

Lajmet
Rusia mohon se po kërkon një pretekst për të sulmuar Ukrainën
Lavrov i hodhi poshtë pretendimet e Shteteve të Bashkuara duke i quajtur “një dizinformim i plotë”.
Published
4 years agoon
By
Betim GashiKryediplomati rus refuzoi me zemërim akuzat e Shteteve të Bashkuara se Moska po përgatit një pretekst për të sulmuar Ukrainën, ndërsa forcat ruse të mbledhura pranë kufirit me Ukrainën filluan të hënën stërvitje të reja ushtarake.
Shtëpia e Bardhë tha të premten se zyrtarët e zbulimit amerikan kanë konkluduar se Rusia ka dislokuar tashmë operativët e saj në Ukrainën lindore të kontrolluar nga rebelët, për të kryer akte sabotazhi dhe për t’ia lënë fajin Ukrainës, duke krijuar kështu një pretekst për ta pushtuar.
Duke folur për gazetarët të hënën, Ministri i Jashtëm rus Sergey Lavrov i hodhi poshtë pretendimet e Shteteve të Bashkuara duke i quajtur “një dizinformim i plotë”.
Ai konfirmoi se Rusia po pret një përgjigje me shkrim këtë javë nga Shtetet e Bashkuara dhe aleatët për kërkesat e Moskës për garancitë se NATO nuk do të anëtarësojë Ukrainën, apo vende të tjera ish-sovjetike, dhe as do të dislokojë forca dhe armatime në atë vend.
Uashingtoni dhe vendet aleate refuzuan me forcë kërkesat e Moskës gjatë negociatave SHBA-Rusi javën e kaluar në Gjenevë dhe gjatë një takimi NATO-Rusi në Bruksel. Takimet zhvilloheshin ndërsa rreth 100 mijë forca ruse me tanke dhe armatime të tjera të rënda janë mbledhur pranë Ukrainës. Perëndimi mendon se ky është preludi i një pushtimi.
Ndërsa vazhdonte grumbullimi i forcave ushtarake, Rusia ka zhvilluar gjatë javëve të fundit disa simulime ushtarake në rajonet pranë kufirit me Ukrainën. Të hënën, ushtria ruse njoftoi fillimin e një tjetër stërvitjeje të mjeteve të blinduara në pjesën perëndimore të Rusisë, ku do të përfshihen 300 mjete luftarake.
Një delegacion senatorësh amerikanë po viziton Ukrainën për të theksuar mbështetjen e Shteteve të Bashkuara për këtë vend.
“Delegacioni ynë dypartiak me anëtarë të Kongresit dërgon një mesazh të qartë për komunitetin global: Shtetet e Bashkuara janë të palëkundura në mbështetje të partnerëve tanë ukrainas që mbrojnë sovranitetin e tyre përballë agresionit të vazhdueshëm rus”, tha nëpërmjet një deklarate Senatorja demokrate Jeanne Shaheen.
Duke folur të hënën gjatë një vizite në Kiev, Ministrja e Jashtme gjermane Annalena Baerbock paralajmëroi se “çdo përshkallëzim i mëtejshëm do të mbarte një çmim të rëndë për regjimin rus – ekonomik, politik dhe strategjik”. Ajo theksoi nevojën e vazhdimit të negociatave.
“Jemi të përgatitur për një dialog serioz me Rusinë, pasi diplomacia është mënyra e vetme për të çtensionuar këtë situatë të rrezikshme”, tha ajo.
