Sot, më 1 korrik 2026, shënohen dy vjet nga ndarja nga jeta e shkrimtarit të madh shqiptar Ismail Kadare, një prej figurave më të rëndësishme të letërsisë bashkëkohore shqipe dhe botërore.

Kadare, i lindur më 28 janar 1936 në Gjirokastër, u konsiderua gjerësisht si prozatori më i shquar shqiptar, me një krijimtari të gjerë që përfshin romane, tregime, poezi, drama dhe ese. Veprat e tij janë përkthyer në rreth 45 gjuhë të botës, duke e bërë atë një nga ambasadorët më të njohur të letërsisë shqipe në arenën ndërkombëtare.

Gjatë karrierës së tij letrare, Kadare trajtoi tema universale si totalitarizmi, liria, historia dhe identiteti kombëtar, shpesh përmes një gjuhe simbolike dhe alegorike. Ndër veprat e tij më të njohura përmenden “Gjenerali i ushtrisë së vdekur”, “Kronikë në gur”, “Kështjella”, “Prilli i thyer” dhe “Pallati i ëndrrave”, të cilat kanë lënë gjurmë të thella në letërsinë evropiane.

I formuar në Universitetin e Tiranës dhe në Institutin “Maksim Gorki” në Moskë, Kadare u kthye në një zë të veçantë letrar që sfidoi kufizimet e kohës dhe solli një vizion kritik ndaj sistemeve totalitare. Pas viteve ’90, ai jetoi mes Francës dhe Shqipërisë, duke vijuar të botojë dhe të mbetet një nga autorët më të lexuar shqiptarë në botë.

Kadare u nderua me çmime të shumta prestigjioze ndërkombëtare, mes tyre “Man Booker International Prize” (2005), “Princesa de Asturias” për Artet (2009) dhe Çmimin “Jerusalem” (2015). Në vitin 1996 u bë anëtar i Akademisë së Shkencave Morale dhe Politike në Francë, një nga institucionet më të larta akademike evropiane.

Dy vjet pas ndarjes së tij nga jeta, vepra e Ismail Kadaresë vazhdon të lexohet, studiohet dhe të mbetet një nga trashëgimitë më të rëndësishme të kulturës shqiptare dhe evropiane të shekullit XX dhe XXI./A.K/

Forca e Sigurisë së Kosovës ka bërë të ditur se, pas dy ditësh kërkimesh intensive, ekipet e saj të kërkim-shpëtimit kanë arritur të gjejnë trupin e pajetë të një 25-vjeçari, i cili ishte raportuar i zhdukur në Liqenin e Batllavës.

Sipas njoftimit, operacioni i kërkimit është zhvilluar në bashkëpunim të ngushtë me Policinë e Kosovës, strukturat komunale të Komunës së Podujevës dhe shoqatat e kërkim-shpëtimit, të cilat kanë qenë të angazhuara në terren gjatë gjithë operacionit.

Pas lokalizimit dhe nxjerrjes nga uji, trupi i pajetë i viktimës është dorëzuar tek Mjekësia Ligjore dhe Policia e Kosovës, për procedurat e mëtejme hetimore dhe obduksionin zyrtar./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Suhareka

1 korrik 1993

Përmes Rumanisë emigruan 80 mijë shqiptarë nga Kosova

Gazeta shqiptaro-amerikane “Illyria” transmeton një informatë të agjencisë “Rojter” për numrin e refugjatëve shqiptarë që kaluan nëpër Rumani. Një udhëheqës i rojës kufitare rumune i deklaroi agjencisë Rojter se “gjatë vitit të fundit rreth 80 mijë shqiptarë nga ish-Jugosllavia kaluan vendin kufitar Kalafat në Rumani dhe jam i sigurt se ata tashmë janë diku në vendet e Perëndimit”.

1 korrik 1994

Vërshime me pasoja tragjike në Suharekë dhe rrethinë

Një i vdekur, disa të lënduar dhe dëme të mëdha materiale, ky është epilogu i vërshimeve që gjatë natës së kaluar e përfshinë Suharekën.

