Lajmet

Raporti 24 orësh i Policisë së Kosovës

Published

1 year ago

August 19, 2025

UBT News

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 2284 tiketa trafiku, janë shkaktuar 85 aksidente me dëme materiale dhe 38 aksidente me të lënduar. Zyra e Informimit nga PK ka njoftuar se 31 persona janë arrestuar, kurse 14 janë dërguar në mbajtje.

INCIDENTET KRIMINALE-PRISHTINË

SHKAKTIM I RREZIKUT TË PËRGJITHSHËM

Rr. Lasgush Pogradeci, Prishtinë 18.08.2025 – 00:02. Është raportuar për të shtëna me armë, në vendin e ngjarjes policia ka hasur katër persona dy femra dhe dy meshkuj kosovarë, por gjatë kontrollit të tyre nuk është gjetur asgjë. Në vendin e ngjarjes janë sekuestruar pesë (5) gëzhoja, por arma nuk është gjetur. Të dyshuarit janë sjellë në stacion dhe me urdhër të prokurorit pas intervistimit janë liruar në procedurë të rregullt.

POSEDIM & PËRDORIM I PAAUTORIZUAR I ARMËS

Rr. Astrit Rrushi, Prishtinë 18.08.2025 – 19:07. Njësitet policore pas pranimit të informatës lidhur me rastin, kanë dalë në vendin e ngjarjes dhe kanë takuar e intervistuar disa dëshmitarë të cilët kanë deklaruar se pas një përleshje në mes dy të rinjve, ka pasur shkëmbim me armë zjarri në mes tyre dhe të njëjtit janë arratisur. Sipas informatave nga vendi i ngjarjes të lënduar nuk ka, por janë gjetur e konfiskuare dy gëzhoja të armës së zjarrit dhe një thikë. Lidhur me rastin është informuar edhe prokurori, ndërsa njësitet policore janë duke hetuar rastin.

HETIM MBI VDEKJEN

Obiliq 18.08.2025 – 06:15. Viktima mashkull kosovar, në një shtëpi ishte gjetur pa shenja jete, vdekjen e ka konstatuar mjeku në vendin e ngjarjes. Prokurori kujdestar ka dalë në vendin e ngjarjes dhe me urdhër të tij trupi i pa jetë është dërguar në IML për obduksion.

DHUNIM

Prishtinë 12.08.2025 – 19:43. Viktima femër kosovare, ka raportuar se pa dëshirën e saj është dhunuar nga i dashuri i saj me të cilin janë në lidhje dashurie. Është njoftuar prokurori dhe ai ka urdhëruar që të bëhen ekzaminimet e nevojshme në lidhje me viktimën. Rasti është duke u hetuar.

AKSIDENT TRAFIKU ME FATALITET

Fsh. Llapushnik / Rr. Nacionale Prishtinë-Pejë 18.08.2025 – 20:50. Ka ndodhur aksident në trafik në të cilin kanë qenë të përfshira dy vetura udhëtarësh njëra me targa vendore dhe tjetra me targa të huaja, me drejtues meshkuj kosovarë. Si pasojë e aksidentit, lëndime vdekjeprurëse kanë pësuar dy viktimat dhë një ka pësuar lëndime. Me urdhër të prokurorit trupat e pajetë janë dërguar në IML për obduksion, ndërsa i lënduari është dërguar në QKUK për tretman mjekësor.

INCIDENTET KRIMINALE-GJILAN

SHKAKTIM I RREZIKUT TË PËRGJITHSHËM

Rr. Fatmir Ratkoceri, Ferizaj 18.08.2025 – 02:27. Është raportuar për të shtëna me armë zjarri nga një veturë. Njësiti policor ka dalë në vendin e ngjarjes dhe kanë marrë informatë se shoferi i një automjeti në lëvizje kishte shtënë me armë disa here. Në vendin e ngjarjes janë gjetur dhe sekuestruar dy gëzhoja dyshohet të armës me gaz. Nuk raportohet për të lënduar. Rasti është duke u hetuar.

Fsh. Llabjan, Novobërd 17.08.2025 – 13:10. Është raportuar se një fëmijë rreth 12 vjeç ka marrë veturën e babait dhe ka filluar ta ngasë atë në oborrin e shtëpisë. Motra e tij ka tentuar ta ndalojë, por ajo është goditur me veturë dhe ka pësuar lëndime trupore, e njëta është dërguar në QKUK për tretman mjekësor.

