Në kuadër të vizitës zyrtare në Washington, D.C., dhe në shënim të 18-vjetorit të lidhjes së marrëdhënieve diplomatike ndërmjet Kosovës dhe Shteteve të Bashkuara të Amerikës, Presidentja e Republikës së Kosovës, Vjosa Osmani, u prit në Departamentin e Shtetit në takim me Sekretarin amerikan të Shtetit, Marco Rubio.

Në një takim të shkëlqyeshëm dhe të përzemërt, Presidentja Osmani shprehu mirënjohjen e thellë për ftesën që Presidenti i Shteteve të Bashkuara të Amerikës, Donald Trump, ia bëri Kosovës për të qenë shtet bashkëthemelues i Bordit të Paqes dhe pjesë e takimit inaugurues. Ajo po ashtu shprehu falënderimet për garancat e fuqishme që Presidenti Trump i dha dje për paqen në rajonin tonë dhe, me këtë rast, e falënderoi edhe Sekretarin Rubio për lidershipin dhe bashkëpunimin e tij në këtë proces.

Në këtë takim u diskutuan çështje të partneritetit strategjik, nga fusha e sigurisë rajonale dhe diplomacisë, deri te ekonomia dhe mbrojtja. Ajo, në veçanti, theksoi disa procese me rëndësi jetike për stabilitetin në rajon: fuqizimin e partneritetit strategjik Kosovë–SHBA, anëtarësimin e Kosovës në NATO, rëndësinë strategjike të pranisë ushtarake amerikane në Kosovë, si dhe hapjen e kapitujve të rinj të bashkëpunimit në ekonomi dhe mbrojtje.

Presidentja e falënderoi Sekretarin Rubio për mbështetjen e fuqishme amerikane për sovranitetin dhe integritetin territorial të Republikës së Kosovës. Në këtë frymë, Presidentja theksoi rolin historik të Shteteve të Bashkuara të Amerikës në çlirimin,

shtetndërtimin dhe konsolidimin e paqes në Kosovë, si dhe rëndësinë e veçantë të pranisë ushtarake amerikane dhe të aleatëve në kuadër të misionit të NATO-s, si faktor kyç për stabilitetin dhe sigurinë në rajon.

Në këtë frymë, ajo nënvizoi se rruga natyrore e këtij partneriteti strategjik është anëtarësimi i Kosovës në NATO, proces ky i domosdoshëm për të siguruar paqe afatgjatë në rajonin tonë.

Presidentja gjithashtu theksoi rëndësinë e avancimit të dialogut strategjik bilateral Kosovë–SHBA si mekanizëm për koordinimin e prioriteteve të përbashkëta dhe hapjen e kapitujve të rinj të bashkëpunimit në fusha të ndryshme.

Për më tepër, ajo theksoi se partneriteti ndërmjet Kosovës dhe Shteteve të Bashkuara të Amerikës përbën interes jetik kombëtar dhe është ekzistencial për Republikën e Kosovës, duke vënë në pah prioritetet strategjike për thellimin e bashkëpunimit bilateral në fushën e mbrojtjes dhe zhvillimit ekonomik.

Kjo çështje ka përfshirë zyrtarë të lartë dhe anëtarë të elitës së biznesit në Ukrainë – duke përfshirë një ish-bashkëpunëtor të ngushtë të Presidentit Volodymyr Zelenskiy nga karriera e tij e mëparshme në media – dhe ka shkaktuar shqetësim të madh te aleatët perëndimorë të Kievit. Galushchenko u ekspozua për pastrim parash dhe pjesëmarrje në një organizatë kriminale nga agjencia e hetimit të korrupsionit NABU dhe zyra e prokurorisë SAPO, sipas një deklarate zyrtare.

Thuhet se më shumë se 7 milionë dollarë janë transferuar në llogari të huaja, duke emëruar gruan dhe katër fëmijët e Galushchenko-s si përfitues. Një pjesë e parave u shpenzuan për shkollimin e fëmijëve në shkolla elite në Zvicër dhe një pjesë u vendosën në një depozitë, nga e cila familja e zyrtarit të lartë merrte të ardhura shtesë për nevojat e veta.

Galushchenko i ka mohuar akuzat, ndërsa nuk ka pasur asnjë përgjigje ndaj mesazheve për koment dhe Reuters nuk ka arritur të kontaktojë me ndonjë avokat që e përfaqëson atë. NABU deklaroi të dielën se ai u ndalua gjatë kalimit të kufirit shtetëror, pa specifikuar vendin e saktë të arrestimit.

Prokurorët thonë se pjesëmarrësit në skemën “Midas” u bënin presion kontraktorëve të kompanisë bërthamore Energoatom për ryshfete në këmbim të përfundimit të projekteve, përfshirë strukturat për mbrojtjen e objekteve energjetike nga sulmet ajrore ruse.

Më parë ishte deklaruar se komploti u organizua nga ish-bashkëpunëtori i Zelenskiy-t, Timur Mindich, i cili u largua drejt Izraelit përpara se të arrestohej në nëntor. Mindich, i cili themeloi studion televizive pas serialit të famshëm që i dha famë Zelenskiy-t si aktor, i ka mohuar shkeljet.