Vërshimet filluan diku rreth orës 00,40 në qytetin e Suharekës. Nga reshjet e mëdha lumi dhe përrenjtë e rrjedhat tjera vërshuan nga të gjitha drejtimet.

Nga vërshimet vdiq plaku 75-vjeç Salih Shala, kurse së paku 10 persona të tjerë janë lënduar. Katër prej tyre gjenden të shtrirë në Spitalin e Prizrenit.

Njoftohet për shumë shtëpi të rrënuara dhe rrëzim të rrethojave. Automjete të ndryshme, traktorë dhe multikultivatorë e aparate të ndryshme gjenden të shpërndarë nëpër ara.

Njoftohet se Xhavit Berisha i sëmurë kronik, nën gërmadhat e shtëpisë së rrënuar, u nxor i gjallë pas pesë orësh.

Thuhet se janë shkaktuar dëme të mëdha nga vërshimet dhe breshëri edhe në fshatrat përreth.

Shumë bagëti u përmbytën nga uji, po ashtu ka dëme të mëdha në shumë shitore dhe shtëpi private, sidomos në inventar dhe mobile. Nata që shkoi ishte e rëndë dhe e rrezikshme për banorët e Suharekës. Shumë njerëz kaluan natën në kulme të shtëpive, ndërsa aty ku pati mundësi u bë që gjatë natës evakuimi i qytetarëve. Dega e LDK-së në Suharekë njofton se një numër i madh familjesh kanë mbetur pa kulm mbi krye, pa mbuloja që janë përfshirë nga uji dhe pa bukë për shkak të dëmtimit të sasive të mëdha të miellit dhe të gjërave ushqimore.

Nga Suhareka bëhet thirrje për dërgim të ndihmave ushqimore dhe veshmbathje.

1 korrik 1995

Klintoni ndau 50 milionë dollarë për forcat për intervenim të shpejtë në Bosnjë

Presidenti i SHBA-ve Bill Klinton pa lejen e Kongresit shfrytëzoi mundësinë ligjore që nga buxheti ushtarak i Pentagonit të ndajë 50 milionë dollarë për financimin e forcave për intervenim të shpejtë në Bosnjë.

Ky vendim vlerësohet si manovër me qëllim që forcat e NATO-s për interevenim të shpejtë të arrijnë edhe në Ballkan, sepse, siç shkruan gazeta “Nasha borba”, vehet në dyshim jo vetëm misioni paqësor i OKB-së në Bosnjë, por edhe situata më e gjerë e sigurisë në Ballkan. Gazeta shton se ekziston rreziku që konflikti i tashëm të zgjerohet edhe në Kosovë e Maqedoni, por ekziston edhe mundësia që në fazën përfundimtare të këtij varianti të ndodhë konfrontimi midis Turqisë dhe Greqisë, dy aleatëve të rëndësishëm të krahut juglindor të aleancës së Atlantikut.

1 korrik 1997

Serbët e instaluar plaçkisin në komunën e Malishevës

Ditë më parë, persona të panjohur nga Rahoveci, në emër të udhëheqësve të instaluar të Ndërmarrjeve shoqërore, si “Një Maji” etj. kanë zhvendosur dhe dërguar për në Rahovec trafostacionin e gatshëm, të vendosur tash e disa vite në lagjen “Gërmiza” të Malishevës. njofton KI i Degës së LDK-së në këtë lokalitet.

Ky trafostacion u zhvendos pa paralajmërimin e asnjë organi përgjegjës në Malishevë, madje as të udhëheqjes së Njësisë së “Elektrokosovës”.

Ndërsa, persona të punësuar në ndërmarrjet që i udhëheqin serbët në Rahovec, tentuan para dy ditësh të zhvendosin edhe trafostacionin tjetër të vendosur në oborrin e Gjimnazit “Avdyl Frashëri”, nga i cili, me energji elektrike furnizohet kjo shkollë e mesme, Shtëpia e Shëndetit dhe Qendra për punë Sociale në Malishevë. Vetëm këmbëngulësia e udhëheqjes së këtyre institucioneve bëri që punëtorët e “Një Majit” nga Rahoveci të kthehen mbrapa pa kryer punë.