ASGJËSIMI, DËMTIMI OSE HEQJA E PAJISJEVE MBROJTËSE DHE RREZIKIMI I SIGURISË NË VENDIN E PUNËS

Rr. Metush Krasniqi, Gjilan 18.08.2025 – 12:00. Viktima mashkull kosovar, punëtor i një kompanie deri sa kishte qenë duke punuar në një objekt te kompanisë kishte ardhur në kontakt fizik me rrymën dhe ishte alivanosur. Ndihma mjekësore i është dhënë në Qendrën Emergjente Gjilan dhe më pas është transferuar në QKUK-Prishtinë për tretman të mëtutjeshëm mjekësor. Lidhur me rastin është arrestuar pronari i kompanisë dhe pas intervistimit me vendim të prokurorit është dërguar në mbajtje.

INCIDENTET KRIMINALE-FERIZAJ

NGACMIM

Kaçanik 18.08.2025 – 14:30. Është arrestuar i dyshuari mashkull kosovar, për shkak të dyshimit se kishte hapur llogari në rrjetin social facebook duke keqpërdorur të dhënat e viktimës femër kosovare, si emrin, mbiemrin, fotografi etj. Pas intervistimit, me vendim të prokurorit i dyshuar është dërguar në mbajtjes.

MASHTRIM

Kaçanik 31.07.2025. Me datë 18.08.2025 është arrestuar i dyshuari shtetas i Shqipërisë, nën dyshimin se i njëjti ka mashtruar viktimën mashkull kosovar, të cilit sipas marrëveshjes kishte për t’ia kthyer me datën e cekur dy makina të cilat ia kishte dhënë në shfrytëzim të dyshuarit, por i dyshuari nuk i kishte kthyer as pas kësaj date. Me vendim të prokurorit i dyshuari pas intervistimit është dërguar në mbajtje.

SULM SEKSUAL

Ferizaj 18.08.2025 – 12:30. Në rast janë të përfshirë një femër e mitur dhe një i dyshuar i panjohur. Lidhur me rastin është njoftuar prokurori kujdestar i cili ka sugjeruar të mirën të gjitha veprimet hetimore për identifikim e të dyshuarit dhe rastit në përgjithësi.

DHUNË NË FAMILJE

Ferizaj 18.08.2025 – 15:00. Është arrestuar i dyshuari mashkull kosovar, nën dyshimin se i njëjti bashkë me nënën e tij, kanë ushtruar presion ndaj viktimës (gjyshit). Me vendim të prokurorit, e dyshuara pas intervistimit është liruar, ndërsa i dyshuari është dërguar në mbajtje.

INCIDENTET KRIMINALE-PRIZREN

KEQPËRDORIM I POZITËS APO AUTORITETIT ZYRTAR

Prizren 18.08.2025 – 14:50. Është arrestuar i dyshuari mashkull kosovar, teknik i pylltarisë në Agjensionin Pyjor të Kosovës, me dyshimin se duke shfrytëzuar detyrën zyrtare i ka tejkaluar kompetencat e tij me qëllim që të përfitojë dobi pasurore për vete, duke marrë para nga qytetarët e ndryshëm të rajonit të Prizrenit. Lidhur me rastin me vendim të prokurorit i dyshuari është dërguar në mbajtje për 48 orë.

POSEDIM & PËRDORIM I PAAUTORIZUAR I ARMËS

Fsh. Lubizhdë e Hasit, Prizren 18.08.2025 – NN. Është arrestuar i dyshuari mashkull kosovar, nën dyshimin se i njëjti gjatë një ahengu familjar ka shtënë me armë zjarri. Njësitet policore në vendin e ngjarjes te i dyshuari kanë gjetur dhe konfiskuar një pistoletë me gaz, 7-fishekë dhe 4-gëzhoja. Me vendim të prokurorit i dyshuari pas intervistimit është dërguar në mbajtje.

VJEDHJE E AUTOMJETIT

Fsh. Reshtan, Suharekë 18.08.2025 – 12:30. Ankuesi mashkull kosovar, ka lajmëruar se i është vjedhur automjeti me targa vendore. Sipas ankuesit vetura i është vjedhur nga persona të panjohur më datë 16.08.2025 rreth orës 04:00 nga oborri i shtëpisë. Rasti nën hetime.

