Duket se çdokush po flet rreth serisë së Netflix-it, “The Squid Game”, një dramë koreane që kritikon ambicien njerëzore dhe dallimin në mundësitë që përjetojnë klasa të ndryshme shoqërore.
Ky serial tregon se si 456 njerëz në një situatë të paqëndrueshme ekonomike konkurrojnë në lojëra shumë vdekjeprurëse të fëmijërisë për të fituar një çmim financiar që mund të ndryshojë jetën e tyre dhe të shkatërrojë plotësisht njerëzimin në këtë proces.
Dy javë pas premierës, seria ka mahnitur audiencën me një fenomen që nuk u pa qysh nga “Game of Thrones”, dhe ka ngjallur debate në mesin e atyre që e shohin këtë seri si kritik kundër brishtësisë së moralit njerëzor dhe ata që theksojnë se dhuna që shfaqet në serial është reflektim i mungesës së vlerave në shoqërinë e sotme.
Shumica nga ju e keni pyetur veten se kush është mbrapa këtij seriali? E vërteta është që “The Squid Game” u projektua nga Hwang Dong-hyk, regjisor, i cili e projektoi këtë ide qe pothuajse një dekadë.
Në një intervistë, Hwang tha se skenarin origjinal për një film e shkroi në vitin 2009, por për shkak të skenarit kompleks askush s’i ndihmoi ta prodhonte atë. U refuzua disa herë derisa Netflix përfundimisht e pranoi.
Autori ishte frymëzuar nga libra komik dhe nga lojërat e fëmijëve koreanë në vitet e ’70-ta dhe ’80-ta. Në fakt, roboti ikonik u bazua në një personazh nga tekstet shkollor të asaj kohe.
“Kur fillova, isha gjithashtu në telashe financiare dhe kalova shumë kohë në manhwabang (kafene në Kore) duke lexuar libra komike si Battle Royale dhe Liar Game. Unë fillova të pyes veten se si do të ndihesha nëse merrja pjesë në lojëra si kjo. Por unë e gjeta dinamikën shumë komplekse, dhe punën time e përqëndrova në përdorimin e lojërave për fëmijë”, tha Hwang për Variety.
Ai e përfundoi shkrimin e skenarit në vitin 2009, mirëpo s’gjente përkrahje nga investitorët, shtëpitë prodhuese dhe aktorët. Atë kohë, sipas Hwang, njerëzit besonin se skenari i “Squid Game” ishte i dhunshëm, kompleks, dhe çka është më e rëndësishmja, pak komercial, dhe nuk ishte i përshtatshëm për televizionet koreane, që synojnë të orientohen më shumë kah familja.
10 vjet kaluan që nga ajo kohë dhe Hwang provoi edhe njëherë. Ai ishte i bindur se do të duhej të provonte me skenarin e lojërave të fëmijëve. Fatmirësisht, Netflix – aktualisht shërbimi më i popullarizuar në botë, i dha mundësinë atij dhe i kjo i lejoi atij të kishte lirinë krijuese që i nevojitej.
“Është storie e dhimbshme. Por arsyeja pse u ktheva në këtë projekt është sepse bota u bë vendi ku për mbijetesë ndodhin këso gjërash”, deklaroi ai.
Jo gjithçka shkoi siç duhet për “The Squid Game”. Xhirimet u ndërprenë një kohë për shkak të pandemisë, dhe kur u lansua u përball me akuza për plagjiaturë. Madje thuhet se ka shumë ngjashmëri me filmin “As the Gods Will”.
“Shkrimi i skenarit ishte më i vështirë për mua, meqë ishte seri dhe jo film. M’i mori gjashtë muaj kohë që t’i shkruajë dhe rishkruajë dy episodet e para. Pastaj u konsultova me miqtë dhe mora këshilla për t’u përmirësuar”, tha ai për Variety.
Që nga premiera e tij më 17 shtator, “The Squid Game” u bë K-drama e parë që u kualifikua si shfaqja më e mirë e Netflix në Amerikë./UBTNews
Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.
Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.
Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.
Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.
Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.
“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/
Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.
Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.
Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.
Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/
Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.
Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.
Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/
Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.
Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.
Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.
Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.
Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.
Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/