Lajmet

​Remitencat deri në fund 2023 pritet të arrijnë në 1.3 miliard euro

BQK parasheh që në vitin 2024 remitencat të rriten prej 6 për qind.

Published

on

Banka Qendrore e Kosovës (BQK) parasheh që rritja ekonomike për 2023 të arrijë 3.4 për qind, derisa për vitin e ardhshëm të jetë 4.2 qind. Nga BQK-ja thanë se nuk dihet saktë vlera e monedhave false në tregun e Kosovës, pasiqë sipas tyre ato qarkullojnë në mënyrë ilegale.

Guvernatori i Bankës Qendrore të Kosovës (BQK), Ahmet Ismaili në një konferencë për media, ka folur mbi sfidat me të cilat janë përballur gjatë vitit që po lëmë pas, duke thënë se pavarësisht kësaj, ata kanë arritur ta përmbyllin me sukses këtë vit.

Ai theksoi se remitencat e pranuara deri në fund të vitit 2023 pritet të arrijnë vlerën 1.3 miliard euro, për çka shtoi se BQK parasheh që në vitin 2024 remitencat të rriten prej 6 për qind.

“Rritja ekonomike për fund të këtij vitit pritet të arrijë 3.4 për qind, kurse projeksionet tona për vitin 2024-2025, për 4.2, përkatësisht 4 për qind…Sa i përket inflacionit në të dhënat e fundit dhe projeksionet e tona të fund vitit, inflacioni do të mbërrijë në 2.9 për qind, megjithatë në nivel të vitit mesatarja vjetore e inflacionit pritet me rreth 5.1 për qind… Sa i përket remitencave, në fund të nëntorit ka kaluar 1.2 miliard euro. Pritjet janë që fundi i vitit të kalojë 1.3 miliardë…Ka pasur rritje nga viti në vit të investimeve të huaja direkte. Në fund të shtatorit ato kanë vlerën 621 milionë dhe kontributi i patundshmërisë është zvogëluar pak. Kemi fillim të maturimit të tregut të patundshmërive në kuptimin e investimeve të huaja direkte. Fakti që është rritur nënkupton se rritja është zhvilluar nga sektorët të tjerë, sikurse ai financiar dhe të ndryshëm… Janë 136 institucione aktive sot që rregullohen, licencohen, mbikëqyren nga BQK-ja, çdo degë e tyre kur hapet dhe çdo drejtues i ri kur miratohet i nënshtrohet një procesi të aprovimit”, tha Ismaili.

Guvernatori i BQK-së, Ahmet Ismaili potencoi se kreditë deri në nëntor të vitit 2023 kanë arritur shumën prej afro 5 miliardë euro, duke shënuar rritje rreth 600 milionë euro, krahasuar me vitin e kaluar. Ai tha se kreditë për sektorin e ndërmarrjeve, të cilat përbëjnë rreth 60 për qind të kredive në sektorin bankar, evidentohen në shumën prej afro tre miliardë euro, teksa sektori i ekonomive familjare përbën 37 për qind të kredive në sektorin bankar, ndërsa norma mesatare e interesit në kredi është 6.39 për qind.

Përveç këtyre, Ismaili foli edhe për depozitat, për të cilat tha se vazhdojnë të jenë burimi kryesor i financimit të kredive. Ai shtoi se depozitat deri në nëntor të vitit 2023 evidentohen në shumë prej rreth 5.9 miliardë euro.

“Depozitat në sistem po ashtu kanë shënuar rritje graduale, rritja është lineare, kanë arritur gati 5.9 miliardë euro, pra 5.88 miliardë euro…83 për qind e mjeteve që janë mbledhur depozita, janë dhënë kredi, pra nëse e merr 100 përqindëshin një me një i bie 83 centë për çdo euro është kredituar…Kreditë pa shmangshëm janë një prej mbështetësve të ekonomisë, në kuptimin edhe të investimeve, por edhe në kuptimin e sektorit privat, individ dhe atë të bizneseve…Shuma e kredive ka kaluar 4.86 apo 4.9 miliardë euro asete deri në fund të nëntorit…Ndërmarrjet kanë shumicën e kredive rreth 2.9 miliardë, norma e kthimit të ndërmarrjeve gjithashtu është e mirë…Tek ekonomitë familjare, shuma e kredive ka arritur 1.8 miliardë. Tash kemi edhe një rritje të peshës hipotekare në këtë shumë… Fitimet e bankave ndër vite kanë shkuar duke u rritur. Në parim, kjo duhet të jetë një informatë se në Kosovë ka mundësi që sistemi bankar të jetë profitabil, ka mundësi ta kryejë mandatin e vet. Ka mundësi ta rrisë edhe qëndrueshmërinë dhe strukturën e kapitalit”, theksoi Ismaili.

Lidhur me atë se çfarë ka bërë BQK-ja në përmirësimin e situatës me qarkullimin e monedhave false, ai tha se kanë bërë furnizim të ekonomisë me monedha të reja, kanë iniciuar themelimin e Qendrës Kombëtare për luftë ndaj parave të falsifikuara dhe veprime të tjera.

