Sot Kuvendi i Kosovës do të mbajë seancë plenare ku në rend dite përveç deklarimeve jashtë rendit të ditës e pyetjeve parlamentare, në lexim të dytë do të shqyrtohet Projektligji për ndryshimin dhe plotësimin e Ligjit për parandalimin e pastrimit të parave dhe luftimin e financimit të terrorizmit.

Në seancën që pritet të nisë në orën 10:00 deputetët do të përzgjedhin edhe dy anëtarë joekzekutivë të Bordit të Bankës Qendrore të Kosovës (BQK).

Seanca është caktuar nga Kryesia e Kuvendit në mbledhjen e mbajtur të hënën.

Rendi i ditës:

1. Miratimi i procesverbaleve nga seancat e mëparshme;

2. Deklarimet jashtë rendit të ditës;

3. Pyetjet parlamentare;

4. Përzgjedhja e dy (2) anëtarëve joekzekutiv të Bordit të Bankës Qendrore të Republikës së Kosovës;

5. Formimi i Komisionit Ad-Hoc për përzgjedhjen e kandidatëve për dy (2) anëtarë nga komuniteti shqiptar, një (1) anëtar nga komuniteti serb dhe një (1) anëtar nga komunitetet jo shumicë në Bordin e Radiotelevizionit të Kosovës;

6. Propozim i GP- Lista serbe për emërimin e deputetëve në komisionet parlamentare;

7. Shqyrtimi i dytë i Projektligjit nr.11/L-017 për ndryshimin dhe plotësimin e Ligjit Nr. 05/L-096 për Parandalimin e Pastrimit të Parave dhe Luftimin e Financimit të Terrorizmit./A.K/

Kryeministri i Shqipërisë, Edi Rama, ka reaguar pas protestave dhe akteve të dhunës të dy ditëve të fundit në Tiranë, duke vizituar ambientet e Kolegjit të Evropës, të cilat u dogjën mbrëmjen e kaluar.

Rama deklaroi se dëmet e shkaktuara nuk mund të jenë vepër e studentëve, duke i cilësuar rrënojat si pasojë të veprimeve që, sipas tij, nuk përfaqësojnë të rinjtë.

“Deri dje kjo ishte zyra e Kolegjit të Evropës, shkollës së Evropës së bashkuar që e hapëm në Shqipëri së bashku me udhëheqësit evropianë. Sot kjo është rrënoja e duarve që nuk janë dhe nuk mund të jenë kurrë duart e studentëve”, tha Rama.

Ai theksoi se studentët janë gjithmonë të mirëpritur për dialog dhe diskutim, ndërsa akuzoi opozitën se po përpiqet ta pengojë rrugëtimin evropian të Shqipërisë.

Sipas Ramës, dhuna e ditëve të fundit nuk do ta ndryshojë drejtimin e vendit drejt Bashkimit Evropian.

Kryeministri paralajmëroi gjithashtu se të gjithë personat e përfshirë në aktet e dhunës do të mbajnë përgjegjësi para ligjit.

“Kushdo që mendon se ligji është larg, gabon. Përgjegjësia para ligjit është e secilit dhe gjithkush që ka dorë në këtë katrahurë sigurisht se do ta paguajë”, deklaroi ai.

Rama shtoi se Shqipëria do të vazhdojë rrugën drejt integrimit evropian, duke e cilësuar të ardhmen e vendit si të lidhur me studentët dhe gjeneratat e reja./A.K/

Presidentja e Kosovës, Justina Shiroka-Pula, ka pritur në takim një delegacion të përfaqësueseve të strehimoreve të Kosovës, me të cilat ka diskutuar për mbrojtjen e grave nga dhuna, sfidat me të cilat përballen strehimoret dhe mundësitë për forcimin e bashkëpunimit institucional.

Gjatë takimit, presidentja vlerësoi punën dhe përkushtimin e përfaqësueseve të strehimoreve në mbrojtjen e grave, garantimin e sigurisë së tyre dhe mbështetjen për riintegrim në shoqëri.

Ajo theksoi se mbrojtja e grave nga dhuna dhe garantimi i dinjitetit të tyre janë përgjegjësi e përbashkët institucionale dhe shoqërore, duke nënvizuar se asnjë grua nuk duhet të përballet e vetme me dhunën apo vështirësitë.

Shiroka-Pula u interesua gjithashtu për sfidat dhe nevojat konkrete të strehimoreve, si dhe për mundësitë e rritjes së mbështetjes institucionale, në mënyrë që shërbimet për gratë që përballen me dhunë të jenë të qëndrueshme, të qasshme dhe efektive.

Në fund, presidentja shprehu gatishmërinë për bashkëpunim të vazhdueshëm me përfaqësueset e strehimoreve, shqyrtimin e mundësive për mbështetjen e punës së tyre dhe adresimin e çështjeve që kërkojnë vëmendje institucionale./A.K/

Në Kosovë, këtë të enjte, më 15 tetor 2026, pritet të mbajë mot kryesisht me diell dhe me vranësira të shpërndara.

Sipas Institutit Hidrometeorologjik të Kosovës (IHMK), temperaturat minimale do të lëvizin nga 4 deri në 6 gradë Celsius, ndërsa ato maksimale pritet të arrijnë nga 16 deri në 19 gradë Celsius./A.K/