Peshqirët me kalimin e kohës ashpërsohen sepse shumica e njerëzve i lajnë gabim.

Përdorimi i shpeshtë i zbutësit krijon shtresë yndyrore mbi fibra, e cila mbledh sapun e baktere dhe i bën peshqirët të ngurtë dhe jo thithës.

Ekspertët e Secret Linen Store rekomandojnë një zgjidhje të thjeshtë dhe të lirë: uthullën e bardhë. Mjafton të shtoni 250 ml uthull së bashku me detergjentin dhe ta vendosni direkt në daullen e lavatriçes para ciklit të larjes. Aroma e uthullës zhduket gjatë shpëlarjes.

Uthulla e bardhë është një pastrues natyral që zbërthen mbetjet yndyrore dhe heq shtresën e krijuar nga zbutësi i rrobave. Ajo eliminon mikrobet dhe mykun, duke i lënë peshqirët më të butë, më thithës dhe më të freskët.

Mund ta përdorni të vetme: lani peshqirët në ujë të nxehtë vetëm me uthull, nëse doni bëni një cikël të dytë me detergjent (pa zbutës).

Pas larjes, tundi peshqirët mirë dhe thajini në tharëse me temperaturë të ulët ose varini për t’u tharë. /A.Z/UBT News/

Në prag të festave të 28-29 Nëntorit, shkollat dhe gjimnazet e Tiranës janë bërë skena arti, ku të rinjtë po sjellin shfaqje kushtuar ditëve më të rëndësishme të historisë shqiptare.

Kryeministri Edi Rama publikoi një video që e cilësoi si “kartolinë feste” nga artistët e rinj të Liceut Artistik “Jordan Misja” dhe qendrës kulturore “Albanian Night”. Në performancë morën pjesë rreth 150 nxënës, pjesë e programit jashtëshkollor Art e Zeje.

Të veshur me kostume tradicionale nga të gjitha trevat shqiptare, të rinjtë interpretuan me instrumente popullore këngën e njohur “Rrjedh në këngë e ligjërime”, duke krijuar një atmosferë festive dhe emocionuese.

Kryeministri ka ndarë së fundmi edhe performanca të tjera që shënojnë festën e Pavarësisë dhe të Çlirimit, ndërkohë që në çdo shkollë të Tiranës festimet vazhdojnë me dekorime kuqezi, vizatime, piktura dhe aktivitete kulturore, duke nxitur kreativitetin e fëmijëve për 113-vjetorin e Pavarësisë dhe 81-vjetorin e Çlirimit të vendit. /A.Z/UBT News/

Biblioteka Kombëtare e Kosovës ka ftuar mediat dhe publikun të marrin pjesë në hapjen e ekspozitës së Agjencisë Shtetërore të Arkivave të Kosovës, me titull “Koha e shndërrimit – Kosova 1968–1981: dokumente dhe dëshmi”.

Ekspozita paraqet materiale arkivore që ndriçojnë një periudhë vendimtare për zhvillimet historike, shoqërore dhe politike në Kosovë, duke i bërë të aksesueshme përmes dokumenteve, dëshmive dhe burimeve historike të ruajtura ndër vite.

Hapja e ekspozitës do të zhvillohet sot në Hollin e Ekspozitave të Bibliotekës Kombëtare, nga ora 12:00.

Biblioteka fton gazetarë, studiues, studentë dhe të gjithë të interesuarit të jenë pjesë e këtij organizimi, për të risjellë në vëmendje një periudhë të rëndësishme të historisë së vendit përmes dëshmive autentike arkivore. /A.Z/UBT News/