

Lajmet
Rusia mohon se po kërkon një pretekst për të sulmuar Ukrainën
Lavrov i hodhi poshtë pretendimet e Shteteve të Bashkuara duke i quajtur “një dizinformim i plotë”.
Published
3 years agoon
By
Betim GashiKryediplomati rus refuzoi me zemërim akuzat e Shteteve të Bashkuara se Moska po përgatit një pretekst për të sulmuar Ukrainën, ndërsa forcat ruse të mbledhura pranë kufirit me Ukrainën filluan të hënën stërvitje të reja ushtarake.
Shtëpia e Bardhë tha të premten se zyrtarët e zbulimit amerikan kanë konkluduar se Rusia ka dislokuar tashmë operativët e saj në Ukrainën lindore të kontrolluar nga rebelët, për të kryer akte sabotazhi dhe për t’ia lënë fajin Ukrainës, duke krijuar kështu një pretekst për ta pushtuar.
Duke folur për gazetarët të hënën, Ministri i Jashtëm rus Sergey Lavrov i hodhi poshtë pretendimet e Shteteve të Bashkuara duke i quajtur “një dizinformim i plotë”.
Ai konfirmoi se Rusia po pret një përgjigje me shkrim këtë javë nga Shtetet e Bashkuara dhe aleatët për kërkesat e Moskës për garancitë se NATO nuk do të anëtarësojë Ukrainën, apo vende të tjera ish-sovjetike, dhe as do të dislokojë forca dhe armatime në atë vend.
Uashingtoni dhe vendet aleate refuzuan me forcë kërkesat e Moskës gjatë negociatave SHBA-Rusi javën e kaluar në Gjenevë dhe gjatë një takimi NATO-Rusi në Bruksel. Takimet zhvilloheshin ndërsa rreth 100 mijë forca ruse me tanke dhe armatime të tjera të rënda janë mbledhur pranë Ukrainës. Perëndimi mendon se ky është preludi i një pushtimi.
Ndërsa vazhdonte grumbullimi i forcave ushtarake, Rusia ka zhvilluar gjatë javëve të fundit disa simulime ushtarake në rajonet pranë kufirit me Ukrainën. Të hënën, ushtria ruse njoftoi fillimin e një tjetër stërvitjeje të mjeteve të blinduara në pjesën perëndimore të Rusisë, ku do të përfshihen 300 mjete luftarake.
Një delegacion senatorësh amerikanë po viziton Ukrainën për të theksuar mbështetjen e Shteteve të Bashkuara për këtë vend.
“Delegacioni ynë dypartiak me anëtarë të Kongresit dërgon një mesazh të qartë për komunitetin global: Shtetet e Bashkuara janë të palëkundura në mbështetje të partnerëve tanë ukrainas që mbrojnë sovranitetin e tyre përballë agresionit të vazhdueshëm rus”, tha nëpërmjet një deklarate Senatorja demokrate Jeanne Shaheen.
Duke folur të hënën gjatë një vizite në Kiev, Ministrja e Jashtme gjermane Annalena Baerbock paralajmëroi se “çdo përshkallëzim i mëtejshëm do të mbarte një çmim të rëndë për regjimin rus – ekonomik, politik dhe strategjik”. Ajo theksoi nevojën e vazhdimit të negociatave.
“Jemi të përgatitur për një dialog serioz me Rusinë, pasi diplomacia është mënyra e vetme për të çtensionuar këtë situatë të rrezikshme”, tha ajo.
Zonja Baerbock tha se Gjermania ka ofruar të dërgojë specialistë të sigurisë kibernetike në Ukrainë për të ndihmuar në hetimin e sulmeve kibernetike të javës së kaluar, për të cilat autoritetet ukrainase kanë fajësuar Rusinë. Në të njëjtën kohë, ajo vuri në dukje se Gjermania nuk e ka ndryshuar vendimin e saj për të mos dërguar armatim.
“E kemi bërë të qartë se do të bëjmë gjithçka për të shmangur përshkallëzimin e krizës”, tha ajo.
Kancelari gjerman Olaf Scholz tha gjatë një vizite në Spanjë se “ne presim hapa të qartë nga Rusia për të ulur tensionet”, duke shtuar se “agresioni ushtarak kundër Ukrainës do të sjellë pasoja të rënda politike dhe ekonomike”.
Zyrtarët ukrainas kanë paralajmëruar se Rusia mund të nisë një sulm nga drejtime të ndryshme, përfshirë edhe nga territori i aleates së saj, Bjellorusisë.
Presidenti i Bjellorusisë, Alexander Lukashenko, i cili është mbështetur gjithnjë e më shumë tek ndihma e Kremlinit ndërsa perëndimi i ka vendosur sanksione për shtypjen brutale të protestave në vend, tha se Rusia dhe Bjellorusia do të zhvillojnë stërvitje masive ushtarake muajin e ardhshëm.
Zoti Lukashenko tha se manovrat do të kryhen në kufirin perëndimor të Bjellorusisë dhe gjithashtu në jug të vendit, ku ndodhet kufiri me Ukrainën. Sekretari i Këshillit të Sigurimit të Bjellorusisë, Alexander Volfovich, tha të hënën se trupat ruse tashmë kishin filluar të mbërrinin në vend për stërvitjen në fjalë, njoftoi agjencia e lajmeve BELTA.
Rusia ka mohuar të ketë plane për të sulmuar vendin fqinj dhe nga ana tjetër ka akuzuar udhëheqjen ukrainase për hartimin e planeve për të përdorur forcën për të rimarrë kontrollin e territoreve të mbështetura nga rebelët në Ukrainën lindore. Autoritetet ukrainase e kanë mohuar këtë gjë.