PERSON I ZHDUKUR

Rr. Selajdin Berisha, Prizren 18.08.2025 – 17:00. Ankuesja femër kosovare, ka raportuar se vëllai i saj ka dalë nga shtëpia dhe nuk dihet vendndodhja e tij. Lidhur me rastin është informuar edhe prokurori, ndërsa njësitet policore janë duke hetuar rastin.

INCIDENTET KRIMINALE-PEJË

HETIM I VDEKJES

Fsh. Cerkolez, Istog 18.08.2025 – 15:14. Është raportuar se viktima mashkull kosovar, ishte gjetur pa shenja jete në automjetin e tij, vdekjen e të cilit e ka konstatuar mjeku. Me urdhër të prokurorit trupi i pa jetë është dërguar në IML për obduksion. Rasti është duke u hetuar.

DHUNË NË FAMILJE & ARMËMBAJTJE PA LEJE

Pejë 18.08.2025 – 00:30. Të përfshirë në rast kanë qenë një femër kosovare dhe bashkëshorti i saj. Policia nga i dyshuari mashkull kosovar, ka konfiskuar një armë me katër fishekë. Me vendim të prokurorit i dyshuari është arrestuar dhe është dërguar në mbajtje.

DHUNË NË FAMILJE

Klinë 15.08.2025 – 22:00. Është raportuar se viktima femër kosovare me 18.08.2025, ka raportuar se në vazhdimësi ajo dhe fëmijët e saj janë duke përjetuar dhunë psikike dhe fyerje nga bashkëshorti i saj. Pas intervistimit të palëve me urdhër të prokurorit rasti procedohet në procedurë të rregullt.

ARMËMBAJTJE PA LEJE

Klinë 18.08.2025 – 02:00. Është konfiskuar një armë pistoletë me një karikator dhe pesë fishekë e cila është gjetur në banesën e një femre kosovare për të cilën ajo ka deklaruar se nuk i përket asaj, por pasi që kishte hyrë në banesë armën e kishte vërejtur në kuzhinë. Me urdhër të prokurorit rasti është iniciuar dhe vazhdon të hetohet.

ASGJËSIM APO DËMTIM I PASURISË

Junik, 17.08.2025, 15:10, Lidhur me rastin janë identifikuar dy fëmijë. Është njoftuar prokurori për të mitur dhe QPS.

PERSON I ZHDUKUR

Istog 17.08.2025 – 07:20. Ankuesi mashkull kosovar, ka raportuar se vëllai i tij ka dalë nga shtëpia dhe ende nuk dihet gjë për vend-ndodhjen e tij. Rasti është duke u hetuar.

INCIDENTET KRIMINALE-GJAKOVË

DHUNË NË FAMILJE

Gjakovë 18.08.2025 – 09:00. Janë arrestuar dy të dyshuara femra kosovare, të cilat pas një mosmarrëveshje gjatë një konfliktit verbal kanë pasur edhe kontakt fizik me viktimën femër. Lidhur me rastin viktima ka pranuar tretman mjekësor dhe e njëjta ka refuzuar strehimin ne shtëpinë e sigurt dhe është kthyer në shtëpi tek nëna e saj. Pas intervistimit me urdhër të prokurorit të dyshuarat janë liruar në procedurë të rregullt.

Gjakovë 18.08.2025 – 15:30. Është arrestuar e dyshuara për shkak se e kishte kanosur me viktimën mashkull kosovar, me të cilin kishte qenë duke bashkëjetuar. E dyshuara pas intervistimit me vendim të prokuronit është dërguar në mbajtje.

Gjakovë 18.08.2025 – 19:30. Është arrestuar i dyshuari mashkull kosovar, nën dyshimin se i njëjti në gjendje të dehur ka keqtrajtuar bashkëshorten e tij. Viktimës i është ofruar tretman mjekësor, ndërsa i dyshuari me vendim të prokurorit është dërguar në mbajtje.

ARMËMBAJTJE PA LEJE

Rr. Ahmet Jashari, Malishevë 18.08.2025 – 07:50. Është arrestuar i dyshuari mashkull kosovar, pasi që më datë 17.08.2025 në një aheng familjar kishte shtënë me armë në ajër. Nga i dyshuari është konfiskuar një pistoletë me gaz me karikator dhe dy fishekë. Pas intervistimit me urdhër të prokurorit i dyshuari është liruar në procedurë të rregullt.

