Rusia ka paralajmëruar Mbretërinë e Bashkuar për “pasoja” pas konfirmimit se dronët e prodhuar në Britani janë përdorur në sulmet e fundit ndaj objektivave ushtarake dhe industriale në Rusia. Në një deklaratë zyrtare, Ambasada e Rusisë në Mbretërinë e Bashkuar e akuzoi Britaninë se “po zgjedh me vetëdije përshkallëzimin e krizës në Ukrainë”, duke shtuar se “sa më e thellë të jetë përfshirja e saj në konflikt… aq më i lartë do të jetë çmimi që do të paguajë”.

Ukraina ka intensifikuar sulmet ndaj Moskvës dhe në zona të tjera thellë brenda Rusisë, duke synuar veçanërisht rafineritë e naftës dhe qendrat logjistike të gjigantit të shitjeve online Wildberries. Lidhur me këtë, një zëdhënës i Ministrisë së Mbrojtjes së Mbretërisë së Bashkuar deklaroi se qëndrojnë “krahas Ukrainës” dhe shtoi: “Rusia nuk duhet të ketë asnjë dyshim për vendosmërinë e kësaj qeverie për t’iu kundërvënë agresionit rus, në Ukrainë dhe kundër Mbretërisë së Bashkuar e aleatëve tanë”.

Rusia e ka kërcënuar edhe më parë Mbretërinë e Bashkuar për rolin e saj në furnizimin e Ukrainës me teknologji dronësh dhe raketa “Storm Shadow”. Ambasada ruse tha se “veprimet e Londrës do të sjellin pashmangshmërisht pasoja për të cilat do të duhet të përgjigjet”, por pa dhënë detaje mbi llojin e masave që po shqyrton Moska. Faza e fundit e luftës ka prekur drejtpërdrejt furnizimet me karburant në Rusi dhe ka goditur ekonominë e saj.

Mbretëria e Bashkuar është ndër mbështetëset më të mëdha ndërkombëtare të Ukrainës që nga nisja e pushtimit ushtarak në shkurt 2022. Ministria e Mbrojtjes konfirmoi se Britania mbetet e përkushtuar për të siguruar pajisjet e nevojshme që Ukraina të mbrohet nga pushtimi ilegal i presidentit rus Vladimir Putin. Ndërkohë, Ukraina ka përdorur javët e fundit edhe teknologji vendore të dronëve dhe raketave, përfshirë raketën e lundrimit FP-5 Flamingo.

Vetëm gjatë dy ditëve të fundit, forcat ukrainase kanë lëshuar qindra dronë drejt rajonit të Moskvës. Guvernatori rajonal Andrey Vorobyov njoftoi se një vajzë 10-vjeçare u lëndua dhe një depo e platformës Wildberries u dëmtua. Në të njëjtën kohë, 17 persona u vranë nga sulmet ruse në Ukrainë, përfshirë 10 viktima në një fshat në verilindje të vendit.

Dy kompani britanike njihen për prodhimin e dronëve të dërguar në Kiev. Një burim ushtarak konfirmoi për BBC-në se dronët e Mbretërisë së Bashkuar janë përdorur në sulmet e fundit brenda Rusisë, të cilat raportohet se kanë shkaktuar mbi 35 miliardë stërlina dëme ekonomike. Zëdhënësja e Ministrisë së Jashtme ruse, Maria Zakharova, pat deklaruar në vitin 2024 se dronët me komponentë britanikë u përdorën për të sulmuar territorin rus, përfshirë një depo karburanti në rajonin e Rostov-it. /BBC/

Rënia e nivelit të mbështetjes për Presidentin Donald Trump në pikën më të ulët të presidencës së tij raportohet nga Reuters, ku një shumicë e madhe amerikanësh janë të shqetësuar se lufta e SHBA-së me Iranin do të zgjasë për një kohë të gjatë, sipas një sondazhi Reuters/Ipsos që përfundoi të hënën.

Vetëm 33% e të anketuarve në sondazhin katërditor deklaruan se miratojnë punën e Trump në Shtëpinë e Bardhë, ndërsa 64% e mosmiratojnë atë. Mbështetja për Trump, e cila ra nga 35% sa ishte në një sondazh të mbyllur më herët këtë muaj, është më e ulët se në çdo pikë të mandatit të tij aktual dhe ka barazuar nivelin më të ulët të mandatit të tij të mëparshëm, të arritur në dhjetor 2017.

