Lajmet nga UBT

Rektori Hajrizi viziton Universitetin e Harvardit – prezanton modelin e UBT-së për Smart City, ekosistemin e inovacioneve dhe vizionin për University 4.0

Gjatë kësaj vizite, rektori Hajrizi do të ketë takime të shumta me përfaqësues të këtij universiteti prestigjioz në botë.

Publikuar

Rektori i UBT-së, Prof. Dr. Edmond Hajrizi po qëndron në një vizitë njëjavore në Universitetin e Harvardit në Shtetet e Bashkuara të Amerikës, ku është duke zhvilluar takime të ndryshme me përfaqësues të institucioneve të arsimit, me studentë shqiptarë, si dhe me diasporën shqiptare.

Gjatë kësaj vizite, rektori Hajrizi do të ketë takime të shumta me përfaqësues të këtij universiteti prestigjioz në botë, për të diskutuar kryesisht për mundësitë e bashkëpunimit për fusha të ndryshme të jetës duke filluar nga zhvillimi ekonomik, ndryshimet klimatike, shëndetësia dhe mjekësia, siguria, energjia, teknologjia e deri te inovacioni, lidershipi dhe ngritja e kapaciteteve akademike në Kosovë.

Rektori Hajrizi mendon se mundësia e ndërlidhjeve të standardeve më të larta akademike botërore që ofron Harvardi si dhe në bashkëveprim me potencialin e ekosistemit inovativ që ofron UBT në Kosovë dhe rajon, do të kishte një impakt të jashtëzakonshëm në ngritjen e cilësisë së jetës dhe zhvillimeve në përgjithësi në Kosovë dhe më gjerë.

Gjatë këtij vizite, rektori i UBT-së, Prof. Dr. Edmond Hajrizi mbajti një ligjëratë tematike lidhur me krijimin e ekosistemeve inovative dhe te mençura duke e prezantuar si rast studimi edhe vet UBT-në, si dhe impaktin e saj në zhvillimin e qëndrueshëm ne Kosovë.

Kjo ligjëratë është organizuar në bashkëpunim me Asociacionin e studentëve shqiptarë në Harvard. Për këtë vizitë një kontribut të madh e ka dhënë edhe Faton Limani, staf i rregullt i Universitetit të Harvardit dhe ekspert për lidership, si dhe Kujtim Thaqi, profesor i biokimisë në UBT, i cili për momentin po qëndron në një vizitë studimore në Fakultetin e Mjekësisë në Harvard përmes Fulbright Visiting Scholar Program.

Rektori Hajrizi përpos takimit me stafin e Universitetit të Harvardit, me studentë shqiptarë në Harvard, do të zhvilloj takime edhe me pjesëtarë të diasporës shqiptare që jetojnë në Boston dhe rrethinë, si dhe do të vizitojë edhe varrin e Fan Nolit dhe Kishën Autoqefale Ortodokse Shqiptare, teksa do të marrë pjesë në festivalin shqiptar në Boston.

Lajmet

Diskutimi në UBT mbi rëndësinë e Sigurisë në Komunikacion  

Publikuar

nga

Më 23 maj 2024, Fakulteti i Inxhinierisë së Ndërtimit dhe Infrastrukturës në UBT organizoi një debat për sigurinë në komunikacion. Ky diskutim u zhvillua në bibliotekën e kampusit të UBT-së, si pjesë e Javës së Sigurisë në Komunikacion.

Debati ofroi një platformë për të diskutuar aspekte të ndryshme të sigurisë në komunikacion, duke përfshirë infrastrukturën, aspektet ligjore dhe rregullat e policisë së Kosovës. Pjesëmarrësit u informuan dhe patën mundësinë të debatojnë mbi këto tema të rëndësishme.

Në këtë aktivitete morën pjesë përfaqësues nga institucionet kryesore, përfshirë Ministrinë e Planifikimit Hapësinor dhe Infrastrukturës. Diskutimet u përqendruan në rolin dhe rëndësinë e infrastrukturës për sigurinë në komunikacion, si dhe në sfidat dhe strategjitë për përmirësimin e saj.

Debati u hap nga Dekani i Fakultetit Inxhinierisë së Ndërtimit në UBT, Visar Krelani, i cili falënderoi të pranishmit për prezencën dhe theksoi nevojën e zhvillimit të diskutimeve të tilla në nivele akademike.