DHUNIM

Gjakovë 10.08.2025 – NN. Lidhur me rastin e lartcekur, më datë 18.08.2025 është arrestuar i dyshuarit mashkull kosovar dhe i njëjti pas intervistimit me vendim të prokurorit është dërguar në mbajtje për 48 orë.

SHKAKTIM I RREZIKUT TË PËRGJITHSHËM

Fsh. Damjan, Gjakovë 17.08.2025 – 01:32. Më 18.08.2025 janë identifikuar tre te dyshuar meshkuj kosovarë, të cilët me datë 17.08.2025 në një aheng familjar kishin shtënë me armë zjarri. Nga të dyshuarit janë konfiskuar: një pistoletë me dy karikator dhe 120 fishekë, një leje e armës, një armë automatike AK 47 dhe një pistoletë. Pas intervistimit me urdhër të prokurorit të dyshuarit janë liruar në procedurë të rregullt.

INCIDENTET KRIMINALE-MITROVICË JUG

VDEKJE E DYSHIMTË

Fsh. Prekaz i Poshtëm,Skenderaj 18.08.2025 – 10:08. Pas pranimit të informatës nga njësiti policor është gjetur një person mashkull pa shenja jete. Në vendin e ngjarjes përveç njësive policore ka dalë autoambulanca dhe nga mjeku është konfirmuar se viktima ishte pa shenja jete. Me urdhër të prokurorit është dërguar në IML për obduksion.

SHKAKTIM I RREZIKUT TË PËRGJITHSHËM

Rr. Mbretëresha Teutë, Mitrovicë Jug 18.08.2025 – 06:00. Ankuesi mashkull kosovar, ka raportuar se në market një person i dyshuar fillimisht ka thyer xhamin me një mjet të fortë pastaj brenda ka hedhur një shishe mollotov me qëllim për ta djegur marketin. Nuk ka pasur persona në market, ndërsa një kalimtar i rastit ka lokalizuar zjarrin. Policia ka dalë në vendin e ngjarjes dhe po heton rastin.

Rr. Mujë Krasniqi, Skenderaj 18.08.2025 – 14:00. Ankuesi mashkull kosovar, ka lajmëruar se pasi ka ardhur nga mërgata ka vërejtur se në katin e parë të shtëpisë janë të dëmtuara roletat e plastikës në disa vende dhe sipas tij dyshohet nga predha e armës së gjuetisë pasi që në vendin e ngjarjes nga njësiti policor janë gjetur dhe konfiskuar dy sfera te fishekut të armës së gjuetisë. Rasti nën hetime.

LËNDIM I RËNDË TRUPOR

Vushtrri, 20.05.2025, Drejtoria për Hetimin e Krimit të Organizuar dhe Krimeve të Rënda, Sektori për Krime të Rënda, lidhur me rastin e datës 20 maj 2025, që ka të bëjë me veprën penale “Lëndim i rëndë trupor” më 18.08.2025, ka zbatuar urdhëresën e leshura nga Gjykata Themelore në Mitrovicë, Dega e Gjykatës në Vushtrri, ku është kryer kontrolli në një lokacion në Vushtrri, gjatë kontrollit si prova materiale janë sekuestruar dy telefona celular.

Pas kontrollit i dyshuari është shoqëruar në polici për intervistim, i njëjti në prezencën e avokatit të tij mbrojtës është intervistuar në cilësinë e të dyshuarit dhe pas intervistimit me vendim të prokurorit të çështjes është dërguar në mbajte për 48 orë.

INCIDENTET KRIMINALE-MITROVICË VERI

VDEKJE E DYSHIMTË

Rr. Mbreti Pjetër, Zveqan 18.08.2025 – 06:00. Është raportuar se një mashkull është gjetur pa shenja jete në rrethojat e shtëpisë së tij. Njësitë policore kanë dalë në vendin e ngjarjes si dhe mjekësia ligjore të cilët me urdhër të prokurorit kanë marrë trupin e pa jetë dhe dërguar në IML për obduksion. Rasti është duke u hetuar.

INCIDENTET KRIMINALE-DEPARTAMENTI I POLICISË KUFITARE

TREGTI E NDALUAR

Fsh. Shkozë, Prizren 18.08.2025 – 15:50. Njësiti policor ka ndaluar një automjet me targa vendore të cilin kishte qenë duke e drejtuar i dyshuari mashkull kosovar. Gjatë kontrollit është konstatuar se në automjet i dyshuari kishte tekstil të llojeve të ndryshme për të cilin mall nuk posedonte ndonjë dokument. Me urdhër të prokurorit rasti procedohet në procedurë të rregullt, ndërsa inspektorët mbetet që të dalin ne vendin e ngjarjes për regjistrimin dhe vlerën e mallit.