Zonja Baerbock tha se Gjermania ka ofruar të dërgojë specialistë të sigurisë kibernetike në Ukrainë për të ndihmuar në hetimin e sulmeve kibernetike të javës së kaluar, për të cilat autoritetet ukrainase kanë fajësuar Rusinë. Në të njëjtën kohë, ajo vuri në dukje se Gjermania nuk e ka ndryshuar vendimin e saj për të mos dërguar armatim.
“E kemi bërë të qartë se do të bëjmë gjithçka për të shmangur përshkallëzimin e krizës”, tha ajo.
Kancelari gjerman Olaf Scholz tha gjatë një vizite në Spanjë se “ne presim hapa të qartë nga Rusia për të ulur tensionet”, duke shtuar se “agresioni ushtarak kundër Ukrainës do të sjellë pasoja të rënda politike dhe ekonomike”.
Zyrtarët ukrainas kanë paralajmëruar se Rusia mund të nisë një sulm nga drejtime të ndryshme, përfshirë edhe nga territori i aleates së saj, Bjellorusisë.
Presidenti i Bjellorusisë, Alexander Lukashenko, i cili është mbështetur gjithnjë e më shumë tek ndihma e Kremlinit ndërsa perëndimi i ka vendosur sanksione për shtypjen brutale të protestave në vend, tha se Rusia dhe Bjellorusia do të zhvillojnë stërvitje masive ushtarake muajin e ardhshëm.
Zoti Lukashenko tha se manovrat do të kryhen në kufirin perëndimor të Bjellorusisë dhe gjithashtu në jug të vendit, ku ndodhet kufiri me Ukrainën. Sekretari i Këshillit të Sigurimit të Bjellorusisë, Alexander Volfovich, tha të hënën se trupat ruse tashmë kishin filluar të mbërrinin në vend për stërvitjen në fjalë, njoftoi agjencia e lajmeve BELTA.
Rusia ka mohuar të ketë plane për të sulmuar vendin fqinj dhe nga ana tjetër ka akuzuar udhëheqjen ukrainase për hartimin e planeve për të përdorur forcën për të rimarrë kontrollin e territoreve të mbështetura nga rebelët në Ukrainën lindore. Autoritetet ukrainase e kanë mohuar këtë gjë.
Rusia aneksoi Gadishullin e Krimesë nga Ukraina në vitin 2014 pas rrëzimit nga pushteti të udhëheqësit pro-rus të Ukrainës dhe gjithashtu mbështeti një kryengritjeje separatiste në Ukrainën lindore. Më shumë se 14 mijë njerëz janë vrarë në gati tetë vjet luftime atje.
Presidenti rus Vladimir Putin ka paralajmëruar se Moska do të ndërmarrë “masa ushtarako-teknike” të papërcaktuara nëse Perëndimi kundërshton kërkesat e tij.
Zëvendësministri i Jashtëm Sergei Ryabkov, i cili udhëhoqi delegacionin rus në bisedimet me SHBA-në në Gjenevë, tha javën e kaluar se ai “as nuk do të konfirmonte dhe as përjashtonte” mundësinë e dërgimit të mjeteve ushtarake nga Rusia në Kubë dhe Venezuelë nëse Shtetet e Bashkuara dhe aleatët e saj nuk kufizojnë aktivitetet e tyre ushtarake në pragun e territorit të Rusisë. Këshilltari i Sigurisë Kombëtare i Shteteve të Bashkuara, Jake Sullivan, i ka hedhur poshtë komentet si thjesht zhurmë.
