Sport

Real Madridi kërkon përmbysjen në Mynih, Arsenali synon vulosjen e gjysmëfinales

Published

2 months ago

April 15, 2026

UBTNews

Sonte bota e futbollit do t’i ketë sytë nga Mynihu dhe Londra, ku do të përcaktohen dy gjysmëfinalistët e radhës në Ligën e Kampionëve përmes dy ballafaqimeve dramatike.

Vëmendja kryesore është përqendruar në “Allianz Arena”, ku Real Madridi do të përpiqet të përmbysë disavantazhin prej një goli ndaj Bayern Mynihut.

Skuadra gjermane arriti të triumfojë në ndeshjen e parë në Madrid me rezultatin 2-1, duke detyruar “Mbretërit” që sonte të luajnë gjithçka për gjithçka në kërkim të një përmbysjeje të madhe.

Ky ballafaqim i vërtetë mes dy gjigantëve evropianë pritet të jetë një luftë e fortë taktike dhe fizike, ku lojtarët e Real Madridit do të sfidojnë mbrojtjen bavareze për të mbajtur gjallë rrugëtimin drejt titullit të kampionit.

Paralelisht me këtë superndeshje, emocione të forta priten edhe në Londër, ku Arsenali do të presë Sportingun e Lisbonës për të vulosur kualifikimin në fazën tjetër.

Në takimin e parë të zhvilluar në Lisbonë, Arsenali arriti një fitore tejet të rëndësishme me rezultatin minimal 1-0, duke krijuar një avantazh premtues për ndeshjen kthyese.

Megjithatë, Sportingu udhëton drejt Anglisë me synimin për të befasuar “Topçinjtë” dhe për të përmbysur rezultatin, ndërsa sonte pritet të mësohet përfundimisht se cili nga këto dy ekipe do të sigurojë një vend në mesin e katër më të mirave të Evropës.

Të dyja takimet priten me interes të jashtëzakonshëm, pasi mbrëmja e sotme do të diktojë fatin e disa prej skuadrave më të fuqishme të kontinentit në garën më prestigjioze për klube.

Sport

Tunizia shkarkon trajnerin pas humbjes së rëndë ndaj Suedisë në Botëror

Published

8 hours ago

June 15, 2026

UBTNews

Vetëm pak orë pas humbjes së thellë 5:1 ndaj Suedisë në ndeshjen hapëse të Kupës së Botës 2026, Federata Tuniziane e Futbollit raportohet se ka shkarkuar trajnerin Sabri Lamouchi. Vendimi thuhet se është marrë pas një mbledhjeje urgjente të drejtuesve të federatës, të thirrur menjëherë pas ndeshjes.

Sipas raportimeve të mediave ndërkombëtare, humbja ndaj Suedisë ishte pika kulmore e një serie rezultatesh zhgënjyese, ku përfshihet edhe disfata 5:0 ndaj Belgjikës në një ndeshje miqësore para fillimit të turneut.

Edhe pse Federata Tuniziane ende nuk ka dalë me një njoftim zyrtar, mediat e huaja raportojnë se largimi i Lamouchit konsiderohet i kryer. Trajneri francezo-tunizian kishte marrë drejtimin e kombëtares vetëm në fillim të këtij viti dhe largohet pas vetëm pesë ndeshjeve në krye të ekipit.

Tunizia renditet e fundit në Grupin F pas humbjes ndaj Suedisë, ndërsa ndeshjen e radhës do ta zhvillojë kundër Japonisë më 20 qershor.

Sport

Portugalia mposht Kosovën në CEV European League 2026

Published

12 hours ago

June 15, 2026

UBTNews

Përfaqësuesja e Kosovës në volejboll për femra është mposhtur nga Portugalia me rezultat 3:0 në sete, në ndeshjen e zhvilluar në kuadër të CEV European League 2026 në Larisa të Greqisë.

Portugalia e dominoi setin e parë, duke e fituar me rezultat 25:13. Në setin e dytë, Kosova tregoi reagim më të mirë dhe qëndroi në lojë deri në momentet vendimtare, por përfaqësuesja portugeze arriti ta mbyllë edhe këtë pjesë me 25:20.

Në setin e tretë, Portugalia vazhdoi me ritëm të lartë dhe krijoi epërsi të hershme, duke e fituar 25:12 dhe duke e vulosur fitoren e përgjithshme 3:0.

Kjo ishte ndeshja e fundit e Kosovës në turneun e zhvilluar në Greqi, ku përfaqësuesja fitoi përvojë të vlefshme ndërkombëtare përballë kundërshtareve të forta në kuadër të European League 2026.

D.L

Sport

Diallo i jep fitoren Bregut të Fildishtë me gol në minutën e 90-të

Published

14 hours ago

June 15, 2026

UBTNews

Amad Diallo ishte heroi i ndeshjes, duke shënuar golin vendimtar në fitoren 1:0 të Bregut të Fildishtë ndaj Ekuadorit në Kupën e Botës 2026.

Takimi, i zhvilluar në Filadelfia dhe i vlefshëm për Grupin E, u vendos në minutën e 90-të, kur ylli i ri i Manchester Unitedit realizoi pas aktivizimit në pjesën e dytë, duke i siguruar ekipit tre pikë të arta.

Ndeshja ishte mjaft e tensionuar, me Bregun e Fildishtë që goditi tri herë shtyllën para golit vendimtar, ndërsa Ekuadori vinte në këtë përballje me një seri prej 19 ndeshjesh pa humbje.

Në këtë grup bëjnë pjesë edhe Gjermania dhe Kuraçao, ndërsa përballja e radhës mes Gjermanisë dhe Bregut të Fildishtë do të zhvillohet më 20 qershor në Toronto.

Përfaqësuesja afrikane, e cila në tri Botërorët e fundit nuk ka kaluar grupin, tashmë ka bërë një hap të rëndësishëm drejt kualifikimit në fazën nokaut.

D.L

Foto: Fifa World Cup

Sport

KF Dukagjini njofton ndarjen nga jeta të futbollistit Bajram Rragamaj

Published

14 hours ago

June 15, 2026

UBTNews

Klubi i Futbollit KF Dukagjini nga Gjakova ka bërë të ditur lajmin e rëndë për ndarjen nga jeta të futbollistit të tij të ri dhe premtues, Bajram Rragamaj.

Në një komunikatë zyrtare, klubi ka theksuar se Rragamaj do të kujtohet për kontributin, përkushtimin dhe dashurinë e madhe që kishte për futbollin dhe ekipin.

“Bajrami do të kujtohet gjithmonë për kontributin, përkushtimin dhe dashurinë që kishte,” thuhet në njoftim.

Po ashtu, klubi ka vlerësuar se humbja e tij është e madhe jo vetëm për familjen dhe të afërmit, por edhe për gjithë komunitetin sportiv që e njohu.

“Largimi i tij është një humbje e madhe për familjen, miqtë dhe gjithë komunitetin sportiv që pati fatin ta njohë,” theksohet më tej në komunikatë.

Stafi, futbollistët dhe e gjithë familja e KF Dukagjinit kanë shprehur ngushëllimet më të sinqerta për familjen Rragamaj, të afërmit dhe miqtë e të ndjerit.

D.L