Pasi u rikthye në Shtëpinë e Bardhë në vitin 2025 me pak më pak se gjysmën e vendit që mbështeste presidencën e tij, popullariteti i Trump këtë vit pësoi një goditje pasi ai urdhëroi sulme ndaj Iranit së bashku me aleatin e SHBA-së, Izraelin. Konflikti që pasoi paralizoi një të pestën e tregtisë globale të naftës, duke nxitur një rritje të çmimit të benzinës që po rëndon mbi familjet amerikane — si dhe mbi aleatët republikanë të Trump që mbrojnë shumicën parlamentare në zgjedhjet e nëntorit.

Trump, i cili bëri fushatë me premtime për të mbajtur inflacionin nën kontroll dhe për të shmangur luftërat e gjata, fillimisht u zotua se konflikti me Iranin do të zgjaste vetëm pak javë. Megjithatë, Irani është treguar rezistent dhe e ka mbajtur tregtinë e naftës përmes Strazit të Hormuzit në masë të madhe të bllokuar, madje edhe pse konflikti është qetësuar. /Reuters/

Siç raporton BBC, i dërguari i Presidentit të SHBA-së Donald Trump për Lindjen e Mesme, Jared Kushner, ka arritur në Izrael, ku pritet të takohet me Kryeministrin izraelit Benjamin Netanyahu. Takimi vjen pasi Kushner zhvilloi biseda të rralla me Hamas-in për të diskutuar zbatimin e planit të paqes për Gazën të mbështetur nga SHBA-ja.

Muajin e kaluar, Bordi i Paqes i Trump-it njoftoi se kishte arritur marrëveshje për “çarmatimin e plotë” të Hamas-it dhe grupeve të tjera të armatosura në Gazë. Sidoqoftë, javën e kaluar Izraeli e hodhi poshtë planin prej 15 pikash të Trump-it, i cili po ashtu kërkon tërheqjen e trupave izraelite dhe rindërtimin e Gazës nën një administratë të re civile palestineze. Tetë vende myslimane publikuan të dielën një deklaratë ku dënojnë refuzimin nga ana e Izraelit.

Trump udhëheq Bordin e Paqes, i cili u krijua si një organizatë ndërkombëtare fillimisht për të sjellë paqe në Gazë, por që më vonë u zgjerua për të përfshirë konfliktet në mbarë botën. Sipas BBC, një zyrtar palestinez tha se dhëndri i Trump-it u takua të dielën në Egjipt me një delegacion të udhëhequr nga lideri i ri i Hamas-it, Khalil al-Hayya. Në një deklaratë të mëvonshme, Hamas u bëri thirrje ndërmjetësve dhe Bordit të Paqes që ta “detyrojnë” Izraelin të miratojë planin e veprimit për hapat e ardhshëm.

Nga ana tjetër, Netanyahu përballet me zgjedhje të vështira për të mbajtur pushtetin, me një koalicion që përfshin ministra të cilët favorizojnë një linjë më të ashpër ndaj Gazës. Shumë izraelitë janë po ashtu skeptikë se Hamas është i gatshëm të çarmatoset.

Takimi i Kushner me Hayya thuhet të jetë i pari i këtij niveli që nga marrëveshja e armëpushimit për Rripin e Gazës e arritur vitin e kaluar. Në takim raportohet se morën pjesë edhe të dërguarit e Bordit të Paqes, Nickolay Mladenov dhe ish-Kryeministri i Mbretërisë së Bashkuar Tony Blair, së bashku me përfaqësues të Egjiptit, Katarit dhe Turqisë. Megjithëse nuk ka pasur një deklaratë zyrtare, bisedimet raportohet se u përqendruan në veprime konkrete për çarmatimin e Hamas-it, tërheqjen e trupave izraelite dhe përpjekjet humanitare.

Gjatë qëndrimit në Egjipt, Kushner u takua gjithashtu me Presidentin egjiptian Abdel Fattah al-Sisi. Sipas medieve izraelite, Mladenov dhe Blair do të takohen po ashtu me Netanyahu-n me qëllim që të çojnë përpara planin e Trump-it. Kryeministri izraelit ka deklaruar se kërkon fillimisht çarmatimin e plotë të Hamas-it për të zbatuar marrëveshjen, duke theksuar se ushtria izraelite nuk do të kryejë asnjë tërheqje pa u çarmatosur realisht Hamas-i.

Netanyahu përballet me presion brenda kabinetit të tij për të vazhduar operacionet. Ministri i Sigurisë Kombëtare, Itamar Ben Gvir, e cilësoi draftin si “të papranueshëm” dhe u shpreh favorizues ndaj “vrasjeve të targetuara”.