Është e çuditshme se si organet serbe në komunën e Rahovecit, pas suprimimit të dhunshëm të Kuvendit të Komunës së Malishevës, më 1991, synojnë shkatërrimin e çdo gjëje. Ata së pari me forcë patën plaçkitur tërë inventarin nga objektet shoqërore, nuk lejuan as rojet e objekteve ta kryejnë detyrën, duke i lënë ato në mëshirë të fatit, dhe më pas synuan mbylljen e shkollave të mesme, plaçkitjen dhe konfiskimin e inventarit nga objekti i Gjimnazit të Malishevës.

Punëtorët nga Ndërmarrja ndërtimore “Elan” nga Prizreni, po ashtu gjatë këtyre viteve të okupimit, kanë zhvendosur nga muret e Shtëpisë së Shëndetit në Malishevë edhe radiatorë e pjesë të tjera, të cilat i kishin rregulluar vetë, por që më vonë kishin deklaruar se investuesi, KK i Malishevës, u ka mbetur borxh për kryerjen e këtij objekti të bukur, thuhet në fund të njoftimit.

1 korrik 1998

Në Drenoc të Klinës është vrarë Skender I. Ademi

Skender Imer Ademi (51) nga Drenoci i Klinës u vra më 28 qershor gjatë sulmit serb në këtë fshat. Ai u varros parmbrëmë.

Po këtë ditë, në këtë fshat u plagosën Fidan Rasim Agushi (12), Arben Hamzë Fejza (17) dhe Labinot Ismet Fejza (10).

Në njoftimin e parë për sulmin në Drenoc u tha se janë vrarë dy shqiptarë të tjerë, por lajmi më vonë u tërhoq si i pakonfirmuar.

Sulm i armatosur në Ministrinë e Informimit të Kosovës në Gjenevë

Sot në orën 15:00 dy persona të maskuar e të armatosur me revole zëmbytës kanë tentuar të hyjnë në lokalet e Ministrisë për Informim të Republikës së Kosovës në Gjenevë, në 4 Ruelle des Templiers.

Zoti Naser Berisha, bashkëpunëtor në këtë ministri ka penguar agresorët që të hyjnë në lokale dhe pas një përleshje me ta është plagosur në anën e majtë të belit. Me t’u dëgjuar zhurma, në korridor kanë dalur bashkëpunëtorët e tjerë të ministrisë dhe fqinjët, kështu që agresorët kanë ikur në drejtim të panjohur. Zoti Berisha është dërguar me urgjencë në spitalin kantonal të Gjenevës. Mjekët kanë pohuar se i plagosuri gjendet jashtë rrezikut.

Në njoftimin e Qendrës për Informim të Republikës së Kosovës në Gjenevë thuhet se ky sulm duhet parë në kontekst të situatës së rëndë në Kosovë, si pasojë e operacioneve policore e ushtarake të soldateskës serbe. Shërbimet sekrete serbe kanë një përvojë të gjatë në likuidimin e personaliteteve politike shqiptare në botën e jashtme, siç ka ndodhur në Gjermani dhe në Belgjikë.

Sipas pohimeve të të plagusorit, ky sulm është ndërmarrë me qëllim të likuidimit të Ministrit Shatri, i cili në këtë kohë ishte në vendin e punës.

Zoti Shatri ka qenë në shënjestër të policisë sekrete serbe edhe gjatë vitit 1989, kur në banesën e tij në Gjenevë është hedhur një bombë, thuhet në kumtesën e Qendrës për Informim të Republikës së Kosovës në Gjenevë.

Trupi pa jetë i Ajet Dedincës nuk mund të tërhiqet e të varroset

Trupi pa jetë i Ajet Dedincës (43) nga fshati Lajthishtë i komunës së Obiliqit nuk mund të tërhiqet nga vendi ku është vrarë dhe të varroset, për shkak se në vendin ku gjendet ai nuk mund të depërtohet për shkak të snajperistëve serbë.

