Teknologji

Risitë dhe produktet e pritshme nga Apple në eventin vjetor të debutimit të iPhone

Vëmendje do të marrë USB-C ndërsa Apple ndryshon portat e karikimit në përgjigje të rregullores së re evropiane.

Published

2 years ago

on

Eventi tradicional i shtatorit të Apple quajtur “Wonderlust” është pranë nesh. Katër modele të reja iPhone dhe disa orë inteligjente Apple Watch pritet të zënë skenën kur kompania të zbulojë produktet më të fundit.

Vëmendje do të marrë USB-C ndërsa Apple ndryshon portat e karikimit në përgjigje të rregullores së re evropiane. Edhe pse asgjë nuk është bërë publike, të paktën derisa Tim Cook të shfaqet në skenë, kemi mbledhur në këtë artikull disa prej informacioneve më të bujshme për ti paraprirë evenimentit të 12 Shtatorit.

iPhone 15 dhe iPhone 15 Pro

Pavarësisht produkteve të tjera që Tim Cook mund të prezantojë, një gjë është e garantuar: iPhone-t e rinj. Presim që krahas modeleve të segmentit të lartë iPhone 15 Pro dhe iPhone 15 Pro Max të shohim edhe variantet më buxhetore të tyre si iPhone 15 dhe iPhone 15 Plus.

Një raportim i hershëm thoshte se Apple mund të ribrandojë modelin Pro Max në iPhone 15 Ultra këtë vit, megjithatë nuk është e qartë nëse vijon të jetë në planet e kompanisë.

Së pari ekranet me shumë gjasa do të qëndrojnë ashtu siç janë duke ruajtur madhësitë 6.1-inç për iPhone 15 dhe iPhone 15 Pro dhe 6.7-inç për iPhone 15 Pro Max dhe iPhone 15 Plus.

Pro Motion, brandimi i Apple për ekranet me frekuencë të lartë rifreskimi prej 120Hz, do të mbeten ekskluzivitet i modeleve të shtrenjta “Pro.”

Siç është përfolur prej shumë kohësh, kabllot Lightning do të dalin jashtë përdorimi. Pasi erdhën një dekadë më parë për të zëvendësuar kabllin e vjetër me 30 gjilpëra, autoritetet rregullatorë janë shtysa kryesore e largimit të Apple nga konektori Lightining.

Bashkimi Evropian ka përcaktuar USB-C si konektorin universal që duhet të përdoret fillimisht nga pajisjet e vogla elektronike si telefonët dhe tabletët në Europë me qëllim të reduktimit të mbetjeve elektronike.

Analisti i mirënjohur i Apple Ming-Chi Kuo parashikon se vetëm modelet iPhone të segmentit të lartë do të shohin shpejtësi më të larta transferimi USB-C ku modelet Pro do të vinë me të paktën USB 3.2 dhe Thunderbolt 3. Ndërkaq modelet iPhone 15 dhe iPhone 15 Plus do të përdorin standardin më të ngadaltë USB 2.0 po aq sa ofronte Lightning.

Ishulli Dinamik, prerja e ekranit që Apple e lançoi me iPhone 14 Pro dhe Pro Max pritet të aplikohet në katër modelet që do të prezantohen ditën e nesërme. Jo vetëm që maskon kamerën frontale dhe sensorin Face ID, por gjithashtu ndriçon kur ka njoftimet, përmban animacione dhe shkurtesa për drejtimin e makinës, kronometër apo muzikë.

Një përmirësim materiale mund të vijë në formën e titaniumi në vend të çelikut për iPhone 15 Pro dhe Pro Max sipas Mark Gurman të Bloomberg. Ai tha se titani do të përdoret edhe në modelet e segmentit të lartë të orëve inteligjente të Apple.

Korniza më të holla gjithashtu pritet të shoqërojnë seritë Pro të iPhone. Raportohet se Apple por zhvillon ekranet e iPhone 15 Pro dhe Pro Max me një proces të quajtur LIPO. Përdorur për herë të parë në prodhimin e serive Apple Watch 7, Gurman raportoi se teknologjia mund të reduktojë kornizën e ekranit në vetëm 1.5mm nga 2.2 mm që është aktualisht.