POSEDIM I PAAUTORIZUAR I NARKOTIKËVE

Maja e Zezë, Pejë 18.08.2025 – 21:30. Njësitet policore gjatë patrullimit kanë ndaluar të dyshuarin mashkull kosovar, i cili ishte duke drejtuar veturën dhe tek i njëjti gjatë kontrollit në një çantë kanë gjetur dhe konfiskuar rreth 2-gramë substanca të dyshuara narkotike të llojit marihuanë. Në konsultim me prokurorin i dyshuari pas intervistimit është liruar në procedurë të rregullt.

ARMËMBAJTJE PA LEJE

Fsh. Vermicë, Prizren 17.08.2025 – 20:30. Lidhur me rastin me 18.08.2025 gjatë kontrollit në automjetin e të dyshuarit janë gjetur dhe sekuestruar katër armë zjarri të llojeve të ndryshme, rreth 128 fishekë të kalibrave të ndryshëm si dhe pjesë tjetra të armëve. I dyshuari mashkull kosovar, është arrestuar dhe me vendim të prokurorit është dërguar në mbajtje.

Vendi

Haxhiu liron nga detyra 18 gjyqtarët serbë të dorëhequr në vitin 2022

Published

13 hours ago

September 2, 2026

UBTNews

Ushtruesja e detyrës së presidentes, Albulena Haxhiu, ka dekretuar lirimin nga detyra të 18 gjyqtarëve nga komuniteti serb, të cilët kishin dhënë dorëheqje përgjatë vitit 2022. Vendimi vjen pas propozimit zyrtar të dërguar nga Këshilli Gjyqësor i Kosovës (KGJK).

Më 27 gusht, KGJK-ja kishte refuzuar kërkesën e gjyqtarëve dhe stafit mbështetës serb për tërheqjen e dorëheqjeve të tyre dhe rikthimin në sistem, duke i rekomanduar presidencës lirimin e tyre përfundimtar nga detyra. Një vendim të ngjashëm më parë e ka marrë edhe Këshilli Prokurorial i Kosovës.

Ky hap ka nxitur reagimin e Bashkimit Evropian, i cili shprehu “keqardhje të thellë” dhe kërkoi që riintegrimi i gjyqtarëve dhe prokurorëve të dorëhequr të trajtohet brenda kornizës së dialogut të lehtësuar nga Brukseli. Rreth 130 pjesëtarë të sistemit të drejtësisë u larguan nga institucionet e Kosovës në nëntor të vitit 2022, si pjesë e braktisjes kolektive të funksioneve publike në katër komunat veriore. /E.A/

Lajmet

Çka pas 6 votave të LDK-së kundër Sejdiut?

Published

14 hours ago

September 2, 2026

UBTNews

Marrëveshja mes Lëvizjes Vetëvendosje (LVV) dhe Lidhjes Demokratike të Kosovës (LDK) për zgjedhjen e presidentit të ardhshëm të Kosovës u refuzua nga gjashtë deputetë të LDK-së, duke ngritur pikëpyetje nëse ajo mund ta prodhojë kreun e ri të shtetit.

Pavarësisht kundërshtisë nga gjashtë deputetë, kreu i LVV-së, Albin Kurti, tha se marrëveshja me partinë e Lumir Abdixhikut qëndron dhe është e vlefshme.

Por, për Donika Eminin, ky konfigurim politik më nuk mjafton.

Emini, hulumtuese në Grupin Këshillues për Politikat e Ballkanit në Evropë (BiEPAG), thotë për Radion Evropa e Lirë se vendimi i gjashtë deputetëve të LDK-së për të mos e mbështetur Bekim Sejdiun – kandidatin e përbashkët të LVV-së dhe LDK-së – për president, nënkupton se konfigurimi aktual s’i ka 80 deputetë që duhet të marrin pjesë në proces, duke bërë që të lindë nevoja për përfshirjen e partive të tjera në marrëveshjen për president.

LVV-ja ka 53 mandate, ndërsa LDK-ja aktualisht, sipas Abdixhikut, ka vetëm 12 deputetë që e mbështesin Sejdiun për president. Nëse llogariten edhe pakicat joserbe – me të cilat Kurti bëri Qeverinë e kaluar – sërish nuk arrihet kuorumi që Sejdiu të bëhet presidenti i gjashtë i Kosovës që nga pavarësia.