Ajet Dedinca, punëtor i Mihjes Sipërfaqësore të thëngjillit në Dobrosellë, u vra të hënën, më 29 qershor, në orët e hershme të mëgjesit, në mes të fshatrave Janovodë dhe Lajthishtë. Në atë kohë ai po kthehej nga vendi i tij i punës, ku atë natë kishte qenë në ndërrimin e natës.

Banorët e fshatit Lajthishtë kërkojnë nga përfaqësuesit e organizatave ndërkombëtare humanitare që gjenden në Kosovë që të ndihmojnë për tërheqjen e trupit pa jetë të Ajetit dhe për varrosjen e tij.

Burimet e informimit në Obiliq njoftojnë se Ajeti është vrarë nga snajperistët e vendosur në kompleksin e termocentralit “Kosova B”. Snajperistët që kanë zënë pozicione në këtë kompleks udhëhiqen nga ushëheqësi i mirëmbajtjes së termocentralit, Rade Popara dhe një refugjat i ardhur nga Knini i Kroacisë me mbiemrin Basara.

Aksionet e forcave serbe në fshatrat e komunës së Obiliqit, të cilat janë sulmuar ditët e fundit, ndihmohen edhe nga serbët e armatosur lokalë nga fshatrat Vodicë e Janovodë dhe nga Obiliqi.

Edhe një arritje e madhe ka shënuar suksesin e stafit akademik të UBT-së në arenën ndërkombëtare.

Profesori i UBT-së, njëherësh Drejtori Ekzekutiv i Asociacionit të Institucioneve Mikrofinanciare të Kosovës (AMIK), Shpresim Vranovci, është nderuar me çmimin prestigjioz “Menaxheri i Vitit 2026”

Ky vlerësim i lartë u nda gjatë një ceremonie madhështore të mbajtur në Sarajevë, të organizuar nga Agjencia Evropiane e Pavarur për Përzgjedhjen dhe Promovimin e Menaxherëve dhe Kompanive më të Suksesshme.

Çmimi, i cili iu dorëzua personalisht nga ish-presidenti i Kroacisë, Stjepan Mesić, u jepet liderëve që kanë dëshmuar rezultate të jashtëzakonshme në zhvillimin ekonomik, menaxhimin institucional dhe promovimin e praktikave më të mira profesionale.

Përtej udhëheqjes së suksesshme të AMIK-ut – ku u vlerësua për avancimin e sektorit mikrofinanciar dhe zgjerimin e përfshirjes financiare në Kosovë – prof. Vranovci luan një rol kyç në përgatitjen e brezave të rinj në UBT. Si profesor në fushat e menaxhimit, financave dhe zhvillimit ekonomik, ai sjell këtë përvojë të nivelit të lartë ndërkombëtar direkt tek studentët.

Ky çmim rikonfirmon modelin e suksesit të UBT-së, ku profesorët nuk janë vetëm teoricientë, por udhëheqës dhe praktikantë të dalluar në sektorët strategjikë të vendit dhe rajonit.

Në ceremoninë ku ishin të pranishëm përfaqësues të shumtë të bizneseve dhe institucioneve publike nga mbarë Evropa Juglindore, u nënvizua se ky çmim është një konfirmim i rëndësishëm për standardet moderne të menaxhimit që po aplikohen në Kosovë.

Për UBT-në, ky rreshtim i radhës i stafit të saj akademik në mesin e liderëve më të rëndësishëm të rajonit, dëshmon përkushtimin e vazhdueshëm të institucionit për të ofruar arsim cilësor të ndërtuar mbi ekspertizën më të lartë profesionale. Suksesi i prof. Shpresim Vranovcit tregon qartë se si ekspertiza që zhvillohet brenda UBT-së po lë gjurmë të qëndrueshme në zhvillimin ekonomik dhe institucional të mbarë rajonit. /E.A/

Foto: Rajoni press