Sot përfaqësuesja e vajzave e Kosovës do të përballet me Gibraltar në kuadër të kualifikimeve për Kampionatin Botëror 2027. Ndeshja zhvillohet në “Fadil Vokrri” në Prishtinë, duke filluar nga ora 17:00.

Ky është një moment i rëndësishëm për ekipin kosovar, që kërkon të tregojë forcën dhe përparimin e saj në arenën ndërkombëtare dhe të mbledhë pikë të vlefshme në grup. Fansat e futbollit të vajzave presin një përballje emocionuese dhe shfaqje të talentit të lojtarëve kosovarë.

Basketbollistja kosovare Astera Tuhina përmbylli sezonin e rregullt në NCAA me Oregon Ducks, duke u nderuar në ceremoninë Senior Day.

Në ndeshjen e fundit ndaj Washington Huskies, Tuhina kontribuoi me një treshe të rëndësishme, edhe pse Ducks humbën 70-69. Pas sezonit të rregullt, Oregon do të garojë në Big Ten Women’s Basketball Tournament kundër Purdue Boilermakers.

Astera është pjesë e Kosovës A, ka kaluar edhe përmes grupeve të moshave dhe konsiderohet një lojtare me të ardhme të ndritur. Në vitin 2022, ajo përfaqësoi Kosovën në FIBA Kampionatin Evropian për Shtetet e Vogla, duke hyrë në Top 5 të kampionatit.

Ky sezon për Tuhinën shënon një kapitull të rëndësishëm në karrierën e saj universitare në SHBA, duke përfaqësuar me dinjitet jo vetëm Oregonin, por edhe Kosovën në një nga konferencat më të forta të basketbollit universitar amerikan.

Boksierja kosovare Donjeta Sadiku ka fituar medaljen e artë në turneun e 77-të ndërkombëtar të boksit “Strangja 2026”, i cili u zhvillua në Sofje, Bullgari.

Sadiku triumfoi në finale ndaj brazilianes Rebeca De Santos në kategorinë -60 kg, duke shënuar gjithsej katër fitore gjatë turneut. Ky është suksesi i saj i dytë radhazi në këtë turne, pasi kishte fituar medaljen e artë edhe vitin e kaluar.

Turneu “Strangja” është më i vjetri në Evropë dhe tërheq boksierët më të mirë të kontinentit, duke e bërë arritjen e Donjetës edhe më të rëndësishme.

Urime të mëdha Donjetës Sadiku për këtë sukses fantastik dhe për përfaqësimin e shkëlqyer të Kosovës në arenën ndërkombëtare!