Togeri Nazim Zogaj, përfaqësues nga Policia e Kosovës ndau pikëpamjet dhe rekomandimet e tyre për sigurinë në komunikacion. Sipas togerit të Policisë së Kosovës, Nazim Zogaj, disa nga shkaktarët më të shpeshtë të aksidenteve rrugore në vitin 2023 ishin mosmbajtja e distancës së sigurisë mes automjeteve, manipulimi i pasigurt me automjet, mos përshtatja e shpejtësisë ndaj kushteve të rrugës, mos respektimi i përparësisë së kalimit, kyçje e pasigurt në rrugë, radhitje e parregullt apo ndërrim i shiritave, kthim, rrotullim dhe lëvizje prapa.

Togeri Zogaj raportoi se ka pasur një rritje të numrit të kundërvajtjeve të cilat kanë rezultuar me pikë negative. Në vitin 2018, ishin regjistruar 18 mijë kundërvajtës, ndërsa në vitin 2023 ky numër ka arritur në 28 mijë. Kjo rritje tregon për një trend negativ, por Zogaj shprehu shpresën se statistikat do të përmirësohen me ndryshime të mundshme ligjore gjatë këtij viti.

“Gjithashtu, numri i personave të cilëve u është ndaluar drejtimi i mjetit motorik është rritur nga mbi 6 mijë në vitin 2018 në mbi 9 mijë në vitin 2023. Po ashtu, është vërejtur një rritje e madhe në kundërshtimet ndaj kundërvajtjeve, nga 1791 ankesa në vitin 2018 në 5556 ankesa në vitin 2023”, tha Zogaj.

Zogaj gjithashtu pasqyroi të dhënat krahasuese të numrit të patentë shoferëve dhe mjeteve motorike me aksidentet fatale dhe personat e vdekur nga viti 2011 deri në 2023. Në vitin 2011, numri i patentë shoferëve të lëshuar nga MPB-ja ishte 475,902, ndërsa deri në vitin 2023 ky numër është rritur në 879,555, një rritje prej 403,653 ose 85%.

“Numri i mjeteve motorike në qarkullim është rritur nga 189,943 në vitin 2011 në 459,108 në vitin 2023, një rritje prej 269,165 ose 142%. Krahasimi i aksidenteve fatale me numrin e patentë shoferëve të lëshuar tregon një rënie për 34 aksidente fatale ose 26%, dhe numri i personave të vdekur ka rënë për 51 persona ose 33%”, theksoi togeri Zogaj.

Nol Dedaj, ekspert i komunikacionit dhe profesor në UBT, ka deklaruar se çdo vit në aksidente rrugore humbin jetën rreth 1.300.000 persona, ndërsa rreth 50.000.000 persona pësojnë lëndime trupore. Sipas tij, parashikimet tregojnë se deri në vitin 2030, aksidentet rrugore mund të bëhen shkaku i pestë kryesor i vdekjeve në botë, me rreth 2.400.000 viktima nëse trendi aktual vazhdon.

“Në vitin 2020, Asambleja e Përgjithshme e Kombeve të Bashkuara miratoi një program dhjetëvjeçar, mbështetur nga 100 shtete, me qëllim të stabilizimit dhe uljes së numrit të viktimave nga aksidentet rrugore. Ky program synon një reduktim prej 50% të viktimave deri në vitin 2030. Nëse arrihet ky objektiv, do të parandalohen rreth 5 milionë viktima dhe 50 milionë lëndime trupore, duke kursyer gjithashtu rreth 30 miliardë dollarë nga buxhetet e shteteve”, u shpreh Dedaj.

Visar Baxhuku, profesor në UBT, ka theksuar se kundërvajtjet që rezultojnë në pagesa gjobash kanë përfunduar si proces. Sipas tij, numri i kundërvajtjeve është rritur në mënyrë represive, duke shënuar një rritje prej 21.5% në Ballkan, ku nga 219 gjoba për çdo 1000 banorë në vit, krahasuar me 94 gjoba për çdo 1000 banorë në shtetet evropiane, që është një numër shumë i lartë dhe ka kosto financiare të konsiderueshme. Ai sugjeron që për të ulur aksidentet, masat preventive duhet të zëvendësohen me masa të tjera./UBTNews/

Vazhdo të lexosh

Lajmet nga UBT

UBT renditet në mesin e top 100 universiteteve në botë në fushën e arkitekturës dhe inxhinierisë civile

Publikuar

nga

UBT po vazhdon të merr vlerësime të rëndësishme dhe njohje të kontributit në arenën ndërkombëtare.

UBT falë kontributit dhe punës së studentëve dhe stafit akademik është renditur si i vetmi institucion i arsimit të lartë privat në mbarë trojet shqiptare në mesin e top 100 universiteve botërore në fushën e arkitekturës dhe inxhinierisë civile në INSPIRELI AWARDS.