Ndërkaq, i pyetur se a dihet sa është vlera e monedha false që po qarkullojnë në tregun e Kosovës, Ismaili tha se është e pamundur të dihet një shifër e tillë, meqë sipas tij qarkullojnë në mënyrë ilegale.

“Kemi ndërmarrë disa aktivitete kohëve të fundit ka qenë për paratë falsifikuara…Ky nuk është fenomen i një viti, është përpjekje e vazhdueshme, përpjekje e gjithhershme. Gjithmonë grupet ilegale dhe kriminale përpiqen të gjejnë zona se ku të operojnë. Ne duhet të bëjmë të qartë të gjithë institucioneve shtetërore se Kosova nuk është një prej tyre…Kemi lëshuar disa udhëzime në publik, së fundi kemi larguar tarifën për deponim në bankë qendrore dhe në banka për monedha…Ka marrë masa që të furnizojë ekonomitë, përkatësisht bankat me monedha të reja, me sasi të reja, tërhiqen të vjetërsuarat dhe vendosen të rejat, që mos të kenë vështirësi në qarkullim. Kjo është masë e menjëhershme, emergjente, ka edhe masa të tjera që janë ndërmarrë…Në të vërtetë nuk ka shifër të tillë (sa monedha false ka në treg). Ne nuk e kemi dhe nuk mund të ketë, sepse ajo qarkullon në mënyrë ilegale, nuk është e evidentuar”, potencoi Ismaili.

Plani strategjik i BQK-së për 2024-2028 është forcimi i qëndrueshmërisë dhe stabilitetit financiar, ngritja e kapaciteteve, digjitalizimi dhe modernizmi i proceseve, avancimi i mbrojtjes së konsumatorit e të tjera.

Në kuadër të konferencës, u bë edhe ndarja e çmimit tradicional të BQK-së, “Ekonomisti i ri”, të cilin e fituan Qëndresë Cuci, Diellëza Mahmuti dhe Agnesa Demolli Mehmeti.

Lajmet

Donika Emini kritikon interpretimin e këngës nacionaliste serbe në forumin e BE-së në Bruksel

Published

on

Ekspertja e politikës së jashtme, Donika Emini, ka kritikuar interpretimin e këngës nacionaliste serbe “Oj Kosovo, Kosovo” në mbrëmjen hapëse të Forumit të Zgjerimit të Bashkimit Evropian në Bruksel, duke e cilësuar të papranueshme përzgjedhjen e një kënge që përmban pretendime territoriale ndaj Kosovës.

Gjatë fjalimit të mbajtur më 16 nëntor, Emini tha se ngjarja e kishte detyruar ta ndryshonte tërësisht fjalimin e përgatitur. Ajo e nisi paraqitjen duke cituar disa vargje të këngës, të interpretuar një natë më parë.

“Popull serb, thërrit fort. Kosovë, nuk do të të dorëzojmë. Ti gjithmonë ke qenë e jona. Kështu ka qenë që nga kohët e lashta”, citoi Emini, duke theksuar se teksti përmban pretendime të drejtpërdrejta territoriale ndaj Kosovës.

Ajo ngriti pikëpyetje nëse institucionet evropiane i kuptojnë kompleksitetet politike dhe ndjeshmëritë historike të Ballkanit Perëndimor.

“Pas asaj që ndodhi mbrëmë, vërtet pyes veten nëse ata i kuptojnë kompleksitetet e rajonit, edhe pse po flasim për një Komision Evropian që është mjaft afër këtij rajoni”, deklaroi ajo.

Emini tregoi se kishte vendosur të merrte pjesë në forum pasi kishte vërejtur mungesën e përfaqësuesve nga Kosova në listën e folësve. Megjithatë, ajo theksoi se prania e saj si përfaqësuese e shoqërisë civile nuk mund ta zëvendësonte përfaqësimin institucional të vendit.

Ajo tha se nuk do të befasohej nëse një këngë e tillë do të interpretohej në tubime nacionaliste apo në një tubim të ish-presidentit serb Slobodan Millosheviq, por u shpreh e befasuar që ajo u dëgjua në një aktivitet të Komisionit Evropian.

“U befasova shumë kur e dëgjova në Komisionin Evropian, një projekt paqeje, një projekt që po e udhëheq rajonin drejt demokracisë”, u shpreh Emini.

Ekspertja sqaroi se kundërshtimi i saj nuk kishte të bënte me gjuhën apo muzikën serbe, duke theksuar se do ta mirëpriste interpretimin e këngëve shqipe dhe serbe që promovojnë bashkëjetesën dhe tejkalimin e ndarjeve.

Në përfundim të fjalimit, Emini i bëri thirrje Bashkimit Evropian të mos riprodhojë narrativa nacionaliste dhe revizioniste që, sipas saj, kanë penguar procesin e pajtimit në Ballkan.

“A mundeni të paktën të mos i riprodhoni narrativat revizioniste dhe propagandistike të një regjimi që e përçau rajonin dhe që e bëri pajtimin kaq të vështirë deri më sot?”, pyeti ajo.

