Lajmet

Rusia synon të largohet nga OSBE-ja

Që nga nisja e pushtimit rus të Ukrainës në shkurt të vitit 2022, OSBE-ja gjerësisht është paralizuar nga përdorimi i vetos nga Rusia.

Published

on

Parlamenti rus do të votojë më 21 shkurt për pezullimin e pjesëmarrjes së shtetit në Asamblenë Parlamentare të Organizatës për Siguri dhe Bashkëpunim në Evropë (OSBE), tha kreu i Dumës ruse, Vyacheslav Volodin.

OSBE-ja, që ka 57 anëtarë përfshirë Ukrainën, Shtetet e Bashkuara dhe Rusinë, është pasardhëse e një organizate gjatë epokës së Luftës së Ftohtë, ku angazhoheshin fuqitë perëndimore dhe sovjetike.

Që nga nisja e pushtimit rus të Ukrainës në shkurt të vitit 2022, OSBE-ja gjerësisht është paralizuar nga përdorimi i vetos nga Rusia.

“Është koha t’i themi lamtumirë Asamblesë Parlamentare të OSBE-së”, tha Volodin gjatë një takimi në Dumë, dhomën e ulët të Parlamentit rus, sipas njoftimit në ueb-faqen e Dumës.

“Organizata ka mungesë të pavarësisë, është e politizuar dhe kërcen sipas muzikës së Uashingtonit. Por, më e keqja në këtë situatë është se edhe ne paguajmë para dhe ne jemi një prej lojtarëve më të mëdhenj”.

Dy dhomat e Parlamentit rus pritet të votojnë për pezullimin e pjesëmarrjes dhe ndalimit të pagesave nga Moska për OSBE-në, tha Volodin.

Me partinë Rusia e Bashkuar – parti në pushtet që mbështet presidentin Vladimir Putin – që ka shumicën në Parlament, rezoluta për pezullimin e pjesëmarrjes në OSBE pritet të miratohet.

Duma po ashtu tha se po shqyrtohet mundësia që Rusia të largohet nga organizata të tjera ndërkombëtare, por nuk saktësoi se për çfarë organizatash bëhet fjalë.

Ukraina dhe aleatët e Baltikut, që janë fqinj të Rusisë, kanë refuzuar të marrin pjesë në takimin vjetor të ministrat të Jashtëm të OSBE-së që u mbajt fundin e vitit të kaluar, për shkak se në mbledhje mori pjesë ministri i Jashtëm rus, Sergei Lavrov./REL

Aktualitet

Rektori i UBT-së, në mesin e pesë liderëve më të mirë globalë të arsimit të lartë nga Triple E Awards

Published

on

Një vlerësim tjetër ndërkombëtar për Kosovën dhe arsimin e lartë: Themeluesi dhe Rektori i UBT-së, Prof. Dr. Edmond Hajrizi, është përzgjedhur në mesin e pesë liderëve më të shquar globalë për çmimin prestigjioz Triple E Awards – Udhëheqësi Universitar i Vitit (Kategoria Globale).

Kjo përzgjedhje e vendos Rektorin Hajrizi krah personaliteteve që kanë transformuar arsimin e lartë dhe rolin e tij në shoqëri, duke e bërë UBT-në një shembull unik të inovacionit, zhvillimit dhe vizionit në nivel ndërkombëtar.

Në këtë kategori shumë konkurruese, finalistët tjerë krahas Rektorit Hajrizi janë:

Nuno Fernandes – President, American Public University System (Shtetet e Bashkuara)

Marie-Josée Lamothe – Drejtoreshë, McGill Dobson Centre for Entrepreneurship (Kanada)

Christina Ionescu – Mount Allison University (Kanada)

Zaur Samadov – Trinity College Dublin & Open Incubator (Irlandë)

Rektori Hajrizi është përzgjedhur për lidershipin e tij transformues të dëshmuar në arsimin e lartë. Si themelues vizionar i UBT-së, ai ka ndërtuar një ekosistem që e pozicionon universitetin si një nxitës të inovacionit, qëndrueshmërisë dhe rinovimit shoqëror.

Që nga themelimi i UBT-së me vetëm 29 studentë në vitin 2004, deri te zhvillimi në një institucion lider kombëtar me mbi 15,000 studentë sot, ai ka integruar ndërmarrësinë, transformimin digjital dhe qëndrueshmërinë në çdo nivel.

Nën udhëheqjen e tij, UBT ka gjeneruar mbi 100 spin-off-e, mbi 1,000 vende pune çdo vit dhe ka nisur iniciativa si UBT Accelerator, Kampi i Inovacionit, dhe Qendra e Inovacionit Digjital. I njohur ndërkombëtarisht për zhvillimin e kampusit të mençur, energjinë e rinovueshme dhe përafrimin me Objektivat e Zhvillimit të Qëndrueshëm (SDG), puna e tij dëshmon se si universitetet mund të shërbejnë si motorë të zhvillimit ekonomik dhe përparimit shoqëror.

