Dardanet U19 kanë arritur një sukses të jashtëzakonshëm në arenën ndërkombëtare, duke shkëlqyer në turneun e UEFA-s të mbajtur në Lituani.

Me lojë të disiplinuar, përkushtim maksimal dhe shpirt gare, Dardanet regjistruan dy fitore bindëse, duke dëshmuar potencialin dhe cilësinë e tyre përballë kundërshtareve evropiane.

Falë këtyre paraqitjeve mbresëlënëse, Dardanet U19 siguruan ngjitjen në Ligën A – një hap i madh përpara për futbollin e vajzave në Kosovë dhe një tregues i qartë i zhvillimit të vazhdueshëm të këtij brezi të talentuar.

Ky sukses jo vetëm që rrit besimin për të ardhmen, por konfirmon se Dardanet e reja janë të gatshme të përballen me sfidat më të mëdha në futbollin evropian.

Është hedhur shorti për turneun prestigjioz World Boxing Cup – Brazil 2026, i cili do të zhvillohet nga 20 deri më 27 prill në Foz do Iguaçu të Brazilit, duke mbledhur elitën botërore të këtij sporti.

Kosova do të përfaqësohet nga dy emra të njohur të ringut. Më 21 prill, në kategorinë 65 kg, Shpëtim Bajoku do të përballet me kanadezin Gabriel Labrie në një duel që pritet të jetë mjaft sfidues.

Ndërkohë, në kategorinë 60 kg, Donjeta Sadiku e ka kaluar një raund pa luftë dhe do të zbresë në ring më 22 prill, ku do të ndeshet me Jordan Wilson.

Ky edicion i Kupës Botërore të boksit konsiderohet rekordthyes, pasi në të marrin pjesë 47 shtete me gjithsej 342 boksierë – numri më i madh në historinë e këtij kompeticioni.

Turneu ka peshë të veçantë për sportistët, pasi pikët e fituara në këtë garë ndikojnë drejtpërdrejt në rrugën drejt kualifikimit për Lojërat Olimpike Los Angeles 2028.

Me konkurrencë të ashpër dhe pjesëmarrje masive, “World Boxing Cup – Brazil 2026” pritet të sjellë duele të nivelit të lartë dhe të jetë një test i rëndësishëm për boksierët në rrugën drejt skenës olimpike.

Në sallën e Fakultetit të Kulturës Fizike në Prishtinë u zhvillua faza finale e Play-Off-it për vajzat U18, ku titulli kampion i takoi KV Kastriotit pas një paraqitjeje shumë të fortë në finale.

Në ndeshjen vendimtare, Kastrioti mposhti KV Prishtina Elite me rezultat 3-1, duke treguar karakter dhe dominim pas setit të parë. Finalja nisi më mirë për Prishtina Elite, që fitoi setin hapës 24-26, por më pas vajzat e Kastriotit reaguan fuqishëm dhe morën kontrollin e plotë të lojës.

Me lojë të organizuar dhe efikasitet të lartë, Kastrioti fitoi tre setet e radhës (25-15, 25-21, 25-13), duke përmbysur rezultatin dhe siguruar trofeun e kampionit në kategorinë U18.

Pas përfundimit të ndeshjes, u zhvillua ceremonia e ndarjes së medaljeve dhe kupës. Medaljet për ekipet pjesëmarrëse u ndanë nga Gezim Brahimi, anëtar i bordit të Federata e Volejbollit e Kosovës dhe Fadil Lumi. Ndërsa kupën për kapitenen e KV Kastrioti e dorëzoi Valon Nikqi.

Federata e Volejbollit e Kosovës përgëzoi ekipin e KV Kastrioti për këtë arritje, duke vlerësuar punën dhe përkushtimin e vajzave që u kurorëzua me titullin kampion në këtë grupmoshë.

Federata e Futbollit e Kosovës ka ngritur zërin publikisht pas një skene zhgënjyese në ndeshjen Kosovë – Bullgari në konkurrencën e vajzave, ku tribuna e mediave rezultoi tërësisht bosh.

Përmes një reagimi të fortë, FFK ka kritikuar mungesën e gazetarëve sportivë, duke e cilësuar këtë si mungesë përgjegjësie dhe vlerësimi ndaj një ekipi që po përfaqëson vendin me dinjitet dhe rezultate konkrete.

Sipas federatës, kontrasti është i thellë dhe i pajustifikueshëm: ndërsa ndeshjet e Kombëtares së meshkujve tërheqin interes të madh mediatik dhe kërkesa të shumta për akreditim, paraqitjet e Dardaneve po kalojnë pothuajse në heshtje totale.

FFK thekson se ky fenomen nuk lidhet me mungesë cilësie apo rezultatesh, pasi vajzat po kalojnë një formë të shkëlqyer dhe janë në garë serioze për objektiva madhore si kualifikimi në Botërorin 2027.

Në reagim vihet në dukje edhe një problem tjetër: prania në zonën e mediave e personave që nuk përfaqësojnë raportim profesional, duke zënë hapësira që duhet t’u takojnë gazetarëve dhe duke ulur standardin e raportimit sportiv.

Federata kërkon reflektim të përgjithshëm nga mediat, duke rikujtuar se roli i tyre është thelbësor në promovimin dhe zhvillimin e sportit. Sipas tyre, mungesa e vëmendjes ndaj futbollit të vajzave, por edhe ndaj ekipeve të tjera si U21 dhe futsalli, dëmton të gjithë ekosistemin sportiv në vend.

“Dardanet nuk kërkojnë favore, por vetëm vëmendjen që e meritojnë,” thuhet në mesazh, duke bërë thirrje për më shumë mbështetje dhe prezencë në ndeshjet e tyre.

Reagimi i FFK-së vjen në një moment kur Kombëtarja e vajzave po shkëlqen në fushë, ndërsa jashtë saj vazhdon beteja për njohje dhe trajtim të barabartë.