Rusia aneksoi Gadishullin e Krimesë nga Ukraina në vitin 2014 pas rrëzimit nga pushteti të udhëheqësit pro-rus të Ukrainës dhe gjithashtu mbështeti një kryengritjeje separatiste në Ukrainën lindore. Më shumë se 14 mijë njerëz janë vrarë në gati tetë vjet luftime atje.
Presidenti rus Vladimir Putin ka paralajmëruar se Moska do të ndërmarrë “masa ushtarako-teknike” të papërcaktuara nëse Perëndimi kundërshton kërkesat e tij.
Zëvendësministri i Jashtëm Sergei Ryabkov, i cili udhëhoqi delegacionin rus në bisedimet me SHBA-në në Gjenevë, tha javën e kaluar se ai “as nuk do të konfirmonte dhe as përjashtonte” mundësinë e dërgimit të mjeteve ushtarake nga Rusia në Kubë dhe Venezuelë nëse Shtetet e Bashkuara dhe aleatët e saj nuk kufizojnë aktivitetet e tyre ushtarake në pragun e territorit të Rusisë. Këshilltari i Sigurisë Kombëtare i Shteteve të Bashkuara, Jake Sullivan, i ka hedhur poshtë komentet si thjesht zhurmë.
I pyetur të hënën për mundësinë e vendosjes së raketave ruse në Kubë dhe Venezuelë, zëdhënësi i Kremlinit Dmitry Peskov u tha gazetarëve se “Rusia po mendon se si të garantojë sigurinë e saj në kontekstin e situatës aktuale”./VOA/
You may like
Lajmet
Protestë e re kundër shtrenjtimit të rrymës në Prishtinë
Published
2 days agoon
April 18, 2025By
UBTNews
Grupi “Asnjë cent më shumë” ka njoftuar se do të organizojë një protestë të re më 19 prill, kundër rritjes së çmimit të energjisë elektrike. Protesta do të mbahet në sheshin “Skënderbeu” në orën 12:00, dhe organizatorët kanë ftuar qytetarët të marrin pjesë në masë.
Besnik Shabiu, organizatori i protestës, ka deklaruar se protesta është një reagim ndaj vendimit të ZRRE-së për rritjen e çmimit të energjisë elektrike, duke theksuar se, nëse autoritetet nuk reagojnë, grupi nuk përjashton mundësinë e përshkallëzimit të aksioneve. Ai paralajmëroi se mund të ndodhin bllokime të rrugëve dhe institucioneve, për të siguruar që zëri i qytetarëve të dëgjohet.
Shabiu ka shtuar se protesta e nesërme vjen në një moment të rëndësishëm, pasi të njëjtën orë mbahet edhe vazhdimi i seancës konstituive të Kuvendit të Kosovës. Ai bëri thirrje për deputetët e zgjedhur që, sapo Kuvendi të konstituohet, të thirret komisioni për energji dhe ZRRE-ja për të raportuar mbi çështjen e rritjes së çmimit të energjisë.
“Zëri i qytetarëve duhet të dëgjohet pa ndërprerë. Ne do të vazhdojmë të jemi të zëshëm, dhe nëse pas kësaj proteste nuk ka reagim, do të jemi të detyruar të përshkallëzojmë aksionet”, tha Shabiu.
Ai gjithashtu njoftoi se po shqyrtohen mundësitë e pezullimit të pagesave për energjinë elektrike për qytetarët si një masë për të mbrojtur interesat e tyre. “Ky është një kërkesë legjitime e qytetarëve. Kur institucionet nuk punojnë për qytetarët, pse duhet të funksionojnë?”, shtoi ai.
Në anën tjetër, Ardian Bajraktari, një nga përfaqësuesit e grupit, ka bërë të ditur se ekipi i tij po punon për hartimin e padisë për anulimin e vendimit të aktit administrativ nga ZRRE. Sipas tij, ky vendim është marrë në shpërputhje me autorizimet e këtij institucioni dhe ka dëme të mëdha për qytetarët. Ai ka njoftuar se janë duke përgatitur gjithashtu një propozim për një masë të përkohshme, për të shtyrë ekzekutimin e vendimit derisa të shqyrtohet nga gjykatat.
Ky zhvillim vjen pas njoftimit të ZRRE-së për një rritje të çmimit të energjisë elektrike për 16%, që do të hyjë në fuqi nga muaji maj. Ky vendim ka shkaktuar reagime të shumta nga qytetarët, bizneset dhe subjektet politike, që po kundërshtojnë një rritje të tillë. Protesta të ngjashme janë mbajtur tashmë dhe grupet e aktivistëve po kërkojnë anulimin e këtij vendimi.
Për më shumë, grupi “Asnjë cent më shumë” ka paralajmëruar se do të vazhdojnë aksionet deri në arritjen e kërkesave të tyre dhe kanë ftuar qytetarët të bashkohen në protestën e nesërme për të shprehur pakënaqësinë e tyre ndaj shtrenjtimit të rrymës.
Lajmet
Osmani dekoron me medalje tre të mbijetuar të dhunës seksuale gjatë luftës
Published
2 days agoon
April 18, 2025By
UBTNews
Presidentja e Republikës së Kosovës, Vjosa Osmani, ka dekoruar me medaljen “Nderi i Republikës së Kosovës” tre të mbijetuar të dhunës seksuale gjatë luftës së fundit në Kosovë. Në një ceremoni të organizuar në Presidencë, medalja iu dorëzua Vasfije Krasniqi-Goodman, Shyrete Tahiri-Sylejmani dhe Ramadan Nishori, të cilët kanë folur publikisht për përvojat e tyre të dhunës nga forcat serbe gjatë luftës.
Në fjalimin e saj, Presidentja Osmani ka vlerësuar guximin e të mbijetuarve për të ndarë me publikun përvojat e tyre dhe ka theksuar rëndësinë e dëshmive të tyre për drejtësinë dhe të vërtetën historike të Kosovës. Ajo ka shtuar se këta individë janë dëshmi e gjallë e luftës për drejtësi dhe kanë kontribuar në ndriçimin e rrugës së drejtë të historisë së vendit.
