Në kuadër të festivalit me të madh të dijes, “Global UBT Fest 2026”, Fakulteti i Arkitekturës dhe Planifikimit Hapësinor në UBT ka hapur zyrtarisht punimet e Akademisë Verore me temë qendrore “NEO HABITAT: Rethinking Urban Space, Architecture & Heritage”.

Ky program synon ndërlidhjen e njohurive teorike me praktikat bashkëkohore të arkitekturës, duke krijuar mundësi për zhvillim profesional dhe fuqizim të kompetencave të studentëve.

Ceremonia e hapjes u udhëhoq nga udhëheqësi i kësaj akademie, Prof. Kujtim Elezi, ndërsa me fjalë rasti pjesëmarrësve iu drejtuan edhe Dekani i Fakultetit, Prof. Binak Beqaj.

Në kuadër të aktiviteteve të ditës së sotme, Prof. Besa Jagxhiu mbajti një ligjëratë mbi trashëgiminë urbane dhe arkitektonike, duke trajtuar transformimin e saj në qytetin bashkëkohor. Po ashtu, Dr.  Aurora Saidi ligjëroi mbi mekanizmat perceptualë që ndërmjetësojnë përvojat urbane gjatë ndërveprimit të banorëve me ambientin e ndërtuar. Një kontribut të veçantë në ditën e parë dha edhe Prof. Nuran Saliu me ligjëratën e tij mbi dizajnin parametrik dhe optimizimin në Grasshopper, duke sjellë trendet më të reja nga gjeometria tek inteligjenca arkitektonike.

Në ditët në vazhdim, Akademia Verore do të zhvendosë fokusin tek puna praktike. Nga data 7 deri më 10 korrik, studentët do të angazhohen në punëtori (workshops) intensive 5-ditore të ndara në tri module: Trashëgimi Arkitektonike dhe Restaurim, Planifikim dhe Dizajn Urban, si dhe Arkitekturë dhe Efiçiencë. Ky edicion do të përmbyllor më 13 korrik me prezantimin e projekteve finale të realizuara nga vetë studentët.

/E.A/

Në kuadër të festivalit më të madh, Global UBT Fest 2026, Fakulteti i Inxhinierisë së Mekatronikës në UBT hapi zyrtarisht punimet e Akademisë Verore për Inxhinierinë e Dizajnit të Produkteve, e cila po zhvillohet në Qendrën UBT – Dukagjin në Prishtinë.

Ceremonia e hapjes u udhëhoq nga koordinatorja e programit të Akademisë Verore në Fakultetin e Inxhinierisë së Mekatronikës, Prof. Saranda Demolli, i cili theksoi rëndësinë e kësaj akademie në zhvillimin e aftësive praktike dhe profesionale të studentëve në fushën e projektimit dhe dizajnimit të produkteve moderne. Ai vlerësoi se kombinimi i njohurive teorike me aplikimet praktike përbën një element kyç në përgatitjen e gjeneratave të reja të inxhinierëve, të gatshëm për sfidat e industrisë bashkëkohore.

Programi i akademisë nisi me ligjëratat e udhëhequra nga Ideal Rafuna, i cili prezantoi konceptet bazë të modelimit 2D dhe 3D, duke u fokusuar në përdorimin e metodave dhe mjeteve moderne të projektimit kompjuterik. Pjesëmarrësit patën mundësinë të zhvillojnë ushtrime praktike në dizajnimin e pjesëve mekanike, duke fituar njohuri të vlefshme mbi procesin e krijimit dhe optimizimit të komponentëve inxhinierikë.

Në ditët në vijim, akademia do të vazhdojë me tema të avancuara që përfshijnë projektimin e komponentëve të dronëve, krijimin e bashkësive (assemblies), simulimet strukturore dhe animacionin e modeleve të projektuara. Përmes këtyre sesioneve, pjesëmarrësit do të njihen me procesin e plotë të zhvillimit të një produkti – nga konceptimi dhe modelimi digjital deri te analiza funksionale dhe vizualizimi i tij.

Në kuadër të festivalit më të madh në Evropën Juglindore, Global UBT Fest 2026, Fakulteti i Menaxhmentit, Biznesit dhe Ekonomisë në UBT hapi zyrtarisht punimet e Akademisë Verore për Ekonomi, Financa, Banka dhe Sigurime.

Ceremonia e hapjes u udhëhoq nga koordinatori i kësaj akademie, Prof. Kestrim Avdimetaj, i cili theksoi rëndësinë e këtij programi veror për të gjithë pjesëmarrësit. Në fjalën e tij, ai nënvizoi rolin e akademisë në ndërlidhjen e njohurive teorike me praktikat bashkëkohore të ekonomisë dhe industrisë, duke krijuar mundësi të vlefshme për zhvillim profesional, shkëmbim të përvojave dhe fuqizim të kompetencave të studentëve dhe të rinjve pjesëmarrës.