Të qenurit në mesin e këtyre liderëve të shquar globalë është një dëshmi e lidershipit vizionar të Rektorit Hajrizi, njohjes ndërkombëtare dhe kontributit të tij të qëndrueshëm në arsimin e lartë dhe shoqëri.

Continue Reading

Aktualitet

Presidentja Osmani: Rusia po synon destabilizimin e Ballkanit

Published

on

Forca me ndikim të keq, si Rusia, po përpiqen të ushtrojnë ndikim në Ballkan sepse kanë “interesa strategjike” dhe synojnë të destabilizojnë sistemin e vlerave të BE-së dhe NATO-s, ka deklaruar Presidentja e Kosovës, Vjosa Osmani, në një intervistë ekskluzive për TVP World.

Duke folur në margjinat e Forumit Evropian në Alpbach, të shtunën, Osmani paralajmëroi për rritjen e ndikimit të “trekëndëshit të së keqes” – Rusisë, Kinës dhe Iranit – dhe theksoi sfidat më të ngutshme për Kosovën.

“Shpesh them se kur shohim forca të tilla si Rusia, Kina dhe Irani – ky trekëndësh i së keqes – duke tentuar të ndikojnë në Ballkanin Perëndimor, ata nuk e bëjnë këtë nga bamirësia, por sepse kanë një interes strategjik”, tha Osmani.

Ajo shtoi se për Kosovën problemi më i madh mbetet Serbia. Duke cituar Misionin e Vëzhgimit Evropian, Osmani theksoi se është dëshmuar që Serbia, “e ndihmuar dhe e shtyrë nga Rusia”, ka ndërhyrë edhe në zgjedhjet e fundit parlamentare në Kosovë.

“Sfida jonë më e madhe, siç kam thënë, është fakti se Serbia vazhdon t’i shohë shtetet fqinjë si shtete të përkohshme”, u shpreh ajo, duke e krahasuar këtë qasje me “mentalitetin imperialist dhe hegjemonist të Rusisë”.

Megjithatë, Osmani theksoi se në skenën e madhe politike të Kosovës “nuk ka ndikim rus apo serb, gjithçka është lokale”.

Ajo gjithashtu rikujtoi se Kosova ka synim të qartë integrimin në BE, por mungesa e një shumice parlamentare po e pengon realizimin e projekteve evropiane dhe bashkëpunimin me administratën amerikane.

Continue Reading

Aktualitet

Shqipëri: Nis shpërndarja falas e librave shkollorë për 236 mijë nxënës

Published

on

Kryeministri i Shqipërisë, Edi Rama, njoftoi sot nisjen e shpërndarjes falas të librave shkollorë për 236 mijë nxënës në të gjithë vendin. Sipas tij, kjo është një mbështetje e përvitshme e Qeverisë për fëmijët dhe familjet e tyre, në prag të vitit të ri shkollor.

“Me nisjen sot të shpërndarjes së librave shkollorë falas për 236 mijë nxënës… ju uroj një javë të mbarë”, shkroi Rama, duke theksuar karakterin social të nismës dhe lehtësimin e kostove për familjet.

Shpërndarja synon të sigurojë një fillim sa më të mbarë të vitit të ri shkollor, me theks në barazinë në qasje ndaj arsimit dhe lehtësimin e barrës financiare për prindërit. Autoritetet arsimore pritet të koordinohen me shkollat për të vijuar procesin në ditët në vijim.

Continue Reading

Aktualitet

Donjeta Sadiku drejt Botërorit të Boksit

Published

on

Nga 13 gushti deri më 2 shtator 2025, boksierja kosovare Donjeta Sadiku, së bashku me trajneren dhe selektoren Marjola Sallauka, po zhvillon përgatitje intensive në kampin stërvitor në Sheffield të Anglisë.

Ky kamp përfaqëson një hap vendimtar në rrugëtimin drejt Kampionatit Botëror të boksit, i cili do të mbahet nga 4 deri më 14 shtator në Liverpool të Anglisë.

Sadiku ka dëshmuar prej kohësh cilësitë e saj si një nga emrat më të fuqishëm të boksit botëror. Ajo ka fituar medaljen e bronztë në Kampionatin Botëror 2022 në Stamboll, një tjetër medalje të bronztë në Kampionatin Evropian 2022 në Budva, si dhe ka shkëlqyer këtë vit me triumfe të njëpasnjëshme duke fituar medalje të arta në tri turnetë prestigjioze: Strandja në Bullgari, Brussels Capital Tournament në Belgjikë dhe Feliks Stamm në Varshavë të Polonisë.

Me këtë përvojë, pritshmëritë dhe besimi janë të mëdha: që Donjeta Sadiku të kurorëzohet në Liverpool si Kampione e Botës, duke sjellë medaljen e artë në Kosovë.

Continue Reading

Të kërkuara