Seritë iPhone 15 Pro mund të vinë me një Buton Aksioni njëlloj si Apple Watch Ultra. Ky buton i përshtatshëm mund të zëvendësojë butonin e çaktivizimit të tingujve në cepin e majtë lartë për modelet Pro të iPhone. Përdorime të tjera të Butonit të Aksionit mund të jenë për lançimin e kamerës, aktivizimin e blicit, fokusit apo hapur opsione aksesibiliteti.

Së fund mbase përmirësime që tërheq më tepër vëmendje është ai i sistemit të kamerave, kryesisht për modelet e orientuar drejt fotografisë si iPhone 15 Pro dhe Pro Max. Një lente e re periskop do të jetë ekskluzivitet vetëm i iPhone 15 Pro Max dhe të përdoren një prizëm për të përthyer dritën kapur nga sensori dhe prodhuar një zmadhim optik 5x ose 6x pa pasur nevojë që të rritet trashësia e smartfonit.

Seritë iPhone 14 Pro mbështetin një zmadhim optik prej 3x. iPhone 15 Pro dhe Pro Max raportohet se do të vinë me çipin e ri 3-nanometër quajtur Apple A17 Bionic. Do të sillte një rritje performance të konsiderueshme ndërsa modelet më buxhetore si iPhone 15 dhe 15 Plus të vijojnë përdorimin e A16 Bionic që gjendet në iPhone 14 Pro.

Apple Watch Series 9 dhe Apple Watch Ultra

Ky mund të jetë viti i përditësimeve të vogla për Apple Watch. Ndryshimi madhor i harduerit në Apple Watch 9 do të jetë çipi S9 dhe është ndryshimi i parë i rëndësishëm i procesorit që prej 2020-ës.

Gurman i Bloomberg raportoi se S9 do të jetë i bazuar në çipin A15 që debutoi me iPhone 13. Detajet e plota të S9 nuk janë të njohur por spekulohet se do të zhvendoset nga procesori prodhues 7-nanometër në 5-nanometër apo edhe 4-nanometër. Kjo do të sillte rritje performance dhe jetëgjatësi më të lartë baterie.

Gurman thotë se modeli i këtij viti nuk do të ketë ndonjë ndryshim madhor dizajni apo funksionalitete të reja. Një ngjyrë e re pink apo Bluetooth 5.3 janë shtesa të mundshme. Megjithatë versioni i ardhshëm i sistemit operativ watchOS 10 është përditësim më i madh i softuerit në historinë e pajisjes dhe do të paraqitet si avancimi më i madh i Apple Watch në 2023.

Sa i përket Apple Watch Ultra, pritet që të pajiset me çipin e ri S9 dhe mundësisht një kasë prej titani.

AirPods

Kufjet e Apple janë produkti i radhës që do të shohë ndryshimin e portës së karikimit nga Lightining në USB-C. Kompania raportohet se do të prezantojë versione të reja të AirPods me kasa karikimi që përdorin USB-C.

Disa ndryshime të spekuluara për kufjet AirPods janë sensorë temperature, funksionalitete aksesibiliteti për njerëz me aftësi të kufizuara dhe potencialisht ulje e çmimit për modelin bazë. Megjithatë nuk presim që këto të bëhen publike ditën e marte.

Softueri

Ditën e nesërme Apple do të zbulojë më shumë detaje rreth përditësimeve madhore si: iOS 17, iPadOS 17 dhe watchOS 10.

Apple i prezantoi sistemet operative në WWDC 2023 dhe versionet e tyre përfundimtare do të bëhen publike diku mes evenimentit dhe debutimit të iPhone 15. Ndërkaq sistemit operativ desktop macOS Sonoma do të mbërrijë në Tetor gjatë një evenimenti tjetër potencial që mund të sjellë iMac të rinj, MacBook Air dhe modelet 13-inç MacBook Pro me çipin M3./PCWorld Albanian

Related Topics:
Continue Reading

Teknologji

TikTok nënshkruan marrëveshje për ndarjen e aseteve në ShBA

Published

3 weeks ago

on

December 19, 2025

By

TikTok ka nënshkruar një marrëveshje të mbështetur nga Presidenti Donald Trump për të ndarë asetet e saj në Shtetet e Bashkuara të Amerikës dhe për të krijuar një entitet të ri të përbashkët, të kontrolluar kryesisht nga investitorë amerikanë.

