Aktualitet

Rritje shqetësuese e dhunës në familje, vrasje në tentativë dhe aksidente në raportin 24‑orësh të Policisë së Kosovës

Published

6 hours ago

September 19, 2025

UBT News

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 2573 tiketa trafiku, janë shkaktuar 46 aksidente me dëme materiale dhe 26 aksidente me të lënduar. Zyra e Informimit nga PK ka njoftuar se 17 persona janë arrestuar, kurse 11 janë dërguar në mbajtje.

INCIDENTET KRIMINALE-PRISHTINË

LËNDIM I LEHTË TRUPOR & POSEDIM I NARKOTIKËVE

Rr. Lidhja e Pejës, Prishtinë 18.09.2025-20:00. Është arrestuar i dyshuari mashkull kosovar, pasi që i njëjti pas një mosmarrëveshje e ka sulmuar fizikisht viktimën femër kosovare derisa kishte qenë në shoqëri me të e cila ka pranuar trajtim mjekësor. Gjatë kontrollit i është gjetur dhe konfiskuar një sasi e vogël substancë që dyshohet të jetë narkotike e llojit marihuanë. Me vendim të prokurorit i dyshuari është dërguar në mbajtje.

DHUNË NË FAMILJE

Podujevë 15.09.2025 – 13:30. Me 18.09.2025 është intervistuar i dyshuari mashkull kosovar, nën dyshimin se me datën e cekur ka ushtruar dhunë fizike ndaj viktimës bashkëshortes së tij dhe po ashtu dyshohet se e ka detyruar viktimën të largohet nga shtëpia. Në konsultim me prokurorin, i dyshuari pas intervistimit është liruar në procedurë të rregullt.

VRASJE NË TENTATIVË & SH. RR. P.& ARMËMBAJTJE PA LEJE

Prishtinë 13.09.2025-18:28. Lidhur me rastin është raportuar se me 18.09.2025 janë arrestuar tre të dyshuar meshkuj kosovarë dhe gjatë kontrollit në vendbanimet e tyre dhe në një veturë pronë e njërit prej tyre, janë gjetur dhe konfiskuar : një armë e shkurtër – pistoletë dhe një AK-47. Tre të dyshuarit janë intervistuar dhe me vendim të prokurorit janë dërguar në mbajtje.

RASTET TJERA/ NGJARJET:

PERSON I ZHDUKUR

Rr. Dardania, Fushë Kosovë 14.09.2025 – 18:00. Me datë 18.09.2025 ankuesja ka raportuar se djali i saj i mitur, me datën e cekur ka dalë nga shtëpia dhe nuk dihet vendndodhja e tij. Rasti është duke u hetuar.

Rr. Bedri Bajrami, Podujevë 14.09.2025 – 12:00. Ankuesi ka informuar se vajza e tij është larguar nga shtëpia dhe nuk është kthyer më. Rasti është duke u hetuar.

INCIDENTE KRIMINALE-GJILAN

VRASJE NË TENTATIVË

Fsh. Debëlldeh, Viti 18.09.2025 – 14:25. Viktima mashkull kosovar, ka pësuar lëndime nga arma e zjarrit, pasi që i dyshuari mashkull kosovar (për motive të panjohura), dyshohet se ka shtënë me armë gjuetie në drejtim të tij. Viktima për shkak të lëndimeve është dërguar për tretman mjekësor në QE-në Gjilan, ndërsa i dyshuari është larguar në drejtim të panjohur. Njësitet policore në konsultim e koordinim me prokurorin gjatë bastisjes në shtëpinë dhe objektet përcjellëse të dyshuarit kanë gjetur dhe konfiskuar: 1-pushkë gjysmë automatike, 1-pushkë pneumatike, 1-pistoletë me gaz, 149-fishekë, 3-gëzhoja dhe 2-DVR të kamerave të sigurisë. Rasti duke u hetuar.

DHUNË NË FAMILJE

Gjilan 17.09.2025 – 23:30. Është arrestuar i dyshuari mashkull kosovar, pasi që dyshohet se kishte sulmuar fizikisht babanë e tij viktimën mashkull kosovar. Me vendim të prokurorit, i dyshuari është dërguar në mbajtje.

INCIDENTE KRIMINALE-FERIZAJ

Asgjë me rëndësi për të raportuar.

INCIDENTE KRIMINALE-PRIZREN

DHUNË NË FAMILJE

Suharekë 18.09.2025 – 15:30. Është arrestuar i dyshuari mashkull kosovar, pasi që dyshohet se ka sulmuar fizikisht bashkëshorten e tij. Viktima ka pranuar tretman mjekësor. Me vendim të prokurorit i dyshuari është dërguar në mbajtje.

VJEDHJE E VETURËS

Fsh. Landovicë, Prizren 18.09.2025 – 02:05. Ankuesi mashkull kosovar, ka raportuar se persona të panjohur (gjatë natës) i kanë vjedhur veturën me targa vendore, të cilën e kishte të parkuar në oborrin e tij. Lidhur me rastin është informuar edhe prokurori, ndërsa njësitet policore janë duke hetuar rastin.

