Pasi lëvizja e ekstremit të djathtë – FPO, fitoi zgjedhjet parlamentare pesë muaj më parë, partitë qendrore të Austrisë arritën një marrëveshje për të formuar një qeveri të re pa të.

Partitë e qendrës së djathtë, Partia Popullore (OVP), Socialdemokratët (SPO) dhe Neos, prezantuan një program 200-faqesh që fokusohet në ringjalljen e ekonomisë dhe uljen e deficitit buxhetor.

Marrëveshja vjen pas dështimit të përpjekjes së parë për formimin e koalicionit në janar dhe pas bisedimeve të dështuara me FPO, e cila kishte fituar pothuajse 29 për qind të votave.

Qeveria e re do të përqendrohet në rregulla më të rrepta për azilin dhe do të krijojë “qendra kthimi” për kërkuesit e azilit të refuzuar, si dhe do të ndalojë ribashkimin familjar.

Programi gjithashtu parashikon një ndalim kushtetues të shamive dhe mbështetje për një Bashkimin Evropian më të fortë, shkruan The Guardian.

Pas marrëveshjes, liderët e partive do të duhet të miratojnë zyrtarisht marrëveshjen.

Kryeministri britanik Keir Starmer do të takohet me Presidentin Donald Trump në Shtëpinë e Bardhë këtë të enjte për të diskutuar mbi luftën në Ukrainë dhe lidhjet tregtare dypalëshe. Presidenti amerikan ka kërcënuar me vendosjen e tarifave ndaj Evropës dhe ka kërkuar që kontinenti të mbështetet më pak tek Uashingtoni për sigurinë e tij.

Përpara takimit, Presidenti Trump, i cili dëshiron që anëtarët e NATO-s të rrisin shpenzimet e mbrojtjes në 5% të Prodhimit të Brendshëm Bruto, përsëriti qëndrimin e tij se Evropa duhet të “fuqizohet”. Ai u tha gazetarëve në Shtëpinë e Bardhë të mërkurën se taksapaguesit amerikanë “nuk duhet të paguajnë më shumë sesa evropianët”.

Në atë që duket si përpjekje për të treguar pajtim me kërkesën e Presidentit Trump, Kryeministri Starmer njoftoi dy ditë më parë një rritje të papritur të buxhetit të mbrojtjes së Mbretërisë së Bashkuar në 2.5% të PBB-së deri më 2027. Kryeministri Starmer tha se një vit më pas buxheti për mbrojtjen do të rritet në 2.6% të PBB-së.

Departamenti amerikan i Shtetit ka njohur vendimin e gjykatës së Bosnjë dhe Hercegovinës për të dënuar me burgim presidentin e Republikës së Serbisë, Milorad Dodik.

Tammy Bruce, zëdhënësja e DASH në platformën X ka shkruar:

“Ne e njohim vendimin e gjykatës së Bosnjë dhe Hercegovinës sot në lidhje me presidentin e Republikës Serbe Milorad Dodik”.

Shtetet e Bashkuara kanë investuar me dekada për një Bosnjë dhe Hercegovinë të qëndrueshme, sipas Bruce.

“Ne kundërshtojmë fort çdo veprim nga liderët lokal që minojnë sigurinë dhe qëndrueshmërinë. Ne përkrahim Dayton dhe sovranitetin e Bosnjës dhe Hercegovinës”, shkroi ajo në X.

Gjykata në Sarajevë dënoi Dodik me një vit burgim dhe gjashtë vjet ndalesë të ushtrimit të detyrës së presidentit, për mosrespektimin e vendimeve të Përfaqësuesit të Lartë të bashkësisë ndërkombëtare, Christian Schmidt.

Pentagoni do të fillojë të shkarkojë anëtarët transgjinorë të shërbimit ushtarak që nuk plotësojnë kërkesat e reja brenda 30 ditëve, përveç nëse atyre u mundësohet përjashtim nga masa e tillë, sipas një dokumenti të ri të Departamentit të Mbrojtjes të SHBA-së.

“Anëtarët e shërbimit të cilët kanë diagnozë aktuale ose histori, ose shfaqin simptoma në përputhje me disforinë gjinore, do të procesohen për largim nga shërbimi ushtarak”, thuhet në dokumentin e bërë publik të mërkurën.

Sipas dokumentit, anëtarët mund të “shqyrtohen për përjashtim nga masa, me kusht që të ketë një interes bindës të qeverisë për të mbajtur anëtarin e shërbimit që mbështet drejtpërdrejt aftësitë luftarake”.

Për të siguruar përjashtim nga masa, anëtari i shërbimit duhet të ketë treguar 36 muaj radhazi stabilitet në identitetin i tij gjinor, pa përjetuar shqetësime ose probleme të rëndësishme në sferën sociale, të punës ose sfera të tjera kyç të jetës.

Në vitin 2016, administrata e presidentit të atëhershëm Barack Obama hoqi ndalesën e ushtrisë amerikane për trupat transgjinore, duke i lejuar ata që tashmë shërbenin të jenë të hapur për identitetin e tyre dhe të planifikojnë të pranojnë rekrutët transgjinorë deri më 1 korrik 2017. Megjithatë, pas marrjes së detyrës në janar 2017, administrata Trump në mandatin e saj të parë vonoi datën e rikrutimit deri në vitin 2018 përpara se përfundimisht ta rikthente politikën.

Pas kthimit në Shtëpinë e Bardhë këtë janar, presidenti i SHBA-së Donald Trump nënshkroi një sërë urdhrash ekzekutivë që riformësojnë ushtrinë, duke përfshirë ndalimin e individëve transgjinorë që të shërbejnë hapur.

Trump ka thënë se urdhri do të sigurojë që SHBA-ja të ketë “forcën luftarake më vdekjeprurëse në botë” duke hequr “ideologjinë transgjinore nga ushtria jonë”.

Pas urdhrit ekzekutiv, ushtria amerikane njoftoi se nuk do t’i lejojë më individët transgjinorë të regjistrohen ose të marrin procedura mjekësore të lidhura me tranzicionin gjinor.

Trump nënshkroi gjithashtu një urdhër ekzekutiv që ndalon gratë transgjinore të konkurrojnë në sportet e grave dhe vajzave dhe lëshoi ​​një tjetër që njeh vetëm gjininë mashkullore dhe atë femërore.