Rektori i UBT-së, Prof. Dr. Edmond Hajrizi ka vlerësuar lartë kontributin e secilit student dhe stafit akademik për këtë arritje, e cila dëshmon edhe njëherë se UBT vazhdon rrugën me hapa të sigurt drejt përsosmërisë akademike dhe profesionale. Ai theksoi se ky sukses është rezultat i punës së palodhshme dhe përkushtimit të gjithanshëm për të ofruar një arsim cilësor dhe për të inkurajuar inovacionin dhe krijimtarinë në fushën e arkitekturës dhe inxhinierisë civile.

“Jemi krenarë për këtë arritje të madhe dhe për reputacionin që kemi ndërtuar në arenën ndërkombëtare. Ky sukses nuk është vetëm një reflektim i punës sonë të palodhshme, por edhe një nxitje për të vazhduar të investojmë në cilësinë e arsimit dhe kërkimit shkencor”, tha Rektori Hajrizi.

Renditja e UBT-së në INSPIRELI AWARDS njeh veçanërisht mbështetjen e institucionit për të motivuar studentët për të marrë pjesë në konkurs, gjë që është vendimtare për përgatitjen e tyre për suksesin e ardhshëm profesional. Përveç pjesëmarrjes në konkurs, performanca e studentëve individualë vlerësohet edhe në bazë të projekteve të tyre akademike.

Çdo finalist apo fitues i këtij konkursi konsiderohet kështu një talent i padiskutueshëm me potencial për t’u bërë një krijues i suksesshëm i së ardhmes së qyteteve botërore.

Vazhdo të lexosh

Lajmet nga UBT

Publikohet punimi shkencor i dekanit të Medias, Ferid Selimi në bashkautorësi me studentët Driton Hyseni, Marigona Xhigoli e Saranda Krasniqi

Publikuar

nga

Është publikuar në revistën shkencore – Revista de Gestão Social e Ambiental, punimi i dekanit të Fakultetit Media dhe Komunikim në UBT, Ferid Selimi në bashkautorësi me studentët, Driton Hyseni, Marigona Xhigoli dhe Saranda Krasniqi. Punimi mban titullin “Young Kosovars, their preferred television and use of viewing devices”.

Në këtë punim autorët trajtojnë nivelin e shikueshmërisë dhe informimit përmes televizionit në mesin e të rinjve, në periudhën kur ky nuk konsiderohet më medium parësor, për shkak të burimeve alternative sikurse telefoni, respektivisht rrjetet sociale.

Përmes studimit autorët bënë dallimin midis shikueshmërisë së programeve televizive, krijimtarisë, besueshmërisë dhe mënyrës se si qasen deri te informacioni, sepse në fund të fundit çdo preferencë dhe shikueshmëria lidhet me besimin në fakte ose të vërteta alternative. Në këtë kontekst, vërehet se përdorimi i ulët i ekranit të televizorit shoqërohet me mundësinë e të rinjve për të përdorur pajisje alternative si celularët dhe laptopët.

Kjo revistë shkencore është e indeksuar në Scopus./UBTNews/

Vazhdo të lexosh

Lajmet nga UBT

Rektori i Akademisë së Sigurisë së Shqipërisë në UBT për diskutim të hapur

Publikuar

nga

Në një iniciativë të veçantë për të nxitur dialogun dhe përparimin në fushën e sigurisë dhe shkencave politike, UBT është krenar të njoftojë një ngjarje të rëndësishme që do të ndodhë të premten, më 24 maj, në Parkun Shkencor Inovativ të UBT-së në Lipjan.

Prof. Dr. Ilirijan Mandro, Rektori i Akademisë së Sigurisë së Shqipërisë, do të vizitojë UBT-në për të mbajtur një diskutim të hapur me studentët dhe stafin akademik të institucionit. Diskutimi do të fokusohet në sfidat dhe mundësitë në fushën e sigurisë, me një rëndësi të veçantë për studentët që studiojnë sigurinë dhe shkencat politike.

Ky takim është shans për të shkëmbyer pikëpamje, për të diskutuar për zhvillimet aktuale dhe për të ndjekur përparimet në këtë drejtim. Në një kohë kur siguria është një çështje thelbësore për shoqërinë, kjo ngjarje ofron një platformë të rëndësishme për të përmbushur qëllimet e dijes dhe angazhimit në këtë fushë të ndryshme.

Me fillim nga ora 14:00, UBT ju fton të merrni pjesë në këtë takim të rëndësishëm për të kontribuar në diskutimet e pasura dhe për të ndërtuar njohuri të reja në fushën e sigurisë dhe shkencave politike./UBTNews/

Vazhdo të lexosh

Të kërkuara