Fjalimi u mbajt në kuadër të forumit “Përmes pajtimit drejt zgjerimit të Bashkimit Evropian”, më 16 nëntor, një ditë pas interpretimit të këngës në mbrëmjen hapëse të aktivitetit në Bruksel./A.K/

Continue Reading

lajme

Studentët e Masterit në Agrokulturë me Mjedis nisin hulumtimin eksperimental për kultivimin e sallatës së gjelbër pa tokë

Published

on

By

Studentët e programit Master në Agrokulturë me Mjedis, Sihana Bokshi dhe Shpëtim Salihu, nën udhëheqjen e profesorit Ismet Babaj, kanë dizajnuar metodikën e hulumtimit dhe kanë nisur punën eksperimentale për kultivimin e sallatës së gjelbër (Lactuca sativa L.) në sistemin e kultivimit pa tokë.

Qëllimi i këtij eksperimenti është vlerësimi i efekteve të sistemit të prodhimit dhe furnizimit me azot në formë të nitratit mbi statusin ushqyes të bimëve, akumulimin e nitrateve dhe nitriteve, prodhimin e biomasës, si dhe morfologjinë e sistemit rrënjor.

Në kuadër të hulumtimit po testohen tre trajtime me tretësira ushqyese në dy sisteme të hapura të prodhimit pa tokë, përmes vazove me vëllim prej 1 litri: njëri sistem përdor vermikulitin si substrat rritës, ndërsa tjetri përdor cocopeat (torfë kokosi).

Puna kërkimore do të përmbyllet me analiza kimike dhe matje të parametrave të rritjes së bimëve. Të dhënat dhe rezultatet e përfituara do t’u shërbejnë studentëve për përgatitjen e punimeve të tyre të diplomës, si dhe për publikime në revista shkencore, duke dëshmuar gërshetimin e suksesshëm të teorisë me praktikën shkencore.

Continue Reading

lajme

Rama kritikon interpretimin e melodisë së këngës nacionaliste serbe në Bruksel

Published

on

By

Kryeministri i Shqipërisë, Edi Rama, ka kritikuar interpretimin e melodisë së një kënge nacionaliste serbe në koncertin e organizuar nga Komisioni Evropian në Bruksel. Ai e bëri këtë në fillim të një debati në “Forumin e Zgjerimit“, duke thënë se kjo çështje nuk mund të mbetet pa u përmendur.

“Nuk mund të heshtet ajo që ndodhi mbrëmë me muzikën e interpretuar në një mbrëmje në prag të këtij forumi. Nuk e di a ishte e qëllimshme apo injorancë, por ishte një këngë nacionaliste këtu, në mbrëmjen e këtij eventi. Për ta shtuar ironinë, u bë nën logon ‘Meloditë e Unitetit’”, tha Edi Rama.

“Asnjëherë nuk mund të lëmë anash diçka që na kthen nga e kaluara. E kam thënë për vite se sa e rëndësishme është Serbia për rajonin tonë, sa e rëndësishme është ta mbajmë Serbinë në anën tonë. Por dua të sigurohem që ajo që them të mos shkojë kundër kësaj bindjeje. Por, në të njëjtën kohë, mendoj se nuk duhet të tolerojmë hapësirë që betejat e mesjetës të bëhen motivim për ndasitë e sotme”, ka thënë Rama.

“Sa më shpejt Serbia ta njohë Kosovën, aq më mirë do të jetë për Serbinë dhe për të gjithë”, ka thënë kryeministri i Shqipërisë. /KOHA/

Continue Reading

Vendi

Ndalohet një zyrtar i Gjykatës së Prishtinës, dyshohet për keqpërdorim detyre

Published

on

By

Prokuroria Themelore në Prishtinë, në bashkëpunim me Drejtorinë për Hetimin e Krimeve Ekonomike dhe Korrupsionit (DHKEK) në Policinë e Kosovës, ka ndaluar sot për 48 orë personin me inicialet A.B., udhëheqës i Zyrës për Menaxhimin e Lëndëve në Gjykatën Themelore në Prishtinë.

Sipas njoftimit të Prokurorisë, ndalimi është bërë pas hetimeve disamujore, nën dyshimin se A.B. ka kryer veprën penale “Keqpërdorimi i pozitës apo autoritetit zyrtar”. Ai dyshohet se gjatë ushtrimit të detyrës, me qëllim të përfitimit të kundërligjshëm pasuror për vete dhe persona të tjerë, ka krijuar dosje fiktive duke vendosur vulën e vërtetësisë në kopjen e një kontrate të falsifikuar të shitblerjes.

Përmes këtyre veprimeve, shtetasit të Serbisë me inicialet M.B. — i cili aktualisht ndodhet në arrati — i është mundësuar regjistrimi i kundërligjshëm i një banese me sipërfaqe prej 55.89 m² në Zonën Kadastrale në Matiçan, pranë Zyrës Kadastrale në Prishtinë.

Prokurori i Shtetit ka paralajmëruar se brenda afatit ligjor do të paraqesë kërkesë në gjykatën kompetente për caktimin e masës së paraburgimit ndaj të pandehurit. /E.A/

Continue Reading

Të kërkuara