Kurti ka kohë që refuzon votat e Listës Serbe – partisë më të madhe të serbëve në Kosovë, që ka mbështetjen e Beogradit, e cila ka fituar nëntë mandate në zgjedhjet e qershorit.

Partia Demokratike e Kosovës, ndërkaq, ka 22 deputetë, ndërkaq Aleanca shtatë.

“Për ta bërë [marrëveshjen] funksionale, duhet të zgjerohet me një partner tjetër, qoftë Aleanca apo PDK-ja. Por, kjo do të ishte një konfigurim krejtësisht i ri politik dhe do të sillte edhe një sërë sfidash të reja”, thotë Emini.

Prej muajsh, Aleanca e Ardian Gjinit ka paraqitur gjashtë kushte në këmbim të mbështetjes për institucionet, ndërkaq PDK-ja e Bedri Hamzës ka refuzuar që të bashkëpunojë me Kurtin, si për Qeverinë, ashtu edhe për presidentin, duke deklaruar se këtë mandat do të qëndrojë në opozitë.

Vetëm LDK-ja e Lumir Abdixhikut pranoi të negocionte me Kurtin, fillimisht për bashkëqeverisje – proces që dështoi pas kërkesës fillestare të LDK-së për të pasur presidentin – dhe më pas për presidentin, që rezultoi me marrëveshjen e 31 gushtit.

Atë ditë, LVV-ja dhe LDK-ja dolën me kandidatin e përbashkët për president, por vetëm një ditë më vonë, gjashtë deputetë të LDK-së dolën kundër.

Kreu i LDK-së tha se me këtë vendim, pashmangshëm këta deputetë po e çojnë vendin në zgjedhje, ndërkaq Kurti më vonë e vlerësoi si “absurde”, “të dëmshme” dhe “të papërgjegjshme” sjelljen e tyre, duke shtuar se ata dëshirojnë zgjedhje të reja.

Emini thotë se paralajmërimi i Kurtit se do të takohet sërish me Abdixhikun dhe me kryesinë e LVV-së për marrëveshjen nuk nënkupton se ai domosdoshmërisht po planifikon zgjedhje, por është një “strategji që i jep atij kohë dhe hapësirë politike”.

“Ai mund të vazhdojë të negociojë me LDK-në, të presë nëse gjashtë deputetët ndryshojnë qëndrim, të shohë nëse Aleanca mund të jetë më fleksibile dhe, mbi të gjitha, të presë edhe zhvillimet në Hagë më 16 shtator”, thotë ajo, duke iu referuar shpalljes së aktgjykimit për rastin ndaj ish-udhëheqësve të Ushtrisë Çlirimtare të Kosovës, të akuzuar për krime lufte dhe krime kundër njerëzimit.

Ndonëse thotë se jo domosdo Kurti po planifikon zgjedhje të reja, nëse nuk arrihet që Aleanca apo PDK-ja të futen në marrëveshje për president, atëherë “koha e fituar mund të funksionojë edhe në favor të një skenari zgjedhor”.

“Dhe, këtu kalendari bëhet politikisht i rëndësishëm. Dështimi për të zgjedhur presidentin do ta shtynte vendin drejt një tjetër procesi zgjedhor në një kohë që mund t’i përshtatet Kurtit shumë më tepër sesa kundërshtarëve të tij”, shprehet ajo.

Sa i përket Aleancës, Emini thotë se ka hapësirë për fleksibilitet, pas paraqitjes së kushteve në këmbim të votës. Por, sipas saj, shtatë votat e partisë që drejtohej nga Ramush Haradinaj “nuk mund të merren automatikisht”.

PDK-ja e Hamzës, sipas saj, është në pozicion më kalkulues. Kjo parti, vlerëson Emini, nuk është e interesuar për zgjedhje, por është më e interesuar se çfarë do të ndodhë pas vendimit të Gjykatës Speciale në Hagë.

Sipas saj, një vendim lirues për ish-presidentin Hashim Thaçi, njëherësh ish-drejtues i PDK-së, do t’i hapte rrugë rikthimit potencial të tij në politikë, dhe rrjedhimisht do të ndryshonte ndjeshëm dinamikat brenda kësaj partie dhe skenës politike në përgjithësi.

