Me konfliktin në Lindjen e Mesme ende të pazgjidhur, ekzistonin dyshime mbi pjesëmarrjen e Iranit në Botërorin “FIFA 2026”. Presidenti i FIFA-s, Gianni Infantino, i dha fund këtyre dyshimeve gjatë një ndeshjeje miqësore ndërmjet Iranit dhe Costa Rica-s në Antali, Turqi.

“Irani do të jetë në Botëror, kjo është arsyeja pse ndodhem këtu. Madje ju siguroj se do të luajë në SHBA”, deklaroi Infantino.

Kjo vjen pas kërkesës së Federatës së Futbollit të Iranit për garanci mbi sigurinë dhe pjesëmarrjen e tyre në turne. Megjithatë, mbetet për t’u parë reagimi i Iranit ndaj deklaratës së presidentit të FIFA-s.

Sulmuesi i Kosovës, Vedat Muriqi, është përballur me kritika të ashpra nga një tifozë, i cili e akuzoi se ka ndarë informacione dhe taktika të ekipit me Turqinë. Megjithatë, një valë mbështetjeje ka ardhur nga figura publike dhe politike, të cilët e kanë mbrojtur dhe falënderuar për përkushtimin e tij, duke theksuar: “Ne jemi me ty dhe ti e bere maksimumin.”

Së fundmi, Federata e Futbollit e Kosovës (FFK) i ka dalë në mbrojtje Muriqit, duke theksuar rëndësinë e rolit të tij jo vetëm si lojtar, por edhe si simbol i kombit:

“Futbolli nuk është thjesht lojë. Ai është pasqyrë e identitetit, përkushtimit dhe vlerave që ne, si shoqëri, duam t’i promovojmë. Kur kapiteni i Kombëtares sulmohet me fyerje dhe gjuhë përçarëse, kjo prek jo vetëm një lojtar, por një simbol të Kosovës dhe të gjithë shqiptarëve që e ndjekin futbollin me krenari.”

FFK vlerëson kontributin e Muriqit në fushë, jo vetëm për golat, por edhe për lidershipin, energjinë dhe shpirtin që sjell në çdo ndeshje:

“Ai është shembull i profesionalizmit, pasionit dhe unitetit që Kombëtarja e Kosovës përfaqëson. Golat e tij nuk janë thjesht pikë në tabelë, por emocione që frymëzojnë popullin shqiptar dhe krijojnë krenari për vendin tonë.”

Federata shton se ofendimet në rrjetet sociale nuk kanë vend në futboll dhe se si individë dhe si shoqëri duhet të reagojmë kur vihen në diskutim vlerat që përfaqësojnë Kosovën në arenën ndërkombëtare.

“Vedat Muriqi nuk është vetëm kapiteni i Kombëtares. Ai është njëri prej Dardanëve që po shkruan historinë e vendit tonë. Mirënjohja për të dhe për të gjithë lojtarët tanë nuk është thjesht një detyrim moral, por reflektim i vlerave që duam të kultivojmë: përkushtim, dinjitet dhe krenari.”

FFK përfundon duke theksuar se futbolli është më shumë se rezultatet, është mënyra se si tregojmë se kush jemi dhe çfarë vlerash mbrojmë. Punë dhe shpirtin e Muriqit, sipas federatës, e tregojnë çdo ditë përkushtimin dhe krenarinë që një komb duhet të ketë.

Federata gjithashtu falënderon tifozët dhe qytetarët që, edhe pas humbjes kundër Turqisë, qëndruan pranë ekipit, duartrokitën dhe mbështetën përkushtimin e jashtëzakonshëm të lojtarëve.

Në Qendrën Nacionale të Xhudos në Pejë është mbajtur punëtoria për ngritjen e kapaciteteve të referëve, e udhëhequr nga Kryemjeshtri Driton Kuka, një nga figurat më të suksesshme të sportit kosovar dhe njëkohësisht pjesë e stafit akademik në UBT.

Në këtë trajnim morën pjesë trajnerë dhe referë nga të gjitha klubet e xhudos në Kosovë, të cilët u njohën me rregullat e reja që kanë hyrë në fuqi për ciklin e garave të vitit 2026, duke forcuar kështu profesionalizmin dhe standardet e gjykimit në këtë sport.