Lajmi u konfirmua nga CEO i TikTok, Shou Chew, në një memo drejtuar punonjësve të enjten, e siguruar nga CNN. Edhe pse transaksioni nuk është finalizuar ende, marrëveshja e çon platformën një hap më afër sigurimit të së ardhmes së saj afatgjatë në tregun amerikan.

Ky zhvillim vjen pas një ligji të miratuar vitin e kaluar, i cili kërkonte që TikTok në ShBA të shkëputej nga kompania mëmë kineze ByteDance, ose përndryshe të përballej me ndalim. Presidenti Trump e ka shtyrë zbatimin e ligjit disa herë, duke favorizuar një marrëveshje që do ta kalonte kontrollin e aplikacionit në duar amerikane.

“Sapo kemi nënshkruar marrëveshje me investitorët për krijimin e një sipërmarrjeje të re të përbashkët TikTok në ShBA, duke u mundësuar mbi 170 milionë amerikanëve të vazhdojnë të zbulojnë një botë me mundësi të pafundme,” shkroi Chew në memo.

Sipas marrëveshjes, 50% e entitetit të ri do të jetë në pronësi të një konsorciumi investitorësh që përfshin Oracle, Silver Lake dhe MGX, një firmë investimesh e mbështetur nga Emiratet e Bashkuara Arabe. Rreth 30% do të zotërohet nga bashkëpunëtorë të investitorëve ekzistues të ByteDance, ndërsa 19.9% do të mbetet në pronësi të vetë ByteDance.

Chew theksoi se ka ende hapa për t’u përfunduar, por palët synojnë finalizimin e marrëveshjes deri më 22 janar 2026. ByteDance dhe TikTok tashmë kanë rënë dakord për kushtet kryesore të transaksionit.

Administrata Trump njoftoi në shtator se kishte arritur një marrëveshje paraprake për transferimin e kontrollit të operacioneve amerikane të TikTok te investitorë kryesisht amerikanë. Presidenti nënshkroi një urdhër ekzekutiv që e cilëson marrëveshjen si një “shitje të kualifikuar” dhe shtyu zbatimin e ndalimit për 120 ditë.

Sipas ligjit amerikan, i cili teknikisht hyri në fuqi në janar, TikTok do të ndalohej nëse ByteDance nuk shiste rreth 80% të aseteve të saj në ShBA investitorëve jo-kinezë.

Entiteti i ri amerikan do të ritrajojë algoritmin e TikTok mbi të dhënat e përdoruesve amerikanë, ndërsa Oracle do të mbikëqyrë ruajtjen e të dhënave dhe sigurinë kibernetike. Gjithashtu, ndërmarrja e re do të jetë përgjegjëse për moderimin e përmbajtjes për përdoruesit në ShBA. Megjithatë, ByteDance pritet të vazhdojë të menaxhojë tregtinë elektronike, reklamimin dhe marketingun global të platformës.

Marrëveshja do të kërkojë gjithashtu miratimin e qeverisë kineze, i cili ende nuk është konfirmuar zyrtarisht. Ndërsa Trump ka deklaruar se Presidenti kinez Xi Jinping është dakord me marrëveshjen, Pekini ka mbajtur një qëndrim të rezervuar, duke theksuar se pozicioni i Kinës për çështjen e TikTok mbetet “i qartë dhe konsistent”./CNN/UBTnews

Continue Reading

Teknologji

OpenAI ka prezantuar një gjenerator të ri imazhesh

Published

3 weeks ago

on

December 17, 2025

By

Kompanitë e teknologjisë po avancojnë me shpejtësi në fushën e inteligjencës artificiale, dhe OpenAI sapo ka prezantuar një gjenerator të ri imazhesh të quajtur ChatGPT Images.

Ky zhvillim shënon një hap të rëndësishëm drejt krijimit të imazheve me anë të inteligjencës artificiale, duke u mundësuar përdoruesve të shprehin kreativitetin e tyre në mënyra të reja dhe më të avancuara.

Sipas deklaratave, ky gjenerator është katër herë më i shpejtë se versionet e mëparshme, ndjek udhëzimet që përdoruesit japin dhe bën më pak gabime në detaje.

Ky përmirësim teknik e bën procesin e krijimit të imazheve më të saktë, më efikas dhe më të kënaqshëm për përdoruesit, duke lehtësuar punën kreative dhe duke reduktuar nevojën për redaktime të mëvonshme.

