Trajneri i Borussia Dortmundit, Edin Terziç foli në konferencë për shtyp në prag të duelit të kthimit në Championsit ndaj Atletico Madrid.

Trajneri kroat u tregua optimist sa i përket ndeshjes së nesërme, ai pret fitoren dhe kalimin tutje të skuadrës së tij.

“Jemi të sigurt që tifozët tanë do të krijojnë një atmosferë të mrekullueshme dhe ne duam t’ua shpërblejmë me një paraqitje të mirë. Atletico Madrid na detyroi të bëjmë disa gabime javën e kaluar. Por nesër do të kemi gjithçka në duart tona që të mund të hyjmë në raundin tjetër. Ne e dimë se do të përballemi me një kundërshtar me shumë përvojë, por ne duam të bëjmë më të miren. Kur luan kundër skuadrave si Atletico, ju duhet të paguani për çdo gabim individual dhe kështu ndëshkoheni. Do të jetë thelbësore të kemi një reagim dhe të korrigjojmë gabimet e bëra më parë. Haller lëndoi përsëri kyçin e këmbës, por Gitens është më mirë dhe shpresojmë që ai të mund të stërvitet me grupin sot. Sancho nga ana tjetër është mirë dhe do kthehet me skuadrën”, deklaroi Terziç./UBTNews/

Trajneri i Barcelonës, Xavi Hernandez ka folur në konferencë për shtyp para duelit të kthimit ndaj PSG-së, në kuadër të Champions League. Ndeshja do të zhvillohet nesër me fillim nga ora 21:00.

Luis Enrique

“Skuadrat e Luis Enrique shkojnë gjithmonë në sulm. Aq më tepër nesër pasi janë disavantazh”.

Hakimi

“PSG ka aq shumë opsione sa nuk e di se cilin variant mund të përdorin. Duhet të kuptojmë se duhet të kemi një strukturë shumë të qartë. Nesër do ta përsërisim ndeshjen e shkuar me disa variacione. Lojtarët tanë ishin në një nivel të shkëlqyer ndeshjen e parë”.

Më pas, trajneri spanjoll foli edhe për të ardhmen e tij e cila mbetet gjithmonë në pikëpyetje.

“Ju shqetësoheni shumë për mua. E rëndësishme është që klubi të shkojë në gjysmëfinale, jo që unë të përparoj”, përfundoi Xavi./UBTNews/

Jurgen Klopp tanimë e ka konfirmuar se do të largohet nga Liverpooli në fund të edicionit aktual dhe skuadra nga “Anfield” ende nuk e ka gjetur zëvendësuesin e tij.

Kohëve të fundit kanë qarkulluar shumë emra lidhur me zëvëndësuesin e Kloppit, mirëpo aktualisht nuk ka asgjë konkrete nga drejtuesit e “The Reds”.

Sipas raportimeve të fundit, një emër i ri i cili është shfaqur është ai i ish-trajnerit të Bayern Munich, Niko Kovac.

Daily Mail bën të ditur se legjenda kroate është një nga emrat që ndodhet në listën e drejtuesve të Liverpoolit.

52-vjeçari karrierën si trajner e filloi me Kombëtaren e Kroacisë, para se të vazhdojë te Eintracht Frankfurt dhe Bayern Munich.

Kovac po ashtu drejtoi edhe Monacon, derisa së fundmi ka qenë pjesë e skuadrës gjermane, VfL Wolfsburg.

Nga tani po shihet si një nga konkurrentët për ta marrë drejtimin e gjigantit anglez, që për kroatin do të ishte një hap i madh në karrierë./UBTNews/

Bayer Leverkusen arriti ta sigurojë titullin e Bundesligës gjermane qysh në xhiron e 29-të të kampionatit, teksa kanë mbetur edhe pesë ndeshje deri në fund të edicionit për t’u luajtur.

Skuadra e drejtuar nga Xabi Alonso ka bërë një super-sezon, ku edhe nuk ka pësuar asnjë humbje deri më tani. Përveç futbollit të bukur dhe lojës mjaft cilësore, vëmendje kanë tërhequr edhe paraqitjet e jashtëzakonshme të futbollistëve të “Aspirinave”.

Së fundmi raportohet se Jeremie Frimpong ka përfunduar në listën e dëshirave të Real Madridit. Me “Los Blancos” të cilët janë të bindur se holandezi do të ishte pasuesi ideal i Dani Carvajal. Por në anën tjetër, sipas asaj që ka raportuar gazetari Fabrizio Romano, madrilenët do të duhet të mposhtin konkurrencën e skuadrave si Bayern Munich, Manchester United, Manchester City dhe Liverpool për t’i siguruar shërbimet e futbollistit.

Te Leverkusen duan ta mbajnë Frimpong, por ai ka një klauzolë të ulët largimi prej 40 milionë eurove dhe Real Madridi është i gatshëm ta paguajë atë menjëherë.

23-vjeçari deri më tani në këtë sezon ka luajtur 38 ndeshje në të gjitha garat, ku edhe ka shënuar 12 gola dhe ka asistuar në 11 të tilla./UBTNews/