Lajmet

Rama: Shkodra, kryefjala e mandatit që do të nisë

Ai foli për fitoren në Shkodër dhe humbjen në Himarë, derisa nuk la pa kritikuar Komisionin Qendror të Zgjedhjeve.

Published

2 years ago

May 16, 2023

Betim Gashi

Kryeministri i Shqipërisë, Edi Rama, shpalli fitoren e partisë së tij për zgjedhjet e mbajtura të dielën, ku Partia Socialiste mori shumicën dërrmuese të bashkive. Ai foli për fitoren në Shkodër dhe humbjen në Himarë, derisa nuk la pa kritikuar Komisionin Qendror të Zgjedhjeve.

Bashkë me udhëheqësin e fushatës së tij elektorale, Endri Fuga, 24-orë pasi PS korri një tjetër rekord elektoral në zgjedhjet lokale të 14 majit, Rama tha se do të angazhohen si asnjëherë më parë për të qëndruar përballë sfidës së marrë nga besimi i madh i qytetarëve.

“Kjo është një fitore shumë e madhe për t’u festuar dhe unë vet ndihem shumë i vogël përballë hartës së mbushur me ngjyrat e fitores së kandidatëve tanë nga Tropoja në Konispol. Kam dhe besoj kemi të gjithë nevojë të ruhemi nga era e fortë dehëse e një fitoreje si kjo… Tanimë që shqiptarët i zgjodhën ata që dëshironin, ne do të vazhdojmë pa humbur kohë punët që u ngadalësuan nga fushata, jo vetëm në nivelin vendor, por edhe në nivelin e qeverisjes qendrore”, tha Rama.

Sa i përket mbarëvajtjes së procesit zgjedhor, kryeministri shqiptar fajësoi KQZ-në për vonesa.

“Zgjedhjet nuk kanë pasur asgjë të veçantë në asnjë aspekt, përveç dështimit spektakolar të KQZ-së, për të garantuar fillimin në kohë të votimit në mbi 500 qendra për mijëra e mijëra qytetarë që në orët e mëngjesit ishin vënë në radhë për të ushtruar të drejtën e tyre kushtetuese… Vërtetë është i pafalshëm dhe i pajustifikueshëm. Ne nuk do ta lëmë me kaq, aq më tepër kur pamë skena të tmerrshme të atyre pajisjeve që hidheshin si arka bosh. Sepse asnjë arkë nuk mund të hidhet ashtu”, tha ai.

Ai paralajmëroi një tur falënderimesh në të gjithë Shqipërinë të cilin tha se do ta nisë nga Shkodra.

“Kam shumë takime për të bërë. Duke filluar nga Shkodra. Nesër duhet të nisem për Samitin e Liderëve të Këshillit të Evropës në Islandë dhe sapo të kthehem nga Samiti, do të nis me turin e falenderimeve nga Shkodra ku jam shumë i vendosur që të bëj një histori të re dhe jam i bindur që ne mund të bëjmë një histori të re në Shkodër… Ne tani duhet të bëjmë jo atë që kemi thënë, po do bëjmë edhe më shumë seç kemi thënë sepse Shkodra na dha jo një shans, po një besim shumë të fortë dhe unë jam i bindur që ky është një besim shumë i fortë që mund të kthehet në një kohë, jo shumë të gjatë në një mosbesim shumë të madh nëse ne nuk jemi në lartësinë e kësaj sfide… Kështu që, Shkodra është kryefjala e mandatit që sapo do të nisë pas disa muajsh. Padiskutim, kjo nuk i heq asgjë angazhimit tim për Durrësin. Durrësi është një potencial strategjik i jashtëzakonshëm për Shqipërinë e 2030-tës”, tha ai.

Sa i përket arrestimit të kandidatit fitues të Himarës, Fredi Beleri, dhe reagimeve nga Greqia, Rama tha se nuk do të lejojë askënd që të përzihet në punën e drejtësisë. Derisa shtoi se mbetet të shihet se çfarë do të dalë nga procesi.

“Kështu që, kam dëgjuar shumë dhe praktikisht, kam preferuar të mos flas dhe nuk do flas deri në mbarimin e zgjedhjeve në Greqi, lidhur me këtë, duke shpresuar që pas zgjedhjeve në Greqi do ketë dialog dhe jo deklarata, të cilat i kam dëgjuar të bëhen, jo vetëm nga përfaqësues të qeverisë greke, por dhe nga parti politike të opozitës, parti simotra, si Siriza apo PASOK-u. Keqardhje e madhe sepse unë besoj që minoriteti grek nuk është mish për topat elektoral të askujt, as në Shqipëri, as në Greqi. Megjithatë, këtu ndalem në këtë pjesë… E drejta për t’u zgjedhur e për të zgjedhur në Shqipëri është e garantuar për të gjithë, por nuk ka dy drejtësi. Akuza e ngritur, nuk është ngritur nga qeveria…. Nëse unë vetë si kryeministër i vendit, nuk e bëj kurrë që të ngre pikëpyetje pa u shprehur drejtësia apo që t’i bëj presion drejtësisë, këtë nuk e lejoj dhe s’kam për ta lejuar ta bëjë askush tjetër. Kjo duhet të jetë shumë e qartë… Subjekti është subjekt i prokurorisë speciale dhe do të trajtohet nga gjykata speciale. Kjo është e gjitha”, është shprehur Rama.

Në fund të konferencës për media, e cila zgjati rreth një orë, Rama bëri të ditur se nuk do të flas më për zgjedhje, pasi që siç tha ai, nuk dëshiron të qëndrojë në ballin e luftës politike.

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

16 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/