Sam Altman, CEO i OpenAI, kishte paralajmëruar prezantimin e këtij modeli më parë dhe e përshkroi atë si një “model argëtues”, duke lënë të kuptohet se përdoruesit mund të presin një përvojë interaktive dhe kreative.

Krijimi i imazheve me cilësi të lartë bëhet i thjeshtë: mjafton të japësh komandat e duhura, dhe inteligjenca artificiale punon për të gjeneruar rezultatin në mënyrë të shpejtë dhe të saktë. ChatGPT Images synon të thjeshtojë procesin e krijimit të imazheve e të ofrojë një eksperiencë më të shpejtë, më të saktë dhe më argëtuese për përdoruesit.

Përveç përdorimit personal, ky mjet ka ndikim edhe në fusha të ndryshme profesionale, si dizajni grafik, marketingu, arsimi dhe krijimi i përmbajtjes digjitale, duke e bërë AI një partner të dobishëm për inovacion dhe krijimtari. /A.Z/UBT News/

Continue Reading

Teknologji

Gjysma e makinave të Ford do të jenë elektrike ose hibride deri në 2030

Published

3 weeks ago

on

December 16, 2025

By

Industria automobilistike po përshtatet vazhdimisht me kërkesat e tregut.

Pas një përqendrimi agresiv në automjetet elektrike (EV), Ford po ndryshon strategji për shkak të kostove të larta, mungesës së infrastrukturës dhe klimës politike, duke u orientuar më shumë drejt modeleve hibride.

Aktualisht, automjetet hibride dhe elektrike përbëjnë 17% të shitjeve globale të Ford, ndërsa synimi është që kjo shifër të arrijë 50%.

Kjo do të mbështetet nga një platformë e re universale EV dhe më shumë modele hibride e me rreze të zgjatur.

Një kamionçinë elektrike e mesme pritet të hyjë në prodhim në vitin 2027, ndërsa F-150 Lightning EREV do të ofrojë rreth 700 milje autonomi.

Ford po redukton investimet në automjete elektrike të mëdha, të cilat nuk po gjenerojnë kërkesë të mjaftueshme, dhe do të fokusohet në modele më të përballueshme me benzinë, hibride dhe elektrike.

Deri në fund të dekadës, kompania planifikon të prezantojë pesë automjete të reja me çmime më të ulëta.

Gjithashtu, Ford synon të hyjë në tregun e ruajtjes së energjisë, duke përdorur kapacitetet e prodhimit të baterive për qendra të të dhënave dhe banesa.

Këto lëvizje janë pjesë e strategjisë Ford+ dhe përputhen me objektivin për neutralitet karbonik deri më 2050, duke synuar njëkohësisht qëndrueshmëri dhe fitim. /A.Z/UBT News/

 

 

 

Continue Reading

Teknologji

Pamja e ndarë e kamerës vjen në Pixel 9 Pro Fold me përditësimin e ri

Published

4 weeks ago

on

December 15, 2025

By

Me rritjen e vazhdueshme të popullaritetit të telefonave të palosshëm, pritet që gjithnjë e më shumë aplikacione të palëve të treta të optimizohen për këtë faktor forme.

Kjo vlen edhe më tepër për aplikacionet e sistemit. Pikërisht për këtë arsye, Google po përmirëson përvojën e aplikacionit Camera për përdoruesit e Pixel 9 Pro Fold, duke sjellë një veçori të re që debutoi fillimisht në Pixel 10 Pro Fold.

Funksioni në fjalë mundëson shikimin paraprak të fotove në gjysmën e majtë të ekranit të brendshëm, ndërsa pamësi (viewfinder) i kamerës mbetet aktiv në anën e djathtë. Kjo e bën procesin e fotografimit më praktik dhe më efikas,.

Sinqerisht, është disi befasuese që Google-it i është dashur kaq shumë kohë për ta implementuar këtë veçori, pasi pamja e ndarë është tashmë standard në shumicën e telefonave të tjerë të palosshëm.

Për më tepër, ekziston një buton i dedikuar poshtë qepenit, i cili ju lejon të shikoni jo vetëm fotot e realizuara gjatë seancës aktuale, por edhe gjithë galerinë tuaj – një shkurtore praktike drejt Google Photos. /A.Z/UBT News/

Continue Reading

Të kërkuara