Një ish-zv.kryeministër u arrestua gjithashtu në nëntor dhe NABU njoftoi se zyrtarë të tjerë të lartë janë nën hetim. Çështja shkaktoi një skandal politik vitin e kaluar që çoi në shkarkimin e shefit të stafit të Zelenskiy-t, Andriy Yermak, dhe nxiti zemërim të ri publik ndaj korrupsionit të rrënjosur, ndërkohë që Ukraina po lufton prej katër vitesh me Rusinë.

Zelenskiy ishte përpjekur të kufizonte pavarësinë e agjencive antikorrupsion vitin e kaluar, përpara se të tërhiqej pas protestave publike dhe presionit nga aleatët perëndimorë.

CEO i Energoatom, Pavlo Kovtonenko, deklaroi javën e kaluar se kompania ka ndërmarrë hapa për të parandaluar përsëritjen e skemave të korrupsionit në të ardhmen. Lufta kundër korrupsionit mbetet një prioritet kyç në përpjekjet e Ukrainës për reforma drejt anëtarësimit në Bashkimin Evropian, gjë që kërkon eliminimin e dukurisë shumëvjeçare. /Reuters/

Gjatë 24 orëve të fundit janë raportuar shtatë raste të dhunës në familje në Policinë e Kosovës, ku në shumicën e rasteve të dyshuarit janë arrestuar dhe dërguar në mbajtje me vendim të prokurorit.

Në Prishtinë, në orën 07:00, është arrestuar një grua pasi, pas një mosmarrëveshjeje verbale me familjarët, dyshohet se ka ushtruar dhunë. Me vendim të prokurorit ajo është dërguar në mbajtje.

Po ashtu në Drenas, në orën 03:00, një grua ka raportuar se është sulmuar fizikisht nga bashkëshorti i saj. I dyshuari është arrestuar dhe, pas intervistimit, është dërguar në mbajtje.

Në Prishtinë ëshët shënuar edhe një rast tjetër i dhunës ne familje viktima, një grua kosovare, ka raportuar se më 13.02.2026 rreth orës 17:00 është sulmuar fizikisht nga një burrë kosovar.
Pas intervistimit të palëve, me vendim të prokurorit, rasti ka shkuar në procedurë të rregullt dhe hetimet janë duke vazhduar.

Në Fushë Kosovë, në orën 20:00, është arrestuar një grua pasi dyshohet se ka sulmuar fizikisht bashkëshortin. Viktimës i është ofruar trajtim mjekësor, ndërsa e dyshuara është dërguar në mbajtje.

Rast tjetër është raportuar në Peja në orën 00:45, ku një grua ka njoftuar se është sulmuar fizikisht nga bashkëshorti. Viktima ka refuzuar tretmanin mjekësor, ndërsa i dyshuari është dërguar në mbajtje pas intervistimit.

Në Gjakovë ,në orën 10:00, është arrestuar një i mitur pasi dyshohet se, pas një mosmarrëveshjeje, ka sulmuar fizikisht vëllain e tij. Me vendim të prokurorit ai është dërguar në mbajtje.

Një burrë është arrestuar në Gjakovë në orën 10:00 pasi dyshohet se ka sulmuar fizikisht një grua. Viktima ka marrë tretman mjekësor, ndërsa me vendim të prokurorit, i dyshuari është dërguar në mbajtje.

Gjatë Konferencës së Sigurisë në Mynih, ministri i Jashtëm i Irakut, Fuad Hussein, bëri të ditur se Bagdadi ka nisur bisedimet me disa shtete arabe dhe myslimane për të kthyer mbrapsht shtetasit e tyre që ishin pjesë e Shtetit Islamik.

Ky proces vjen në një kohë kur ushtria amerikane njoftoi se ka përfunduar me sukses transferimin e rreth 5,700 të burgosurve të IS-it nga Siria drejt burgjeve irakiane. Sipas ministrit Hussein, deri tani rreth 3,000 prej tyre janë vendosur tashmë në burgjet e Irakut, por ai theksoi se ky fluks i madh përbën një rrezik serioz për sigurinë kombëtare. Për këtë arsye, Iraku po kërkon ndihmë financiare nga komuniteti ndërkombëtar për të menaxhuar mbajtjen e tyre në afatgjatë.

Shqetësimi i Bagdadit shtohet edhe nga rritja e fundit e aktiviteteve të ISIS-it përgjatë kufirit me Sirinë, sidomos pas dobësimit të forcave kurde që kontrollonin atë zonë. Ndërsa vendet arabe kanë treguar gatishmëri për bisedime, shtetet evropiane mbeten ende hezituese për të marrë mbrapsht shtetasit e tyre, nga frika se sistemet e tyre ligjore mund t’i lirojnë ata para kohe.

Në rrafshin diplomatik, Hussein u shpreh se po i merr shumë seriozisht sinjalet nga Uashingtoni, veçanërisht pas paralajmërimeve të Presidentit Donald Trump lidhur me ndikimin iranian në qeverinë e ardhshme irakiane, ndërkohë që mbetet në fuqi plani që trupat amerikane të largohen përfundimisht nga Iraku deri në fund të vitit 2026. /Reuters/