramiz Sylejmanin, etj.

Pas këtyre rrahjeve dhe provokimeve, Ymer Dervish Agushi provoi të ndërmjetësonte për të mos ndodhur ndonjë konflikt më i madh, por njëri nga ushtarët ia drejtoi atij automatikun në zemër dhe me një të shtënë e la të vdekur në vend. Ishte ora 18,45.

Pasi vrasin Ymerin, ushtarët vazhduan të shtijnë edhe më tujte me armë, por për fat nuk shkaktuan viktima të tjera. Më vonë ushtarët u pozicionuan në një vend 30 metra larg vendit të krimit dhe kufomës që mbeti aty.

Rreth orës 19:30 në vendin e ngjarjes arritën ushtarët tjerë të armatosur nga karaulla e afërme.

Prej orës 20 e deri në mesnatë në fshat vazhduan të arrijnë automjete ushtarake dhe ushtarë nga Gjakova. Fshati u vu në bllokadë të plotë.

Kufoma e Ymerit të ndjerë mbeti në vendin e krimit deri në orën 03 pas mesnate, kur disa eprorë ushtarakë njoftuan babain e Ymerit për vrasjen e djalit dhe i thonë se djali i tij është vrarë “me pahirë- pa dashje”.

Eprorët ushtarakë serbë kërkuan që kufoma e të ndjerit të dërgohej për obduksion në Nish. Mirëpo me insistimin e babait të tij, kufoma iu dha familjes pa u bërë obduksioni.

Varrimi i të ndjerit u bë dje, në prani të mijëra qytetarëve të kësaj ane.

Të gjithë të rinjtë që ishin prezent në momentin kur ndodhi vrasja, dje u thirrën në bisedë informative në polici.

 28 gusht 1997

Dhuna e përditshme në Kosovë

Mitrovicë: – Më 25 gusht, rreth orës 12:30, tre policë ishin në lagjen Tavnik në familjen e Rizah Hazirit, korrespondent i gazetës “Koha ditore”. Aty nuk e gjetën as Rizahun as të vëllain Shahinin, me ç’rast policia ua la thirrjen që Shahini të paraqitet të nesërmen në polici. Të nesërmen Shahini u paraqit në stacionin e policisë ku e mori në pyetje polici Mihajlo Voloviq, i cili prej tij kërkoi një revole. Pasi ai deklaroi para këtij polici se nuk posedon kurrëfarë armësh u keqtrajtua afro tri orë dhe u urdhërua që të të nesërmen të paraqitet sërish në polici. Kur Shahini ashtu veproi u mor në pyetje nga polici Kandiq i cili nga ai kërkoi të njëjtën revole sikur edhe më herët dhe kjo “bisedë informative zgjati tri orë dhe pas lirimit u urdhërua të paraqitet sërish në polici më 29 gusht në orën 8:00.
Vushtrri: – Pas vuajtjes së dënimit prej 30 ditë burg në burgun e Smrekonicës, u lirua Berdi Shuti, zëvendësdrejtor i Gjimnazit në Vushtrri. Ai u dënua ngase policët serbë e kishin zënë duke mbajtur orët e mësimit në gjuhën shqipe, njofton KI i Degës së LDK-së në Vushtrri.

28 gusht 1998

Malishevë: Tre të vrarë e dy të plagosur nga granatat – tre refugjatë të vdekur

Në Lladroviq të Malishevës dje pasdite nga granatat serbe u vranë Ramadan Berisha (60), reja e tij, rreth 30-vjeçe dhe një fëmijë i familjes Berisha, të cilët po iknin nga fshati i tyre që granatohej nga forcat serbe.

KI i Degës së LDK-së në Malishevë njofton se me këtë rast u plagos edhe Abdyl Berisha vëlla i Ramadanit dhe bashkëshortja e Abdylit, Sanija (53).

Dyshohet se të vrarë e të plagosur nga granatat ka edhe në fshatin Senik.

Gjithashtu bëhet me dije se si pasojë e jetës nën qiellin e hapur dje kanë vdekur dy persona të moshuar, ndërsa sot ka vdekur një foshnjë disajavëshe.

I njëjti burim bënë me dije se forcat serbe kanë kidnapuar dje dhjetë shqiptarë në fshatin Ngucat.

Sot, nga shtëpitë që po digjen në fshatin Banjë po shkon tym e flakë.

Si pasojë e ofensivës së ditëve të fundit të forcave serbe ka pasur zhvendosje të madhe të popullatës edhe nga disa fshatra të Malishevës, si nga Baja, Gajraku, Karvansaria, Bellanica, Seniku, Lladroviqi, Temeçina, Tërpeza e tjerë. Banorët e të gjitha këtyre fshatrave janë koncentruar në trikatër fshatra malore të cilat aktualisht konsiderohen si më të sigurta.