Raport shtesë:

KULTIVIM I BIMËS SË HASHASHIT, SHKURRES SË KOKAINËS OSE BIMËVE TË KANABISIT

Fsh. Maqitevë, Suharekë 16.09.2025 – 17:30. Lidhur me rastin, sistemi për ujitje dhe disa pajisje që kanë shërbyer për mbjellje të bimëve narkotikë janë asgjësuar me vendim të prokurorit. Rasti është duke u hetuar.

INCIDENTE KRIMINALE-PEJË

Asgjë me rëndësi për të raportuar.

INCIDENTET KRIMINALE-GJAKOVË

DHUNË NË FAMILJE

Gjakovë 17.09.2025 – 19:00. Me 18.09.2025 është arrestuar i dyshuari mashkull kosovar, nën dyshimin se me datën e cekur në gjendje të dehur ka fyer dhe sulmuar fizikisht viktimatbashkëshorten dhe vajzën e tij të mitur. Viktimat kanë refuzuar tretmanin mjekësor, ndërsa i dyshuari pas intervistimit me vendim të prokurorit është dërguar në mbajtje.

Raport shtesë:

DHUNË NË FAMILJE

Gjakovë 16.09.2025 – 09:30. Lidhur me rastin me 18.09.2025 është arrestuar i dyshuari mashkull kosovar dhe pas intervistimit, me vendim të prokurorit është dërguar në mbajtje.

INCIDENTET KRIMINALE-MITROVICË VERI

VDEKJE E DYSHIMTË

Fsh. Jasenovik i Poshtëm, Zubin Potok 18.09.2025 – 06:40. Njësitet policore pas pranimit të informatës lidhur me rastin kanë dalë në vendin e ngjarjes dhe në kanalin e ujit të Ibër-Lepencit kanë gjetur trupin e pajetë të viktimës femër kosovare. Ekipi mjekësor ka konstatuar vdekjen e viktimës në vendin e ngjarjes, ndërsa me urdhër të prokurorit trupi i pa jetë i viktimës është dërguar në IML për obduksion.

RASTET TJERA/ NGJARJET:

AKSIDENT TRAFIKU ME LËNDIME

Rr. Sutjeska, Mitrovicë Veri 18.09.2025 – 21:00. Vozitësi mashkull kosovare, me veturë dyshohet nga pa kujdesia ka goditur këmbësoren femër kosovare- e mitur. Viktima është dërguar në Spitalin e Mitrovicës për tretman mjekësor. Rasti është duke u hetuar.

INCIDENTET KRIMINALE-MITROVICË JUG

VRASJE NË TENTATIVË

Mitrovicë Jug 18.09.2025 – 09:00. Ankuesja femër kosovare, ka informuar se nipi i saj i dyshuari mashkull kosovar, kishte tentuar të privojë nga jeta. I dyshuari është dërguar në neuropsikiatri nga familjarët. Viktima është dërguar në IML për ekzaminim. Rasti është duke u hetuar.

DEPARTAMENTI I POLICISË KUFITARE

KALIM ILEGAL I KUFIRIT

Rr. Eksodi 99, Hani Elezit 18.09.2025 – 17:10. Është shoqëruar në stacionin policor i dyshuari mashkull shqiptar shtetas i R. Maqedonisë Veri, pasi që kishte kaluar kufirin ilegalisht. Me vendim të prokurorit i dyshuari pas intervistimit është liruar në procedurë të rregullt.

/S.K/PK/

Aktualitet

Komanda e Forcave Tokësore realizoi garën “Ujku Garues 2025”

Published

57 seconds ago

September 19, 2025

UBT News

Gara tradicionale “Ujku Garues 2025”, është përmbyllur me sukses, aktivitet ky i cili realizohet nga Komanda e Forcave Tokësore ku marrin pjesë ekipe nga njësitë e Forcës së Sigurisë së Kosovës.

Këtë vit, pjesëmarrës ishin 21 ekipe dhe aktiviteti u mbajt në kazermën “Ushtarët e NATO-s” në Istog.

“Garën e ka fituar, Policia Ushtarake e FSK-së, dhe është shpërblyer me vendin e parë. Vendi i dytë i takoi Kompanisë B nga Regjimenti i Parë i Këmbësorisë dhe vendi i tretë shkoi për Kompaninë MB nga Regjimenti i Parë i Këmbësorisë”, njoftoi Forca e Sigurisë së Kosovës.

Gara “Ujku Garues” për herë të parë është mbajtur në vitin 2015 si rezultat i shkëmbimit të përvojave mes nënoficerëve të FSK-së dhe atyre të kontigjentit slloven.