Në një nga ditët e kësaj punëtorie, Fakulteti i Shkencave të Sportit në UBT ka qenë i pranishëm me ftesë të Kryemjeshtrit Driton Kuka, ku pjesëmarrës kanë qenë Dekani i Fakultetit, Prof. Dr. Agron Thaçi, së bashku me stafin akademik. Pjesëmarrja në këtë aktivitet ka përfaqësuar një mundësi të rëndësishme për shkëmbim përvojash dhe forcim të bashkëpunimit ndërmjet akademisë dhe komunitetit sportiv, duke reflektuar angazhimin e UBT-së për të qenë pjesë aktive në zhvillimin e sportit dhe ngritjen e standardeve profesionale në xhudo në Kosovë.

Ky aktivitet u realizua në kuadër të programit shtetëror “Kosova, shtet i xhudos”, i mbështetur nga Ministria e Kulturës, Rinisë dhe Sportit, me fokus të veçantë në zhvillimin e kapaciteteve dhe avancimin e vazhdueshëm të komunitetit sportiv në vend.

Përtej angazhimit të tij në arenën sportive, prania e Driton Kukës si pjesë e stafit akademik në UBT përbën një vlerë të shtuar të jashtëzakonshme për studentët, veçanërisht për ata të Fakultetit të Shkencave të Sportit. Përvoja e tij shumëvjeçare në ndërtimin e kampionëve olimpikë dhe në menaxhimin e performancës sportive në nivelet më të larta ndërkombëtare u jep studentëve një mundësi unike për të mësuar drejtpërdrejt nga praktika reale.

Ky ndërthurje mes teorisë dhe praktikës krijon një avantazh të rëndësishëm për studentët, të cilët përfitojnë njohuri të aplikueshme, mentorim profesional dhe inspirim nga një trajner që ka ndërtuar histori suksesi në sportin ndërkombëtar.

Fakulteti i Shkencave të Sportit në UBT shquhet për qasjen e tij moderne dhe gjithëpërfshirëse ndaj edukimit, duke kombinuar programet akademike me përvojat praktike dhe bashkëpunimet me profesionistë të nivelit të lartë. Përmes metodave bashkëkohore të mësimdhënies, aktiviteteve praktike dhe lidhjeve të forta me industrinë sportive, ky fakultet përgatit studentët për sfidat reale të tregut të punës në fushën e sportit dhe performancës fizike.

Angazhimi i figurave si Driton Kuka në procesin akademik dëshmon përkushtimin e UBT-së për të ofruar një edukim cilësor dhe të lidhur ngushtë me praktikën, duke krijuar gjenerata të reja profesionistësh që synojnë ekselencën në sport dhe më gjerë.

Ylli i përfaqësueses së Kosovës, Dion Gallapeni, ka reaguar përmes një mesazhi prekës pas humbjes ndaj Turqisë në fazën “play-off”, e cila i dha fund ëndrrës për kualifikim në Kampionatin Botëror.

Përmes një postimi në rrjetet sociale, Gallapeni ka shprehur dhimbjen e tij për rezultatin, duke theksuar se ekipi dha gjithçka në fushë dhe besoi deri në sekondat e fundit, por fati nuk ishte në anën e tyre.

“Nuk ia dolëm… por kjo nuk na ndalë. Është një humbje që dhemb, sepse dhamë gjithçka në fushë dhe besuam deri në fund,” u shpreh ai.

Tutje ai u shpreh se e ndjen zhgënjimin e madh të tifozëve, por nënvizoi se momente të tilla shërbejnë për t’i bërë lojtarët më të bashkuar dhe më të vendosur për të mos u dorëzuar kurrë.

Në mbyllje të mesazhit të tij, lojtari falënderoi publikun për mbështetjen e jashtëzakonshme dhe dha një premtim të fortë se ekipi do të rikthehet edhe më i fuqishëm për të luftuar për çdo ëndërr që kanë nisur së bashku me tifozët dardanë.