Emri i Thaçit është propozuar për president nga ish-kreu i Aleancës, Haradinaj. Ndonëse ka pasur përkrahje për këtë kandidaturë nga Arian Tahiri i PDK-së, sekretarja e përgjithshme e partisë, Vlora Çitaku, ka thënë se Thaçi nuk ka nevojë për poste, por “për liri”.

E, pikërisht për shkak të zhvillimeve në Hagë, në këtë moment, sipas Eminit, për PDK-në do të ishte shumë e vështirë që të angazhohej në një marrëveshje të re politike me Kurtin.

“Pas vendimit, në varësi të asaj se çfarë ndodh dhe si ndikon kjo në PDK, mund të kemi një situatë krejtësisht tjetër dhe një diskutim tjetër politik”, vlerëson ajo.

Megjithatë, duke folur për mundësinë e gjetjes së rrugdaljes, ajo vë theksin tek afatet kohore.

“Afatet për zgjedhjen e presidentit janë shumë të ngushta dhe zgjerimi i një koalicioni, negocimi me një partner të ri dhe gjetja e një formule që mund të pranohet nga të gjithë nuk është diçka që mund të bëhet lehtë në pak ditë”, shprehet ajo.

Rrjedhja e afatit 60-ditor për presidentin nis me konstituimin e Kuvendit – proces që nisi më 6 gusht, por nuk është përmbyllur pasi LVV-ja insiston që fillimisht të ketë pajtim për presidentin.

Por, Emini vlerëson se Kurti e menaxhoi politikisht mirë situatën pas zhvillimeve në LDK, që vetë kreu i LVV-së i vlerësoi si negative.

Sipas saj, ai po ndërton narrativin ku paraqitet si lider i gatshëm për kompromis, “që vazhdon të kërkojë dialog me LDK-në dhe që është i gatshëm të presë deri në fund për ta gjetur një zgjidhje”.

Në deklarimin në orët e vona të 1 shtatorit, Kurti insistoi se kandidati për president për LVV-në vazhdon të jetë Bekim Sejdiu – ish-gjyqtar i Gjykatës Kushtetuese dhe ish-diplomat.

Sipas Eminit, Kurti po bën “një lëvizje shumë strategjike” duke ngulur këmbë se “Bekim Sejdiu është ‘kandidat i Republikës’ dhe jo thjesht kandidat i një marrëveshjeje partiake”.

“Në këtë mënyrë, ai e ngre kandidaturën mbi marrëveshjen LVV–LDK dhe e paraqet mbështetjen e tij si çështje të interesit institucional. Në mënyrë indirekte, kjo është edhe një kritikë ndaj mënyrës se si po sillet LDK-ja: nëse kandidati është i Republikës dhe nëse qëllimi është zhbllokimi i institucioneve, atëherë ata që e kundërshtojnë mund të paraqiten si ata që po e pengojnë këtë interes”, vlerëson ajo.

Pse Abdixhiku dhe Kurti po fajësojnë gjashtë deputetët?

Megjithatë, një gjë e përbashkët e Kurtit dhe Abdixhikut pas zhvillimeve më 1 gusht është fajësimi i gjashtë deputetëve të zgjedhur të LDK-së që kundërshtuan marrëveshjen për president: Avdullah Hoti, Hykmete Bajrami, Kujtim Shala, Arben Gashi, Armend Zemaj dhe Janina Ymeri.

Të gjithë janë arsyetuar se vota e tyre është kundër bashkëpunimit me LVV-në dhe “zgjatjen e pushtetit” të Kurtit.

Emini thotë se Kurti dhe Abdixhiku kanë arsye të ndryshme pse e zhvendosin fajin te ky grup deputetësh.

Kurti, sipas saj, fajëson këta deputetë për bllokadën, e jo udhëheqjen e LDK-së, sepse ajo “mund t’i duhet për marrëveshje në të ardhmen edhe nëse ka zgjedhje të jashtëzakonshme”.

Abdixhiku, ndërkaq, e përdor fajësimin për një objektiv tjetër politik, thotë ajo. Ai “mund të distancohet nga përgjegjësia për rezultatin e ardhshëm të LDK-së”, vlerëson Emini.

“Nëse partia e tij dështon, ai tashmë ka krijuar një narrativ ku fajin e mbajnë ata gjashtë deputetë që bllokuan marrëveshjen, ndërsa përgjegjësia politike për performancën e partisë zhvendoset tek ata. Në këtë kuptim, gjashtë deputetët mund të bëhen edhe një lloj ‘scapegoat’ [v.j. dash kurbani] për problemet më të gjera të LDK-së”, vlerëson ajo.