Në këto dhe fshatra të tjera të komunës së Malishevës janë të koncentruar rreth 100 mijë banorë të kësaj komune si dhe të fshatrave të Suharekës e të Rahovecit të cilët jetojnë në kushte tepër të rënda në mungesë të madhe të ushqimit, barnave dhe veshëmbathjes.

Dy shqiptarë vdiqën nga plagët

Shaban Islam Gashi nga Peçani dhe Zenun Mataj nga Baballoçi, të cilët vdiqën nga plagët e marra ditë më parë, u varrosën në Pagarushë të Malishevës, njofton KI i Degës së LDK-së në Malishevë.

Suharekë: Forcat serbe vranë 2 pjesëtarë të UÇK-së dhe varrosën me dhunë 4 shqiptarë të paidentifikuar

Dje në Suharekë, forcat e policisë serbe kanë vrarë Naim Hajrullah Berishën (30) dhe Xhelal Jemin Kuçin (30), që të dy pjesëtarë të Ushtrisë Çlirimatre të Kosovës nga Suhareka, bën të ditur KI i Degës së LDK-së në Suharekë.

Po ashtu njoftohet se në Shirokë, e cila është paralagje e Suharekës, policia serbe ka varrosur edhe kufomat e katër shqiptarëve të paidentifikuar.

Gjakovë: Edhe një shqiptar i vrarë nga forcat serbe

 Siç bëhet me dije, nga forcat serbe është vrarë Ekrem Ramë Prushi (17) nga fshati Prush i anës së Hasit të brezit kufitar Kosovë – Shqipëri.

Sipas deklaratave të familjes, i ndjeri Ekrem Prushi u vra më 26 gusht, rreth orës 20,30, derisa kthehej në shtëpinë e tij, qëllohet nga forcat serbe pa paralajmërim, në hyrje të fhatit të tij Prush.

Po ashtu njoftohet se në brezin kufitar Kosovë – Shqipëri, qe dy ditë janë duke u djegur malet e Bokës së Babajve dhe thuhet se deri më tani janë djegur me dhjetra hektarë. Nuk dihet për shkaqet e shpërthimit të këtij zjarri dhe është e pamundshme që të lokalizohet dhe shuhet, meqë është në vijën kufitare Kosovë – Shqipëri.

Sipas deklarimit të familjes Zogaj, thuhet se Tush Tunë Frrokaj (39) dhe bashkëshortja e tji Ilire Mark Frrokaj (32), më 26 gusht, janë nisur prej fshtait Plançor në drejtim të qytetit të Gjakovës dhe deri më tani nuk dihet për fatin e tyre.

Edhe sot në qytetin e Gjakovës, vazhdojnë lëvizjet e përforcuara të forcave ushtarako policore në drejtime ët ndryshme.

Edhe më tutje vazhdon keqësimi i gjendjes të popullatës së zhvendosur si në qytet ashtu edhe në malet e anës së Dushkajës.

Foto: Senatori amerikan, Pol Kavërdell

Negociatat për përfshirjen e Dua Lipës në edicionin e vitit 2027 të Festivalit të Sanremos kanë avancuar ndjeshëm, sipas agjencisë italiane të lajmeve Adnkronos.

Megjithatë, deri tani as transmetuesi italian Rai dhe as organizatorët e festivalit nuk e kanë konfirmuar zyrtarisht pjesëmarrjen e këngëtares shqiptaro-britanike.

Sipas raportimeve, nëse arrihet marrëveshja, Dua Lipa mund të ketë një rol më të rëndësishëm se ai i një të ft uareje ndërkombëtare. Ajo mund të angazhohet si bashkëprezantuese në njërën prej netëve kryesore të festivalit.

Sanremo 2027 do të mbahet në Teatrin Ariston nga 16 deri më 20 shkurt, ndërsa festivali do të jetë edicioni i parë nën drejtimin e Stefano De Martinos.

Për Dua Lipën kjo do të ishte një rikthim në skenën e Sanremos. Ajo performoi aty në vitin 2020, kur interpretoi hitin “Don’t Start Now”.

Ende nuk dihet se në cilën natë mund të shfaqet ajo në edicionin e ardhshëm. Ndër mundësitë e përfolura janë nata e hapjes, finalja, ose nata që lidhet me përzgjedhjen e përfaqësuesit të Italisë për Eurovision.

Një faktor që mund ta lehtësojë pjesëmarrjen e saj është fakti se, sipas raportimeve, Dua Lipa nuk ka aktualisht të planifikuara koncerte apo performanca live gjatë datave të Sanremos 2027.

Përveç saj, me festivalin janë lidhur edhe emrat e Maria De Filippit dhe humoristes Brenda Lodigianit, por as këto pjesëmarrje nuk janë konfirmuar zyrtarisht.

Nëse marrëveshja finalizohet, Dua Lipa do të rikthehej në Ariston jo vetëm si artiste, por si një prej figurave qendrore të festivalit./A.K/