I pyetur të hënën për mundësinë e vendosjes së raketave ruse në Kubë dhe Venezuelë, zëdhënësi i Kremlinit Dmitry Peskov u tha gazetarëve se “Rusia po mendon se si të garantojë sigurinë e saj në kontekstin e situatës aktuale”./VOA/
You may like
Lajmet
Rritet importi i energjisë elektrike, bie prodhimi i thëngjillit në Kosovë
Published
1 hour agoon
October 16, 2025By
UBTnews
Agjencia e Statistikave të Kosovës bën të ditur se gjatë muajit gusht të vitit 2025, energjia elektrike bruto në dispozicion ishte 502.12 GWh, kurse konsumi i energjisë elektrike ishte 411.92 GWh ose 1.29 për qind më i madh sesa në muajin e njëjtë të vitit paraprak.
Sipas ASK-së, pjesëmarrja e energjisë elektrike alternative në kuadër të konsumit të përgjithshëm ishte 7.78 për qind.
Agjencia e Statistikave të Kosovës njofton se importi i energjisë elektrike në gusht të këtij viti është rritur 69.95 për qind krahasuar me periudhën e njëjtë të vitit të kaluar. Sipas ASK-së ka shënuar rënie prodhimi bruto nga termocentralet në KEK.
ASK njofton po ashtu se importi i energjisë elektrike në gusht të vitit 2025 ishte 360.623 GWh, ndërsa në periudhën e njëjtë të vitit të kaluar, importi ishte 212,197 GWh ose 148. 432 GWh më shumë.
Kurse eksporti i energjisë elektrike në të njëjtën periudhë ishte 243.28 GWh (këtu janë të përfshira edhe sasitë e transmisionit).
Ndërsa, sipas ASK-së prodhimi i thëngjillit për muajin gusht 2025 ishte rreth 495.66 mijë ton, që paraqet një rënie prej 18.68 për qind në krahasim me të njëjtin muaj të vitit të kaluar./KP
Lajmet
Gjermania konfiskon 720 milionë euro nga asetet e ngrira të bankës ruse
Published
2 hours agoon
October 16, 2025By
UBTnews
Gjykata e Lartë gjermane synon të konfiskojë rreth 720 milionë euro nga asetet e ngrira të një institucioni financiar rus, njoftoi sot sistemi gjyqësor në landin qendror Hesen.
Sipas autoriteteve, janë hapur procedura të posaçme me kërkesë të Zyrës Federale të Prokurorit të Përgjithshëm, raporton ATSH.
Banka ishte përfshirë në listën e embargos së Bashkimit Evropian ndaj Rusisë në qershor të vitit 2022, pas pushtimit të plotë të Ukrainës nga Rusia në shkurt të atij viti, thuhet në një deklaratë.
Si pasojë, të gjitha pasuritë e kompanisë në institucionet financiare dhe kreditore evropiane u ngrinë në përgjigje të sulmit ndaj Ukrainës.
Pak pas vendosjes së sanksioneve, persona të panjohur në bankë thuhet se kanë tentuar të tërheqin fondet, por urdhri përkatës elektronik i transferimit nuk është ekzekutuar.
Sipas procedurave, paratë do të konfiskohen në favor të arkës shtetërore./KP