“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë,” tha Osmani.
Pas dekoratës, Ramadan Nishori shprehu mirënjohjen për përkrahjen nga populli, duke theksuar se ndihej mirë që kishte marrë mbështetje në këtë rrugëtim të vështirë. “E përshëndes gjithë popullin tonë që më ka përkrahur këto ditë,” tha ai shkurt.
Vasfije Krasniqi, një tjetër e dekoruar, bëri thirrje që viktimat e dhunës seksuale të flasin hapur dhe të kërkojnë drejtësi. “Dua të falënderoj për qasjen, angazhimin. Të dashura viktima, ju lutem, ku do që jeni, ka ardhur koha të kërkojmë drejtësi. Lirojeni shpirtin që të mos ia falim Serbisë krimin që ka kryer,” tha Krasniqi.
Shyrete Tahiri-Sylejmani, gjithashtu e dekoruar, theksoi rëndësinë e drejtësisë për arritjen e paqes. “Kur të kemi drejtësi, kemi paqe. Faleminderit për kurajën që na jepni,” përfundoi ajo.
Lajmet
Prokuroria kërkon vazhdimin e paraburgimit për Selimin dhe Krasniqin
Published
2 days agoon
April 18, 2025By
UBTNews
Prokuroria në Hagë ka kërkuar vazhdimin e paraburgimit për Rexhep Selimin dhe Jakup Krasniqin edhe për dy muaj të tjerë.
Në kërkesën për Krasniqin e ngjashëm edhe për Selimin, Prokuroria thotë se përfundimi i paraqitjes së provave nga ana e tyre rrit rrezikun e pengimit të drejtësisë dhe kryerjes së krimeve të tjera.
Veç kësaj, ZPS ka thënë se kjo justifikon edhe rishqyrtimin e rrezikut të arratisjes në vendimet për vazhdimin e paraburgimit. E njëjta gjë është theksuat edhe tek vendimi për Rexhep Selimin.
Sipas tyre vazhdon të ekzistojnë dyshime të bazuara se Jakup Krasniqi ka kryer një ose më shumë prej krimeve që bien në jurisdiksiomin e DHSK-së. Madje, Prokuroria thotë se ky dyshim është përforcuar edhe nga provat e ZPS-së që tashme janë përfshirë në dosjen e gjykimit.
Ata thonë se, fakti që Krasniqi dhe Selimi tani kanë njohuri të veçantë mbi rastin dhe provat kundër tij e rrit rrezikun që ai mund të kryejë krime të tjera, përfshirë kundër dëshmitarëve që kanë dhënë ose mund të japin dëshmi në çështje dhe/ose që mund të paraqiten para këtij Paneli në faza të ardhshme të procedurave.
“Për më tepër, Selimi tashmë është në dijeni të identitetit të të gjithë dëshmitarëve të ZPS-së dhe të provave të tyre. Përfundimi i çështjes së ZPS-së nuk e zvogëlon rrezikun e pengimit, por e rrit atë, pasi i akuzuari tashmë ka njohuri të plotë për përmbajtjen e çështjes ndaj tij. Siç është theksuar nga Trupi Gjykues, ekziston rreziku që ndërhyrjet me qëllim për të siguruar tërheqje të dëshmive dhe/ose për të dekurajuar dëshmitarët e ardhshëm nga dhënia e dëshmive mund të pengojnë përparimin e procedurës. Më tej, ekziston mundësia që dëshmitarët të thirren sërish, duke i bërë ata të cenueshëm ndaj përpjekjeve për ndërhyrje”, thuhet në kërkesën e Prokurorisë për Selimin.
Përveç rrezikut të arratisjes dhe pengimit të procedurave, Prokuroria ka thënë se masat e vendosura ne objektet e paraburgimit kanë ofruar garanci kundër vizitave dhe komunikimeve të pa-monitoruara si masa për të minimizuar rreziqet përkatëse.
Ata thonë se paraburgimi mbetet proporcional dhe i arsyeshëm veçanërisht që procedurat tashmë kanë përparuar.
Ndryshe, Prokuroria më 15 prill 2025 ka njoftuar se ka përfunduar paraqitjen e provave në këtë rast.
Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /Betimi për Drejtësi/
Lajmet
Rama: Vendimi për ndërprerjen e projektit në shesh nuk është i mbështetur ligjërisht
Published
2 days agoon
April 18, 2025By
UBTNews
Kryetari i Prishtinës, Përparim Rama, ka deklaruar se vendimi për ndalimin e punimeve në sheshin “Xhorxh Bush” është i paligjshëm dhe i pambështetur në argumente juridike. Ai tha se institucionet që morën këtë vendim po ndikohen nga qëllime politike, edhe pse duhet të veprojnë në mënyrë të pavarur.
“Për herë të dytë janë ndërprerë punimet në një projekt të planifikuar për transformimin e hapësirës publike. Arsyetimet për këtë ndërhyrje nuk qëndrojnë në bazë ligjore dhe nuk janë ngritur nga palët përkatëse,” tha Rama në një konferencë për media.
Ai theksoi se projekti ka për qëllim përmirësimin e hapësirës publike dhe integrimin e trashëgimisë kulturore në zhvillimin urban të qytetit.
“Ka munguar përgjigjja nga Ministri për një debat publik për këtë çështje, edhe pse kemi qenë të hapur për diskutim,” shtoi ai.
Rama njoftoi se Komuna e Prishtinës do të ndjekë rrugë ligjore ndaj veprimeve që, sipas tij, bien ndesh me ligjin.
“Kryeqyteti do të vazhdojë procedurat ligjore ndaj të gjithë atyre që shkelin ligjin,” përfundoi ai.