Në kuadër të aktiviteteve të akademisë, Gazmend Selmani mbajti një ligjëratë mbi fintech-un dhe inovacionin financiar, duke prezantuar modelin IBAS si një shembull të suksesshëm të transformimit digjital të shërbimeve financiare në Kosovë. Gjatë prezantimit u trajtuan trendet bashkëkohore në industrinë fintech, roli i teknologjisë dhe i të dhënave në krijimin e vlerës, menaxhimi i rrezikut dhe përputhshmëria me rregulloret, si dhe mundësitë profesionale që ky sektor dinamik ofron për studentët dhe profesionistët e rinj.

Po ashtu, Prof. Ermal Lubishtani mbajti ligjëratën me temën “Green Investment Landscape in Kosovo: Opportunities, Gaps, and the Road Ahead for Climate-Smart FDI”. Gjatë ligjëratës u trajtuan trendet aktuale të investimeve të gjelbra, rëndësia e tyre për zhvillimin ekonomik të qëndrueshëm të Kosovës, si dhe sfidat dhe mundësitë për tërheqjen e investimeve të huaja të drejtpërdrejta, të orientuara drejt tranzicionit të gjelbër dhe zhvillimit të qëndrueshëm.

Një kontribut të veçantë në kuadër të Akademisë Verore dha edhe ekonomisti i njohur dhe ish-kryetari i Odës Ekonomike të Kosovës, Prof. Safet Gërxhaliu, i cili mbajti një ligjëratë mbi rëndësinë e stabilitetit politik si një parakusht thelbësor për zhvillimin e qëndrueshëm ekonomik të vendit. Ai theksoi se një mjedis politik i qëndrueshëm krijon kushtet e nevojshme për tërheqjen e investimeve, rritjen e konkurrueshmërisë së ekonomisë, fuqizimin e institucioneve dhe përmirësimin e klimës së biznesit. Gjithashtu, ai vuri në pah lidhjen e ngushtë ndërmjet stabilitetit politik, zbatimit të reformave dhe avancimit të procesit të integrimit evropian të Kosovës.

Në vijim të programit, prof. Shpresim Vranovci mbajti një ligjëratë me temën “Asetet Digjitale, Blockchain dhe e Ardhmja e Sektorit Bankar”, duke trajtuar transformimin që teknologjitë e reja po sjellin në sistemin financiar global. Ai theksoi potencialin e teknologjisë blockchain për rritjen e sigurisë, transparencës dhe efikasitetit të transaksioneve financiare, si dhe ndikimin e saj në zhvillimin e aseteve digjitale dhe të shërbimeve inovative bankare. Gjatë prezantimit u diskutuan gjithashtu sfidat dhe mundësitë që këto zhvillime paraqesin për institucionet financiare, si dhe rëndësia e përshtatjes së sektorit bankar me trendet e ekonomisë digjitale dhe financave të së ardhmes.

Akademia Verore për Ekonomi, Financa, Banka dhe Sigurime do të vazhdojë me aktivitete të shumta akademike dhe profesionale, duke ofruar një platformë të rëndësishme për shkëmbimin e njohurive, diskutimin e sfidave bashkëkohore dhe promovimin e ideve inovative në fushën e ekonomisë dhe financave.

Rektori i UBT-së, Prof. Dr. Edmond Hajrizi, mirëpriti në Parkun Shkencor, Inovativ dhe Teknologjik një delegacion nga Universiteti “Fan S. Noli” në Korçë, të kryesuar nga Rektori Prof. Dr. Lorenc Ekonomi, së bashku me stafin Dr. Aida Mosko, Prof. As. Dr. Lorena Zeqo dhe Marie Dojçe.

Gjatë vizitës, delegacioni pati mundësinë të njihej nga afër me infrastrukturën moderne të UBT-së, laboratorët inovativë, hapësirat teknologjike dhe projektet zhvillimore që realizohen në kuadër të Parkut Shkencor, Inovativ dhe Teknologjik.

Në takimin ndërmjet përfaqësuesve të dy institucioneve u diskutua për avancimin e bashkëpunimit akademik dhe institucional, zhvillimin e projekteve të përbashkëta shkencore dhe kërkimore, si dhe krijimin e mundësive të reja për studentët dhe stafin akademik.

Fokus i veçantë iu kushtua inovacionit në arsim, inteligjencës artificiale, programeve ndërkombëtare, shkëmbimeve akademike dhe ndërlidhjes së studimeve me tregun e punës dhe industrinë.

Rektori i UBT-së, Prof. Dr. Edmond Hajrizi, vlerësoi rëndësinë e bashkëpunimit ndëruniversitar, duke theksuar se partneritete të tilla kontribuojnë drejtpërdrejt në ngritjen e cilësisë në arsim, shkencë dhe teknologji, si dhe në krijimin e urave të reja të bashkëpunimit ndërmjet institucioneve të Kosovës dhe Shqipërisë.

Gjithashtu, delegacioni mori pjesë edhe në Konferencën për Lidership, ku Rektori i Universitetit “Fan S. Noli”, Prof. Dr. Lorenc Ekonomi, theksoi:

“UBT është pararojë jo vetëm në trojet shqiptare, por edhe në botë. Korça është një qytet me traditë në arsim dhe vendi ku u hap shkolla e parë shqipe. Ne do të vazhdojmë të angazhohemi së bashku për të zhvilluar më tej projektet tona të përbashkëta, sidomos në fushën e inteligjencës artificiale”, tha Ekonomi.