Në muajin gusht të këtij viti janë regjistruar 2 mijë e 516 lindje (brenda dhe jashtë Kosovës). Prej këtyre lindjeve të regjistruara, 1 mijë e 284 lindje janë meshkuj dhe 1 mijë e 232 lindje janë femra.
Sipas Agjencisë së Statistikave të Kosovës (ASK), në muajin gusht 2025 ka rënie të numrit të lindjeve me rreth 6.4 për qind, krahasuar me muajin korrik 2025.
Ndërkaq, gjatë muajit gusht 2025 janë regjistruar gjithsej 914 raste të vdekjeve (brenda dhe jashtë Kosovës). Nga gjithsej vdekje të regjistruara, 515 janë meshkuj dhe 399 janë femra. Krahasuar me muajin korrik 2025, në muajin gusht janë regjistruar 4,3% më shumë raste të vdekjeve.
Po ashtu sipas ASK-së, në muajin gusht 2025 janë regjistruar gjithsej 1 mijë 972 kurorëzime (brenda dhe jashtë Kosovës). Krahasuar me muajin korrik 2025, në muajin gusht ka rritje të numrit të kurorëzimeve për 59,5%.
Ndërsa, në këtë periudhë janë regjistruar 97 raste të shkurorëzimeve në Kosovë, ku krahasuar me muajin korrik 2025 ka rënie të numrit të shkurorëzimeve për (-45,2%)./KP
Lajmet
Debat i ashpër për Kosovën në Kuvendin e Shqipërisë
Published
3 hours agoon
October 16, 2025By
UBTnews
Kuvendi i Shqipërisë ka rrëzuar kërkesën e opozitës për një mocion me debat në lidhje me programin qeverisës për katër vitet e ardhshme. Me 73 vota kundër nga shumica, mocioni nuk kaloi, duke nxitur kështu reagime nga përfaqësues të opozitës.
Kryetari i Grupit Parlamentar të Partisë Socialiste, Taulant Balla, u shpreh se kërkesa e opozitës ishte e mangët dhe në kundërshtim me rregulloren e Kuvendit.
“Opozita nuk ka vullnet për debat real, ndaj dhe kërkesat e tyre nuk janë të plota”, tha Balla.
Debatet në seancë gjatë ditës së sotme, u përqendruan edhe rreth Kosovës, ka raportuar Euronews.
Kryetari i Partisë Demokratike, Sali Berisha e quajti kryeministrin Edi Rama “shërbëtor të Vuçiçit”, ndërsa kritikoi edhe mungesën e një rezolute në Kuvend për gjenocidin serb në Kosovë. Poashtu edhe deputeti demokrat Tomor Alizoti e kritikoi mungesën e trajtimit të çështjes së Kosovës në programin qeverisës.
“Asnjë fjalë për Kosovën, asnjë qëndrim i qartë për rezolutën për gjenocidin. Kjo është një turp publik”, tha Alizoti.
Pjesë e debatit u bë edhe deputeti i PS-së, Ardit Bido, i cili tha se në Kuvend po dëgjohen deklarata që përshkruajnë liderët e UÇK-së si të akuzuar për gjenocid në Serbi – një gjë që, sipas tij, nuk e ka bërë as vetë Serbia. Berisha e mohoi këtë, duke e akuzuar Bidon për deformim të deklaratave.
Më vonë, përmes një video-mesazhi, Bido tha se nuk iu përgjigj dot Berishës në foltore për shkak të një problemi familjar, ndërsa sqaroi se deklarata për gjenocidin ishte bërë nga Tritan Shehu, jo nga Berisha.
Tutje gjatë këtij debati dhe në këtë seancë të Kuvendit, kreu i Partisë Republikane, Fatmir Mediu, deklaroi se do të marrë pjesë në protestën e së premtes në Tiranë në mbështetje të UÇK-së, duke theksuar se atje do të jetë si qytetar, jo si politikan.
Balla konfirmoi se kryeministri Edi Rama nuk do të marrë pjesë në protestë me arsyetimin se prezenca e tij do të politizonte ngjarjen./EO

Sa ndikojnë hormonet në humor dhe shëndetin mendor?

Rritet importi i energjisë elektrike, bie prodhimi i thëngjillit në Kosovë

Parashqevi Simaku ndan mesazhin emocionues për djalin e saj, Luke

Gjermania konfiskon 720 milionë euro nga asetet e ngrira të bankës ruse

Bie numri i lindjeve në Kosovë

Lodhje e vazhdueshme? Problemi mund të mos jetë gjumi

Julia Roberts rrëfen se një film i vjetër frymëzoi vajzën e saj të ndalonte celularin

Debat i ashpër për Kosovën në Kuvendin e Shqipërisë

Abdixhiku takon ambasadorin e ri gjerman, e njofton për zhvillimet politike dhe procesin e zgjedhjeve
Të kërkuara
-
Vendi2 months ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Lajmet3 months ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës
-
Lajmet nga UBT1 month ago
Votoni për UBT-në dhe Rektorin Hajrizi në Triple E Awards: Dy nominime të reja ndërkombëtare për institucionin dhe Kosovën
-
Rajoni3 weeks ago
Policia, FSK-ja dhe Shërbyesit Civilë përfitojnë bursë 20 për qind në programet Master Shkenca Politike dhe Studime të Sigurisë në UBT