Garën e karakterizon aspekti organizativ, vlerësues, shpirti garues, profesionalizmi dhe angazhimi maksimal i ekipeve./S.K/KP/

Aktualitet

Qeveria bart 904 mijë euro për subvencionet e efikasitetit të energjisë

Published

8 minutes ago

September 19, 2025

UBT News

Qeveria e Republikës së Kosovës ka miratuar bartjen e 904 mijë eurove nga pakoja për përballje me krizën energjetike, fonde këto që vijnë nga Bashkimi Evropian, për të përmbyllur disbursimin e subvencioneve në kuadër të Pakos së Mbështetjes Energjetike (IPA 2023).

Ministrja në detyrë e Ekonomisë, Artane Rizvanolli, njoftoi se këto mjete do të shërbejnë për disbursimin e subvencioneve për pajisje efiçiente ngrohëse të aprovuara nga Ministria e Ekonomisë, si dhe për trajtimin e listës së pritjes për izolimin e shtëpive nga Fondi i Kosovës për Efiçiencë të Energjisë.

Ministria e Ekonomisë dhe Fondi i Kosovës për Efiçiencë të Energjisë kanë premtuar se do të ndërmarrin të gjitha hapat e nevojshëm për realizimin sa më të shpejtë të këtyre procesve.

Që nga viti 2022, përmes masave të Ministrisë së Ekonomisë dhe mbështetjes së Bashkimit Evropian, janë përkrahur mbi 43 mijë familje dhe biznese në Kosovë me mbi 19.6 milionë euro, duke ulur kostot e energjisë dhe përmirësuar kushtet e jetesës.

Ministria e Ekonomisë falënderoi Bashkimin Evropian për partneritetin e vazhdueshëm dhe mbështetjen që bën të mundur realizimin e këtyre programeve të rëndësishme për qytetarët./S.K/KP/

Aktualitet

Edhe një aktakuzë në mungesë për krime lufte

Published

10 minutes ago

September 19, 2025

UBT News

Prokuroria Speciale e Kosovës, ka dorëzuar një aktakuzë në mungesë për krime lufte ndaj të të akuzuarve L.D dhe V.O. në Gjykatën Themelore në Prishtinë.

Sipas njoftimit, të pandehurit akuzohen se gjatë periudhës 1998-1999 në Gjakovë, duke vepruar në bashkëkryerje me pjesëtarë tjerë të forcave policore dhe ushtarake serbe, kanë shkelur rregullat e së drejtës ndërkombëtare, duke marrë pjesë në vrasje, keqtrajtime, arrestime, vjedhje dhe shkatërrime të pasurisë të popullsisë civile të nacionalitetit shqiptar.

Sipas aktakuzës, më 25 dhe 26 mars 1999, në rrugën “Tahir Efendiu”, gjatë një aksioni të forcave policore serbe, ku morën pjesë edhe të pandehurit në cilësinë e zyrtarëve policorë, është vrarë një civil dhe janë keqtrajtuar gjashtë civilë të nacionalitetit shqiptar.

Ekziston dyshimi i bazuar mirë se, të pandehurit, në bashkëkryerje, kishin rrethuar shtëpinë e të dëmtuarit N.K., ku ndodheshin N.K., M.M., S. G., B.G., B.Sh., A.C., dhe Q. Sh., të cilët janë keqtrajtuar fizikisht dhe psikikisht, i kishin detyruar të ngarkojnë në kamionetën e policisë të gjitha materialet ndihmëse që ndodheshin në objektin e shoqatës humanitare “Nënë Tereza”, dhe më pas janë futur me dhunë në një kamion dhe janë dërguar në stacionin policor të Gjakovës.

Ndërsa, në stacionin policor, të dëmtuarit janë ndarë nëpër qeli të ndryshme, ku kanë qëndruar për 24 orë pa ushqim, pa ujë dhe pa ndihmë mjekësore, duke u rrahur dhe maltretuar vazhdimisht nga ana e të pandehurve dhe pjesëtarëve të tjerë të policisë serbe me shufra gome, shqelma dhe grushte.

I arrestuari M.M., në ditën kur është nxjerrë nga qelia, më 26 mars 1999 , ishte gjetur i vrarë në afërsi të urës së Taliqit, në Gjakovë./S.K/KP/

Aktualitet

Tre të lënduar në një aksident trafiku në Prishtinë

Published

2 hours ago

September 19, 2025

UBT News

Tre persona kanë mbetur të lënduar në një aksident që ndodhi mëngjesin e sotëm rreth orës 08:30 në rrugën “Jusuf Gërvalla” në Prishtinë.

Sipas Policisë, në aksidentin në afërsi të rrethit me flamur, u përfshinë tri vetura dhe të lënduarit morën trajtim mjekësor.

Rasti po hetohet nga Njësia e Trafikut të Kryeqytetit.

“Sot rreth orës 08:30 kemi pranuar informatën për një aksident trafiku me lëndime në rrugën “Jusuf Gërvalla” në Prishtinë. Në aksident janë përfshirë tri vetura. Si pasojë lëndime kanë pësuar tre persona, të cilët kanë pranuar tretman mjekësor. Me rastin po merret Njësia e Trafikut të Kryeqytetit”, thuhet në përgjigjen e policisë./S.K/EO/PK/