Protestë e re kundër shtrenjtimit të rrymës në Prishtinë

Osmani dekoron me medalje tre të mbijetuar të dhunës seksuale gjatë luftës

Prokuroria kërkon vazhdimin e paraburgimit për Selimin dhe Krasniqin

Rama: Vendimi për ndërprerjen e projektit në shesh nuk është i mbështetur ligjërisht

Avokati Rodney Dixon: Trupi gjykues po sfidon padrejtësisht dëshmitarin

Van Damme thotë se ka simpati për Putinin: Dua të shkoj në Rusi dhe të bëhem ambasador i paqes atje

Kryetari i Prishtinës mirëpret Vasfije Krasniqin në Odën e Kryeqytetit

Rama: Sot kujtojmë sakrificën për liri dhe demokraci

Sporti ndihmon edhe në përmirësimin e shikimit
Të kërkuara
-
Bota3 months ago
Marrëveshja për pranimin e pakufizuar të emigrantëve, Shtëpia e Bardhë tërhiqet nga tarifat ndaj Kolumbisë
-
Bota3 months ago
Fluturimet e dëbimit kanë filluar, thotë Shtëpia e Bardhë
-
Bota3 months ago
Shtëpia e Bardhë: Armëpushimi në Liban do të zgjatet deri më 18 shkurt
-
Lajmet nga UBT2 months ago
Përgatituni për të udhëhequr politikën e të ardhmes me Fakultetin e Shkencave Politike në UBT