Megjithatë, kundërshtimet brenda LDK-së, sipas Eminit, kanë të bëjnë me atë se procesi i negociatave për marrëveshjen nuk ishte transparent. Ajo thotë se ky rezultat ishte i pritshëm, pasi brenda partisë së Abdixhikut prej kohësh ka ndarje e rivalitete “që shkojnë përtej kësaj kandidature”.

Abdixhiku u sfidua nga një mocion mosbesimi në korrik, por i mbijetoi atij, duke vazhduar në krye të partisë. Edhe më herët, ai kishte kërkuar votëbesim për të udhëhequr partinë, pas rezultatit zgjedhor.

“Abdixhiku, si lider i partisë, mban përgjegjësinë kryesore për faktin që nuk ka arritur ta mbajë të bashkuar grupin e tij parlamentar dhe ta menaxhojë këtë konflikt brenda partisë. Ajo që po shohim sot është, mbi të gjitha, një krizë e lidershipit dhe e kohezionit të brendshëm të LDK-së, e cila tani po manifestohet përmes procesit presidencial”, vlerëson Emini.

Nëse skena politike e Kosovës dështon të zgjedhë një president të ri, qytetarët do t’iu drejtoheshin sërish kutive të votimit – për zgjedhjet e katërta në më pak se dy vjet dhe të dytat për shkak të moskonsensusit për çështjen e presidentit.

Vendi

Aktakuzë ndaj dy mjekëve në Vushtrri dhe 9 qytetarëve për ryshfet

Published

14 hours ago

September 2, 2026

UBTNews

Prokuroria Themelore në Mitrovicë, Departamenti i Krimeve të Rënda, ka ngritur aktakuzë në Gjykatën Themelore në Mitrovicë ndaj dy mjekëve të Spitalit të Vushtrrisë, V.R. dhe E.S., nën dyshimin për kryerjen e veprës penale “Marrja e ryshfetit”. Përmes të njëjtës aktakuzë, nëntë persona të tjerë (F.V., B.Q., F.Xh., B.G., B.A., K.H., S.N., V.Y. dhe L.K.) po akuzohen për “Dhënie ryshfeti”.

Sipas dosjes së prokurorisë, mjeku V.R. akuzohet për gjashtë raste, ndërsa mjeku E.S. për tri raste ku në cilësinë e personave zyrtarë kanë kërkuar dhe pranuar drejtpërdrejt shuma të ndryshme parash për ofrimin e shërbimeve dhe trajtimit mjekësor ndaj pacientëve.

Nga ana tjetër, nëntë të pandehurit e tjerë akuzohen se u kanë ofruar ose dhënë mjekëve të akuzuar shuma parash që variojnë nga 50 deri në 300 euro, si shpërblim për kryerjen e ndërhyrjeve operative ndaj familjarëve të tyre. Prokuroria i ka kërkuar gjykatës që të akuzuarit t’i shpallë fajtorë dhe t’i dënojë sipas ligjeve në fuqi. /E.A/

Lajmet

Përplasje në KPK, raporton Blerim Isufaj

Published

16 hours ago

September 2, 2026

UBTNews

Raportimi i kryeprokurorit të Prokurorisë Speciale, Blerim Isufaj, para Këshillit Prokurorial të Kosovës (KPK) për punën e vitit 2025, është shoqëruar me tensione e debate me kryesuesin e këtij institucioni, Arian Gashi.

Përplasja nisi gjatë kohës kur anëtarët e Këshillit po i parashtronin pyetje Isufajt. Kryesuesi Arian Gashi ndërhyri duke i kërkuar kryeprokurorit të Prokurorisë Speciale që vetëm t’u përgjigjet pyetjeve dhe të mos tentojë t’u bëjë pyetje apo të kërkojë llogari nga anëtarët e KPK-së.

Nga ana e tij, Isufaj — i cili ka mbajtur më parë postin e kryesuesit të KPK-së — u shpreh se po jepte argumentet e tij dhe se nuk po i bënte pyetje askujt. Megjithatë, Gashi u tregua i prerë duke deklaruar se rolet tashmë kanë ndryshuar dhe se është kryeprokurori ai që duhet të raportojë e të dëgjojë para Këshillit, e jo e kundërta. /E.A/