Pas refuzimit të planit nga Izraeli, pati një pauzë në sulmet ajrore izraelite në Gazë, megjithëse sulmet kanë vazhduar më pas. Armëpushimi që hyri në fuqi më 10 tetor të vitit të kaluar mbetet zyrtarisht në fuqi, por ushtria izraelite ka kryer sulme pothuajse çdo ditë. Më shumë se 1,200 persona janë vrarë që nga fillimi i armëpushimit sipas Ministrisë së Shëndetësisë të udhëhequr nga Hamas, shifra këto që konsiderohen të besueshme nga OKB-ja, ndërsa Unicef raporton se të paktën 300 fëmijë kanë humbur jetën. /BBC/

Shtetet e Bashkuara deklaruan të enjten se mund ta mbajnë bllokadën detare ndaj Iranit për një kohë të pacaktuar dhe se do të rrisin presionin ekonomik mbi Teheranin, në një kohë kur bisedimet për armëpushim kanë dështuar, oferta globale e naftës po bie dhe tensionet rajonale po rriten.

Sekretari i Mbrojtjes, Pete Hegseth, u tha gazetarëve se ushtria e SHBA-së ka kapacitetin për të mbajtur një prani detare në rajon për të zbatuar bllokadën ndaj Iranit, e cila i ka shkaktuar dëme të rënda ekonomike këtij vendi.

“Marina e Shteteve të Bashkuara mund ta mbajë një bllokadë të tillë për një kohë të pacaktuar sepse do të ndërrojmë anijet me rotacion, siç kemi bërë dhe do të vazhdojmë të bëjmë,” tha Hegseth për gazetarët gjatë një udhëtimi në Panama.

Sekretari i Thesarit, Scott Bessent, tha të enjten se Shtetet e Bashkuara planifikojnë t’i shkaktojnë edhe më shumë dëm financiar Iranit.

“Ndiqni me vëmendje njoftimet e javës së ardhshme, sepse ne do të aplikojmë masa të tilla që nuk janë parë kurrë në historinë e izolimit ekonomik të një vendi,” tha ai në një intervistë për programin “Rob Schmitt Tonight” në Newsmax.

Me dështimin e marrëveshjes tentative të qershorit për t’i dhënë fund luftës, Irani ka kërkuar të ushtrojë presion mbi Uashingtonin duke marrë kontrollin e ngushticës së Hormuzit.

Irani ka sulmuar disa anije që përpiqeshin të kalonin përmes kësaj rruge detare strategjike, përmes së cilës kalonte një e pesta e naftës dhe gazit natyror të lëngshëm të botës përpara se të niste lufta në shkurt.

Bi dy anije të kompanisë shtetërore të naftës të Abu Dhabit (Abu Dhabi National Oil Company) u sulmuan teksa po kalonin nëpër ngushticë të enjten mbrëma, njoftoi agjencia shtetërore e lajmeve e EBA-së, WAM. Qeveria e Emirateve të Bashkuara Arabe e dënoi atë si një sulm iranian.

Presidenti i SHBA-së, Donald Trump, është nën presion në vendin e tij për t’i dhënë fund një me një luftë që është mjaft jopopullore, ku çmimet e larta të karburantit po ulin nivelin e mbështetjes për të dhe potencialisht po zbehin kontrollin e partisë së tij në Kongres për zgjedhjet e mesmandatit në nëntor.

Trump ka pohuar vazhdimisht se SHBA ka “kontroll të plotë” mbi ngushticën, gjë që ka nxitur reagimin mohues të Iranit. Teherani ka deklaruar se nuk do të lejojë rihapjen e rrugës detare deri sa të plotësohen kushtet e tij. Këto kushte përfshijnë heqjen e sanksioneve ekonomike dhe lirimin e meve financiare të ngrira iraniane.

Trafiku i anijeve përmes Ngushticës së Hormuzit ra në tetë anije të martën, krahasuar me një mesatare 10-ditore prej rreth 12 anijesh, dhe 130 deri në 140 anije përpara fillimit të luftës.

Shtetet e Bashkuara e hoqën bllokadën e tyre ndaj transportit detar dhe porteve të Iranit për një muaj në mes të qershorit, por që nga ajo kohë e kanë rivendosur atë, duke prerë burimin kryesor të valutës së fortë për Teheranin dhe duke thelluar humbjet e mëparshme nga goditjet e kohës së luftës në infrastrukturën e tij energjetike.

Uashingtoni më parë kishte deklaruar se do ta hiqte bllokadën ndaj Iranit pasi Irani dhe Omani, të cilët ndodhen në të dyja anët e ngushticës, të arrijnë një marrëveshje për të rikthyer transportin tregtar detar. /BCC/